བོད་མཚོ་སྔོན་ཞིང་ཆེན་སྐྱེ་རྒུ་ཁྲི་འདུ་རྫོང་ཡོང་ཤ་སྡེ་བ་ནས་ཡིན་པའི་བོད་མི་ཞིག་གིས་སྤྱི་ཚོགས་དྲ་ལམ་དུ་༧གོང་ས་རྒྱལ་བ་རིན་པོ་ཆེ་མཆོག་ནས་གནང་བའི་ཏོག་དབྱིབས་དང་འབྲེལ་བའི་བཀའ་སློབ་བརྒྱུད་བསྐུར་བྱས་པའི་ཉེས་མིང་འོག་འཛིན་བཟུང་བྱས་ཏེ་གང་དུ་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལྷག་འདུག
ཁ་སང་འདི་ག་བོད་ཀྱི་དུས་བབ་གསར་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཉེ་སྔོན་ཕྱི་ཟླ་ ༡༠ ཚེས་ ༢༩ ཙམ་ལ་བོད་སྐྱེ་རྒུ་མདོ་ཁུལ་ཁྲི་འདུ་རྫོང་ཡོང་ས་སྡེ་བ་ནས་ཡིན་པའི་སྐར་རྣམ་(གནས་ཚུལ་མཁོ་སྤྲོད་པས་བརྗོད་པ་ལྟར་བཞག་ཡོད)ཞེས་པའི་བོད་མི་ཞིག་རང་ཁྱིམ་དུ་བསྡད་ཡོད་སྐབས། གློ་བུར་དུ་ཉེན་རྟོག་པ་བཞི་ཡོང་ནས་འཛིན་བཟུང་བྱས་ཏེ་མུ་མཐུད་བཀག་ཉར་འོག་བཞག་ཡོད་པ་དང་། ཁོང་གི་ཨ་མ་གནས་སྐྱིད་ལགས་ནས་སེམས་འཁུར་ཆེན་པོ་བྱས་ཏེ་ཉིན་ལྟར་ས་གནས་ཉེན་རྟོག་ཁང་དུ་ཕྱིན་ནས་ངའི་བུ་ག་བར་ཡོད། ཁོས་ནག་ཉེས་གང་ཡང་བཟོས་ཡོད་པ་མ་རེད་ཅེས་ཞུ་གཏུག་བྱེད་བཞིན་ཡོད་ཀྱང་། ཁོང་གང་དུ་ཡོད་མེད་གཏན་ནས་བཤད་ཀྱི་མེད་འདུག
གནས་ཚུལ་མཁོ་སྤྲོད་པས། སྐར་རྣམ་ལགས་ཀྱིས་ཉེ་སྔོན་༧གོང་ས་རྒྱལ་བ་རིན་པོ་ཆེ་མཆོག་ནས་གཞིས་ལུས་བོད་མི་ཚོར་གནང་བའི་ཏོག་དབྱིབས་དང་འབྲེལ་བའི་བཀའ་སློབ་ཡིག་ཐོག་ཏུ་ཕབ་པ་ཞིག་དང་། དེ་བཞིན་ཏོག་དབྱིབས་དང་འབྲེལ་བའི་པར་རིས་དང་བརྙན། ཡི་གེ་སོགས་སྤྱི་ཚོགས་དྲ་ལམ་དུ་བརྒྱུད་བསྐུར་བྱས་ཡོད་པའི་ཉེས་མིང་གཡོགས་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས་ད་ལྟའི་ཆར་ཁྲི་འདུ་རྫོང་ཁོངས་སུ་ཏོག་དབྱིབས་བཀག་སྡོམ་ལྷོད་དུ་བཏང་སྟེ་སང་ཉིན་གནངས་ཉིན་ནས་སློབ་གྲྭ་ཁག་འཛོམས་ཀྱི་ཡོད་པ་དང་། མང་ཚོགས་ཁྲོད་དུའང་མི་མང་པོ་འདུ་འཛོམས་བྱེད་མི་ཆོག་ཀྱང་ཡར་མར་འགྲོ་སྐྱོད་བྱེད་དུ་འཇུག་གི་ཡོད་སྐོར་བརྗོད་བྱུང་།
སྐར་རྣམ་ལགས་ཆུང་དུས་ནས་པ་ལགས་འདས་གྲོངས་སུ་ཕྱིན་ཡོད་སྟབས། ཨ་མ་ལགས་ལ་རོགས་པ་བྱས་ནས་འབྲོག་ལས་གཉེར་ནས་བསྡད་ཡོད་འདུག་ལ། ཁྲི་འདུ་ཡོང་ཤ་སྡེ་བ་ནི་འབྲོག་ལས་གཉེར་བའི་སྡེ་བ་ཞིག་ཀྱང་ཡིན་འདུག
