ཅེག་སྤྱི་མཐུན་རྒྱལ་ཁབ་ཀྱི་འདེམས་ཐོན་སྲིད་འཛིན་གསར་པར་འཚམས་འདྲི་ཞུས་པ།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་པ་སྒྲོལ་མ་ཚེ་རིང་མཆོག་རྣམ་གཉིས་ནས་ཅེག་སྤྱི་མཐུན་རྒྱལ་ཁབ་ཀྱི་གསར་དུ་འདེམས་ཐོན་བྱུང་བའི་སྲིད་འཛིན་པེ་ཌར་པཱ་ཝལ་ (Petr Pavel)མཆོག་ལ་ཁོང་གིས་སྲིད་འཛིན་ཟུར་པ་མཆོག་གི་རླབས་ཆེན་གྱི་མཛད་རྗེས་རྒྱུན་སྐྱོང་གནང་ཐུབ་པའི་སྨོན་འདུན་ཞུས་འདུག

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་མང་གི་ཚབ་བྱས་ཏེ་སྐུ་ཉིད་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དུ་འདེམས་ཐོན་བྱུང་བར་རྟེན་འབྲེལ་ཞུ། ཅེག་སྤྱི་མཐུན་རྒྱལ་ཁབ་ཀྱིས་འཛམ་བུ་གླིང་གི་རྒྱལ་ཁབ་གང་དུའང་མེད་པའི་དམངས་གཙོའི་ལམ་ལུགས་ཀྱི་རིན་ཐང་དང་། རྩ་དོན་གཞིར་བཟུང་ཐོག་དབུ་ཁྲིད་ལམ་སྟོན་གནང་ཡོད་ཅིང་། སྐུ་ཉིད་ཀྱིས་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་གྱི་ལས་ཡུན་རིང་འགྲོ་བ་མིའི་ཐོབ་ཐང་དང་། དམངས་གཙོའི་རང་དབང་གི་ལས་དོན་མུ་མཐུད་དུ་གོང་འཕེལ་གྱིས་གཞན་གྱི་དཔེ་མཚོན་དུ་འགྱུར་བའི་གདེང་སྤོབས་ཡོད། སྐུ་ཉིད་ཀྱིས་སྲིད་འཛིན་ཟུར་པ་མཆོག་གི་རླབས་ཆེན་གྱི་མཛད་རྗེས་རྒྱུན་སྐྱོང་བྱེད་ཐུབ་པ་མ་ཟད། ཡུ་རོབ་གླིང་དང་འཛམ་གླིང་ཡོངས་སུ་ཞི་བདེའི་ལས་དོན་དོན་སྨིན་ཡོང་བའི་རེ་འདུན་ཞུ་ཞེས་གསུངས་འདུག

དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་གིས་འཚམས་འདྲི་གནང་བའི་ནང་། ངས་བོད་མི་མང་སྤྱི་འཐུས་དང་བོད་མི་ཡོངས་ཀྱི་ཚབ་བྱས་ཏེ། སྐུ་ཉིད་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དུ་འོས་འདེམས་བྱུང་བར་ལྷག་བསམ་རྣམ་དག་གིས་རྟེན་འབྲེལ་ཞུ། ༧གོང་ས་མཆོག་དང་སྲིད་འཛིན་ཟུར་པ་ཝཱ་ཁི་ལཱ་ཝ་ཧཱ་ཝལ་མཆོག་གཉིས་ཀྱི་རྒྱུན་རིང་བའི་མཛའ་བཤེས་ཀྱིས་བོད་དང་ཅེག་སྤྱི་མཐུན་རྒྱལ་ཁབ་བར་དུ་འབྲེལ་ལམ་ཟབ་མོ་བྱུང་ཡོད། སྐུ་ཉིད་ཀྱི་སྲིད་འཛིན་ལས་ཡུན་རིང་སྲིད་འཛིན་ཟུར་པ་ཝཱ་ཁི་ལཱ་ཝ་ཧཱ་ཝལ་མཆོག་གི་འགྲོ་བ་མིའི་ཐོབ་ཐང་གི་རིན་ཐང་དང་། དྲང་བདེན། རིག་གཞུང་ཤུལ་བཞག་བཅས་ལ་ཅེག་སྤྱི་མཐུན་རྒྱལ་ཁབ་ཀྱི་ནང་དུ་རྒྱུན་སྐྱོང་གནང་བའི་རེ་བཞག་ཡོད། ཅེག་སྤྱི་མཐུན་རྒྱལ་ཁབ་ཀྱིས་བོད་དོན་ཐོག་དུས་ཡུན་རིང་བོར་རྒྱབ་སྐྱོར་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་དང་། སྐུ་ཉིད་ཀྱིས་ཅེག་སྤྱི་མཐུན་རྒྱལ་ཁབ་ཀྱི་རེ་འདུན་བཞིན་བྱ་བཞག་ཐམས་ཅད་འབྲས་བུ་གཡུར་དུ་ཟ་བའི་སྨོན་འདུན་ཞུ། ཞེས་གསུངས་འདུག

ཕྱི་ཟླ་ ༡ ཚེས ༢༨ ཉིན་སྐུ་ཞབས་པེ་ཊར་པཱ་ཝལ་མཆོག་ཅེག་རྒྱལ་ཁབ་ཀྱི་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་པ་གསལ་བསྒྲགས་གནང་ཡོད་པ་དང་། འདི་ལོའི་ཕྱི་ཟླ་ ༣ ཚེས་ ༩ ཉིན་སྲིད་འཛིན་གྱི་དམ་འབུལ་མཛད་སྒོ་བསྡུ་འཆར་ཡོད་འདུག ཁོང་ནི་ཅེག་སྤྱི་མཐུན་རྒྱལ་ཁབ་ཀྱི་འདེམས་ཐོན་སྲིད་འཛིན་སྐབས་བཞི་པ་དང་། དམག་མིའི་ཁྱིམ་རྒྱུད་ཀྱི་རྒྱབ་ལྗོངས་ཡོད་པའི་སྲིད་འཛིན་གཉིས་པ་དེ་ཆགས་ཡོད་འདུག ཁོང་ཕྱི་ལོ་ ༡༩༦༡ ལོའི་ཟླ་ ༡༡ ཚེས་ ༡ ཉིན་པ་ལཱ་ནཱ་རུ་དམག་མིའི་ཁྱིམ་རྒྱུད་ཞིག་ཏུ་སྐྱེས་ཤིང་། འཛིན་རིམ་བཅུ་གཉིས་སློབ་མཐར་ཕྱིན་རྗེས་ཅེག་མི་མང་དམག་མིར་ཞུགས་པ་དང་། ཕྱི་ལོ་ ༡༩༨༥ ལོར་ཅེག་སྤྱི་མཐུན་ཚོགས་པའི་ནང་དུ་ཞུགས། ཝེལ་ཝེ་ཊ་གསར་བརྗེའི་སྐབས་སུ་ཁོང་ཅེག་དམག་མིའི་ཁོངས་སུ་འཛུལ་ཏེ། ཅེག་དང་སི་ལོ་ཝཱ་ཁི་གཉིས་ཀྱི་དམག་མི་མཉམ་འབྲེལ་ཀྱིས་ཁི་རོ་ཌི་ཡ་རུ་ཧྥ་རན་སི་དམག་མི་མཐར་སྐྲོད་གཏོང་སྐབས་པཱ་ཝལ་ལགས་ལ་སྐད་གྲགས་རྒྱས་ཏེ་རྒྱལ་སྤྱིའི་ཐོག་ཁོ་རང་ངོ་ཤེས་པར་གྱུར། ཕྱི་ལོ ༢༠༡༢ ནས་ ༢༠༡༥ བར་ཅེག་རྒྱལ་ཁབ་ཀྱི་དམག་སྤྱི་གནང་བ་མ་ཟད། ཕྱི་ལོ་ ༢༠༡༥ ནས་ ༢༠༡༨ བར་དུ་བྱང་ཆིངས་མཉམ་འབྲེལ་སྒྲིག་འཛུགས་(NATO) ཀྱི་དམག་དོན་དབུ་ཁྲིད་དུ་འདེམས་ཐོན་བྱུང་འདུག  ཁོང་གིས་བྱང་ཆིངས་མཉམ་འབྲེལ་སྒྲིག་འཛུགས་ཀྱི་མཐུན་འགྱུར་འོག་ཡུ་རོབ་གླིང་དུ་་ཡུ་ཁི་རིན་ལ་རྒྱབ་སྐྱོར་བྱེད་དགོས་པའི་གླེང་སློང་ཤུགས་ཆེན་བྱས་ཡོད་འདུག

གསར་འགོད་པ། བྱམས་པ་ཚེ་རིང་།