རྒྱ་གར་གྱི་མངའ་སྡེ་ཨ་རུ་ན་ཅལ་གྱི་ཡང་རྩེ་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་བར་གདོང་ཐུག་བྱུང་སྟེ་ཕྱོགས་གཉིས་ཀྱི་དམག་མིར་རྨས་སྐྱོན་ཕོག་ཡོད་ཀྱང་། ད་ལྟ་ཕྱོགས་གཉིས་བར་གྲོས་མོལ་བྱས་ཏེ་ཞི་འགྲིག་ཆགས་ཡོད་སྐོར་བརྗོད་འདུག
ད་ལྟ་རྒྱ་དཀར་ནག་གཉིས་བར་གྱི་རྒྱལ་འབྲེལ་ཐིག་མཚམས་ཁྱོན་ཀེ་ལོ་མེ་ཊར་ ༣༠༠༠ ལྷག་ཡོད་པ་ལས། ཟླ་འདིའི་ཕྱི་ཚེས་ ༩ ཉིན་རྒྱ་གར་གྱི་ཨ་རུ་ན་ཅལ་མངའ་སྡེའི་ཤར་ཕྱོགས་ཡང་རྩེ་ས་ཁུལ་དུ། རྒྱ་ནག་གི་དམག་མི་འབོར་ཆེན་ཞིག་རྒྱལ་འབྲེལ་ཐིག་མཚམས་ལས་བརྒལ་ཏེ། རྒྱ་གར་གྱི་ས་ཐོག་ཏུ་བསྐྱོད་པར། རྒྱ་གར་དམག་མིས་བཀག་འགོག་བྱས་ཏེ། རྒྱལ་ཁབ་གཉིས་ཀྱི་དམག་མིའི་བར་གདོང་ཐུག་བྱུང་ཡོད་ཅིང་། གདོང་ཐུག་སྐབས་རྒྱ་གར་གྱི་དམག་མི་ ༦ ལ་རྨས་སྐྱོན་ཕོག་པ་དང་རྒྱ་ནག་གི་དམག་མི་ ༩ ཙམ་རྨས་སྐྱོན་ཕོག་པའི་གནས་ཚུལ་ཐོན་འདུག
དེ་འབྲེལ་རྒྱ་གར་དུས་བབ་གསར་ཁང་གི་གནས་ཚུལ་ནང་། རྒྱ་དཀར་ནག་གི་དམག་མིའི་གདོང་ཐུག་སྐབས། ཕྱོགས་གཉིས་ཀྱི་དམག་མི་ཚོས་དབྱུག་པ་དང་ལྕགས་གྲིན་གྱིས་གཞུ་རེས་བྱས་ཏེ་ལག་འཛིང་ཤོར་ཡོད་པ་དང་། སྐབས་དེར་རྒྱ་ནག་ལ་དམག་མི་ཁྱོན་ ༣༠༠ ཙམ་ཡོད་པ་དང་། རྒྱ་གར་དམག་མི་ ༧༠ ནས་ ༨༠ བར་ཡོད་སྐོར་དང་། ལག་འཛིང་ཁྲོད་ཕྱོགས་གཉིས་ཀྱི་དམག་མི་ཁག་ཅིག་ལ་རྨས་སྐྱོན་བཟོས་པ་ཙམ་ལས་ཛ་དྲག་གི་གནས་སྟངས་གང་ཡང་བྱུང་མེད་སྐོར་སོགས་བརྗོད་འདུག
རྒྱ་གར་གྱི་དམག་མིས། ས་ཁུལ་དེའི་རྒྱ་གར་དམག་གི་བཀོད་འདོམ་དཔོན་གྱིས། རྒྱ་ནག་གི་དམག་དཔོན་དང་ལྷན་དུ་གྲོས་མོལ་བྱས་རྗེས། རྩོད་རྙོག་བྱུང་ཡུལ་ནས་ཕྱོགས་གཉིས་ཀྱི་དམག་མི་རྣམས་ཕྱིར་འཐེན་བྱས་ཟིན་པ་རེད། ཅེས་བརྗོད་ཡོད་པ་དང་། དེ་རིང་རྒྱ་གར་གྱི་བདེ་སྲུང་བློན་རཱ་ཇེ་ན་ཐི་སིན་ལགས་ཀྱིས་རྒྱ་གར་གྲོས་ཚོགས་ལ། རྒྱལ་ཁབ་གཉིས་ཀྱི་དམག་མིའི་གདོང་ཐུག་སྐབས་རྒྱ་གར་གྱི་དམག་མིར་རྨས་སྐྱོན་དང་གནོད་སྐྱོན་ཚབས་ཆེན་བཟོས་མེད་པ་དང་ད་རེས་ཀྱི་གདོང་ཐུག་དེ་རྒྱལ་ཁབ་གཉིས་ཀྱི་ཕྱི་སྲིད་གནད་དོན་ཞིག་ལ་ཐུག་ཡོད་པའ་འགྲེལ་བརྗོད་བྱས་ཡོད་འདུག རྒྱ་ནག་ཕྱོགས་ནས་གནད་དོན་དེའི་ཐད་ལན་འདེབས་གང་ཡང་བྱས་མེད་འདུག
ད་རེས་རྒྱ་དཀར་ནག་གཉིས་ཀྱི་དམག་མི་ཕྱི་ལོ་ ༢༠༢༠ ལོར་ལ་དྭགས་ཀྱི་གྷ་ཝན་ལོང་གཤོངས་སུ་གདོང་ཐུག་བྱུང་རྗེས་ཀྱི་ཐོག་དང་པོ་ཡིན་པ་དང་། རྟ་དབང་གི་ཡང་རྩེ་ས་ཁུལ་གྱི་རྒྱ་དཀར་ནག་གི་རྩོད་རྙོག་དེ་ནི་ཕྱི་ལོ་ ༢༠༠༦ ལོ་ནས་ཡོད་པ་ཞིག་ཡིན་པ་དང་དེ་ནི་ཕྱོགས་གཉིས་བར་རྒྱལ་འབྲེལ་ཐིག་མཚམས་ངོས་འཛིན་བྱེད་ཕྱོགས་ཐད་འགའ་ཟླ་བྱུང་གི་ཡོད་པས་ཡིན་འདུག
ཟླ་སྔོན་མའི་ནང་རྒྱ་གར་གྱི་སྲིད་བློན་མུ་དྷི་མཆོག་དང་ཞི་ཅིན་ཕིན་གཉིས་བྷ་ལིར་སྟོབས་ཆེན་རྒྱལ་ཁབ་ཉི་ཤུའི་ཚོགས་ཆེན་སྟེང་ཐུག་འཕྲད་བྱུང་ཡོད་ཀྱང་། རྒྱལ་ཁབ་གཉིས་བར་གྱི་ཆབ་སྲིད་ཚོར་ཤུགས་སྐྱེན་པའི་བརྗོད་གཞིའི་སྐོར་ནས་གླེང་སློང་གང་ཡང་བྱས་མེད་འདུག
རྒྱ་དཀར་ནག་གི་ས་མཚམས་མ་རེད། ཧིན་བོད་ས་མཚམས་རེད། སྔར་ཡིན་ན་མཚོ་སྣ་རྫོང་སྡོད་ཀྱི་ས་ཁུལ་རེད། འདི་ལ་བོད་རིགས་གསར་འགོད་པ་ཚོས་ངེས་པར་དུ་དོ་ནན་བྱེད་དགོས་འདུག མ་འོངས་པར་གསར་འགྱུར་འདི་རིགས་ཀྱང་ལོ་རྒྱུས་ཀྱི་དཔྱད་གཞིར་འཛིན་ངེས་པས། གསར་འགྱུར་འགོད་དུས་གཞན་ནས་དཔེ་བཤུས་རྐྱང་རྐྱང་མ་ཡིན་པར་གསར་འགོད་པའི་རྣམ་དཔྱོད་བེད་སྤྱོད་གཏོང་དགོས།