ཆོས་བརྒྱུད་ཚོགས་སྡེ་སོགས་ནས་བརྟན་བཞུགས་ཁག་བརྒྱད་བསྟར་འབུལ་ཞུས།
ཕྱི་ལོ་ ༢༠༢༣ ཟླ་ ༡ ཚེས་ ༡ ཉིན་གནས་མཆོག་རྡོ་རྗེ་གདན་དུ་དགེ་ལུགས་ཀྱི་ཆོས་བརྒྱུད་འཛིན་པ་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧མགོན་པོ་མཆོག་ནས། སྤྱི་ཡོངས་ཀྱི་ཆ་ནས་བོད་ཀྱི་ཆོས་དང་རིག་གཞུང་དེ་འཛམ་བུ་གླིང་གི་གཅེས་ནོར་ཡིན་བསམ་པའི་ཐོག་ནས་ཉམས་པ་སོར་བཅུད་མི་ཉམས་གོང་སྤེལ་ཡོང་རྒྱུའི་ཐད་ཚང་མས་ཐུགས་འཁུར་སྐྱེད་རོགས་གནང་ཞུ་རྒྱུ་དང། དུས་རབས་འདིའི་ནང་ལ་བཀྲ་ཤིས་པའི་ཉི་མ་ཤར་རྒྱུ་ཞིག་མགོ་འཛུགས་ཀྱི་ཡོད་པ་ཞིག་ཕལ་ཆེར་ངོས་རང་གི་བློར་ཡོང་གི་འདུག ཅེས་བཀའ་བཟང་བསྩལ།
ཕྱི་ཟླ་ ༡ ཚེས་ ༡༨ ཉིན་གནས་མཆོག་རྡོ་རྗེ་གདན་གྱི་དཔལ་ཡུལ་རྣམ་གྲོལ་གླིང་དུ། རྙིང་མའི་ཆོས་བརྒྱུད་འཛིན་པ་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧གོང་ས་མཆོག་ནས་ད་ལྟ་བར་དུ་བོད་བསྟན་སྲིད་ཀྱི་དོན་དུ་ཞབས་འདེགས་གང་ཙམ་ཞིག་བསྒྲུབས་ཡོད་པ་དང་ད་དུང་ཡང་ལོ་བཅུ་ཕྲག་གཅིག་གཉིས་རིང་གཏན་ཏན་ཞབས་འདེགས་བསྒྲུབ་ཐུབ་རྒྱུ་རེད་ཅེས་བཀའ་བཞེས་མཛད།
ཕྱི་ལོ་ ༢༠༢༢ ཟླ་ ༡༡ ཚེས་ ༣༠ ཉིན་གྱི་སྔ་དྲོར་ཐེག་ཆེན་ཆོས་གླིང་གཙུག་ལག་ཁང་དུ། འབྲས་སྤུངས་སྒོ་མང་གྲྭ་ཚང་དང་དགེ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་པ་གཉིས་ཐུན་མོང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། ༧གོང་ས་མཆོག་ནས་དེ་རིང་སྦྱིན་བདག་གི་གྲས་སུ་འབྲས་སྤུངས་སྒོ་མང་གྲྭ་ཚང་ཡོད་རེད། གོ་སྐབས་འདི་བརྒྱུད་ནས་སེར་འབྲས་དགའ་གསུམ་དང་ལྷག་པར་སྒོ་མང་གྲྭ་ཚང་གི་ཕྱག་དཔེ་གཟིགས་མཁན་ཚོས་ཐོས་བསམ་སྒོམ་པ་ཡ་མ་བྲལ་བ་སྤུས་དག་པོ་ཡོང་རྒྱུར་ཚང་མས་ཐུགས་ཁུར་སྐྱེད་ཤོག་ཨ། ཞེས་བཀའ་ནན་པོ་བསྩལ།
ཕྱི་ལོ་ ༢༠༢༢ ཟླ་ ༡༠ ཚེས་ ༢༦ ཉིན་གྱི་སྔ་དྲོར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་བོད་ཕྲུག་ཁྱིམ་སྡེའི་ལས་སློབ་ངོ་ཟུར་ཡོངས་དང་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་བཅས་ཀྱིས་བརྟན་བཞུགས་བསྟར་འབུལ་ཞུས་ཡོད་པ་དང་། བརྟན་བཞུགས་སྐབས་༧གོང་ས་མཆོག་གིས། ངོས་ཀྱིས་དཀའ་ལས་བརྒྱབ་པའི་རིན་པ་དེ་འཛམ་བུ་གླིང་གི་མི་མང་པོས་དགའ་བོ་བྱེད་ཀྱི་འདུག་ལ། དེ་ཡང་བསམ་པ་རྣམ་དག་གིས་གཞན་ལ་ཕན་ཐོགས་པའི་བྱ་བ་བསྒྲུབ་པ་ལ་བརྟེན་ནས་དགའ་བོ་བྱེད་ཀྱི་ཡོད་པ་ལས་དངུལ་སྤྲད་ནས་དགའ་བོ་བྱེད་ཀྱི་ཡོད་པ་མ་རེད་ཅེས་དང་། འཕགས་པ་སྤྱན་རས་གཟིགས་ཀྱི་སྐུ་ཡི་སྐུ་ཚབ་དང་། གསུང་གི་གསུང་ཚབ། ཐུགས་ཀྱི་ཐུགས་ཚབ་གནང་ནས་འགྲོ་དོན་མཛད་པ་དང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་པའི་ལེགས་སྐྱེས་ལ་སེམས་སྐྱིད་པ་དང་ལུས་པོ་བདེ་བོ་ཡོང་གི་ཡོད་སྐོར་བཀའ་སློབ་བསྩལ།
ཕྱི་ལོ་ ༢༠༢༢ ཟླ་ ༩ ཚེས་ ༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞིས་བྱེས་གཉིས་ཀྱི་རྒྱལ་བ་ཇོ་ནང་བ་ཡོངས་དང་། མདོ་སྨད་མང་འབའ་བྱ་གསུམ། མོན་ཡུལ་རིག་གཞུང་གཅེས་འཛིན་ཁང་། སིཌ་ནི་བོད་རིགས་སྤྱི་མཐུན་ཚོགས་པ་བཅས་ཚོགས་པ་ཁག་ལྔ་ཡིས། ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། ༧གོང་ས་མཆོག་ནས་ངོས་ད་ལྟ་འབྱུང་འགྱུར་ལོ་ ༢༠ ལྷག་འཚོ་ཐུབ་ཀྱི་རེད། དངོས་ཡོད་གནས་ཚུལ་ལ་ངོས་རང་གིས་མི་མང་པོ་ཞིག་ལ་ཕན་ཐོགས་བྱ་ཐུབ་རྒྱུ་དང་། ནང་པ་མིན་པའི་མི་མང་པོ་ཞིག་ལའང་ཕན་ཐོགས་ཏོག་ཙམ་བྱེད་ཐུབ་པ་ཆགས་དུས། ནམ་མཁའ་མ་ཟད་ཀྱི་བར་དུ་འགྲོ་བའི་དོན་བྱེད་ཀྱི་ཡིན་ཞེས་བཀའ་བཟང་བསྩལ།
ཕྱི་ཟླ་ ༧ ཚེས་ ༡༠ ཉིན་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་གནང་བ་དང་། སྐྱེ་བ་སྔ་ཕྱི་ཁས་བླངས་ཀྱང་མ་བླངས་ཀྱང་མི་ཚེ་འདི་ལ་སེམས་པ་བཟང་པོ་བྱོས། ཆུང་ཆུང་སྐབས་སུ་ཨ་མའི་བྱམས་བརྩེས་བསྐྱངས་པ་དང་། ཨ་མས་རླུང་བསྟན་ནས་འགྲོ་ཡི་མེད་པར་བྱམས་བརྩེ་སྟོན་གྱི་ཡོད་པས་ང་ཚོའི་མི་ཚེའི་མགོ་དེ་ལྟར་བཙུགས་པ་རེད། མི་ཚེའི་འཕྲོ་བྱམས་བརྩེ་ལྡན་པ་ཞིག་གིས་བསྐྱལ་བ་ཡིན་ན་སོ་སོའི་སེམས་སྐྱིད་པ་དང་། རོགས་པ་ཚོའང་སེམས་སྐྱིད་པ། མདོར་ན་འཛམ་གླིང་སྤྱི་ལ་དངོས་གནས་དྲང་གནས་སེམས་ཀྱི་ཞི་བདེ་ཡོད་པ་དང་ཞི་བདེ་ཡོང་བའི་གོ་སྐབས་ཡོད་པ་རེད། དེ་རིང་གོ་སྐབས་འདིར་ངོས་ཀྱི་གྲོགས་པོ་ཚང་མར་དུས་རྒྱུན་དུ་ཆོས་ཁས་བླངས་ཀྱང་མ་བླངས་ཀྱང་སེམས་པ་བཟང་པོ་བྱེད་པ་དང་། སུ་ལ་ཡིན་ནའང་ཕན་ཐོགས་བྱེད་པའི་བསམ་བློ་གཏོང་དགོས་སྐོར་སོགས་གསུངས་སོང་།
ཕྱི་ལོ་ ༢༠༢༢ ཟླ་ ༦ ཚེས་ ༢༤ ཉིན་གྱི་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་ཡར་འབྲོག་གཞིས་བྱེས་མི་མང་དང་འཇོལ་ཀོང་རྒྱལ་གསུམ་གཞིས་བྱེས་མི་མང་། མངའ་རིས་སྤྱི་མཐུན་ཚོགས་པ་ཐུན་མོང་དང་། སེར་བྱེས་དགེ་བཤེས་གྲོལ་ལྡན་རྒྱ་མཚོ། དེ་བཞིན་བྱང་རིས་གཞིས་བྱེས་མི་མང་བཅས་ཚོགས་པ་ལྔ་ཐུན་མོང་གིས་བོད་བསྟན་སྲིད་མི་རིགས་དང་བཅས་པའི་སླད་དུ་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་བསྐལ་བརྒྱར་བརྟན་ཕྱིར་བརྟན་བཞུགས་བསྟར་འབུལ་ཞུས་ཡོད་པ་དང་། ༧གོང་ས་མཆོག་ནས་སླར་ཡང་མགོན་པོ་གང་ཉིད་མཆོག་ད་དུང་ལོ་བཅུ་ཕྲག་གཉིས་གསུམ་རིང་སྐུ་འཚོ་བཞུགས་མཛད་རྒྱུའི་བཀའ་བཟང་བསྩལ།
ཕྱི་ལོ་ ༢༠༢༢ ཟླ་ ༥ ཚེས་ ༢༥ ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་ས་སྐྱ་༧གོང་མ་ཁྲི་ཆེན་རིན་པོ་ཆེ་མཆོག་གི་དབུས་ཁྲི་འཛིན་རྣམ་གཉིས་དབུ་བཞུགས་ཐོག དཔལ་ས་སྐྱ་བའི་ཆོས་བརྒྱུད་འཛིན་པ་ཡོངས་ནས་སྒྲོལ་དཀར་བསྙེན་མཚམས་ཡོད་པའི་མཁན་བླ་སྤྲུལ་དགེ་འདུན་པ་ ༡༡༣ ནས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། ༧གོང་ས་མཆོག་ནས་བོད་ཀྱི་སངས་རྒྱས་ཀྱི་བསྟན་པ་དང་བོད་རྒྱ་ཆེ་མི་མང་གི་རེ་འདོད་སྐོང་ཆེད་ཁོང་སྐུ་ཚེ་ཡུན་རིང་བརྟན་པར་ཐུགས་སྨོན་གནང་གི་ཡོད་པ་ལྟར་བོད་མི་ཚོས་ཀྱང་དེ་དེ་བཞིན་གྱིས་སྨོན་ལམ་བརྒྱག་དགོས་སྐོར་གསུངས།
གསར་འགོད་པ་སྐལ་བཟང་སྦྱིན་པས་ཕྱོགས་བསྒྲིགས་བྱས།
