ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་མངའ་སྡེ་དེར་ཡོད་པའི་བཙན་བྱོལ་བོད་མི་རྣམས་ཀྱིས་ས་གནས་ཡུལ་མིའི་ལྷན་དུ་མཐུན་ལམ་ལེགས་པོ་གཉེར་བ་མ་ཟད། བོད་མིའི་སྲོལ་རྒྱུན་རིག་གཞུང་གིས་ས་གནས་ཡུལ་མི་དག་ལ་ཕན་ཐོགས་ཀྱིན་ཡོད་པའི་གསུང་བཤད་གནང་འདུག
ཁ་སང་ཕྱི་ཚེས་ ༡༩ ནས་ ༢༡ བར་ཉིན་གྲངས་གསུམ་རིང་། རྒྱ་གར་བྱང་ཤར་བོད་མིའི་གཞིས་ཆགས་བསྟན་འཛིན་སྒང་གི་སམ་བྷོ་ཊ་སློབ་གྲྭ་དབུ་བརྙེས་ནས་ལོ་ངོ་ ༥༠ འཁོར་བའི་མཛད་སྒོ་བསྡུ་ཡི་ཡོད་ཅིང་། མཛད་སྒོའི་སྟེང་སྐུ་མགྲོན་གཙོ་བོ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་དམིགས་བསལ་སྐུ་མགྲོན་དུ་ཤར་པ་ཆོས་རྗེས་༧རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དང་། མངའ་སྡེའི་ཆོས་རིག་བློན་ཆེན་འཇམ་དཔལ་དབང་ཕྱུག་མཆོག སློབ་གྲྭའི་དགེ་ཆོས་རྡོ་རྗེ་དགྲ་འདུལ་ལགས་བཅས་ཀྱིས་གསུང་བཤད་གནང་ཡོད་པ་རེད།
དེ་འབྲེལ་རྒྱ་གར་ཨན་ཌེ་བརྙན་འཕྲིན་གསར་ཁང་གིས་དེ་རིང་སྤེལ་བའི་གནས་ཚུལ་ལྟར་ན། སྐབས་དེར་སྐུ་མགྲོན་གཙོ་བོ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། བསྟན་འཛིན་སྒང་བོད་ཀྱི་སམ་བྷོ་ཊ་སློབ་གྲྭའི་འགྲུལ་བཞུད་ཧ་ཅང་དོན་སྙིང་ལྡན་པ་ཞིག་ཡིན། སློབ་གྲྭ་འདིའི་ལས་དོན་རླབས་ཆེ་ཞིང་དམིགས་བསལ་གྱིས་ཨ་རུ་ན་ཅལ་གྱི་ས་གནས་ཡུལ་མི་དང་བོད་ཀྱི་བུད་མེད་ཚོའི་སློབ་གསོའི་ཐོག་རྒྱ་ཆེ་བའི་ལས་དོན་བསྒྲུབས་ཡོད། ཅེས་བརྗོད་ཡོད་པ་མ་ཟད། ཨ་རུ་ན་ཅལ་གྱི་བཙན་བྱོལ་བོད་མི་དག་གིས། ས་གནས་ཡུལ་མི་དང་འགྲོག་འདྲིས་ཀྱིས་འབྲེལ་ལམ་ཡག་པོ་གཉེར་བར་ཡི་རངས་སྔགས་བརྗོད་བྱས་ཡོད་པ་རེད།
དམིགས་བསལ་དུ་པདྨ་མཁའ་འགྲོ་མཆོག་གིས། ཕྱོགས་སྐྱོད་གང་གི་སྐབས་སུ་ཡིན་ཡང་། ང་བོད་པའི་གཞིས་ཆགས་ཁག་ཏུ་ཆེད་དུ་བསྐྱོད་ཀྱི་ཡོད། ང་ཨ་རུ་ན་ཅལ་མངའ་སྡེའི་ཤར་ཕྱོགས་སུ་ཡོད་པའི་བོད་མིའི་གཞིས་ཆགས་ཁག་གཉིས་ཀྱི་ནང་དུ་སོང་མྱོང་ལ། དོན་དངོས་ཐོག་བོད་རྣམས་ནས་ས་གནས་ཡུལ་མི་རྣམས་ལ་ཕན་ཐོགས་ཀྱི་ཡོད་པ་ཤེས་རྟོགས་བྱུང་། ཅེས་དང་། བོད་མིའི་སྲོལ་རྒྱུན་ཐགས་ལས་དང་ཐགས་ཁྲི། ཧ་ཅང་ཕྱུག་པའི་སྐད་དང་རིག་གཞུང་སོགས་ལས་ས་གནས་ཡུལ་མི་རྣམས་ལ་ཕན་ཐོགས་ངེས་ཅན་ཐོབ་ཡོད་སྐོར་སོགས་བརྗོད་འདུག
ད་རེས་སྤྱི་ཁྱབ་བློན་ཆེན་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་གཞིར་བཟུང་སྟེ། ང་ཚོས་རང་རང་གི་བྱིས་པ་རྣམས་ལ་འགྲོ་བ་མིའི་རིན་ཐང་དང་བྱམས་བརྩེ་རྒྱུན་ལ་འཇགས་པ། ད་དུང་ཁོར་ཡུག་དང་གནམ་གཤིས་འགྱུར་ལྡོག དེ་བཞིན་སའི་གོ་ལ་སྲུང་སྐྱོབ་སོགས་བྱིས་པར་སློབ་ཁྲིད་བྱ་རྒྱུ་གལ་ཆེན་ཡིན་སྐོར་བཅས་བརྗོད་ཡོད་པ་རེད།
ཕྱི་ལོ་ ༡༩༧༢ ལོར་གསར་འཛུགས་བྱས་པའི་བསྟན་འཛིན་སྒང་སམ་བྷོ་ཊ་སློབ་གྲྭར་ཁ་སང་ནས་སང་ཉིན་བར་འཚོག་བཞིན་པའི་ལོ་ངོ་ལྔ་བཅུའི་ཕྱིར་དྲན་མཛད་སྒོའི་སྟེང་སྐུ་མགྲོན་གཙོ་བོ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་དམིགས་བསལ་སྐུ་མགྲོན་དུ་ཤར་པ་ཆོས་རྗེས་༧རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དང་། མངའ་སྡེའི་ཆོས་རིག་བློན་ཆེན་འཇམ་དཔལ་དབང་ཕྱུག་མཆོག་བཅས་ཀྱི་དབུས་པའི་ས་གནས་མགོ་འཛིན་རིན་ཆེན་ལགས་དང་ས་གནས་འཐུས་ཚོགས་དང་རང་སྡེ་ཚོགས་ཆུང་གི་འཐུས་མི། གཞུང་འབྲེལ་མིན་པའི་ཚོགས་སྡེ་ཁག་གི་འཐུས་ཚབ། དེ་བཞིན་སློབ་གྲྭའི་དགེ་ཆོས་རྡོ་རྗེ་དགྲ་འདུལ་ལགས་གཙོས་པའི་སློབ་ཟུར་དང་སློབ་གྲྭའི་དགེ་ལས་ཡོངས་བཅས་ཁྱོན་མི་གྲངས་ ༣༠༠ ལྷག་འཛོམས་ཡོད་འདུག
གསར་འགོད་པ། སྐལ་བཟང་སྦྱིན་པ།
