བོད་ཀྱི་སྐད་ཡིག་ཞབས་ཞུ་ཁང་བཙུགས་ནས་ལོ་ངོ་ ༡༠ འཁོར་བའི་མཛད་སྒོ་འཚོགས།

རྒྱ་གར་རྒྱལ་ཡོངས་ཀྱི་འཛིན་རིམ་༡༢ པའི་ཡིག་ཚད་ནང་བོད་ཡིག་བརྒྱ་ཆ་༩༥ ལོན་མཁན་སློབ་མ་ ༣༦ ཙམ་ལ་ཧིན་སྒོར་ ༥༠༠༠ རེ་དང་ལག་འཁྱེར། མི་ལོ་ ༢༥ རིང་བོད་ཡིག་དགེ་རྒན་གྱི་ཕྱག་ལས་གནང་མྱོང་མཁན་ ༥༠ ལ་བཀའ་དྲིན་རྗེས་དྲན་ཆེད་ལེགས་གསོལ་ཕྱག་འཁྱེར་བཅས་ཕུལ་སོང་།

དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་བོད་ཀྱི་ཟློས་གར་ཚོགས་པའི་ཚོགས་ཁང་དུ། བོད་ཀྱི་སྐད་ཡིག་ཞབས་ཞུ་ཁང་བཙུགས་ནས་མི་ལོ་ཧྲིལ་བོ་ ༡༠ འཁོར་བའི་དགའ་སྟོན་རྟེན་འབྲེལ་གྱི་མཛད་སྒོ་ཞིག་འཚོགས་སོང་། ཐེངས་འདིའི་མཛད་སྒོའི་ཐོག་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་དང་། བོད་ཀྱི་དཔེ་མཛོད་ཁང་གི་རྒན་ན་ག་སངས་རྒྱས་བསྟན་དར་ལགས། བོད་ཁྱིམ་དྲུང་ཆེ་ཆོས་དབྱིངས་དོན་གྲུབ་ལགས། སྨོན་ལམ་ཞིབ་འཇུག་ཁང་གི་འགན་འཛིན་བློ་བཟང་སྨོན་ལམ་ལགས། དཔེ་སྟོན་སློབ་གྲྭའི་སློབ་སྤྱི་ལེགས་བཤད་ཉི་མ་ལགས་བཅས་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་སོགས་ལྷན་འཛོམས་གནང་འདུག མཛད་སྒོའི་ཐོག་དགེ་བཤེས་བློ་བཟང་སྨོན་ལམ་ལགས་ལ་དེང་རབས་དང་མཐུན་པའི་བོད་ཀྱི་སྐད་ཡིག་དར་སྤེལ་དང་ཡུན་གནས་ལ་རླབས་ཆེན་གྱི་བྱས་རྗེས་བཞག་ཡོད་པའི་ཆེ་བསྟོད་གཟེངས་རྟགས་དང་། རྒྱ་གར་རྒྱལ་ཡོངས་ཀྱི་འཛིན་རིམ་༡༢ པའི་ཡིག་ཚད་ནང་བོད་ཡིག་བརྒྱ་ཆ་༩༥ ལོན་མཁན་སློབ་མ་ ༣༦ ཙམ་ལ་ཧིན་སྒོར་ ༥༠༠༠ རེ་དང་ལག་འཁྱེར། མི་ལོ་ ༢༥ རིང་བོད་ཡིག་དགེ་རྒན་གྱི་ཕྱག་ལས་གནང་མྱོང་མཁན་ ༥༠ ལ་བཀའ་དྲིན་རྗེས་དྲན་ཆེད་ལེགས་གསོལ་ཕྱག་འཁྱེར་བཅས་ཕུལ་སོང་།

བོད་ཀྱི་སྐད་ཡིག་ཞབས་ཞུ་ཁང་གི་སྐབས་བཞི་བའི་ཚོགས་གཙོ་ཐུབ་བསྟན་རབ་བརྟན་ལགས་ཀྱིས་ཚོགས་པའི་སྐོར་ལ། བོད་ཀྱི་སྐད་ཡིག་ཞབས་ཞུ་ཁང་གི་ཐོག་མའི་དམིགས་ཡུལ་ནི་བོད་ཀྱི་སྐད་ཡིག་རྒྱ་གར་གྲོས་ཚོགས་ནང་དུ་ཁྲིམས་མཐུན་གྱི་ངོས་འཛིན་ཡོང་བའི་ཆེད་དུ་གླེང་སློང་བྱུང་ཡང་། རྗེས་སུ་རྐྱེན་མང་པོ་ཞིག་གིས་རྒྱ་གར་གྲོས་ཚོགས་ནང་དུ་གླེང་སློང་དེ་ཞི་འཇམ་དུ་གྱུར་བ་རེད། བོད་ཀྱི་སྐད་ཡིག་འདི་དམངས་གཙོའི་རྒྱལ་ཁབ་ཞིག་གི་ནང་དུ་ཁྲིམས་མཐུན་གྱི་ཐོག་ནས་སྲུང་སྐྱོབ་དང་རྒྱབ་སྐྱོར་ཐོབ་པར་གལ་ཆེན་ཡིན་པར་མཐོང་ནས་ལས་འགུལ་སྤེལ་བ་ཡིན་ཡང་། ང་ཚོ་སྐྱབས་བཅོལ་གནས་བབས་ཀྱི་ཐོག་ནས་རྒྱ་གར་གྱི་ཁྲིམས་ལ་ལག་པ་འཆིང་བའི་གནས་སྟངས་མེད་པ་ཞིག་རེད། སྐབས་དེ་དུས་བོད་ཀྱི་སྤྱི་ཚོགས་ཀྱི་ནང་དུ་བོད་སྐད་ཡིག་ནང་སྐད་ཡིག་གཞན་གྱི་ཤུགས་རྐྱེན་ཐེབས་ནས་བཙན་བྱོལ་སྤྱི་ཚོགས་དཀའ་ལས་ཁག་པོ་ཆགས་ཡོད་པ་དངོས་ཡོད་གནས་ཚུལ་དུ་གྱུར་ཡོད་པས། བོད་པའི་སྤྱི་ཚོགས་ནང་དུ་བོད་ཀྱི་སྐད་ཡིག་ལ་ཞབས་ཞུ་བསྒྲུབ་རྒྱུ་གལ་ཆེན་དུ་མཐོང་ནས་ཚོགས་པའི་ངོ་བོ་ནས་ལས་འགུལ་སྤེལ་མགོ་བཙུགས་པ་ཞིག་ཡིན། ད་ལྟའི་ཆར་རྒྱ་གཞུང་གིས་བོད་པའི་སྐད་ཡིག་གཏོར་བཤིག་གཏོང་བའི་གནས་སྟངས་ཉིན་རེ་བཞིན་ཛ་དྲག་ཏུ་འགྱུར་བཞིན་ཡོད་པས། བོད་མི་ཡོད་དོ་ཅོག་ལ་རྣམ་དཔྱོད་དང་རིག་པ་ག་རེ་ཡོད་ན་བོད་ཀྱི་སྐད་ཡིག་སྲུང་སྐྱོབ་བྱེད་པར་གྲ་སྒྲིག་ཨང་གསར་དགོས་པ་མ་ཟད། འཛམ་གླིང་ཡུལ་གྲུ་ཁག་ཏུ་བོད་བརྒྱུད་ནང་བསྟན་གྱི་དགོན་པ་དང་ཆོས་ཚོགས་མང་པོ་ཡོད་པས། བོད་བརྒྱུད་ནང་བསྟན་གྱི་སྤྱི་སྐད་བོད་ཀྱི་སྐད་ཡིག་ཏུ་གཏན་འབེབ་བྱེད་རྒྱུ་གལ་ཆེན་པོ་རེད། དེ་བཞིན་བོད་ཀྱི་སྐད་ཡིག་འཁོར་བསྐྱོད་བྱེད་པའི་ཁོར་ཡུག་ཡག་པོ་ཞིག་འབད་བརྩོན་བྱེད་གལ་ཆེ་སྐོར་གསུངས་སོང་།

སཱ་ར་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས།  ༸གོང་ས་མཆོག་གི་བཀའ་དྲིན་ལ་བརྟེན་ནས་བོད་ཀྱི་རིག་གཞུང་གང་ལ་གང་འཚམ་གྱི་ཉར་ཚགས་བྱས་ཡོད་ཅིང་། དེང་དུས་ཀྱི་སྤྱི་ཚོགས་ཟང་ཟིང་གི་དབང་གིས་བོད་ཀྱི་སྐད་ཡིག་དང་རིག་གཞུང་ཉིན་རེ་བཞིན་ཉམས་ཆག་འགྲོ་བཞིན་ཡོད་པས། བོད་ཀྱི་མཐོ་སློབ་ཁག་དང་། གཞུང་འབྲེལ་མིན་པའི་ཚོགས་པ་ཚང་མ་མཉམ་རུབ་ཀྱི་ཐོག་ཏུ་སྲུང་སྐྱོབ་བྱེད་དགོས་པ་ལས། མི་རེ་ཟུང་གིས་སྒྲུབ་ཐུབ་པ་ཞིག་མིན་པས་ཚང་མ་མཉམ་འབྲེལ་བྱེད་དགོས་སྐོར་གསུངས་སོང་། དགེ་བཤེས་བློ་བཟང་སྨོན་ལམ་ལགས་ཀྱིས། བཙན་བྱོལ་གྱི་མི་རབས་རྒན་པས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་སྤུས་དག་པོ་བྱས་ཡོད་རེད། ད་ནི་ང་ཚོའི་མི་རབས་ཀྱི་ཕྲག་ཏུ་འགན་ཞིག་ཡོད་པ་ནི་གནས་སྟངས་ཧ་ཅང་ཛ་དྲག་ཡིན་པའི་སྐད་ཡིག་སྲུང་སྐྱོབ་རེད།  དེང་རབས་འཕྲུལ་རིག་གིས་ཉིན་དང་ཟླ་བ་རེའི་སྤྱི་ཚོགས་ཡོངས་སུ་འགྱུར་བ་ཐེབས་ཀྱི་ཡོད། ཏོག་དབྱིབས་གཉན་རིམས་སྐབས་སུ་མི་མང་ཡར་མར་འགྲིམ་འགྲུལ་བྱེད་མི་ཆོག་པའི་དབང་གིས་བརྡ་འཕྲིན་དང་འཕྲུལ་རིག་གིས་སྤྱི་ཚོགས་སུ་ཧང་སངས་པའི་འགྱུར་བ་ཐེབས་སུ་བཅུག་ཡོད་པ་མངོན་གསལ་དོད་པོ་རེད།  ནུབ་ཕྱོགས་ཀྱི་ཚན་རིག་པ་ཚོས་མ་འོངས་པ་མིའི་ཀླད་པ་ལས་གློག་གི་ཀླད་པ་བདེ་སྤྱོད་མང་ཤོས་སུ་འགྱུར་རྒྱུའི་ཚོད་དཔག་བྱེད་ཀྱི་ཡོད་པ་བཞིན། བོད་ཀྱི་སྐད་ཡིག་སྲུང་སྐྱོབ་བྱེད་པར་བོད་མི་ཚང་མ་མཉམ་རུབ་མ་བྱས་ཚེ་ཉེན་འཚབ་ཀྱི་གནས་སྟངས་སུ་འགྱུར་བཞིན་ཡོད་ན། ང་ཚོས་ཀྱང་དེང་རབས་དང་མཐུན་པའི་ལག་རྩལ་ཐོག་ནས་སྲུང་སྐྱོབ་དགོས་པ་དང་། འཛམ་གླིང་གི་ཁ་ཕྱོགས་གང་དུ་འགྲོ་བཞིན་ཡོད་ན་ང་ཚོའི་སྐད་ཡིག་གི་ཁོར་ཡུག་ཞིག་བསྐྲུན་དགོས་པ་དེར་མི་ཟུང་གིས་འུར་བརྒྱབ་པ་ཙམ་གྱིས་ཡོང་གི་མི་འདུག་ཅེས་གསུངས་སོང་།

བོད་ཀྱི་སྐད་ཡིག་ཞབས་ཞུ་ཁང་ནི་ཕྱི་ལོ་ ༢༠༡༢ ལོ་མཇུག་ཏུ་སྐད་འཕྲིན་དྲ་རྒྱ་ལས་གསར་འཛུགས་བྱས་པའི་སྐད་ཡིག་སྲུང་སྐྱོབ་ཀྱི་ཚོགས་པ་ཞིག་ཡིན་ཅིང་། འདས་པའི་མི་ལོ་ཧྲིལ་བོ་ ༡༠ བརྒྱུད་རིམ་ནང་དུ་བོད་ཀྱི་སྐད་ཡིག་སྲུང་སྐྱོབ་དང་འབྲེལ་བའི་ལས་འགུལ་རྒྱུན་མ་ཆད་པར་སྤེལ་ཡོད་པ་བཞིན། དེང་སྐབས་བཙན་བྱོལ་སྤྱི་ཚོགས་ནང་དུ་བོད་སྐད་བཤད་སྐབས་གཞན་སྐད་མཉམ་བསྲེས་བྱས་ནས་སྦྲགས་སྐད་བཤད་པ་སྐྱོན་དུ་ལྟ་བའི་སྤྱི་ཚོགས་ནང་དུ་བཟང་ཕྱོགས་ཀྱི་འགྱུར་བ་མཐོང་མུས་ཡིན་འདུག

གསར་འགོད་པ། བྱམས་པ་ཚེ་རིང་།