བོད་ཀྱི་བུ་མོ་ཀླུ་མོ་མཚོས་ཨི་ཊ་ལིའི་འདུར་རྒྱུག་འགྲན་བསྡུར་ཁྲོད་ཨང་དང་པོ་དང་གཡང་འབུམ་བཀྲ་ཤིས་ཀྱིས་ཨང་བདུན་པ་སོ་སོར་བླངས།
ཉེ་ལམ་ཡུ་རོབ་རྒྱལ་ཁབ་ཨི་ཊ་ལིའི་མེ་ལཱ་རྫོ་ (Milazzo) གྲོང་ཁྱེར་དུ་འཚོགས་པའི་སི་པན་དང་རྒྱ་ནག ཨི་ཊ་ལི་བཅས་ཀྱི་འདུར་རྒྱུག་འགྲན་བསྡུར་ཁྲོད། བོད་ཀྱི་བུ་མོ་ཀླུ་མོ་མཚོས་ཆུད་ཚོད་གཉིས་དང་སྐར་མ་ ༤༦་དང་སྐར་ཆ་ ༠༨ ཀྱི་ཐོག་ནས་སྐྱེས་མའི་སྤྱི་ལེ་ ༣༥ ཡི་འགྲན་བསྡུར་ལས་ཨང་དང་པོ་བླངས་ཡོད་པ་དང་། སྐྱེས་པའི་སྤྱི་ལི་ ༢༠ ཡི་འགྲན་བསྡུར་ཁྲོད་བཀྲ་ཤིས་གཡང་འབུམ་གྱིས་ཆུ་ཚོད་གཅིག་དང་སྐར་མ་ ༢༩ དང་སྐར་ཆ་ ༡༣ ཐོག་ནས་ཨང་དྲུག་པ་བླངས་ཡོད་པ་རེད།
རྒྱལ་སྤྱིའི་རྩེད་འགྲན་མཐུན་ཚོགས་ཀྱི་དྲ་རྒྱ་ལྟར་ན། ཐེངས་འདིའི་འགྲན་བསྡུར་ཁྲོད་མཉམ་ཞུགས་བྱས་ཏེ་ཨང་པོའི་རྒྱལ་ཁ་ཐོབ་པའི་བོད་ཀྱི་བུ་མོ་ཀླུ་མོ་མཚོ་ཕྱི་ལོ་ ༡༩༩༢ ཟླ་ ༡༠ ཚེས་ ༢༠ ཉིན་སྐྱེས་ཤིང་། ཁོ་མོ་སྔ་གཞུག་ཏུ་རྒྱ་ནག་དང་རྒྱལ་སྤྱིའི་རིམ་པའི་འགྲན་བསྡུར་གང་མང་གི་ཁྲོད་མཉམ་ཞུགས་བྱས་ཡོད་པ་དང་། ཕྱི་ལོ་ ༢༠༡༩ ལོར་རྒྱ་ནག་རྒྱལ་ཡོངས་ཀྱི་སྐྱེས་མའི་སྤྱི་ལེ་ ༥༠ འགྲན་བསྡུར་ཁྲོད་ཨང་གཉིས་པ་བླངས། ཡང་ལོ་དེར་ཁ་ཊར་རྒྱལ་ཁབ་ཏུ་འཚོགས་པའི་རྒྱལ་སྤྱིའི་རྒྱུག་མཆོངས་འཕེན་གསུམ་གྱི་འགྲན་བསྡུར་ལས་སྐྱེས་མའི་སྤྱི་ལེ་ ༥༠ འདུར་རྒྱུག་ཁྲོད་དངུལ་གྱི་རྟགས་མ་དང་ཕྱི་ལོ་ ༢༠༢༢ ལོར་ཨ་རིའི་རྒྱལ་སྤྱིའི་སྐྱེས་མའི་སྤྱི་ལེ་ ༣༥ ཡི་འདུར་རྒྱུག་འགྲན་རྩོད་ཁྲོད་ཨང་བདུན་པ་བཅས་བླངས་མྱོང་། དེ་དག་ལས་ཀྱང་། སྐྱེས་མའི་སྤྱི་ལེ་ ༣༥ ཡི་འདུར་རྒྱུག་འགྲན་བསྡུར་ཁྲོད་འཛམ་གླིང་གི་ཨང་གསུམ་པ་དང་སྤྱི་ལེ་ ༢༠ འགྲན་བསྡུར་ཁྲོད་ཨང་རིམ་ ༡༡ པ་བཅས་ཡིན་འདུག
ཐེངས་འདིའི་འདུར་རྒྱུག་གོ་སྒྲིག་མཁན་ཨི་ཊ་ལིའི་ (ASD Duilia Barcellona PG) ཞེས་པའི་ཚོགས་པ་དེ་ཉིད་ཡིན་པ་དང་ཚོགས་པའི་དྲ་ཐོག་ཏུ། རྒྱལ་ཁབ་གསུམ་གྱི་ལུས་རྩལ་བ་མཉམ་ཞུགས་བྱས་པའི་འགྲན་བསྡུར་དེ་གོ་སྒྲིག་བྱེད་དོན་ནི། རིག་གཞུང་དང་ལུས་རྩལ་བའི་སྙིང་སྟོབས་སྐྱེད་བསྲིང་དང་རྗེས་དྲན་བཅས་ཀྱི་ཐོག་ནས་གོ་སྒྲིག་བྱས་ཡོད་ཅིང་། གཅིག་གྲོང་ཁྱེར་མེ་ལཱ་རྫོ་ནི་ལོ་རྒྱུས་རང་བཞིན་ལྡན་པའི་ཨི་ཊ་ལིའི་རྩེད་འགྲན་ཚོགས་ཡུལ་ཞིག་ཡིན་པས། ད་ལན་ནི་ལོ་ངོ་ ༤༠ རྗེས་ནས་གྲོང་ཁྱེར་དེའི་ནང་རྩེད་འགྲན་བསྡུས་པ་ཐོག་མ་ཆགས་ཀྱི་ཡོད་པ་དང་། རྩེད་འགྲན་པས་མེ་ལཱ་རྫོ་ཡི་མཛེས་སྡུག་དང་རིག་གཞུང་ལ་སྤྲོ་བས་རོལ་མྱོང་བྱེད་ཐུབ་ཡོད་པ། གཉིས་ནས་ད་རབ་ཀྱི་རྩེད་འགྲན་དེ་ནི་འདས་གྲོངས་སུ་གྱུར་བའི་མེ་ལཱ་རྫོ་གྲོང་ཁྱེར་གྱི་སློབ་སྟོན་པ་ (Maurizio Catanzaro) ལགས་སུ་རྗེས་དྲན་གྱི་ཚུལ་དུ་ཡིན་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
