སྤུ་ཧྲེང་རྫོང་ཁུལ་གྱི་གནམ་ཐང་གསར་རྒྱག་བྱས་ཚར་གྲབས་ཡོད་འདུག

རྒྱ་ནག་གཞུང་གིས་འདི་ལོའི་ལོ་མཇུག་ཏུ་སྤུ་ཧྲེང་ཁུལ་གྱི་གནམ་ཐང་གསར་རྒྱག་ཚར་བ་བྱས་ཏེ་འགྲིམ་འགྲུལ་བ་རྣམས་ཤར་གཏོང་བྱ་རྒྱུ་ཡིན་འདུག

ཉེ་བའི་ལོ་ཤས་ནས་རྒྱ་ནག་གཞུང་གིས་བོད་ཀྱི་མཐའ་མཚམས་ཁུལ་དུ་གནམ་ཐང་དང་མེ་འཁོར་ལྕགས་ལམ་སོགས་འཛུགས་སྐྲུན་བྱེད་བཞིན་ཡོད་པ་ལྟར། ཉེ་ལམ་རྒྱ་ནག་གཞུང་གིས་འདས་པའི་ལོ་ཤས་རིང་བོད་མངའ་རིས་སྤུ་ཧྲེང་རྫོང་ཁོངས་ཀྱི་རི་གོང་གྲོང་རྡལ་དུ་གསར་འཛུགས་བྱེད་བཞིན་པའི་གནམ་ཐང་དེའི་འཛུགས་སྐྲུན་གྱི་ལས་གཞི་འགྲུབ་གྲབས་ཡོད་པ་མ་ཟད། འདི་ལོའི་ལོ་མཇུག་ནས་མངའ་རིས་རྫོང་ཁོངས་ཀྱི་མངའ་ལམ་གསར་པ་དེ་བརྒྱུད་འགྲིམ་འགྲུལ་བ་རྣམས་ཤར་གཏོང་བྱ་རྒྱུ་ཡིན་འདུག

འདི་གའི་གསར་འགོད་པར་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས། རྒྱ་ནག་གཞུང་གིས་ཧིན་བོད་མཐའ་མཚམས་སུ་ཁེལ་བའི་བོད་མངའ་རིས་སྤུ་ཧྲེང་ཁུལ་གྱི་རི་གོང་གྲོང་རྡལ་དུ་གསར་འཛུགས་བྱེད་མུས་ཡིན་པའི་གནམ་ཐང་དེ། ཕྱི་ལོ ༢༠༡༨ ལོ་ནས་རྒྱ་ནག་གཞུང་གིས་བོད་ལྷུན་རྩེ་དང་དིང་རི། སྤུ་ཧྲེང་བཅས་ཀྱི་ནང་གནམ་ཐང་གསུམ་གསར་དུ་བསྐྲུན་རྒྱུའི་ལས་གཞི་གཏན་འབེབ་བྱས་རྗེས། སྤུ་ཧྲེང་རྫོང་ཁུལ་དུ་གནམ་ཐང་གསར་རྒྱག་གི་ལས་གཞི་ལག་བསྟར་བྱེད་མགོ་བཙུགས་ཡོད་ཀྱང་། བོད་ནང་དུ་རིམས་ནད་ཁྱལ་གདལ་ཤུགས་ཆེན་ཕྱིན་ནས་ཐེམ་སྤང་བཀག་རྒྱ་ཡུན་རིང་བསྡམས་པས། ད་ལྟ་བར་ལྷག་ཡོད་པ་ལས། རྒྱ་ནག་གཞུང་གིས་མངའ་རིས་སྤུ་ཧྲེང་ཁུལ་གྱི་གནམ་ཐང་གསར་པ་དེ་ ༢༠༢༣ ལོར་འཛུགས་སྐྲུན་གྱི་ལས་གཞི་ཡོངས་སུ་ཚར་བ་བྱས་ནས། འགྲུམ་འགྲིལ་བ་རྣམས་མངག་གཏོང་བྱེད་པའི་འཆར་གཞི་ཡོད་སྐོར་སོགས་འགྲེལ་བརྗོད་བྱས་བྱུང་།

ཡང་ཁོང་གིས། ད་ལྟ་གནམ་ཐང་དེའི་འགྲིམ་འགྲུལ་བ་རྣམས་ཀྱི་ལག་ཁྱེར་ལྟ་ཞིབ་བྱེད་སའི་ཁང་པའི་རིགས་མ་གཏོགས་གནམ་གྲུའི་རྒྱུགས་ལམ་སོགས་ཡོངས་སུ་གྲུབ་ཟིན་ཡོད་པ་དང་། ཉེ་ལམ་གནམ་ཐང་འཛུགས་སྐྲུན་གྱི་ཆེད་ལས་མི་རྣམས་ཀྱིས་ཉིན་མཚན་མེད་པར་རྡོ་སྐྱེལ་རླངས་འཁོར་ཉིས་བརྒྱ་ཡས་མས་མངག་གཏོང་བྱས་ནས་ལས་ཀ་བྱས་དང་བྱེད་མུས་ཡིན་པས། འཛུགས་སྐྲུན་གྱི་ལས་གཞི་དག་མགྱོགས་པོ་འགྲུབ་ཟིན་ལ་ཉེ་ཡོད་སྐོར་དང་། རྒྱ་ནག་གཞུང་གིས་བོད་སྤུ་ཧྲེང་ཁུལ་དུ་གནམ་ཐང་གསར་འཛུགས་ཀྱི་ལས་གཞིའི་ཁྲོད། ས་རྡོ་སྐྱེལ་འདྲེན་གྱི་རླངས་འཁོར་ཡོད་པའི་ས་གནས་བོད་མི་ཚོ་ལའང་ལས་ཀ་བྱེད་དུ་བཅུག་ཡོད་སྐོར་སོགས་ཀྱང་བརྗོད་བྱུང་།

ཕྱི་ལོ་ ༢༠༢༡  ཟླ་ ༤ ཚེས ༡༠ ཉིན་རྒྱ་ནག་གཞུང་གིས་བོད་ལྷུན་རྩེ་དང་དིང་རི། སྤུ་ཧྲེང་བཅས་ཀྱི་ནང་གནམ་ཐང་གསུམ་གསར་དུ་བསྐྲུན་རྒྱུ་ཆོག་མཆན་ཐོབ་ཡོད་པ་དང་། ལྷོ་ཁ་ལྷུན་རྩེའི་གནམ་ཐང་དེ་རྒྱ་ནག་པེ་ཅིན་གནམ་ཐང་བཟོ་ལས་ཁང་ཟེར་བ་ཞིག་གིས་འཛུགས་སྐྲུན་བྱ་རྒྱུ་དང་། ཧྲང་ཧེ་གནམ་ཐང་བཟོ་ལས་ཁང་གིས་གཞིས་ཀ་རྩེའི་གནམ་ཐང་། ནུབ་རྒྱུད་གནམ་ཐང་མཉམ་ལས་ཁང་ཟེར་བ་ཞིག་གིས་མངའ་རིས་ཀྱི་གནམ་ཐང་གི་ལས་གཞིའི་འགན་བླངས་ཡོད་འདུག ལྷུན་རྩེའི་གནམ་ཐང་དང་སྤུ་ཧྲེང་གནམ་ཐང་གཉིས་བོད་རང་སྐྱོང་ལྗོངས་ཟེར་བའི་ནང་ཁུལ་ལ་འཕུར་སྐྱོད་དང་། དིང་རིའི་གནམ་ཐང་ནས་བོད་རང་སྐྱོང་ལྗོངས་ཟེར་བའི་ནང་དང་། དེ་བཞིན་ཁྲིན་ཏུའུ་དང་། ཁུན་མིང་། ཞི་ཨན་བཅས་རྒྱ་ནག་ནང་དུའང་འཕུར་སྐྱོད་བྱ་རྒྱུ་ཡིན་འདུག་ལ། གནམ་ཐང་གསར་རྒྱག་གི་ལས་གཞིའི་ཆེད་རྒྱ་ནག་གཞུང་གིས་རྒྱ་སྒོར་དུང་ཕྱུར་ ༡༣༦ གི་མ་དངུལ་གཏོང་རྒྱུའི་འཆར་གཞི་ཡོད་འདུག

རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་། ལྷ་སའི་གོང་དཀར་གནམ་ཐང་དང་།  ཉིང་ཁྲིའི་སྨན་ལིང་གནམ་ཐང། ཆབ་མདོའི་པན་ཌ་གནམ་ཐང་། མངའ་རིས་གནམ་ཐང་། གཞིས་ཀ་རྩེའི་ཞི་བདེ་གནམ་ཐང་། ནག་ཆུའི་གནམ་ཐང་བཅས་འཛུགས་སྐྲུན་བྱས་ཡོད་ཅིང་། རྒྱ་ནག་གཞུང་གིས་བོད་ཀྱི་མཐའ་མཚམས་ཁུལ་སོགས་སུ་གནམ་ཐང་གསར་རྒྱག་བྱས་པ་དེས། ཧིན་བོད་མཐའ་མཚམས་སོགས་སུ་ཛ་དྲག་གི་གནས་ཚུལ་བྱུང་ཕྲལ། དམག་དཔུང་དབོར་འདྲེན་དང་མཚོན་ཆའི་རིགས་དབོར་འདྲེན་སྟབས་བདེ་ཡོང་ཆེད་དང་། བོད་ནང་དུ་རྒྱ་རིགས་མང་པོ་ཞིག་གནས་སྤོར་སོགས་བདེ་བའི་ཆེད་དུའང་ཡིན་འདུག

གསར་འགོད་པ། དཔལ་ལྡན།