༧གོང་ས་རྒྱལ་བ་རིན་པོ་ཆེ་མཆོག་གིས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཡ་མ་བྲལ་བ་བྱས་ནས་བསམ་བློ་བཏང་ན་མི་ཚེ་ཏན་ཏན་དོན་དང་ལྡན་པ་ཡོང་ཐུབ་རྒྱུ་ཡིན་སྐོར་སོགས་གསུངས་སོང་།
ལྷོ་ཀོ་རི་ཡའི་དད་ལྡན་མང་ཚོགས་རྣམས་ཀྱིས་ཇི་ལྟར་གསོལ་བ་བཏབ་པ་ལྟར། དེ་རིང་ཕྱི་ཚེས་ ༢༥ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གྲངས་ ༢ རིང་དབུ་མ་རྩ་བ་ཤེས་རབ་ཀྱི་བཀའ་ཆོས་དབུ་འཛུགས་མཛད་སོང་བ་དང་། དེ་རིང་བཀའ་ཆོས་ཀྱི་ཉིན་དང་པོར་༧གོང་ས་རྒྱལ་བ་རིན་པོ་ཆེ་མཆོག་གིས་ང་ཚོ་ཚང་མ་བདེ་བ་འདོད་ཅིང་སྡུག་བསྔལ་མི་འདོད་མཁན་ཤ་སྟག་ཡིན་སྟབས། སེམས་པ་བཟང་པོ་བྱས་ནས་འཛམ་གླིང་ཞི་བདེ་ཡོང་ཐབས་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཀོ་རི་ཡའི་ཆོས་གྲོགས་ཚོ་ལ་ཆོས་འགྲེལ་བྱ་རྒྱུ་དེ་རེད། ཀོ་རི་ཡ་ནི་ཕ་མེས་ནས་ནང་ཆོས་བྱས་ནས་དོ་སྣང་ཆེན་པོ་ཡོད་པ་ཞིག་རེད་འདུག བར་སྐབས་ནས་ངོས་རང་ south korea (ལྷོ་ཀོ་རི་ཡ) ལ་འབྲེལ་བ་ཆགས་བསྡད་ཡོད། ངོས་རང་ལྷོ་ཀོ་རི་ཡར་འཁྱུག་ཙམ་བསླེབས་པ་རེད། ཀོ་རི་ཡའི་མི་མང་ཚོ་དངོས་གནས་དྲང་གནས་སངས་རྒྱས་པའི་ཆོས་ལ་དད་པ་རྩེ་གཅིག་ཡོད་པ་ཞེ་དྲགས་རེད་འདུག དེ་རིང་ངོས་རང་ལ་ཀོ་རི་ཡའི་ཆོས་གྲོགས་ཚོར་ཆོས་འགྲེལ་བྱ་རྒྱུའི་གོ་སྐབས་དེ་འདྲ་ཞིག་བྱུང་བ་རེད། ངོས་རང་དགའ་པོ་ཞེ་དྲགས་བྱུང་ལ། ཁྱེད་རང་ཚོས་སངས་རྒྱས་པའི་ཆོས་ལ་དམིགས་བསལ་གྱིས་དོ་སྣང་བྱས་པ་དེ་ཡག་པོ་ཞེ་དྲགས་རེད། རྩ་བའི་ཆོས་དད་རང་མོས་རེད། སྤྱི་ཡོངས་ནས་ཆོས་བྱས་དང་མ་བྱས་དེ་སོ་སོ་སྒེར་གྱི་རང་དབང་རེད། ཆོས་ལུགས་འདྲ་མི་འདྲ་ཡོད་པའི་ཁྲོད་ནས། རང་གི་མོས་པ་གང་ལ་ཡོད་ན། དེའི་ཐོག་ནས་སོ་སོའི་ཆོས་དེ་བྱ་རྒྱུ་རེད། འཇིག་རྟེན་བཀོད་པ་འདོད་མཁན་གྱི་ཆོས་པ་ཚོས། འཇིག་རྟེན་བཀོད་པ་པོ་འདོད་པའི་ལྟ་གྲུབ་དེའི་ཐོག་ནས་བློ་རྩེ་གཅིག་ཏུ་དད་པ་བྱས་ཡོང་དུས་ཡག་པོ་ཡོད་རེད། ཆོས་ལུགས་ཚང་མར་ལྟ་གྲུབ་འདྲ་མི་འདྲ་ཡོད་པ་རེད་དེ། ཆོས་ལུགས་ཚང་མས་སེམས་པ་བཟང་པོ་བྱ་རྒྱུ། མི་ལ་ཕན་སེམས་བྱ་རྒྱུ། མི་ལ་གནག་སེམས་གནོད་སེམས་ཀྱི་བསམ་ངན་མི་བཅང་རྒྱུ་གསུང་གི་འདུག ཞེ་དྲགས་ཡག་པོ་རེད་འདུག ངོས་རང་ནང་པའི་དགེ་སློང་ཞིག་ཡིན་པ་དང་ཆོས་ལུགས་ཚང་མ་བརྩི་བཀུར་བྱེད་ཀྱི་ཡོད་པས། ངོས་རང་གིས་ཆོས་ལུགས་འདྲ་མི་འདྲ་དང་ཆོས་པ་འདྲ་མི་འདྲ་ངོ་ཤེས་ཀྱི་ཡོད་ལ། དངོས་གནས་དྲང་གནས་སེམས་པ་བཟང་པོ་དང་སོ་སོ་སྒེར་གྱི་ངོས་ནས་ཆོག་ཤེས་བྱས། སྤྱི་ལ་ཕན་ཐོགས་བྱ་རྒྱུའི་བསམ་བློ་ཡོད་པ་སོགས་ཞེ་དྲགས་ཡག་པོ་རེད་འདུག ངོས་ནས་ཚང་མར་གུས་ཞབས་བྱེད་ཀྱི་ཡོད། དེང་སང་ཆབ་སྲིད་ཀྱི་ཐོག་ནས་འཐེན་འཁྱེར་ཡོད་པ་མ་ཟད། ཆོས་ལུགས་ཀྱི་ཐོག་ནས་འཐེན་འཁྱེར་བྱེད་བཞིན་པ་དེ་འདྲ་ཡོང་གི་ཡོད། དཔེར་ན། ཨབ་གྷ་ནི་སི་ཐན་གྱི་ནང་དུ་ཆོས་ལུགས་ཀྱི་འཐེན་འཁྱེར་བྱས་བསྡད་པ་དེའི་རིགས་བློ་ཕམ་པོ་ཞེ་དྲགས་རེད་འདུག་པས། ང་ཚོ་ཆོས་ལུགས་ཚང་མ་མཐུན་པོ་བྱ་རྒྱུ་དེ་དཔེ་གལ་ཆེན་པོ་རེད། ངོས་རང་ནང་པ་རེད་དེ་ཡི་ཤུ་དང་། ཁ་ཆེ། ཧིན་དྷུའི་མཆོད་ཁང་སོགས་ཀྱི་ནང་དུ་འགྲོ་ཡི་ཡོད་པ་མ་ཟད་ངོས་ནས་ཆོས་ལུགས་འདྲ་མིན་ཚང་མར་གུས་ཞབས་བྱེད་ཀྱི་ཡོད། ཅེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། ཉེ་ཆར་ལྷོ་ཀོ་རི་ཡར་མི་འགའ་ཤས་འདས་གྲོངས་སུ་ཕྱིན་པ་དང་། ཤི་རྨས་བྱུང་བ་ཞིག་བཤད་ཀྱི་འདུག དེ་ཐབས་སྐྱོ་བོ་རེད། ང་རང་ཚོ་ཚང་མས་འདས་གྲོངས་སུ་གྱུར་བའི་ནང་མི་ཚོར་སེམས་གསོ་བྱ་རྒྱུ། ང་རང་ཚོའི་ནང་པའི་ཡུལ་གྲུ་ཞིག་གིས་དོན་དག་ཆུང་ཙག་ཅིག་གི་སྒང་ནས་ཕན་ཚུན་འཁྲུག་པ་བརྒྱབ་པ་དེར་བློ་ཕམ་པོ་ཞེ་དྲགས་བྱུང་ལ། ང་རང་ཚོ་ནང་པ་སྤྱིའི་ངོས་ནས་བཤད་པ་ཡིན་ན་བློ་ཕམ་གྱི་རང་བཞིན་ཞིག་རེད། གང་ལྟར། འདས་གསོན་ཚང་མར་ང་ཚོས་སྨོན་ལམ་བརྒྱག་རྒྱུ་དེ་གལ་ཆེན་པོ་རེད། ཅེས་དང་། ངོས་རང་གི་ངོས་ནས་ཆ་བཞག་ན་ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ་དེ་ཉམས་ལེན་གྱི་གཙོ་བོ་བྱེད་ཀྱི་ཡོད། དེས་སེམས་ལ་ཕན་ཐོགས་ཞེ་དྲགས་འདུག སྟོང་ཉིད་ཀྱི་ལྟ་བ་དེས་ཆགས་སྡང་གི་བློ་དེ་ཉུང་དུ་ཕྱིན། བྱང་ཆུབ་ཀྱི་སེམས་དེས་རང་གཅེས་པར་འཛིན་པའི་གཅེས་འཛིན་གྱི་བློ་དེ་ཆུང་དུ་བཏང་། གཞན་ཕན་གྱི་བློ་ཞིག་ཡོད་པའི་ཚོད་ཀྱིས་སོ་སོའི་སེམས་ཀྱི་གཏིང་ནས་སྙིང་སྟོབས་ཤིག་བསླེབས་བསྡད་པ། ཀུན་ལ་ཕན་བདེ་བསྒྲུབ་བསམ་པའི་སེམས་ཤུགས་ཀྱང་བསླེབས་པ། རང་གཅེས་པར་འཛིན་པའི་གཅེས་འཛིན་གྱི་དབང་གིས་སེམས་ལ་རྣམ་རྟོག་འདྲ་མི་འདྲ་སྐྱེད་པ་དེ་དག་ཉུང་དུ་ཕྱིན་ནས། སེམས་པ་བཟང་པོའི་སེམས་སྐྱེད་ནས་ལུས་བདེ་བ། སེམས་ལྷོད་པ། སོ་སོ་སྒེར་ལའང་ལུས་བདེ། སེམས་ཞི་བདེ་ཡོད་པ་གང་ཞིག་ལ་སེམས་ཀྱི་གཏིང་ནས་སྙིང་སྟོབས་ཡོད་པ་ཞིག་ཡོང་བསྡད་པ་རེད། གཞན་ཕན་གྱི་བྱང་ཆུབ་སེམས་དེ་བསམ་བློ་བཏང་བ་ཡིན་ན། རང་གཞན་གཉིས་ཀའི་དོན་འགྲུབ་ཡོང་བར་ཡག་པོ་ཞེ་དྲགས་འདུག་གཱ སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་འདི་ཡ་མ་བྲལ་བ་བྱས་ནས་བསམ་བློ་བཏང་ན། ང་ཚོའི་མི་ཚེ་ཏན་ཏན་དོན་དང་ལྡན་པ་ཡོང་ཐུབ་རྒྱུ་ཡོད་པ་རེད། ཅེས་གསུངས་སོང་།
ཡང་མགོན་པོ་གང་ཉིད་ཀྱིས། འཛམ་བུ་གླིང་འདིའི་སྒང་ན་མི་ཐེར་འབུམ་ཁ་ཤས་ཤིག་ཡོད་རེད། དེ་དག་ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་པ་རེད་དེ། སེམས་ཀྱི་བདེ་སྡུག་དེ་ཆོས་ཕྱོགས་ཀྱི་བསམ་བློ་ཡོད་མཁན་ཚོ་ག་རེ་བྱས་ནའང་བསམ་བློའི་གཏོང་སྟངས་དེ་རྒྱ་ཆེ་བ་དང་ཟབ་པ་ཞིག་འདུག ཆགས་སྡང་གིས་བློའི་ཞི་བདེ་དཀྲུག་གིན་ཡོད་པས་དེའི་གཉེན་པོ་བྱང་ཆུབ་ཀྱི་སེམས་བསམ་བློ་བཏང་ནས་ཆགས་སྡང་གི་བློ་ཉུང་དུ་གཏང་དགོས། འཛམ་གླིང་ཞི་བདེ་ཟེར་བ་དེ་མཐར་གཏུགས་ན་སེམས་རྒྱུད་འདུལ་དགོས་པའི་སྒང་བསླེབས་ཡོང་གི་འདུག བྱས་ཙང་ང་ཚོས་ནང་པ་ཡིན་མིན་དང་། ཆོས་དད་ཡོད་མེད་ལ་མ་ལྟོས་པར་ཚང་མས་སེམས་པ་བཟང་པོ་བྱོས། ཐོག་མར་སོ་སོའི་སེམས་ལ་ཞི་བདེ་ཡག་པོ་ཞིག་ཡོང་བར་བྱོས། དེ་ནས་སོ་སོའི་ངོ་ཤེས་པ་དང་། ཁྱིམ་མཚེས་སོགས་ལ་དངོས་གནས་དྲང་གནས་ཞི་བདེ་སྒྲུབས། དེ་འདྲ་བྱས་ན་འཛམ་བུ་གླིང་ཞི་བདེ་ཡོང་ཐུབ། ཅེས་གསུངས་སོང་།
གསར་འགོད་པ། དཔལ་ལྡན།
