དེ་རིང་བྱང་ཆུབ་སེམས་འགྲེལ་གྱི་བཀའ་ཆོས་ཉིན་གཉིས་པར་༧གོང་ས་རྒྱལ་བ་རིན་པོ་ཆེ་མཆོག་གིས་ར་སྟོད་སྐྱོང་བླ་རིན་པོ་ཆེ་དགོངས་པ་མ་རྫོགས་གོང་ལ་ལྗགས་རྩོམ་མཛད་པའི་༧གོང་ས་༧སྐྱབས་མགོན་ཆེན་པོའི་གསང་བའི་རྣམ་ཐར་གྱི་ཕྱག་དེབ་༧རྒྱལ་བའི་མཛད་རྣམ་དད་གསུམ་པདྨོ་འཛུམ་པའི་ཉིན་བྱེད་ཞེས་པ་དབུ་འབྱེད་གནང་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་གི་མར་མེའི་རྒྱུན་འདི་ཧི་རོ་ཤི་མ་ Hiroshima རྡུལ་ཕྲན་གྱི་མཚོན་ཆ་བེད་སྤྱོད་བྱ་ས་དེ་རེད། ངོས་རང་ཧི་རོ་ཤི་མ་ (Hiroshima) ལ་བསླེབས་ཡོད་པ་དང་། སྐབས་དེ་དུས་རྡུལ་ཕྲན་མཚོན་ཆའི་འོག་མི་མང་པོ་ཤི་བ་རེད། ངོས་རང་གིས་དེ་དག་དྲན་པ་དང་ལོ་རྒྱུས་ཏོག་ཙམ་ཤེས་ཀྱི་ཡོད་པ་རེད། སེམས་ཧ་ཅང་སྐྱོ་བྱུང་ལ། འཛམ་བུ་གླིང་འདི་རྡུལ་ཕྲན་གྱི་མཚོན་ཆ་མེད་པ་ཞིག་འབྱུང་ན་ཅི་མ་རུང་བསམ་པའི་སྨོན་ལམ་བརྒྱབ་པ་ཡིན། དུས་ད་བར་དམག་འཁྲུག་མུ་མཐུད་དུ་འགྲོ་ཡི་ཡོད་པ་དང་མི་གསོད་ཁྲག་སྦྱོར་མུ་མཐུད་ནས་བྱེད་ཀྱི་ཡོད་པ་རེད། ཡིན་ནའང་རྡུལ་ཕྲན་མཚོན་ཆ་བེད་སྤྱོད་བྱས་ནས་དམག་འཁྲུག་མཚམས་ཆད་རྒྱུ་ཞིག་བྱུང་མེད་པ་དང་ཕལ་ཆེར་ཡོང་གི་མ་རེད། འཛམ་གླིང་གང་ས་ནས་རྡུལ་ཕྲན་མཚོན་ཆ་ལ་ངོ་རྒོལ་བྱ་རྒྱུ་དེ་ཤུགས་ཇེ་ཆེར་འགྲོ་བཞིན་ཡོོད་པ་དང་། དངོས་ཡོད་གནས་ཚུལ་ལ་བསམ་བློ་འཁོར་མཁན་ཚོས་རྡུལ་ཕྲན་མཚོན་ཆ་བེད་སྤྱོད་བྱེད་ཚེ། སྲོག་ཆགས་མང་པོར་སྡུག་བསྔལ་མྱོང་གི་ཡོད་པ་གསལ་པོ་ཞེ་དྲགས་རེད། དེར་བརྟེན། དེ་རིང་གནས་ཁྱད་པར་ཅན་འདིར་ཧི་རོ་ཤི་མའི་མེའི་རྒྱུན་དེ་འདྲ་ཡོད་པ་བྱས་ཏེ་སྨོན་ལམ་བརྒྱག་རྒྱུའི་གོ་སྐབས་བྱུང་བ་རེད། ཅེས་གསུངས་སོང་།
ཡང་༧མགོན་པོ་གང་ཉིད་མཆོག་གིས། དེང་སང་འཛམ་གླིང་འདིའི་སྒང་ལ་དམག་འཁྲུག་གི་ཉེན་ཁ་ཆུང་དུ་ཕྱིན་ཡོད་ནའང་། ནད་ཡམས་ཀྱི་སྡུག་བསྔལ་གསར་པ་སླེབ་ཡོང་འདུག དེ་ཡང་ང་ཚོའི་རྒྱ་གར་གྱི་མཚོན་པའི་རྒྱ་ནག་སོགས་ལ་ནད་ཡམས་ཀྱི་གནས་ཚུལ་གསར་པ་བསླེབས་ཡོད་དུས། ང་ཚོ་ཚང་མས་འདུན་པ་རྩེ་གཅིག་གི་ཐོག་ནས་ནད་ཡམས་འདི་རིམ་པས་རྒྱུན་ཆད་པ་ཞིག་ལ་ཚང་མས་ཐུགས་སྣང་གནང་གི་ཡོད་པ་རེད། གཞན་ད་ལྟ་ནད་ཡམས་འདི་དངངས་སྐྲག་ཚ་པོ་འདུག རྒྱ་ནག་ནང་དུ་ཆ་བཞག་ནའང་། ནད་ཡམས་འདི་ཛ་དྲག་ཆེན་པོ་འདུག་ལ། རྒྱ་གར་ལའང་ནད་ཡམས་འདི་ས་གནས་འགའ་ཤས་ལ་ཡོང་བསྡད་ཀྱི་ཡོད་རེད། ང་ཚོ་ཚང་མ་མི་གཅིག་པ་རེད། དེ་ཡང་སྐྱེ་རྒ་ན་འཆིའི་སྡུག་བསྔལ་གྱིས་མནར་ནས་ཡོང་བསྡད་པ་འདིས་ང་ཚོ་ཚང་མ་ཚོར་བ་གཅིག་གྱུར་ཡིན་དུས། དེ་རིང་ང་ཚོ་ཚང་མས་སྒྲོལ་མའི་གཟུངས་སྔགས་དང་མ་ཎི་ཏོག་ཙམ་བསགས་ཏེ། ནད་ཡམས་དེ་རྒྱུན་ཆད་རྒྱུ་ཞིག་ལ་ཚང་མས་ཐུགས་སྨོན་གནང་ཤོག ཅེས་དང་། གང་ཟག་སོ་སོའི་ངོས་ནས་གཙོ་བོ་བྱང་ཆུབ་ཀྱི་སེམས་བསྒོམ་རྒྱུ་དང་། དེ་དང་འབྲེལ་ནས་སྟོང་ཉིད་ཀྱི་ལྟ་བ་ག་ཚོད་ཐུབ་ཐུབ་ཀྱིས་བསམ་བློ་གཏང་ཐུབ་ན་ཡག་པོ་ཡོད་སྐོར་དང་། རྒྱུན་དུ་སོ་སོའི་ངོས་ནས་བསླབ་པ་སློབ་གཉེར་བྱས་ཏེ་སེམས་ལ་གོ་བ་ཡག་པོ་ཆགས་ཐུབ་པ་དེ་དཔྱད་སྒོམ་དང་འཇོག་སྒོམ་ཟུང་འབྲེལ་གྱི་ཐོག་ནས་བསམ་བློ་གཏང་དགོས་པ་དེ་གལ་ཆེ་སྐོར་སོགས་བཀའ་སློབ་བསྩལ།
ཡང་༧གོང་ས་མཆོག་གིས། ང་ཚོ་ཚང་མ་མི་གཅིག་པ་རེད། ཡང་བསྒོས་ལྷག་པར་དུ་བོད་ཁ་བ་གངས་ཅན་ལྗོངས་འཕགས་པ་སྤྱན་རས་གཟིགས་ཀྱི་གདུལ་ཞིང་དང་། དེ་དང་ཉེ་བའི་ཡུལ་གྲུ་ཁག་ནས་ཡོང་བསྡད་པ། ད་དུང་དེ་སྔ་འབྲེལ་བ་རྒྱ་ཆེར་མེད་ནའང་བར་སྐབས་བོད་གངས་ཅན་གྱི་ཆོས་དང་རིག་གཞུང་ལ་དོ་སྣང་གསར་པ་སླེབས་མཁན་མང་པོ་ཡོད་རེད། ཁྱེད་རང་ཚོ་ཚང་མས་དེ་རིང་གནས་འདིར་བསླེབས་ཏེ་མ་མཐར་ཆུ་ཚོད་གཅིག་རིང་དཔྱད་འཇོག་ཟུང་འབྲེལ་གྱི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་ཐུབ་ན་ཏན་ཏན་ཕན་ཐོགས་ཡོང་གི་རེད་ལ། ཚེ་འདི་ཙམ་མིན་པར་ཚེ་རབས་ནས་ཚེ་རབས་དང་། རང་གཅིག་པོ་མ་ཡིན་པར་སེམས་ཅན་ཐམས་ཅད་ལ་ཕན་ཐོགས་དང་བདེ་བའི་རྒྱུར་འགྲོ་རྒྱུ་ཞིག་ཆགས་ཀྱི་ཡོད་པར་བརྟེན། ཚང་མས་སྒྲོལ་མ་དང་མ་ཎི་བསགས་ཏེ་སྒོམ་ཡག་པོ་བསྐྱོན་ནས། སེམས་མ་རུང་པ་དེ་རྡོ་རྗེ་གདན་ལ་མ་ཡོང་གོང་དང་བསླེབས་ཚར་བའི་རྗེས་སུ་བཟང་ཕྱོགས་ཀྱི་འགྱུར་བ་ཕྲན་བུ་ཞིག་སོ་སོས་བཟོ་ཐུབ་པ་ཞིག་གནང་དགོས། སེམས་མ་འདུལ་ན་ཆགས་སྡང་གི་གཞན་དབང་དུ་སོང་ན། ཧི་རོ་ཤི་མར་རྡུལ་ཕྲན་གྱི་མཚོན་ཆ་གཡུགས་ཏེ་མི་མང་པོ་འདས་གྲོངས་སུ་ཕྱིན་པ་རེད། དེར་བརྟེན། འཛམ་གླིང་ཞི་བདེ་ཡོང་ཐུབ་པ་བྱ་རྒྱུ་དེ་མི་ཚང་མའི་ལས་འགན་ཡིན་པས། ཚང་མས་གཞན་ཕན་བྱང་ཆུབ་ཀྱི་སེམས་ཀྱི་བློ་སྐྱེད་པའི་ཐོག་ནས་འཛམ་གླིང་ཞི་བདེ་ཡོང་ཐུབ་པར་ཧུར་ཐག་གནང་རོགས་གནང་། ཞེས་གསུངས་སོང་།
གནས་མཆོག་རྡོ་རྗེ་གདན་ནས་གསར་འགོད་པ་བསྟན་འཛིན་ཕུར་བུས་སྤེལ།
