ཐའེ་ཝན་ནང་འདི་ལོའི་གསུམ་བཅུའི་དུས་དྲན་བར་དུ་བོད་དོན་རྐང་འཁོར་སྐྱོད་སྐྱོད་བྱེད་བཞིན་པ།

ཟླ་འདིའི་ཕྱི་ཚེས་ ༨ ནས་བཟུང་འདི་ལོའི་གསུམ་བཅུའི་དུས་དྲན་བར་དུ་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་འོག་ཐའེ་ཝན་ནང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བཞིན་འདུག

གོང་ཚེས་ཉིན་ཐའེ་ཝན་གྱི་གཉིས་གཉིས་བརྒྱད་ཞི་བདེའི་སྤྱི་གླིང་ནས་འདི་ལོའི་ལས་འགུལ་མགོ་འཛུགས་བྱས་ཡོད་པ་དང་། ཐེངས་འདིའི་རྐང་འཁོར་སྐོར་སྐྱོད་ནང་ཐའེ་ཝན་དང་ཧོང་ཀོང་གི་གཞོན་སྐྱེས་རང་དབང་འཐབ་རྩོད་པ་ ༡༥ མཉམ་ཞུགས་གནང་འདུག་ལ། འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་འདི་གའི་གསར་འགོད་པར།  ཐའེ་ཝན་ལྷོ་ཕྱོགས་ནི་དམངས་གཙོ་ཡར་ཐོན་ཚོགས་པའི་མི་མང་པོ་ཡོད་པའི་རང་དབང་དང་དམངས་གཙོའི་ཐོག་ལ་དོ་སྣང་ཤུགས་ཆེན་ཡོད་པའི་ཁུལ་ཞིག་ཡིན་པ་མ་ཟད། བོད་དོན་ཐོག་ལ་དམིགས་བསལ་གྱིས་དོ་སྣང་ཆེ་བ་ཡོད་ས་ཞིག་ཡིན་སྐོར་བརྗོད་བྱུང་།

བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་ཐའེ་ཝན་གྲོས་ཚོགས་ཁང་གི་མདུན་དུ་གསར་འགོད་ལྷན་ཚོགས་ཤིག་བསྡུས་པའི་ཐོག འབྲེལ་མཐུད་ཁང་གི་འགན་འཛིན་གཞོན་པ་བཀྲ་ཤིས་ཚེ་རིང་ལགས་ཀྱིས། ད་ལན་གཙོ་བོ་གཅིག་ནི་རྒྱ་ནག་གཞུང་གིས་བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ལ་ལོ་བཅུ་བཙོན་འཇུག་ཁྲིམས་ཐག་བཅད་པར་བརྟེན། ཐའེ་ཝན་གྲོས་ཚོགས་ནང་དུ་སྒོ་ཤེས་རབ་རྒྱ་མཚོའི་གནས་སྟངས་ཐད་གྲོས་འཆར་འདོན་པ་དང་། གྲོས་ཚོགས་ངོས་ནས་རྒྱལ་སྤྱི་སྤྱི་ཚོགས་སུ་འབྲེལ་ལམ་ཡོད་པའི་ཚོགས་སྡེ་ཁག་ལ་བོད་དོན་ཐོག་བཀའ་མོལ་གནང་དགོས་པའི་འབོད་སྐུལ་ཞུ་རྒྱུ་དང་། ཐའེ་ཝན་དང་ཧོང་ཀོང་གི་གཞོན་སྐྱེས་རྣམས་ཀྱི་དམིགས་ཡུལ་གཙོ་བོ་ཞིག་ནི། རྒྱ་ནག་ནང་དུ་འགྱུར་བ་འགྲོ་རྒྱུ་གལ་ཆེན་པོ་མཐོང་གི་ཡོད་པ་མ་ཟད། རྒྱ་གཞུང་གིས་གདུག་རྩུབ་མནར་གཅོད་གཏོང་ས་བོད་ནང་གཅིག་པུ་མ་ཡིན་པར། རྒྱ་ནག་སྐམ་ས་དང་ཧོང་ཀོང་སོགས་ཀྱི་ནང་དུའང་ཉེན་འཚབ་ཆེ་རུ་འགྲོ་བཞིན་ཡོད་པའི་གནས་སྟངས་དེར། རང་དབང་རྒྱལ་ཁབ་ཁག་ཏུ་ཡོད་པའི་མི་མང་གིས་གདུང་སེམས་མཉམ་བསྐྱེད་གནང་དགོས་པ་ཧ་ཅང་གལ་ཆེན་ཡིན་ལ། རྒྱ་ནག་མི་མང་གིས་ཀྱང་རྒྱ་གཞུང་གི་ལས་དོན་བྱེད་ཕྱོགས་ནོར་འཁྲུལ་ཡིན་པ་རང་དབང་གི་ཐོག་ནས་བཤད་དགོས་པ་དེ་གལ་ཆེན་པོ་ཡིན་སྐོར་བརྗོད་འདུག

བོད་རང་དབང་ཆེད་དུ་རྐང་འཁོར་སྐོར་སྐྱོད་ཀྱི་ལས་འགུལ་འདི་ནི་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་འོག་ཕྱི་ལོ་༢༠༡༤ ལོ་ནས་བཟུང་སྤེལ་མགོ་བརྩམས་ཡོད་ཅིང་། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་བཙན་བྱོལ་ནང་བོད་མི་ཚོས་དམངས་གཙོ་ལོངས་སུ་སྤྱོད་བཞིན་ཡོད་པ་ངོ་སྤྲོད་དང་། བོད་དང་རྒྱ་ནག་ནང་དུ་འགྲོ་བ་མིའི་ཐོབ་ཐང་དང་དམངས་གཙོ། རང་དབང་མེད་པར་གདུག་རྩུབ་དང་མནར་གཅོད་གཏོང་བཞིན་ཡོད་པའི་གནས་སྟངས་རྣམས་རྒྱ་ནག་ནས་ཡོང་བའི་རྒྱ་མི་དང་། ཐའེ་ཝན་མི་མང་ནང་གོ་རྟོགས་སྤེལ་སླད་དུ་མགོ་འཛུགས་བྱས་པ་ཞིག་ཡིན་འདུག

གསར་འགོད་པ། བྱམས་པ་ཚེ་རིང་།