དེ་རིང་རྒྱ་གར་ལྷོ་ཕྱོགས་སུ་གཞུང་འབྲེལ་མ་ཡིན་པའི་བོད་ཀྱི་ཚོགས་པ་གསུམ་གྱིས་རྒྱ་ནག་ནང་གི་ཤོག་དཀར་གསར་བརྗེའི་ལས་འགུལ་ལ་གདུང་སེམས་མཉམ་སྐྱེད་དང་རྒྱབ་སྐྱོར་གྱི་ལས་འགུལ་སྤེལ་འདུག
དེ་རིང་ཕྱི་ཚེས་ ༡༠ སྟེ་འགྲོ་བ་མིའི་ཐོབ་ཐང་གི་ཉིན་མོ་དང་སྟབས་བསྟུན། རྒྱ་གར་ལྷོ་ཕྱོགས་སྦེལ་ཀོབ་དང་། ཀོ་ལི་གྷལ། ཧོན་སུར་བཅས་ཀྱི་བོད་ཀྱི་བུད་མེད་ལྷན་ཚོགས་དང་། དབུ་མའི་ལམ་གཞོན་ནུ། མེ་སོར་བོད་རིགས་སློབ་ཕྲུག་མཐུན་ཚོགས་བཅས་ཐུན་མོང་གི་གོ་སྒྲིག་འོག ཀར་ན་ཊ་ཀའི་མེ་སོར་རྫོང་དཔོན་ལས་ཁུངས་ནས་མེ་སོར་རྒྱལ་ཁང་མདུན་ཐང་བར་དུ་མི་གྲངས་ ༢༠༠ ལྷག་གིས་རྒྱ་ནག་ནང་གི་ཤོག་དཀར་གསར་བརྗེའི་ལས་འགུལ་ལ་གདུང་སེམས་མཉམ་བསྐྱེད་ཀྱི་རྔམ་སྟོན་ཁྲོམ་སྐོར་ཞིག་བྱས་སོང་།
གོམ་བགྲོད་སྐབས་མི་ཚང་མས་ལག་ཏུ་ཤོག་དཀར་སྟོང་པ་རེ་བཟུང་སྟེ། རྒྱ་ནག་གཞུང་གིས་ཏོལ་དབྱིབས་གཙང་སེལ་གྱི་སྲིད་ཇུས་འོག་བོད་ནང་དང་རྒྱ་ནག་ནང་ཚད་ལས་འདས་པའི་སྡུག་སྦྱོང་གཏོང་བཞིན་པའི་རྐྱེན་གྱིས། རྒྱ་ནག་གི་སློབ་ཆེན་ཁག་དང་མི་མང་བཅས་ནས་ངོ་རྒོལ་བྱེད་བཞིན་པར་གདུང་སེམས་མཉམ་སྐྱེད་དང་རྒྱབ་སྐྱོར། དེ་བཞིན་ལོ་རྒྱུས་ཐོག་བོད་རང་བཙན་ཡིན་པའི་ངོ་རྒོལ་ཁྲོམ་སྐོར་བྱས་ཡོད་པ་རེད། ཐེངས་འདིའི་ངོ་རྒོལ་དང་འབྲེལ་བའི་སྙན་ཞུ་ཞིག་མེ་སོར་རྫོང་དཔོན་བརྒྱུད་རྒྱ་གར་གྱི་སྲིད་བློན་མུ་དྷི་མཆོག་གི་མཚན་ཐོག་ཏུ་ཕུལ་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
