ཕྱི་ལོ་ ༢༠༢༢ ལོར་རྒྱལ་སྤྱིའིི་ཐོག་བྱུང་བའི་གནས་ཚུལ་ཆེན་པོ་ཁག་ཅིག

འཛམ་གླིང་གི་མི་འབོར་དུང་ཕྱུར་ ༨༠ ཟིན།

Protestors gather to demonstrate against India’s new citizenship law in Mangalore, India, on Jan. 15, 2020. STR/AFP/GETTY IMAGES

འདི་ལོའི་ཕྱི་ཟླ་ ༡༡ ཚེས་ ༡༥ ཉིན་མཉམ་འབྲེལ་རྒྱལ་ཚོགས་ཀྱིས་འཛམ་གླིང་ཁྱོན་ཡོངས་ཀྱི་མི་འབོར་དེ་དུང་ཕྱུར་ ༨༠ ལ་ཟིན་ཡོད་སྐོར་བསྒྲགས་ཡོད། འཛམ་གླིང་གི་མི་འབོར་དུང་ཕྱུར་ ༧༠ ནས་ ༨༠ ཟིན་པར་ལོ་ངོ་ ༡༡ མ་གཏོགས་འགོར་མེད་ཅིང་། དེ་ཡང་གཙོ་བོ་རྒྱ་གར་དང་རྒྱ་ནག་ལྟ་བུའི་དཔར་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་ནང་མི་འབོར་ཤུགས་ཆེར་འཕེལ་བའི་རྐྱེན་གྱིས་ཡིན་པར་བཤད་ཡོད་ལ། འཛམ་གླིང་ཁྱོན་ཡོངས་ཀྱི་འཕྲོད་བསྟེན་རྨང་གཞི་ཡར་རྒྱས་ཕྱིན་པའི་རྒྱུ་མཚན་གྱིས་ཀྱང་ཡིན་པར་བསྒྲགས། གཞན་ཡང་མཉམ་འབྲེལ་རྒྱལ་ཚོགས་ཀྱི་གྲངས་ཐོའི་ནང་འདས་པའི་མི་ལོ་ ༡༡ ནང་རྒྱ་གར་གྱི་མི་འབོར་ས་ཡ་ ༡༨༠ འཕར་ཡོད་ཅིང་། ཕྱི་ལོ་ ༢༠༢༣ ལོར་རྒྱ་ནག་ལས་བརྒལ་ཏེ་འཛམ་གླིང་གི་མི་འབོར་མང་ཤོས་ཀྱི་རྒྱལ་ཁབ་དེར་འགྱུར་རྒྱུ་ཡིན་པའི་ཚོད་དཔག་བྱས་འདུག འོན་ཀྱང་ཆེད་མཁས་པ་ཚོས་ད་ལྟའི་ཆར་འཛམ་གླིང་གི་ཕྲུ་གུ་སྐྱེས་ཚད་ཉུང་དུ་འགྲོ་བཞིན་པའི་རྐྱེན་གྱིས། འཛམ་གླིང་གི་མི་འབོར་དུང་ཕྱུར་ ༩༠ ཟིན་པར་ལོ་ ༡༥ འགོར་སྲིད་པ་དང་། མི་འབོར་དུང་ཕྱུར་ ༡༠།༤ ཟིན་ཐོ་དེ་ཕྱི་ལོ་ ༢༠༨༠ ནང་ཐོན་ཏེ་ཕྱི་ལོ་ ༢༡༠༠ བར་འཕར་སྣོན་དེ་ཙམ་མེད་པར་གནས་རྒྱུ་ཡིན་སྐོར་བསྒྲགས་ཡོད་པ་རེད།

པེ་ཅིང་གི་དགུན་དུས་ཨོ་རྩལ་འགྲན་ཚོགས་ལ་ཕྱོགས་ཡོངས་ནས་ངོ་རྒོལ་བྱས།

Ethnic Uyghur demonstrators take part in a “No Beijing 2022” protest calling for a boycott of Beijing 2022 Winter Olympic Games, in front of the Olympic House, the headquarters of Turkey’s National Olympic Committee (TMOK), in Istanbul, Turkey June 23, 2021. REUTERS/Dilara Senkaya

འདི་ལོའི་ཕྱི་ཟླ་ ༢ ཚེས་ ༤ ནས་ ༢༠ བར་རྒྱ་ནག་གི་རྒྱལ་ས་པེ་ཅིང་དུ་འཛམ་གླིང་དགུན་དུས་ཨོ་ལིམ་ཕིག་རྩེད་འགྲན་བསྡུས་པ་དང་བསྟུན། བོད་གཙོས་པའི་ཤར་ཊུར་ཀི་སི་ཐན་དང་རྒྱ་རིགས་དམངས་གཙོ་དོན་གཉེར་བ་རྣམས་ཀྱིས་རྩེད་འགྲན་གྱི་སྔ་གཞུག་བར་གསུམ་དུ་རྒྱ་ནག་གཞུང་དང་རྒྱལ་སྤྱིའི་ཨོ་རྩལ་སྒྲིག་འཛུགས་ལ་ངོ་རྒོལ་སྐྱོན་བརྗོད་ཤུགས་ཆེན་བྱས་ཡོད་ལ། རྒྱ་ནག་གཞུང་གི་གནོན་ཤུགས་ལ་འཛེམ་དོགས་མེད་པར་འཛམ་གླིང་གི་སྟོབས་ཆེན་རྒྱལ་ཁབ་ཨ་རི་དང་། དབྱིན་ཡུལ། སི་ཝེ་ཌན། སོ་ལོ་ཝེ་ནི་ཡ་(Slovenia)། ནེའུ་ཛི་ལན་ཌི། ནི་ཋར་ལན་ཌི། ལི་ཐུ་ནི་ཡ། ཉི་ཧོང་། ཨེ་སོ་ཊོ་ནི་ཡ། ཌན་མཱག ཁེ་ན་ཌ། སྦེལ་ཇམ། ཨོ་སི་ཊི་རི་ཡ། ཨོ་གླིང་བཅས་ཀྱིས་ཨོ་རྩལ་འགྲན་ཚོགས་ནང་རྩེད་འགྲན་པ་མ་གཏོགས་གཞུང་འབྲེལ་མི་སྣ་མངག་གཏོང་བྱས་མེད་པ་རེད། དེ་བཞིན་རྒྱ་ནག་གཞུང་གིས་རྩེད་འགྲན་སྒོ་འབྱེད་བྱེད་སྐབས། ཕྱི་ལོ་ ༢༠༢༠ ལོར་བོད་འཕགས་ས་མཚམས་ཀྱི་གྷལ་ཝན་ལུང་གཤོངས་སུ་བྱུང་བའི་རྒྱ་དཀར་ནག་གི་དམག་མིའི་གདོང་ཐུག་སྐབས་ཀྱི་རྒྱའི་དམག་དཔོན་ཞིག་དཔལ་འབར་འཁྱེར་མཁན་ཁྲོད་དུ་བཞག་པར་བརྟེན། རྒྱ་གར་ཕྱི་སྲིད་ལྷན་ཁང་ངོས་ནས་རྒྱ་ནག་གཞུང་གིས་ཨོ་ལིམ་ཕིག་རྩེད་འགྲན་དེ་ཉིད་ཆབ་སྲིད་ཀྱི་ངོ་བོར་བསྒྱུར་བར་ངོ་རྒོལ་དང་འབྲེལ། པེ་ཅིང་དགུན་དུས་ཨོ་རྩེད་ཐོག་རྒྱ་གར་གྱི་གཞུང་འབྲེལ་སྐུ་ཚབ་མངག་གཏོང་བྱ་རྒྱུ་མིན་པ་མ་ཟད། རྒྱ་གར་དབུས་བརྙན་འཕྲིན་ཁང་དྷུར་དྷར་ཤན་ (Door darshan) ངོས་ནས་རྒྱ་གར་ནང་ཨོ་རྩེད་ཐད་གཏོང་བྱ་རྒྱུ་མིན་སྐོར་གྱི་རྒོལ་གཏམ་སྤེལ་ཡོད་པ་རེད།

ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་ཏེ་ཟླ་ ༡༠ ལྷག་ཕྱིན།

A Ukrainian soldier inspects a destroyed Russian armored transport vehicle outside Kyiv on March 31. (Vadim Ghirda/AP)

འདི་ལོའི་ཕྱི་ཟླ་ ༢ ཚེས་ ༢༠ ཉིན་ཨུ་རུ་སུའི་སྲིད་འཛིན་པུ་ཀྲིན་གྱིས་རང་གི་ལྷོ་ནུབ་ཁྱིམ་མཚེས་རྒྱལ་ཁབ་ཡུ་ཀེ་རེན་ནང་ས་མཚོ་གནམ་གསུམ་ནས་དྲག་པོའི་བཙན་འཛུལ་བྱས་ཏེ། ཕྱི་ཟླ་ ༣ པའི་ནང་ཡུ་ཀེ་རེན་གྱི་ཤར་བརྒྱུད་ཕལ་ཆེར་དབང་འོག་ཏུ་བསྡུས་ཏེ་རྒྱལ་ས་ཀིབ་(Kyiv)ཀྱི་མཐའ་མཚམས་སུ་འབྱོར་ཏེ་མུ་མཐུད་དྲག་པོའི་བཙན་འཛུལ་བྱས་ཡོད་ནའང་། ཨ་རིའི་གཙོས་པའི་ཡུ་རོབ་ཀྱི་རྒྱལ་ཁབ་ཕལ་ཆེ་བས་ཡུ་ཀེ་རེན་ལ་ཨ་སྒོར་ཐེར་འབུམ་ལྷག་གི་གོ་མཚོན་མཁོ་སྤྲོད་བསྟུད་མར་བྱས་པ་དང་། ཡུ་ཀེ་རེན་གྱི་སྲིད་འཛིན་ཛི་ལིན་སི་ཀེ་མཆོག་གི་སྣེ་འཁྲིད་པའི་རྒྱལ་ཡོངས་མི་མང་དང་དྲག་པོའི་དམག་དཔུང་གིས་བསྟུད་མར་ཕར་རྒོལ་ནུས་པ་གཅིག་ཏུ་སྤུངས་བར་བརྟེན། ཕྱི་ཟླ་ ༣ པའི་ཟླ་མཇུག་ཙམ་ལ་ཨུ་རུ་སུའི་དམག་ལ་ཕམ་ཉེས་ཆེན་པོ་བྱུང་སྟེ་རྒྱལ་སའི་དབུས་ཁུལ་ནས་ཤར་ཕྱོགས་སུ་ཕྱིར་འཐེན་བྱས། དེའི་རྗེས་ཀྱི་དམག་འཐབ་ཕལ་ཆེ་བ་ཡུ་ཀེ་རེན་གྱི་ཤར་དང་ལྷོ་ཁུལ་དུ་བྱུང་ཡོད་ནའང་། ཡུ་ཀེ་རེན་གྱིས་ཨུ་རུ་སུར་ཕར་རྒོལ་དྲག་པོ་བྱས་ཏེ་ཕྱི་ཟླ་ ༩ པའི་ནང་ཨུ་རུ་སུའི་བཙན་འོག་ཏུ་ཡོད་པའི་ཁར་ཀིབ་(Kharkiv)ཀྱི་ས་གནས་ཕལ་ཆེར་བ་དང་། ཕྱི་ཟླ་ ༡༡ པའི་ནང་ཤར་བརྒྱུད་གྲོང་ཁྱེར་ཁེར་སོན་(Kherson) ཚུར་བླངས། ཡིན་ནའང་། ད་ལྟའང་ཡུ་ཀེ་རེན་གྱི་ལྷོ་ཤར་གྱི་ས་ཁུལ་མང་ཆེ་བ་ཞིག་ཨུ་རུ་སུའི་བཙན་འོག་ཏུ་ཡོད་པར་བརྟེན། མུ་མཐུད་ཨུ་རུ་སུའི་བཙན་འཛུལ་ལ་ཕར་རྒོལ་བྱེད་མུས་ཡིན་པ་རེད། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་གྲངས་ཐོ་ལྟར་ན། ཕྱི་ཟླ་ ༡༢ ཚེས་ ༤ ཉིན་བར་ཨུ་ཡུག་གི་དམག་འཁྲུག་ཁྲོད་ཉུང་མཐར་མི་སེར་དཀྱུས་མ་ ༦༧༠༢ རྐྱེན་འདས་དང་། མི་གྲངས་ ༡༠༤༧༩ ལ་རྨས་སྐྱོན་བཟོས་ཡོད་པ་དང་། ཡུ་ཀེ་རེན་གྱི་མི་གྲངས་ས་ཡ་ ༧།༩ ཙམ་ཡུ་རོབ་རྒྱལ་ཁབ་ཁག་ནང་བྲོས་བྱོལ་དུ་ཕྱིན་ཡོད་འདུག་ལ། ཝེ་ཀེ་རིག་མཛོད་དུ་ཨུ་རུ་སུའི་བཙན་འཛུལ་ཁྲོད་ད་ལྟ་བར་དུ་མི་གྲངས་ཁྲི་ ༤ ལྷག་འདས་གྲོངས་སུ་ཕྱིན་ཡོད་པ་དང་། མི་གྲངས་ ༡༥༠༠༠ ཙམ་གར་སོང་ཆ་མེད་དུ་གྱུར་ཡོད་སྐོར་བཀོད་འདུག

སིངྒ་ལའི་དཔལ་འབྱོར་དཀའ་རྙོག

A man lifts a gas tank amid fuel shortages and an ongoing economic crisis as he joins a protest to demand the resignation of Sri Lankan President Gotabaya Rajapaksa in Colombo, Sri Lanka, on June 30. THILINA KALUTHOTAGE/NURPHOTO VIA GETTY IMAGES

འདི་ལོའི་ཕྱི་ཟླ་ ༣ པའི་ནང་སིངྒ་ལའི་ཡུལ་དུ་འདས་པའི་ལོ་ངོ་ ༧༠ ལྷག་གི་རིང་བྱུང་མྱོང་མེད་པའི་དཔལ་འབྱོར་གོད་ཆག་བྱུང་སྟེ། རྒྱལ་ཡོངས་སུ་རྒྱུན་མཁོའི་སྣུམ་དང་གློག་འདང་ངེས་མེད་པ་མ་ཟད། ཉིན་རེའི་འཚོ་བའི་ཁྲོད་དུའང་ཟ་འབྲུའི་རིན་གོང་བརྒྱ་ཆ་ ༥༠ ལྷག་འཕར་ཏེ་དཀའ་ངལ་ཤུགས་ཆེར་ཕྲད་རྐྱེན། སྲིད་གཞུང་གིས་དཔལ་འབྱོལ་ལམ་ལུགས་ལ་དོ་ནན་མ་བྱས་པའི་ནག་ཉེས་བཙུགས་ཏེ་མི་མང་གིས་གཞི་རྒྱ་ཆེ་བའི་གཞུང་རྒོལ་ལས་འགུལ་བསྟུད་མར་སྤེལ་ཏེ། ཡུལ་དེའི་ལོ་ངོ་ ༣༠ ལྷག་གི་ནང་འཁྲུག་ཁྲོད་དཔའ་བོའི་ཆོ་ལོ་ཐོབ་པའི་སྲིད་འཛིན་གྷོ་ཏ་བྷ་ཡ་ར་ཇ་པག་ས་ (Gotabaya Rajapaksa)དང་། ཁོ་པའི་གཅུང་པོ་སྲིད་བློན་མ་ཧིན་དྷ་རཱ་ཇ་པག་ས་(Mahinda Rajapaksa) གཉིས་ཀས་སྔ་གཞུག་ཏུ་ལས་འཁུར་བཤོལ་དགོས་བྱུང་བ་མ་ཟད། ལས་འགུལ་བས་སྲིད་འཛིན་གྱི་ཕོ་བྲང་ནང་བཙན་རྒོལ་བྱས་པའི་རྐྱེན་གྱིས་གྷོ་ཏ་བྷ་ཡ་ར་ཇ་པག་ས་གནས་སྐབས་རིང་སིང་གྷ་པུར་དུ་བྲོས་བྱོལ་དུ་འགྲོ་དགོས་པའང་བྱུང་བ་རེད། མི་མང་གི་ངོ་རྒོལ་གནོན་ཤུགས་དང་བསྟུན་འདི་ལོའི་ཕྱི་ཟླ་ ༧ པའི་ཚེས་ ༢༠ ཉིན་སིངྒ་ལའི་གྲོས་ཚོགས་ཀྱིས་ཡུལ་དེའི་སྲིད་བློན་ཟུར་པ་ར་ཎིལ་ཝི་ཁེ་རེ་མེ་སིང་ (Ranil Wickremesinghe) སྲིད་འཛིན་གསར་པར་འདེམས་བསྐོ་བྱས་རྗེས། ཟླ་དེའི་ཕྱི་ཚེས་ ༢༢ ཉིན་ཁོ་པས་དྷི་ནེ་ཤི་གྷུ་ན་ཝར་ཌེ་ན་ (Dinesh Gunawardena) ཡུལ་དེའི་སྲིད་བློན་གསར་པར་བསྐོ་གཞག་བྱས་ཡོད་པ་རེད། སྤྱིར་མང་ཚོགས་ཁྲོད་སྲིད་འཛིན་འཕོ་འགྱུར་གྱི་གནས་སྟངས་དེར་འདོད་བློ་ཁེངས་པ་ཞིག་བྱུང་མེད་ནའང་། རྒྱལ་ཁབ་ཀྱི་དཔལ་འབྱོར་རིམ་པས་ཡར་རྒྱས་ཕྱིན་པར་བརྟེན། འདི་ལོའི་ཕྱི་ཟླ་ ༡༡ པའི་ནང་རྒྱལ་ཡོངས་ཀྱི་གཞུང་རྒོལ་ལས་འགུལ་རིམ་གྱིས་ཞི་འཇགས་སུ་ཕྱིན།

ཊུ་ཝི་ཊར་སྤྱི་ཚོགས་དྲ་ལམ་གྱི་ཆག་འཇིག་ཆེན་མོ།

Elon Musk has promised to shrink the size of ads on Twitter

འདི་ལོའི་ཕྱི་ཟླ་ ༤ ཚེས་ ༡༤ ཉིན་འཛམ་གླིང་གི་ཕྱུག་བདག་ཨང་དང་པོ་ཨེ་ལོན་མཱ་སི་ཀི་(Elon Musk) ཡིས་འཛམ་གླིང་གི་སྤྱོད་རྒྱུག་ཆེ་བའི་སྤྱི་ཚོགས་དྲ་ལམ་ཊུ་ཝི་ཊར་ཉོ་འདོད་ཡོད་སྐོར་བསྒྲགས་རྗེས། ཟླ་དེའི་ཕྱི་ཚེས་ ༢༥ ཉིན་སྤྱི་ཚོགས་དྲ་ལམ་དེའི་འགན་འཛིན་ལྷན་ཚོགས་ཀྱིས་ཨ་སྒོར་ཐེར་འབུམ་ ༤༤ ལ་བཙོང་གཏན་ཁེལ་ཏེ། ཕྱོགས་གཉིས་དབར་གྲོས་བསྡུར་རིམ་པ་བྱས་ཏེ་མཐར་ཕྱི་ཟླ་ ༡༠ ཚེས་ ༢༧ ཉིན་ཨེ་ལོན་མཱ་སི་ཀི་ཊུ་ཝི་ཊར་གྱི་སྦྱིན་བདག་ཆེན་མོར་གྱུར། ཊུ་ཝི་ཊར་བདག་བཟུང་བྱས་པའི་ཐོག་མའི་ཉིན་འགའི་ནང་ཨེ་ལོན་མཱ་སི་ཀི་ཡིས་སྤྱི་ཚོགས་དྲ་ལམ་དེའི་སྤྱི་ཁྱབ་འགན་འཛིན་པཱ་རག་ཨག་ར་ཝལ་(Parag Agrawal) གཙོས་པའི་གནད་ཡོད་ལས་བྱེད་རྙིང་གྲས་ཁག་ཅིག་ཕྱིར་ཕུད་ཡོད་པ་མ་ཟད། དེའི་རྗེས་བསྐྱར་དུ་ཊུ་ཝི་ཊར་གྱི་ལས་བྱེད་ཕྱེད་ཀ་ལྷག་ལས་གནས་ནས་ཕུད་ཡོད་པ་རེད་ལ། ལས་བྱེད་བརྒྱ་ཕྲག་མང་པོ་ལས་ཚེགས་ཆེ་དྲགས་ནས་རང་འགུལ་གྱིས་རྩ་དགོངས་ཞུ་དགོས་བྱུང་། ཨེ་ལོན་མཱ་སི་ཀིས་ཊུ་ཝི་ཊར་ཉོས་རྗེས། དཔྱད་ཞིབ་པ་ཕྱོགས་གཅིག་གིས་སྤྱི་ཚོགས་དྲ་ལམ་དེས་སྨྲ་བརྗོད་རང་དབང་ལ་སྔར་བས་བརྩི་སྲུང་ཆེ་བ་འབྱུང་སྲིད་པ་དང་། གུ་ཡངས་དྲགས་པའི་རྐྱེན་གྱིས་གནས་ཚུལ་བདེན་རྫུན་དབྱེ་འབྱེད་དཀའ་བར་འགྱུར་སྲིད་པ། ཡང་མང་པོ་ཞིག་གིས་སྤྱི་ཚོགས་དྲ་ལམ་དེས་སྔར་ལས་སྨྲ་བརྗོད་རང་དབང་ལ་རྡོག་རོལ་གཏོང་གི་ཡོད་པའི་སྐྱོན་བརྗོད་ཀྱང་ཤུགས་ཆེན་ཡོང་གི་ཡོད་པ་རེད། འདི་ལོའི་ཕྱི་ཟླ་ ༡༢ ཉིན་ ༡༩ ཉིན་ཨེ་ལོན་མཱ་སི་ཀིས་ཊུ་ཝི་ཊར་སྤྱི་སྟེགས་ཏུ། ངས་དྲ་གནས་འདིའི་སྤྱི་ཁྱབ་འགན་འཛིན་ནས་རྩ་དགོངས་ཞུ་དགོས་ཀྱི་འདུག་གམ། ཞེས་གྲུབ་དོན་དྭང་ལེན་བྱ་རྒྱུ་ཡིན་སྐོར་གྱི་བསམ་ཤོག་ཅིག་བསྡུ་སྐབས། འཛད་སྤྱོད་པ་བརྒྱ་ཆ་ ༡༧ ལྷག་གིས་རྩ་དགོངས་མ་ཞུས་ན་ལེགས་པ་དང་། བརྒྱ་ཆ་ ༥༧ ལྷག་གིས་རྩ་དགོངས་ཞུ་ན་ལེགས་པའི་བསམ་ཚུལ་བཏོན་རྗེས། ཨེ་ལོན་མཱ་སི་ཀིས་སྤྱི་ཁྱབ་ཀྱི་ལས་འགན་འཁུར་མཁན་ཞིག་རག་རྗེས་ཁོ་རང་གིས་རྩ་དགོངས་ཞུ་རྒྱུ་ཡིན་སྐོར་བསྒྲགས།

རྒྱལ་ཚོགས་འགྲོ་བ་མིའི་ཐོབ་ཐང་གི་འགན་འཛིན་ཤིན་ཅང་དུ་ཕེབས།

Chinese Foreign Minister Wang Yi with the UN High Commissioner for Human Rights Michelle Bachelet in Guangzhou, in southern China’s Guangdong province, May 23, 2022. photo: Xinhua News Agency

འདི་ལོའི་ཕྱི་ཟླ་ ༥ ཚེས་ ༢༣ ནས་ ༢༨ བར་ཉིན་གྲངས་དྲུག་རིང་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་གི་དགག་བྱ་དང་སྐྱོན་བརྗོད་ལ་ལྟོས་མེད་ཀྱིས། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ལྕམ་མི་ཤེལ་བྷ་ཆི་ལེ་ཊི་ (Michelle Bachelet) ལགས་རྒྱ་ནག་གཞུང་གིས་ཡུ་གུར་མི་མང་ས་ཡ་གཅིག་ལྷག་བཀག་སྐྱིལ་ཁང་དུ་འཇུག་སའི་ཤར་ཊུར་ཀི་སི་ཐན་(ཤིན་ཅང་)གྱི་རྒྱལ་ས་ཨུ་རུམ་ཆི་(Urumqi)དང་། ཀ་ཤི་གྷར་(Kashgar)། གཞན་ཡང་རྒྱ་ནག་གི་གྲོང་ཁྱེར་ཀང་ཀྲུའུ་སོགས་སུ་ཕེབས་ཏེ། ཕྱི་ཟླ་ ༩ ཚེས་ ༧ ཉིན་ཤིན་ཅང་སྐོར་གྱི་སྙན་ཐོ་ཞིག་བཏོན་ཏེ། རྒྱ་ནག་གཞུང་གིས་ཤིན་ཅང་གཙོ་བོར་གྱུར་བའི་གྲངས་ཉུང་མི་རིགས་ས་ཁུལ་དུ་འགྲོ་བ་མིའི་ཐོབ་ཐང་ལ་རྡོག་རོལ་བཙན་གནོན་གཏོང་བཞིན་པ་འཕྲལ་དུ་མཚམས་འཇོག་དགོས་པ་དང་། རྒྱལ་སྤྱིའི་སྤྱི་ཚོགས་ཀྱིས་ཀྱང་གནད་དོན་དེར་ངེས་པར་དུ་དོ་འཁུར་དགོས་པའི་འབོད་སྐུལ་བྱས། གཟིགས་སྐོར་དེ་དང་འབྲེལ་བའི་གསར་འགོད་གསལ་བསྒྲགས་སྐབས། ལྕམ་མི་ཤེལ་བྷ་ཆི་ལེ་ཊི་ལགས་ཀྱིས་རྒྱ་ནག་གི་དཔོན་རིགས་ཚོར་ཐུག་འཕྲད་གནང་སྐབས། བོད་མི་ཚོས་རང་དབང་ལྡན་པའི་ཐོག་ནས་ཆོས་ཕྱོགས་ཀྱི་བྱེད་སྒོ་ཁག་ལ་མཉམ་ཞུགས་དང་གླེང་སློང་བྱ་རུ་འཇུག་དགོས་པ་མ་ཟད། བོད་ཀྱི་སྐད་ཡིག་དང་། ཆོས་ལུགས། བོད་མིའི་ངོ་བོ་མཚོན་པའི་རིག་གཞུང་སྲུང་སྐྱོབ་བྱ་རྒྱུ་གལ་ཆེན་ཡིན་སྐོར་དང་། བོད་རང་སྐྱོང་ལྗོངས་ཀྱི་ཤེས་ཡོན་སྲིད་ཇུས་དང་། ཁྱིམ་ཚང་ངམ་སྤྱི་ཚོགས་སུ་བོད་ཕྲུག་ཚོས་བོད་ཀྱི་སྐད་ཡིག་དང་རིག་གཞུང་སྦྱང་སྤྱོད་བྱ་རུ་འཇུག་པ་དེ་གལ་ཆེན་ཡིན་སྐོར་སོགས་གླེང་སློང་གནང་ཡོད་སྐོར་བསྒྲགས་ཡོད་པ་རེད།

ལྕམ་ནེན་སི་པེ་ལོ་སིས་རྒྱ་གཞུང་གི་ཉེན་བརྡར་ཡ་མེད་བཏང་ནས་ཐའེ་ཝན་དུ་ཕེབས།

U.S. House Speaker Nancy Pelosi, center left, and Taiwanese President President Tsai Ing-wen arrive for a meeting in Taipei, Taiwan, Wednesday, Aug. 3, 2022.

འདི་ལོའི་ཕྱི་ཟླ་ ༨ ཚེས་ ༢ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་དང་ཁོང་མོས་སྣེ་ཁྲིད་པའི་གྲོས་ཚོགས་ཀྱི་ཚོགས་ཆུང་ཞིག་ཐའེ་ཝན་དུ་ཕེབས་ཏེ། ཡུལ་དེའི་སྲིད་འཛིན་ཚེ་ཡེན་ཝུན་མཆོག་གིས་གཙོས་གཞུང་འབྲེལ་དཔོན་རིགས་རྣམས་དང་མཇལ་མོལ་གནང་། སྲིད་འཛིན་ལས་ཁུངས་ཀྱི་མཉམ་འབྲེལ་གསར་འགོད་གསལ་བསྒྲགས་སྐབས་ཐའེ་ཝན་ལ་ཕེབས་དོན་གཙོ་བོ་ནི་ཨ་རིས་ཐའེ་ཝན་གྱི་དམངས་གཙོ་ལ་རྒྱབ་སྐྱོར་གཡོ་མེད་ཡོད་པ་མཚོན་ཆེད་ཡིན་སྐོར་བསྒྲགས་ཡོད་པ་རེད། ཚོགས་གཙོ་མཆོག་ཐའེ་ཝན་ལ་ཕེབས་རྒྱུའི་གནས་ཚུལ་ཐོན་པ་ནས་བཟུང་རྒྱ་ནག་གཞུང་གིས་སྐྱོན་བརྗོད་དྲག་པོ་བྱས་ཡོད་པ་མ་ཟད། ལྕམ་སྐུ་མཆོག་ཐའེ་ཝན་དུ་འབྱོར་བའི་སྔར་ཉིན་དེར་རྒྱ་ནག་གིས་ཐའེ་ཝན་གྱི་རྒྱ་མཚོ་ཁུལ་དུ་དམག་སྦྱོང་རྒྱ་ཆེན་པོ་བྱས་པ་མ་ཟད། ཐའེ་ཝན་གྱི་འཁྲིས་སུ་འཐབ་འཁྲུག་གནམ་གྲུ་འཕུར་སྐྱོད་བྱས་ཏེ་འཇིགས་སྐུལ་བྱས་ཡོད་པ་རེད། ལྕམ་སྐུ་ནེན་སི་པེ་ལོ་ནི་འདས་པའི་ལོ་ངོ་ ༢༥ ནང་ཐའེ་ཝན་དུ་ཕེབས་མཁན་གྱི་ཨ་རིའི་མགོ་འཁྲིད་མཐོ་ཤོས་དེ་ཆགས་ཀྱི་ཡོད་པ་རེད་ལ། འདི་ལོའི་ཨ་རི་དང་རྒྱ་ནག་དབར་གྱི་ཕྱི་འབྲེལ་གྱི་གནད་དོན་ཆེས་ཛ་དྲག་ཆེ་བ་ཞིག་ཡིན་པར་བཤད།

དབྱིན་ཡུལ་གྱི་རྒྱལ་མོ་སྐུ་གྲོངས་ཏེ་རྒྱལ་པོ་གསར་པ་བསྐོས།

Queen Elizabeth II and Charles, Prince of Wales, during the opening of Parliament in London, England, in October 2019. Paul Edwards/WPA/Getty Images

འདི་ལོའི་ཕྱི་ཟླ་ ༩ ཚེས་ ༨ ཉིན་དབྱིིན་ཡུལ་གྱི་སྲིད་དབང་ཡུན་རིང་ཤོས་སྐྱོང་མཁན་རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་དགུང་ལོ་ ༩༦ སྟེང་སི་ཀོ་ཊི་ལན་ཌིར་ཡོད་པའི་བྷལ་མོ་རལ་མཁར་རྫོང་ནང་སྐུ་གྲོངས་ཡོད་སྟབས། དབྱིན་ཡུལ་གིས་གཙོས་རྒྱལ་མོར་ཆེས་མཐོའི་མགོ་ཁྲིད་ཀྱི་དབང་ཚད་ཡོད་པའི་འཛམ་གླིང་གི་རྒྱལ་ཁབ་བཅོ་ལྔའི་གཞུང་མང་གིས་ཁོང་མོར་མྱ་ངན་རྗེས་དྲན་ཞུས་ཡོད་པ་དང་། རྒྱལ་སྲས་ཆར་ལི་སི་ (Prince Charles)་རྒྱལ་ཁྲིར་ཕེབས། རྒྱལ་མོ་ཨེ་ལི་ཛེ་བྷེ་ཐི་གཉིས་པ་མཆོག་ནི་ཕྱི་ལོ་ ༡༩༢༦ ལོར་སྐུ་འཁྲུངས་ཤིང་། ཕྱི་ལོ་ ༡༩༥༢ ནས་ ༢༠༢༢ ལོའི་བར་དུ་ལོ་ངོ་ ༧༠ རིང་དབྱིན་ཡུལ་གྱི་རྒྱལ་སྲིད་བཟུང་། ཕྱི་ལོ་ ༡༩༤༧ ལོར་ཨི་དིན་བྷག་ (Edinburgh) གི་རྒྱལ་སྲས་ཕི་ལིབ་ (Philip)དང་གཉེན་སྒྲིག་གནང་སྟེ་སྲས་སྲས་མོ་བཞི་བྱུང་། ཁོང་མོའི་སྲིད་དབང་དེ་དམག་ཆེན་གཉིས་པ་མཇུག་བསྒྲིལ་ཏེ། འཛམ་གླིང་ནང་སླར་ཡང་དམག་ཆེན་འབྱུང་ཉེན་གྱི་མཚམས་དང་། གྲང་དམག་མགོ་འཛུགས་བཞིན་པའི་དུས་སྐབས་སུ་ཐོན་ཡོད་ཅིང་། ཁོང་མོས་སྲིད་དབང་སྐྱོང་བའི་རིང་དེར་དབྱིན་ཡུལ་ནང་སྲིད་བློན་ ༡༥ འཕོ་འགྱུར་ཕྱིན་ཡོད་ལ། ཕྱི་ལོ་ ༢༠༢༢ ལོར་དབྱིན་ཡུལ་གྱི་སྲིད་བློན་རིམ་པ་གསུམ་བརྗེ་བོ་ཐེབས་པའི་ཁྲོད་ནས་ཉིན་གྲངས་ ༤༥ རིང་སྲིད་བློན་གྱི་ལས་འཁུར་ཞུས་པའི་ལྕམ་ལེ་ཛི་ཊི་རོ་སི་(Liz Truss)ལགས་ནི་རྒྱལ་མོ་མཆོག་ནས་ངོས་བཞེས་གནང་བའི་སྲིད་བློན་མཐའ་མ་དེ་ཆགས་ཡོད་པ་དང་། ལྕམ་ཊི་རོ་སིས་སྲིད་བློན་ནས་རྩ་དགོངས་ཞུས་རྗེས་ཁོང་མོའི་ཁ་གཏད་དུ་ལངས་བའི་རྒྱ་གར་གྱི་མི་རྒྱུད་ཡིན་པ་སྐུ་ཞབས་རཱི་ཤེ་སོ་ནཱག་ལགས་སུ་གྲོས་ཚོགས་ནང་ཁ་གཏད་མེད་པར་སྐབས་ ༥༧ པའི་དབྱིན་ཡུལ་སྲིད་བློན་དུ་བསྐོས་ཡོད་པ་རེད།

ཉི་ཧོང་གི་སྲིད་བློན་ཤིན་ཛོ་ཨ་བྷེ་མཆོག་ལྐོག་གསོད་བྱས།

Former Prime Minister Shinzo Abe is shot while making a street speech for upcoming Upper House election. (Photo by The Asahi Shimbun via Getty Images)

འདི་ལོའི་ཕྱི་ཟླ་ ༧ ཚེས་ ༨ ཉིན་ཉི་ཧོང་གི་སྲིད་བློན་བོད་དོན་རྒྱབ་སྐྱོར་བ་སྐུ་ཞབས་ཤིན་ཛོ་ཨ་བྷེ་མཆོག་གིས་ཡུལ་དེའི་གྲོང་ཁྱེར་ནོ་རཱ་ཞེས་པའི་ནང་འོས་བསྡུའི་དྲིལ་བསྒྲགས་ཀྱི་གཏམ་བཤད་གནང་སྐབས། གློ་བུར་དུ་མཚོ་དམག་ཟུར་པ་མིང་ལ་རཱ་མཱ་གྷཱ་མི་ཊི་སུ་ཡཱ་(Yamagami Tetsuya)ཟེར་བའི་སྐྱེས་པ་ཞིག་གིས་བྲང་ཁར་མེ་མདས་གཞུས་ཏེ་ཉིན་དེ་རང་ལ་སྐུ་གྲོངས། ༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་འཛམ་གླིང་གི་དབུ་འཁྲིད་དང་མི་མང་བཅས་ནས་གདུང་སེམས་མཉམ་སྐྱེད་དང་མྱ་ངན་ཐུགས་སྨོན་ཞུས་ཡོད་པ་རེད། སྐུ་ཞབས་ཤིན་ཛོ་ཨ་བྷེ་མཆོག་ནི་ཕྱི་ལོ་ ༡༩༥༤ ལོར་འཁྲུངས་ཤིང་། ཕྱི་ལོ་ ༢༠༠༦ ནས་ ༢༠༠༧ བར་དང་། ཕྱི་ལོ་ ༢༠༡༢ ནས་ ༢༠༢༠ བར་ཉི་ཧོང་གི་སྲིད་བློན་གྱི་འགན་ཁུར་ཞུས་ཏེ་ཡུལ་དེའི་ལོ་རྒྱུས་ཁྲོད་སྲིད་བློན་གྱི་ལས་ཁུར་རྒྱུན་རིང་ཤོས་གནང་མཁན་དེ་ཆགས་ཡོད་པ་རེད།

རྒྱ་ནག་ནང་ཤོག་དཀར་གསར་བརྗེའི་ལས་འགུལ་བྱུང་།

People hold white sheets of paper in protest against COVID-19 restrictions in Beijing on Sunday. | REUTERS

འདས་པའི་ལོ་གསུམ་ལྷག་གི་རིང་རྒྱ་ནག་གི་གྲོང་ཁྱེར་ཝུའུ་ཧན་ནས་མཆེད་པའི་ཏོག་དབྱིབས་རིམས་ནད་ཀྱིས་འཛམ་གླིང་གི་འཕྲོད་བསྟེན་དང་དཔལ་འབྱོར་མ་ལག་དང་བཅས་པར་བརྡབ་གསིག་ཆེན་པོ་བཟོས་ཡོད་ནའང་། འདི་ལོ་ནས་འཛམ་གླིང་རྒྱལ་ཁབ་ཕལ་ཆེ་བས་ནད་ཡམས་འགོག་སྲུང་གི་ཐབས་ལམ་སྤྱད་དེ་རྒྱུན་ལྡན་གྱི་འཚོ་བར་ཕྱིར་ལོག་ཟིན་ཡོད་ནའང་། འདི་ལོའི་ཕྱི་ཟླ་ ༡ པོ་ནས་ཝུའུ་ཧན་གྲོང་ཁྱེར་ནས་འགོ་བཙུགས་ཏེ་རིམ་པས་ཧྲང་ཧེ་དང་ཤིན་ཅང་། བོད་གཙོས་པའི་རྒྱ་ནག་གི་གྲོང་ཁྱེར་དང་ས་ཁུལ་ཕལ་ཆེ་བར་ཏོག་དབྱིབས་ནད་ཡམས་བསྐྱར་དུ་འགོས་ཁྱབ་བྱུང་རྐྱེན། རྒྱ་ནག་གཞུང་གིས་ཏོག་དབྱིབས་ནད་ཡམས་རྩ་མེད་དམ་ཏོག་དབྱིབས་གཙང་སེལ་ཟེར་བའི་སྲིད་ཇུས་ལག་བསྟར་ནན་པོ་བྱས་ཏེ། མང་ཚོགས་བྱིངས་ལ་དཔལ་འབྱོར་དང་འགྲིམ་འགྲུལ་སོགས་ཀྱི་ཐད་ལ་དཀའ་ངལ་ཤུགས་ཆེན་བྱུང་བར་བརྟེན། པེ་ཅིང་གི་སི་ཊོང་ཟམ་ཆེན་དང་ལྷ་ས། ཧྲང་ཧེ་སོགས་ཀྱི་ནང་གཞུང་རྒོལ་ལས་འགུལ་བྱུང་ཡོད་པ་མ་ཟད། འདི་ལོའི་ཕྱི་ཟླ་ ༡༡ ཚེས་ ༢༤ ཉིན་ཤིན་ཅང་གི་རྒྱལ་ས་ཨུ་རུམ་ཆི་ནང་ཏོག་དབྱིབས་ནད་ཡམས་ཀྱི་ཁྱིམ་སྡོད་བཀག་སྡོམ་འོག་ཡོད་པའི་ཁང་རྩེག་ཅིག་ལ་མེ་ཤོར་ཏེ་མི་གྲངས་ ༡༠ རྐྱེན་འདས་དང་། མི་ ༡༠ ལྷག་རྨས་སྐྱོན་བཟོས་པར་བརྟེན། རྒྱ་ནག་གི་དཔལ་འབྱོར་ལྟེ་བའི་གྲོང་ཁྱེར་ཧྲང་ཧེ་དང་པེ་ཅིན་སོགས་ནས་མགོ་བཙུགས་ཏེ། ནན་ཅིན་དང་། ཞི་ཨན། ཁྲིན་ཏུའུ། ཀང་ཀྲུའུ། ཝུའུ་ཧན་སོགས་ཉུང་མཐར་གྲོང་ཁྱེར་ཁག་་ ༢༦ ལྷག་གི་ནང་དུ། གཙོ་བོ་སློབ་མས་སྣེ་ཁྲིད་དེ་ལག་ཏུ་ཤོག་སྟོང་བཟུང་ནས་ཏོག་དབྱིབས་བཀག་སྡོམ་ཀློད་དགོས། ཞི་ཅིན་ཕིང་གོ་གནས་ནས་ཕབ་དགོས། དབང་ཆ་གཅིག་སྡུད་ཀྱི་དམར་ཤོག་གཞུང་མེད་པ་བཟོ་དགོས་ཞེས་པ་སོགས་ཀྱི་འབོད་ཚིག་བསྒྲགས་ཏེ་མི་མང་གི་གཞུང་རྒོལ་ལས་འགུལ་རབ་དང་རིམ་པ་སྤེལ་བར་བརྟེན། ཕྱི་ཟླ་ ༡༢ ཚེས་ ༡༠ ཡས་མས་ནས་སྤྱི་ཡོངས་ཀྱི་བཀག་སྡོམ་ཀློད་དེ་མི་མང་གིས་སོ་སོར་འགན་ཁུར་དགོས་པའི་སྐོར་གྱི་དོན་ཚན་ ༡༠ ཅན་ཞིག་བསྒྲགས། བཀག་སྡོམ་གློ་བུར་དུ་ཀློད་རྗེས་རྒྱལ་ཡོངས་སུ་ཏོག་དབྱིབས་འགོས་ཁྱབ་ཤུགས་ཆེན་འགྲོ་བཞིན་ཡོད་པ་རེད།

ཨ་རིའི་བར་མའི་འོས་བསྡུར་རྒྱལ་ཕམ་གྱི་ཁྱད་པར་ཆེན་པོ་མ་བྱུང་།

A voter casts their ballot at the Hillel Foundation on Nov. 8, 2022, in Madison, Wis. (Photo by Jim Vondruska/Getty Images)

འདི་ལོའི་ཕྱི་ཟླ་ ༡༡ ཚེས་ ༨ ཉིན་ཨ་རིའི་བར་མའི་འོས་བསྡུ་ཆེན་མོ་བྱས་ཡོད་ཅིང་། ཐེངས་འདིའི་འོས་བསྡུའི་ཁྲོད་འདས་པའི་ལོ་ངོ་གཉིས་དང་ཕྱེད་ཀའི་རིང་ཨ་རིའི་གཞུང་འཛིན་དམངས་གཙོ་ཚོགས་པའི་སྟངས་འཛིན་འོག་ཡོད་པའི་གྲོས་ཚོགས་གོང་འོག་གཉིས་ནས་གྲོས་ཚོགས་གོང་མ་མ་གཏོགས། གྲོས་ཚོགས་འོག་མ་དེ་སྤྱི་མཐུན་ཚོགས་པའི་ལག་ལ་ཤོར་ཡོད་ཅིང་། དེ་ནི་མ་འོངས་ལོ་གཉིས་དང་ཕྱེད་ཀའི་རིང་སྲིད་འཛིན་བྷའེ་ཌིན་སྲིད་གཞུང་ལ་གནད་དོན་ཆེ་ཁག་རིགས་ཐག་གཅོད་དང་ལག་བསྟར་བྱ་རྒྱུའི་འགག་རྡོ་ལྟ་བུར་གྱུར་ཡོད། ཨ་རིའི་དབུས་འོས་བསྡུ་ལས་ཁང་གི་གསལ་བསྒྲགས་ལྟར་ན། འདི་ལོའི་བར་མའི་འོས་བསྡུའི་ཁྲོད་གྲོས་ཚོགས་གོང་མའི་ནང་དམངས་གཙོ་ཚོགས་པར་ཞབས་བཀྱག་ ༤༩ དང་སྤྱི་མཐུན་ཚོགས་པར་ ༤༩ ཞེས་འདྲ་མཉམ་བྱུང་ཡོད་ནའང་། ལྷག་འཕྲོ་རང་དབང་ཅན་གྱི་འཐུས་མི་ ༢ དེ་དམངས་གཙོ་ཚོགས་པའི་ཕྱོགས་སུ་ཟླ་སྒྲིལ་བྱས་པའི་རྐྱེན་གྱིས་གྲོས་ཚོགས་གོང་མ་དམངས་གཙོ་ཚོགས་པར་ཐོབ་པ་དང་། གྲོས་ཚོགས་འོག་མའི་ནང་སྤྱི་མཐུན་ཚོགས་པར་ཞབས་བཀྱག་ ༢༢༢ དང་། དམངས་གཙོ་ཚོགས་པར་ཞབས་བཀྱག་ ༢༡༣ ཐོབ་པ་བཅས་སྤྱི་མཐུན་ཚོགས་པའི་སྟངས་འཛིན་འོག་ཤོར་ཡོད་པ་དང་། གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་གིས་མུ་མཐུད་ཚོགས་གཙོ་གནང་རྒྱུ་མིན་པའི་གསལ་བསྒྲགས་གནང་།

ཐུན་མོང་དུ་གནང་བའི་ཕྱི་ལོ་ ༢༠༢༢ ལོའི་ནོ་སྦེལ་གཟེངས་རྟགས།

Nobel Prize award ceremony in Konserthuset Stockholm, 10 December 2022. © Nobel Prize Outreach. Photo: Nanaka Adachi

འདི་ལོའི་ཕྱི་ཟླ་ ༡༢ ཚེས་ ༡༠ ཉིན་སེ་ཝི་ཌན་གྱི་རྒྱལ་ས་སི་ཀྲོག་ཧོམ་དུ་འདི་ལོའི་ནོ་སྦེལ་གཟེངས་རྟགས་འབུལ་བཞེས་ཀྱི་མཛད་སྒོ་བསྡུས་ཡོད་པ་དང་། འདི་ལོའི་ནོ་སྦེལ་ཞི་བདེའི་གཟེངས་རྟགས་དེ་ཉིད་ཡུ་རོབ་ཤར་མའི་རྒྱལ་ཁབ་བྷེ་ལེ་རུ་སི་(Belarus) ཡི་དམངས་གཙོའི་ལས་འགུལ་བ་སྐུ་ཞབས་ཨེ་ལེ་སི་བྷའེ་ལའེ་ཊི་སི་ཀི་(Ales Bialiatski)དང་། ཨུ་རུ་སུར་རྟེན་གཞི་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་སྡེ་མེ་མོ་རི་ཡལ་(Memorial)དང་ཡུ་ཀེ་རེན་དུ་རྟེན་གཞི་བྱས་པའི་སྤྱི་དམངས་རང་དབང་བསྟི་གནས་ཁང་ཞེས་པའི་ཚོགས་པ་བཅས་གསུམ་ལ་ཕུལ་ཡོད་ཅིང་། འདི་ལོའི་རྩོམ་རིག་བྱ་དགའ་དེ་ཧྥ་རན་སིའི་རྩོམ་པ་པོ་ཨེ་ནི་ཨར་ནེག་སི་ (Annie Ernaux) ལ་ཕུལ་ཡོད། དེ་བཞིན་དངོས་ཁམས་རིག་པའི་གཟེངས་རྟགས་དེ་ཉིད་དངོས་ཁམས་རིག་པ་སྨྲ་བ་ཨེ་ལེན་ཨེ་སི་པེག་ (Alain Aspect) དང་། ཨེན་ཊོན་ཛེ་ལིན་གར་ (Anton Zellinger)། ཨ་རིའི་དངོས་ཁམས་གཞུང་ལུགས་སྨྲ་བ་ཇོན་ཀོ་ལོ་སར་ (John Clauser) བཅས་གསུམ་ལ་ཕུལ་ཡོད། གཞན་ཡང་། རྫས་འགྱུར་གྱི་གཟེངས་རྟགས་དེ་ལྕམ་ཁེ་རོ་ལིན་བྷེར་ཊོ་ཛི་ (Carolyn R. Bertozzi) དང་། སྐུ་ཞབས་ཀཱལ་བྷེ་རི་ཤར་པེ་ལེ་སི་ (Karl Barry Sharpiess)། སྐུ་ཞབས་མོར་ཊན་མེལ་ཌལ་ (Morten P. Meldal) བཅས་གསུམ་ལ་ཕུལ་འདུག དཔལ་འབྱོར་རིག་པའི་གཟེངས་རྟགས་དེ་ཡང་སྐུ་ཞབས་ཕི་ལིབ་ཌའེ་ཝིག་ (Philip H. Dybvig)དང་། ཌོག་ལ་སི་ཌའེ་མོན་ཌི་ (Douglas Diamond)། སྐུ་ཞབས་བྷེན་བྷར་ནེན་ཀེ་ (Ben S. Bernanke) བཅས་གསུམ་ལ་ཕུལ། སྨན་གྱི་གཟེངས་རྟགས་དེ་ཉིད་སི་ཝེ་ཌན་ནས་ཡིན་པའི་རིགས་རྫས་འཕེལ་རིམ་གྱི་ཐོག་ལ་ཕྱག་ལས་ཤུགས་ཆེར་གནང་མཁན་སྐུ་ཞབས་སི་ཊན་ཏེ་པཱ་བོ་ (Svante Paabo) ལ་ཕུལ་ཡོད་པ་རེད་འདུག་ལ། འདི་ལོའི་གཟེངས་རྟགས་རྣམས་ལས་སྨན་མ་གཏོགས་གཞན་ཚང་མ་མི་སྒེར་དང་ཚོགས་པ་སོགས་ལ་ཐུན་མོང་དུ་གནང་འདུག

ཨར་ཇན་ཊི་ན་ཡིས་འཛམ་གླིང་རྐང་སྤོལ་གྱི་གསེར་བུམ་ཐེངས་གསུམ་པ་བཀྱགས།

Argentina’s Lionel Messi holds up the trophy after winning the World Cup final soccer match between Argentina and France at the Lusail Stadium in Lusail, Qatar, Sunday, Dec.18, 2022. (AP Photo/Manu Fernandez)

འདི་ལོའི་ཕྱི་ཟླ་ ༡༡ ཚེས་ ༢༠ ནས་ཟླ་ ༡༢ ཚེས་ ༡༨ བར་དཀྱིལ་ཤར་ཨེ་ཤ་ཡའི་རྒྱལ་ཁབ་ཀ་ཊར་ནང་ལོ་བཞི་རེའི་མཚམས་སུ་རྩེད་སྲོལ་ཡོད་པའི་འཛམ་གླིང་གསེར་འབུམ་གྱི་རྐང་སྤོལ་རྩེད་འགྲན་ཆེན་མོ་བསྡུས་ཡོད་ཅིང་། ཐོག་མའི་རྩེད་འགྲན་གྱི་རྒྱལ་ཁབ་ ༣༢ ཁྲོད་ནས་མཐའ་མའི་བཅུ་དྲུག་ནང་དུས་རྒྱུན་སྐད་གྲགས་ཆོད་པའི་འཇར་མན་ནི་ཚུད་མེད་ཀྱང་ཨེ་ཤ་ཡའི་རྒྱལ་ཁབ་ལྷོ་ཀོ་རི་ཡ་དང་ཉི་ཧོང། ཨ་ཧྥེ་རི་ཀའི་རྒྱལ་ཁབ་མོ་རོ་ཁོ་(Morocco) བཅས་ཚུད་པ་མ་ཟད། རྩེད་འགྲན་གྱི་སྐབས་སུ་ཐོབ་ཤག་ཡིན་པའི་ཨར་ཇན་ཊི་ན་དང་འཇར་མན་ནེའི་རུ་ཁག་གཉིས་ཉི་ཧོང་རྩེད་འགྲན་པ་དང་སོ་དྷའེ་ཨ་རབ་བྷིན་གྱི་ལག་ནས་ཕམ་པ་སོགས་ཅུང་ཡ་མཚན་པའི་གནས་ཚུལ་ཁག་ཅིག་བྱུང་། ཕྱི་ཚེས་ ༡༨ ཉིན་ལྷོ་ཨ་མེ་རི་ཁའི་རྒྱལ་ཁབ་ཨར་ཇན་ཊི་ན་དང་ཕ་རན་སིའི་རུ་ཁག་བར་རྟིང་རྩོད་འགྲན་སྡུར་ཚ་བེར་བ་བྱས་མཐར་ཨར་ཇན་ཊི་ན་ལ་རྒྱལ་ཁ་ཐོབ་པ་དང་། ཨར་ཇན་ཊི་ནའི་རྩེད་འགྲན་པ་གྲགས་ཅན་མེ་སི་ལ་རྩེད་འགྲན་པ་ཡག་ཤོས་གསེར་གྱི་སྤོ་ལོ་ཐོབ་པ་དང་། ཧྥ་རན་སིའི་རྩེད་འགྲན་པ་ཨེམ་པ་པེ་ལ་སྤོ་ལོ་མང་ཤོས་ལྡུག་མཁན་གྱི་བྱ་དགའ་གསེར་ལྷམ་ཐོབ། དེ་བཞིན་ཨར་ཇན་ཊི་ནའི་སྒོ་ར་བ་མ་ཊི་ནོ་སི་( Emiliano Martínez)ལ་གསེར་གྱི་ལག་ཤུབ་ (golden gloves)། ཨར་ཇིན་ཊི་ནའི་རྩེད་འགྲན་པ་ཧྥ་ནན་ཌ་སི་(Enzo Fernández) ལ་ལོ་ཆུང་རྩེད་འགྲན་པ་ཡག་ཤོས་ཀྱི་བྱ་དགའ་ཐོབ་ཡོད་པ་རེད། སྙན་གྲགས་ཅན་གྱི་རྩེད་འགྲན་པ་མེ་སི་ཡི་མགོ་པར་ཨར་ཇན་ཊི་ནའི་དངུལ་ལོར་འགོད་དགོས་པའི་རེ་སྐུལ་བྱས་པ་ལྟར་ཡུལ་དེའི་དབུས་དངུལ་ཁང་གིས་བསམ་བློ་གཏོང་གི་ཡོད་པར་བཤད།