ཆབ་མདོ་ངག་ཕུན།
དེ་རིང་ངས་གླེང་འདོད་པ་ནི། དྷ་སའི་གཙུག་ཁང་ལ་གླིང་སྐོར་འགྲོ་དུས་ལྷ་རྒྱལ་རིའི་བསང་གསོལ་བྱེད་སའི་ལག་འཁོར་འགྲམ་དེར་དཔེ་དེབ་མང་པོ་བཞག་འདུག་ཅིང་། དེའི་གསེང་ནས་བོད་ཀྱི་དཔེ་མཛོད་ཁང་ནས་པར་སྐྲུན་གནང་བའི་ཡིད་དགའ་ལྷ་མོའི་དམངས་ཀྱི་ལོ་རྒྱུས་རྒྱུ་ཆ་ཞེས་པའི་དེབ་གཅིག་རག་སོང་། དེ་འཁྱེར་ཡོང་ནས་དུས་ཚོད་ནམ་ཁོམ་ལ་བཀླགས་པ་ཡིན། མི་ཚེའི་བརྒྱུད་རིམ་ནང་དུ་ཡིད་དགའ་ལྷ་མོ་ལགས་སུ་དཀའ་སྡུག་སྣ་མང་འཕྲད་འདུག་ཅིང་། ལྷག་པར་བོད་ནང་དུ་རྒྱ་དམར་གྱིས་བཙན་འཛུལ་བྱས་པའི་དབང་གིས་མི་དམངས་ཉམ་ཆུང་ཚོས་དཀའ་སྡུག་ག་ཚོད་གཅིག་མྱོང་དགོས་བྱུང་བ་གསལ་པོ་བྲིས་གནང་འདུག་པ་དང་། བོད་ནང་གི་མི་དམངས་དཀྱུས་མའི་ལོ་ཆུང་སྐབས་འཚོ་བ་རོལ་སྟངས་དང་། དེ་ཡང་ཞིང་འབྲོག་གི་འཚོ་བ་རོལ་སྟངས། འབྲོག་པའི་ཐབ་ཆས་དང་ཁྱིམ་དངོས། དེ་བཞིན་ཞིང་པའི་དཔྱིད་དུས་སུ་གོན་པ་རིགས་བཟོ་རྒྱུ་དང་། ཁང་ལས་བྱ་རྒྱུ། དབྱར་ཟླའི་ནང་ཡུང་ཕྲུ་རྨོས་འདེབས་དང་། དབྱར་རྩྭ་དགུན་འབུ་བརྐོ་བ། ཞིང་ཁའི་ལྡུམ་བུའམ་རྩ་ཉོག་རྣམས་བཀོག་པ་དང་། དེ་བཞིན་སྟོན་ལས་སྐབས་ལོ་བརྔ་བ་དང་། བཅིང་བ། བམ་པོ་ཁལ་ལ་བཀལ་ཏེ་སོ་སོའི་སྡོད་ཁང་དུ་དབོར་ནས་རྩིག་པ་སོགས་བཀོད་འདུག་ཅིང་། ཞིང་པའི་ཐ་སྙད་མང་པོ་ཞིག་འདུག་ན། རང་ཉིད་ལ་མཚོན་ན་ཧ་ཅང་ཕན་ཐོགས་ཆེན་པོ་བྱུང་ཞིང་། སྤྱིར་བཏང་བཙན་བྱོལ་ནང་དུ་བརྩམས་དེབ་ནང་ཞིང་པའི་ཐ་སྙད་སྐོར་འཁོད་པ་ཉུང་ཉུང་ཡོད་པ་ཞིག་ང་རང་ཉིད་ཀྱི་སེམས་ནང་དུས་རྒྱུན་ནས་ཚོར་གྱི་ཡོད་མོད། ང་རང་མཐོང་རྒྱུ་ཆུང་བའི་སྐྱོན་ཡང་ཡིན་སྲིད། གང་ལྟར་སློབ་གྲྭ་ཁག་གི་སློབ་དེབ་ནང་དུ་དེ་ཙམ་ཞིག་མཐོང་རྒྱུ་མི་འདུག་བསམ་ཞིང་། ཅི་བྱས་ན་གོང་ཞུས་ལྟར་རང་ཉིད་ཀྱི་མ་མཐོང་བ་ཡིན་ཡང་སྲིད། སློབ་གྲྭ་ཁག་གི་སློབ་དེབ་ནང་དུ་བོད་ཀྱི་ཞིང་འབྲོག་གི་འཚོ་བ་རོལ་སྟངས་དང་། ཅ་དངོས་ཀྱི་ཐ་སྙད་དེ་དག་འགོད་ཐབས་བྱ་རྒྱུ་གལ་ཆེའི་རང་བཞིན་ཞིག་ཏུ་མཐོང་།
དེང་སྐབས་སྤྱི་ཚོགས་འཕོ་འགྱུར་དབང་གིས་ཞིང་འབྲོག་གི་ཐ་སྙད་མང་པོ་ཞིག་ཉམས་ཆག་འགྲོ་བཞིན་ཡོད་ལ། འབྲོག་པའི་ཐ་སྙད་སྐོར་སློབ་གྲྭའི་སློབ་དེབ་ནང་དུ་ཡག་པོ་བཀོད་འདུག་པ་དང་། ཞིང་པའི་སྐོར་གོང་དུ་ཞུས་པ་བཞིན་ཞིང་པའི་ཅ་དངོས་ཀྱི་ཐ་སྙད་དེ་དག་མདོ་དབུས་ཁམས་གསུམ་དུ་གཅིག་འགྱུར་མེད་པ་ཡིན་ནམ་གང་ལྟར་སློབ་དེབ་ཁག་ཏུ་ཡོད་པ་མ་མཐོང་། གོང་བརྗོད་ཡིད་དགའ་ལྷ་མོའི་ལོ་རྒྱུས་ནང་ཞིང་འབྲོག་གི་ཐ་སྙད་གང་འཚམས་འཁོད་འདུག་ན། དེང་གི་ན་གཞོན་ཞིང་འབྲོག་གི་ལས་ཀ་བྱ་མྱོང་མཁན་མེད་པ་རྣམས་ལ་བོད་ནང་གི་ཞིང་འབྲོག་གི་ལས་ཀ་བྱེད་སྟངས་དང་། ཞིང་འབྲོག་གི་འཚོ་བ་རོལ་སྟངས་སྐོར་ག་འདྲ་ཞིག་ཡོད་པ་གསལ་པོ་ཤེས་པར་ཕན་ཐོགས་ཡོང་བ་ནི་བརྗོད་མ་དགོས་ལ། ལྷག་དོན་བོད་ནང་དུ་རྒྱ་དམར་བཙན་འཛུལ་སྐབས་བོད་མི་ཉམ་ཆུང་རྣམས་ཀྱིས་དཀའ་སྡུག་ག་ཚོད་མྱངས་དགོས་བྱུང་བ་སོགས་གསལ་པོ་འཁོད་འདུག་ན་དེང་གི་བྱེས་ཀྱི་ན་གཞོན་ཚོས་ཀློག་ན་ཧ་ཅང་དགེ་ཕན་ཆེན་པོ་ཞིག་ཏུ་ཡོང་ངེས་མཐོང་། དེ་དག་ནི་ཞོར་འཕྲོས་ཙམ་ཞིག་ཡིན་ནོ།།
དེ་བཞིན་དེབ་དེ་བཀླགས་པའི་བརྒྱུད་རིམ་ནང་སྔོན་དུས་ལོ་ཆུང་སྐབས་སུ་ཞིང་འབྲོག་གི་འཚོ་བ་རོལ་སྟངས་རྣམས་གསོན་པོ་སེམས་ནང་འཆར་ཡོང་བ་དང་། ལྷག་པར་རྒྱ་དམར་སྲིད་གཞུང་གིས་བོད་མི་རིགས་མེད་པ་བཟོ་ཐབས་སུ་དང་ཐོག་དམངས་གཙོ་བཅོས་བསྒྱུར་འགོ་བཙུགས་པ་དང་། དེ་ནས་རིམ་པས་ལེའུ་ལུག་ཚོགས་ཆུང་ཟེར་བ་བཙུགས་ནས་མི་རྣམས་ལ་བརྒྱབ་ལུང་བརྒྱབ་བྱས་ཏེ་ཡར་མར་བྲོས་དགོས་བཟོས་པ། སྐབས་དེ་དུས་མི་རྣམས་བཟའ་རྒྱུ་མི་རག་པ་ཉིན་གྲངས་གསུམ་བཞི་ཙམ་སྡོད་དགོས་ཐུག་གི་ཡོད། རྒྱ་དམག་གིས་མེ་མདའ་འཕེན་བཞིན་རྗེས་འདེད་གཏོང་གི་ཡོད་པས། ག་དུས་ཚེ་སྲོག་ཤོར་གྱི་ཡོད་ན་བསམ་ནས་སེམས་ནང་དངངས་སྐྲག་ངང་བྲོས་ཡིབ་བྱ་དགོས་ཐུག་ཡོད།
མཐར་རྒྱ་དམར་གྱིས་ཇུས་ངན་སྟོན་ནས་བོད་མི་རྣམས་མགོ་བཏགས་པ་ཡིན་ན་ཉེས་པ་མེད་ཚུལ་བསྒྲགས་ཡོད་རུང་། བོད་མི་རྣམས་མགོ་བཏགས་ཞུས་རྗེས་སྡུག་ལས་སྣ་ཚོགས་ཤིག་བཙན་གྱིས་བཀོལ་ནས་བོད་མི་རྣམས་མུན་དོང་དུ་བརྫངས་བ་རེད་ལ། ཉེས་མེད་བོད་མི་མང་པོའི་ཚེ་སྲོག་ཀྱང་འཕྲོག་ཡོད། མི་ཡུལ་དུ་དམྱལ་བ་ལྟར་མྱངས་དགོས་བྱུང་ཡོད། ཉིན་མོ་ངལ་རྩོལ་དུ་བསྐུལ་ཞིང་། དགོང་མོ་སློབ་གསོ་བརྒྱབ་ཀྱི་ཡོད་ཚུལ་གྱིས་བོད་མི་ནང་ཁུལ་བཙན་གྱིས་འཐབ་འཛིང་བཏང་བཅུག་སྟེ་བོད་མི་ནང་ཁུལ་འགལ་ཟླ་བཟོ་ཐབས་ཀྱིས་ཆབ་སྲིད་ཀྱི་ཇུས་ངན་སྤེལ་ཡོད་ལ། ལྟོ་གྲོད་པ་གང་བ་ཞིག་བཟའ་རྒྱུ་མེད་པའི་གནས་སྟངས་དེ་འདྲ་ཞིག་ཏུ་ཆགས་ཡོད། ང་ཚོའི་ལུང་པར་སེང་གེ་ཞེས་པའི་སྐྱེས་པ་ཞིག་ཡོད་ཅིང་། ཁོང་དང་མཉམ་དུ་ལུང་པའི་མདའ་ལ་དབྱར་དུས་ཞིང་ལས་བྱེད་དུས་ཁོང་གིས་ང་ལ་དེ་འདྲ་ཞིག་བརྗོད་མྱོང་ཡོད། མི་མང་མཉམ་འབྲེལ་སྐབས་སུ་ལུང་པར་ཐན་པ་བྱུང་ནས་ལུང་པའི་སྐྱེ་ཕོ་མོ་རྒན་གཞོན་ཚང་མ་ངོམས་ཆུ་ནས་ཆུ་འཁྱེར་ཏེ་ཞིང་ཁར་བླུགས་བཅུག་པ་དང་། སྐབས་དེ་དུས་ཉི་ཚ་བ་དང་། ཁ་ལག་ཀྱང་ལྟོ་གྲོད་པ་གང་བཟའ་རྒྱུ་མེད་པ་སོགས་ཀྱི་མགོ་ཡུ་འཁོར་ནས་ཐེངས་མང་སར་འགྱེལ་གྲབས་བྱེད་པ་སོགས་ཀྱིས་ད་ནི་དེ་འདྲའི་དཀའ་སྡུག་མྱོང་བ་ལས་ཤི་ན་དགའ་ས་རེད་སྙམ་ནས་ཐེངས་མང་ངོམས་ཆུ་རུ་མཆོང་གྲབས་བྱས་རུང་། ནང་གི་བུ་ཕྲུག་མིག་ནང་འཁོར་ནས་ཆུ་ནང་མཆོང་ཐུབ་མ་སོང་ཟེར། དེ་འདྲའི་དཀའ་སྡུག་མྱོང་དགོས་བྱུང་ཡོད། དེ་དང་དེ་འདྲ་བའི་བགྲེས་སོང་དེ་དག་གི་ངག་ནས་སྐབས་དེ་དུས་ཀྱི་དཀའ་སྡུག་གི་གཏམ་རྒྱུད་ཡ་ང་བ་དེ་འདྲ་གོ་དུས་སེམས་སྐྱོ་ཞིང་ཡིད་ཐང་ཆད་ནས་དམར་གཞུང་འོག་ནས་ག་དུས་ཐར་ན་བསམ་པའི་སེམས་ནང་ཐེངས་མང་དྲན་མྱོང་ཡོད།
དེ་ཡང་ཡིད་དགའ་ལྷ་མོའི་ལོ་རྒྱུས་ལས། “རེའུ་ལུག་ཚོགས་ཆུང་དང་རྒྱ་དམག་གིས་རྟག་ཏུ་རྒྱང་ཤེལ་རྒྱག་ཞོར་དང་མེ་མདའ་འཕེན་ཞོར་གྱིས་རྗེས་འདེང་བྱེད་ཀྱི་ཡོད་པ་དང་གཡས་གཡོན་དུ་མི་གསོད་པ་མཐོང་བ་དང་མི་རོ་སོགས་ཡང་ཡང་མཐོང་ཡོང་དུས་སེམས་ནང་ལ་ནམ་འཛིན་ཡོང་དང་ནམ་གསོད་འགྲོ་སྙམ་པའི་ཞེད་སྣང་ཆེན་པོ་སྐྱེས་ནས་རྟག་ཏུ་སེམས་ལ་དངངས་སྐྲག་གིས་ཁེངས་ནས་སྡོད་དགོས་བྱུང་གི་ཡོད།” ཅེས་གོང་གསལ་བརྗོད་ཚིག་དེ་དག་ལས་སྐབས་དེ་དུས་ཀྱི་གནས་སྟངས་གང་འདྲ་ཡོད་པ་ང་ཚོའི་སེམས་ནང་དུ་རོབ་ཙམ་རྟོགས་ཐུབ་པ་ཞིག་རེད་སྙམ།
ལྷག་པར་ཆེས་གདུག་རྩུབ་ཅན་གྱི་ལས་འགུལ་རིག་གནས་གསར་བརྗེ་སྐབས་སུ་ཡིན་ཞིང་། བོད་མི་རིགས་ཀྱི་ལོ་རྒྱུས་ཡུན་རིང་ལྡན་པའི་དགོན་སྡེ་དུ་མ་ཞིག་གཏོར་བཤིག་བཏང་ཡོད་ལ། རྩ་ཆེའི་གསུང་རབ་དུ་མ་ཞིག་མེར་བསྲེགས་པ། ཆུའི་ནང་གཡུགས་པ་སོགས་བྱས་ཡོད་ལ། བོད་མི་རིགས་ཀྱི་གཙུག་ཏུ་བཀུར་སའི་བླ་སྤྲུལ་དུ་མ་ཞིག་བཙན་བཀའ་བཏང་སྟེ་སྐྱ་སར་ཕབ་པ་དང་། མ་ཉན་ཚེ་རྡུང་རྡེག་བཏང་སྟེ་ཚེ་སྲོག་ཀྱང་འཕྲོག་ཡོད། བྱས་རྗེས་ཅན་གྱི་མི་སྣ་དུ་མ་ཞིག་ཉེས་མེད་རྡུང་རྡེག་དང་བཙོན་ཁང་དུ་བཅུག་པ་སོགས་བྱས་ཡོད། དེ་ཡང་ཡིད་དགའ་ལྷ་མོའི་ལོ་རྒྱུས་ལས། “ཤང་གི་ལས་བྱེད་ཀྱི་སྣེ་ཁྲིད་འོག་དང་ན་གཞོན་རང་ལོ་བཅོ་ལྔ་ཡན་ཆད་རྣམས་ཁྲིད་དེ་དགོན་པ་གཏོར་ཡོད་འདུག་ཅེས་དང་། ཡང་སྤྱིར་དགོན་པའི་ནང་གི་གསེར་དངུལ་སོགས་རིན་པོ་ཆེའི་རིགས་དང་རྩ་ཆེའི་ཅ་དངོས་རྣམས་ནི་དེ་སྔོན་དམངས་གཙོ་བཅོས་བསྒྱུར་གྱི་སྐབས་སུ་ཆ་ཚང་གཞུང་བཞེས་བཏང་ཟིན་པས་ད་ཆ་ཤུལ་དུ་དགོན་ཁང་དང་། གསུང་རབ། ས་སྐུ་དང་རྡོ་སྐུའི་རིགས་ཙམ་ལས་ལྷག་མེད།” ཅེས་དང་། ཡང་“དགོན་པའི་འདུ་ཁང་དང་གྲྭ་ཤག་ཡོངས་རྫོགས་གཏོར་བཤིག་བྱས་ནས་ཀ་གདུང་དང་གླེགས་ཤིང་། སྒོ་དང་སྒེའུ་ཁང་སོགས་ཤིང་ལྕགས་རིགས་ཀྱི་དངོས་པོ་རྣམས་མི་དམངས་སྤྱི་ཁང་དང་། ཡུལ་ཟམ། ཕྱུགས་རའི་སྡོད་ཁང་སོགས་སུ་བགོ་འགྲེམ་བྱས་ནས་སྤྱད་པ་རེད།” ཅེས་གསུང་པ་བཞིན་རྒྱ་དམར་སྲིད་གཞུང་གིས་བོད་མི་རིགས་ཀྱི་ཆོས་གཞུང་མེད་པ་བཟོ་རྒྱུའི་ལས་འགུལ་ཐབས་སྡུག་གང་འདྲ་སྤེལ་ཡོད་པ་གོང་གི་བརྗོད་ཚིག་ལས་ང་ཚོ་ལམ་ཙམ་རྟོགས་ཐུབ་པ་ཞིག་རེད། ངའི་རྨོ་མོས་རིག་གནས་གསར་བརྗེ་སྐབས་ཀྱི་གནས་སྟངས་དེ་འདྲ་ཞིག་བརྗོད་མྱོང་ཡོད། ན་གཞོན་ཚོ་ཁག་ཡོང་ནས་མཆོད་ཁང་ནས་སྐུ་འདྲ་འཁྱེར་ནས་གསང་སྤྱོད་དུ་གཡུགས་པ་དང་། ཕྱག་དཔེ་འཁྱེར་ནས་མེར་བསྲེགས་བཏང་སོང་། སྐབས་དེ་དུས་ང་ནི་སྙིང་ཁར་གྲང་ལྷང་ལྷང་གྱུར་ཡང་བྱ་ཐབས་ཅི་ཞིག་ཡོད། སྤུས་མོ་བཙུགས་ཏེ་མགོ་བོ་སྒུར་ནས་སྡོད་རྒྱུ་ལས་མ་འདས། མ་ཎི་རྡོ་ཕུང་བཤིག་ནས་མི་ཡར་མར་འགྲོ་སའི་རྡོ་ཆག་སྒྲིག་ནས་དེའི་ཐོག་ཏུ་བཙན་གྱིས་འགྲོ་བཅུག་པ། གལ་སྲིད་འགྲོ་འདོད་མེད་པས་རྣམ་པ་ཙམ་ཡང་སྟོན་ཚེ་ཀླད་རྙིང་ལ་སྒྱུར་བཅོས་གཏོང་དགོས་ཟེར་ནས་ལམ་སེང་འཐབ་འཛིང་གཏོང་གི་རེད་ཟེར། ང་རང་ལོ་ཆུང་སྐབས་སུ་དྲན་པ་ཞིག་ནི། ང་ཚོའི་ལུང་པ་ནས་ཡར་ཙམ་ཁྱིམ་ཚང་ཞིག་ཡོད་ཅིང་། ཁོ་ཚོ་གྲལ་རིམ་མངའ་བདག་རེད། ཁོ་ཚོ་ལ་བུ་ཞིག་ཡོད་ཅིང་། ཁོང་ནི་ཕོ་བཟོ་འདོད་པ་ཞིག་ཡོད་པ་དང་། ཁོང་ལ་མ་ཉེས་ཁ་གཡོག་བཙུགས་ནས་གཡས་གཡོན་ལུང་པ་ཚང་མར་ཁྲིད་ནས་འཐབ་འཛིང་བཏང་བ་རེད། སྐབས་དེ་དུས་ང་ཚོའི་ལུང་པ་ལའང་ཁྲིད་བྱུང་། མི་དམངས་ཚོགས་འདུ་ཚོགས་ནས་གྲལ་རིམ་ཞ་མོ་ཡོད་མཁན་ཚང་མ་མི་མང་ཚོགས་འདུ་ཚོགས་སར་སྤུས་མོ་བཙུགས་ནས་བཞག །དེ་ནས་མགོ་ཁྲིད་ཀྱིས་གཏམ་བཤད་ཚར་རྗེས་ཡར་ཐོན་པ་འགའ་ཤས་ཀྱིས་ངར་ངར་ཤོར་ཤོར་གྱིས་ཁོང་ལ་རྡོག་རྒྱག་གཞུས་པ་དང་། ཁུ་ཚུར་བཞུ་བ། སྐྲ་ནས་བཟུང་སྟེ་ཡར་མར་དྲུད་པ་སོགས་བྱས་ནས་ཁ་ནས་ཁྲག་དམར་ཐོན་རུང་ད་དུང་སྙིང་རྗེ་མེད་པར་འཐབ་འཛིང་བཏང་སོང་། ཁོང་ནི་སྐད་ངན་ཙམ་ཡང་ཤོར་གྱི་མི་འདུག་ལ། འཇིགས་སྣང་སྤུ་ཙམ་ཡང་བྱེད་ཀྱི་མི་འདུག་པས། རྗེས་སུ་ལུང་པའི་མི་རྣམས་ཁོང་གི་སྙིང་སྟོབས་ལ་ཧང་སངས་འདུག །དེ་ནས་རིམ་པའི་གྲལ་རིལ་གྱི་ཞ་མོ་ཡོད་མཁན་རྣམས་ལ་འཐབ་འཛིང་བཏང་སོང་བས། སྐབས་དེར་ངའི་ཨ་ཕར་གྲལ་རིམ་གྱི་ཞ་མོ་ཡོད་པ་སོང་སྤུས་མོ་བཙུགས་མགོ་བོ་སྒུར་ནས་བསྡད་ཡོད། ང་ནི་ལོ་ཆུང་ཡིན་དུས་མི་དམངས་མཉམ་དུ་སྡོད་ཆོག་གི་རེད། ཡིན་ནའང་དངངས་སྐྲག་དང་སེམས་སྐྱོ་བཞིན་མགོ་བོ་སྒུར་ནས་སྡོད་རྒྱུ་ལས་བྱ་ཐབས་གང་ཞིག་ཡོད། དེ་དག་མཐོང་དུས་ངའི་སེམས་ནང་དུ་དབུལ་ཕོངས་ཀྱི་་ཁྱིམ་ཚང་ཞིག་ཏུ་སྐྱེས་ཡོད་ན་ད་གཟོད་དཀའ་སྡུག་དེ་དག་མྱོང་དགོས་མ་རེད་བསམ་པ་ཐེངས་མང་དྲན་མྱོང་ཡོད། དེ་འདྲའི་བོད་མདོ་དབུས་ཁམས་གསུམ་གྱི་བོད་མི་རིགས་ལ་དཀའ་སྡུག་མྱོང་དགོས་བྱུང་རུང་། ད་དུང་འཇིགས་ཞུམ་མེད་པར་གནས་ཡོད། རྒྱ་དམར་གྱིས་གཡོ་སྒྱུ་སྣ་ཚོགས་ག་ཚད་བྱས་རུང་བོད་མི་རིགས་རང་ཚུགས་བརྟན་པོའི་ཐོག་ནས་གནས་ཡོད།
རིམ་གྱིས་བོད་ལ་ཆབ་སྲིད་ཀྱི་གུ་ཡངས་ཕྲན་བུ་བཏང་བའི་ཁུལ་གྱིས་ཆོས་དད་རང་དབང་ཡིན་ཚུལ་སོགས་བསྒྲགས་རུང་། བོད་མི་རྣམས་ཀྱིས་ཡིད་ཆེས་བྱེད་ཀྱི་མེད། བོད་ལྗོངས་ཉིན་རེ་གསར་འགྱུར་རེད། ཉིན་མ་རེར་འགྱུར་བ་གཏོང་ཡོང་གི་རེད་ཟེར་ནས་ཡིད་ཆེས་མི་བྱེད་ལ། ང་རང་ལོ་ཆུང་སྐབས་སུ་བགྲེས་སོང་འགའ་ཤས་ཀྱིས་ངག་ནས་སྲིད་གཞུང་འདི་ལ་ཡིད་ཆེས་བྱ་ས་རྩ་བ་རང་ནས་ཡོད་མ་རེད་ཅེས་མང་པོ་ཐོས་མྱོང་ཡོད་ཅིང་། ཡང་འགའ་ཤས་ཀྱིས་ང་ཚོ་ཉམས་ཚོད་ལེན་ས་ཡིན་རྒྱུ་རེད་བསམ་ནས་དོགས་པའི་འོག་བོད་མི་སུ་ཞིག་གིས་ཀྱང་ཡིད་མི་ཆེས། རིམ་གྱིས་བོད་མི་རིགས་ལ་བཀའ་དྲིན་ཆེ་བའི་པཎ་ཆེན་པོ་ཆེ་བོད་ཀྱི་ས་ཁུལ་གང་སར་ཆིབས་སྒྱུར་གནང་ཞིང་། མང་ཚོགས་ལ་བཀའ་སློབ་ལམ་སྟོན་གནང་བས། ད་གཟོད་གཞི་ནས་བོད་མི་རྣམས་བློ་སེམས་ཕྲན་བུ་བདེ་རུ་ཕྱིན་ནས་དགོན་པ་གསར་བཞེངས་སོགས་བྱས་ཡོད། དེ་མ་གཏོགས་རྒྱ་གཞུང་ལ་བོད་མི་སུ་ཞིག་གིས་ཡིད་ཆེས་མི་བྱེད་ཅིང་། བོད་མི་ཚོའི་སེམས་ནང་རྒྱ་གཞུང་གི་སྲིད་ཇུས་ནི་ངེས་གཏན་མེད་པའི་སྲིད་གཞུང་ཞིག་ལ་ངོས་འཛིན་དང་ལྟ་སྟངས་དེ་འདྲ་ཞིག་འཛིན་གྱི་ཡོད་པ་རེད། དེ་བཞིན་རྒྱ་གཞུང་གི་ལས་བྱེད་གུང་ཁྲན་ཏང་ཡོན་བོད་རིགས་ཚོ་ཡང་རྒྱ་གཞུང་ལ་ཡིད་ཆེས་དེ་ལས་ཀྱང་མི་བྱེད། ཡིན་ནའང་ལས་དབང་གིས་རྒྱ་གཞུང་གི་ལམ་སྟོན་འོག་མ་འགྲོ་ཀ་མེད་ཀྱི་གནས་སྟངས་ཤིག་ཆགས་ཡོད།
གང་ལྟར་གནས་སྟངས་དེ་འདྲ་ཞིག་འོག་གཞིས་བྱེས་གཉིས་ཀྱི་བོད་མི་རྣམས་ཐུག་འཕྲད་དུ་འགྲོ་འོང་ཆོག་པའི་གོ་སྐབས་ཤིག་ཤར་བ་དང་བསྟུན། བཙན་བྱོལ་ནས་སྐུ་ཚབ་ཚོགས་ཆུང་བོད་ནང་ལྟ་སྐོར་ཕེབས་པ་དང་། སྐབས་དེ་དུས་རྒྱ་དམག་གི་འགོ་ཁྲིད་འགའ་ཤས་ཀྱིས་ཁྱོད་ཚོ་བོད་དུ་འགྲོ་དུས་གཟབ་གཟབ་བྱོས་མ་གཏོགས་བོད་མིས་རྡོ་དང་གཡུག་པ་བཞུ་ཡོང་ཞེས་བརྗོད་རབ་བཤད། བོད་མི་ཚོས་དེ་ལས་ལྡོག་སྟེ་བཙན་བྱོལ་བོད་མིའི་སྐུ་ཚབ་ཚོ་ལ་ཕེབས་བསུ་ཞུ་མཁན་མི་དམངས་བརྒྱ་ཕྲག་དུ་མ་ཞིག་འདུ་འཛོམས་གནང་ཞིང་། མིག་ཆུ་གཏོང་བཞིན་རིག་གནས་གསར་བརྗེའི་སྐབས་ཀྱི་དཀའ་སྡུག་མྱོང་རབས་ཞུས་ཡོད། རྒྱ་དམར་སྲིད་གཞུང་ཧོན་ཐོར་དགོས་པ་བཟོས་ནས་ཁོ་པ་ཚོའི་དམིགས་ཡུལ་ནང་བཞིན་བྱུང་མེད་པ་གསལ་པོ་རྟོགས་ཐུབ་པ་བྱུང་ཡོད། དེ་བཞིན་ཕ་ཡུལ་དམངས་ཁྲོད་ཀྱི་མགུར་མོ་དང་། གླུ་ཤགས། གཏམ་དཔེ་སོགས་འཁོད་གནང་འདུག་ན་དེ་དག་ནི་ཧ་ཅང་དོན་སྙིང་ལྡན་ལ། ལྷག་དོན་བོད་གངས་ལྗོངས་ནི་གླུ་གར་གྱི་རྒྱ་མཚོ་ཞེས་གྲགས་པ་ནི་དམངས་ཁྲོད་ཀྱི་གླུ་ཤགས་དེ་དག་ལས་བོད་མི་རིགས་གླུ་གར་ལ་དགའ་མོས་ག་ཚོད་ཡོད་པ་མཚོན་དོན་ཞིག་རེད་ལ། རྩ་བ་ཆེན་པོ་ཞིག་ཀྱང་རེད་སྙམ།
རིམ་གྱིས་ནང་ཆེན་ཨ་མ་ལགས་ཀྱང་རེ་བ་དང་དམིགས་ཡུལ་ཞིག་འཛིན་ནས་ལ་ལུང་བརྒལ་ནས་བཙན་བྱོལ་དུ་ཡོང་ཞིང་། འཕགས་ཡུལ་གནས་ཆེན་ཁག་སྐོར་བ་དང་། བུ་མོ་ཡང་སློབ་གྲྭ་བཏང་། དེ་བཞིན་རང་གཞུང་ལ་ཁ་ལྡང་ནས་མ་བཞུགས་པར་ཞར་དང་ཞོར་ལ་ལས་ཀ་ཙག་ཙིག་གནང་སྟེ་རང་ཁ་རང་གསོ་གནང་ཞིང་། མདོར་ན་རང་ནུས་ཡོད་ཚད་སྟོན་ནས་ལས་དོན་གནང་འདུག་པ་དང་། མི་ཡུལ་ལུང་པར་ས་ཆུ་མ་འཕྲོད་ནས་དཀའ་སྡུག་སྣ་མང་ཁག་ལ་གདོང་ལེན་གནང་དགོས་བྱུང་རུང་། གཞན་སུ་ཞིག་ལའང་ཟུར་ཟ་དང་སྐྱོན་བརྗོད་མེད་པ་དེ་འདྲའི་ནང་ཆེན་ཨ་མར་སྦྱང་བའི་སློབ་སྦྱོང་གི་གོ་སྐབས་མ་རག་རུང་། རང་བཞིན་གྱིས་སྐྱེས་སྟོབས་ཀྱི་ཤེས་བྱ་དང་། མི་རིགས་ལ་བཅངད་བའི་ལྷག་བསམ་དང་སྙིང་སྟོབས་ག་ཚོད་ཡོད་མེད་ལོ་རྒྱུས་དེ་ཉིད་ཐེངས་གཅིག་བཀླག་ཚེ་ཤེས་ངེས་སྙམ། ད་ནི་དེ་ཙམ་ཞིག་ཡིན། ནོར་འཁྲུལ་འདྲ་མཆིས་ཚེ་བཟོད་གསོལ་ཞུ་རྒྱུ་ལས་མ་འདས་སོ།།
མཐའ་དོན་བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བརྟན་ཞིང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པའི་སྨོན་འདུན་ཤུགས་དྲག་དང་། བོད་མི་རིགས་ཀྱི་བདེན་མཐའ་མྱུར་དུ་གསལ་བར་སྨོན་འདུན་ཞུའོ།། །།
