འདས་ལོ་གཅིག་རིང་གི་མི་སྒེར་ལ་སྩལ་བའི་བཀའ་སློབ་དང་དམིགས་བསལ་མཛད་འཕྲིན།

འཛམ་གླིང་གི་གནད་ཡོད་མི་སྣར་བསྩལ་བའི་འཚམས་འདྲིའི་གསུང་འཕྲིན།

ཕྱི་ལོ་ ༢༠༢༢  ཟླ་ ༤ ཚེས་ ༢༩ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས། ལྷོ་ཤར་ཨེ་ཤ་ཡའི་གླིང་ཕྲན་རྒྱལ་ཁབ་ཨི་སི་ཊི་མོར་ (East Timor) གྱི་སྲིད་འཛིན་དུ་གསར་དུ་བདམས་པའི་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཇོ་སི་མེ་ཉུལ་རཱ་མོ་སི་ཧོར་ཊ་ (José Manuel Ramos-Horta) ལགས་དང་། ཕྱི་ཟླ་ ༥ ཚེས་ ༢༢ ཉིན་ཨོ་གླིང་གི་སྲིད་བློན་ཨེན་ཐོ་ནི་ཨལ་བྷེ་ནི་སི་(Anthony Albanese) ལགས། ཕྱི་ཟླ་ ༧ ཚེས་ ༡ ཉིན་ཧྥི་ལི་པིན་གྱི་སྲིད་འཛིན་གསར་པ་སྐུ་ཞབས་མར་ཁོ་སི་(Ferdinand Marcos Jr) ལགས།  ཕྱི་ཟླ་ ༧ ཚེས་ ༢༢ ཉིན་རྒྱ་གར་གདོད་མའི་རིགས་རྒྱུད་རྒྱ་གར་གྱི་སྲིད་འཛིན་ལྕམ་ཤྲི་མ་ཏི་(Shrimati Droupadi Murmu)ལགས།  ཕྱི་ཟླ་༨  ཚེས་ ༦ ཉིན་རྒྱ་གར་གྱི་སྲིད་འཛིན་གཞོན་པ་སྐུ་ཞབས་ཇག་དྷིབ་ཌན་ཀར་( Jagdeep Dhankhar )ལགས། ཕྱི་ཟླ་ ༩ ཚེས་ ༦ ཉིན་དབྱིན་ཡུལ་གྱི་སྲིད་བློན་གསར་པ་ལྕམ་ལེ་ཛི་ཊི་རོ་སི་ (Liz Truss) ལགས། ཕྱི་ཟླ་ ༡༠ ཚེས་ ༤ ཉིན་ནོ་སྦེལ་དངོས་ཁམས་རིག་པའི་གཟེངས་རྟགས་ཐོབ་མཁན་ཧྥ་རན་སིའི་ཚན་རིག་པ་ཨ་ལིན་ཨེ་སི་ཕེ་ཁི་ཌི་(Alain Aspect)ལགས་དང་། ཨ་རིའི་ཚན་རིག་པ་རྗོན་ཁི་ལཱ་ཟིར་(John F. Clauser)ལགས།  ཨོ་སི་ཊི་རི་ཡའི་ཚན་རིག་པ་ཨེན་ཊོན་ཛེ་ལིན་གྷིར་(Anton Zeilinger)ལགས་བཅས་དང་། ཕྱི་ཟླ་ ༡༠ ཚེས་ ༢༣ ཉིན་ཨི་ཊ་ལིའི་སྲིད་བློན་གསར་པ་ལྕམ་ཇོར་ཇི་ཡ་མེ་ལོ་ནི་ལགས། ཕྱི་ཟླ་ ༡༠ ཚེས་ ༢༥ ཉིན་དབྱིན་ཡུལ་གྱི་སྲིད་བློན་གསར་པ་སྐུ་ཞབས་རཱི་ཤེ་སོ་ནཱག་ལགས། ཕྱི་ཟླ་ ༡༡ ཚེས་ ༢༥ ཉིན་མཱ་ལེ་ཤི་ཡའི་སྲིད་བློན་གསར་པ་ཨན་ཝར་ཨིབ་ར་ཧིམ་(Anwar Ibrahim)ལགས། ཕྱི་ཟླ་ ༡༢ ཚེས་ ༡༢ ཉིན་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་སུག་ཝིན་ཌར་སིང་སུ་ཀུའུ་(Sukhvinder Singh Sukhu ) ལགས། ཕྱི་ལོ་ ༢༠༢༣ ཟླ་ ༡ ཚེས་ ༡ ཉིན་བྷར་ཛིལ་གྱི་སྲིད་འཛིན་གསར་པ་སྐུ་ཞབས་ལུ་ལ་དྷ་སིལ་ཝ་ (Lula da Silva) ལགས། ཕྱི་ལོ་ ༢༠༢༣ ཟླ་ ༡ ཚེས་ ༩ ཉིན་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བ་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) ལགས་དང་། གྲོས་ཚོགས་འོག་མའི་དམངས་གཙོ་ཚོགས་པའི་ཚོགས་གཙོ་གསར་པ་སྐུ་ཞབས་ཧ་ཁེམ་ཇའེ་ཧྥར་སི་ (Hakeem Jeffries) ལགས། ཕྱི་ཟླ་ ༡ ཚེས་ ༢༥ ཉིན་ཛེ་ལན་ཌིའི་སྲིད་བློན་ཟུར་པ་ལྕམ་ཇཱེ་སིན་ཌ་ཨར་དི་རེན་ (Jacinda Ardern) ལགས་དང་རྒྱལ་ཁབ་དེའི་སྲིད་བློན་གསར་པ་སྐུ་ཞབས་ཁི་རི་སི་ཧིབ་ཁིན་ (Chris Hipkins) ལགས་རྣམ་གཉིས་བཅས་ལ་འཚམས་འདྲིའི་གསུང་འཕྲིན་སྩལ་གནང་ཡོད།

འཛམ་གླིང་གི་གནད་ཡོད་མི་སྣར་ཐུགས་གསོའི་གསུང་འཕྲིན་བསྩལ་བ།

ཕྱི་ལོ་ ༢༠༢༢ ཟླ་  ༣ ཚེས་ ༢༥ ཉིན་ཨ་རིའི་བུད་མེད་ཕྱི་སྲིད་དྲུང་ཆེ་ཐོག་མ་ལྕམ་སྐུ་མེ་ཌེ་ལིན་ཨལ་བྷི་རའེ་ཊི་ (Madeleine Albright) ལགས་འདས་གྲོངས་སུ་ཕྱིན་པར་ཐུགས་གསོ་དང་། ཕྱི་ཟླ་ ༦ ཚེས་ ༢༡ ཉིན་ཨ་སམ་ནང་ཆར་ཤུགས་དྲག་པོས་རྐྱེན་བྱས་ཏེ་དཀའ་ངལ་འཕྲད་བཞིན་པའི་ཨ་སམ་མི་མང་།  ཕྱི་ཟླ་ ༧ ཚེས་ ༢༦  ཉིན་འདས་གྲོངས་སུ་ཕྱིན་པའི་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཁྲེམ་སྦེལ་ (lord David Trimble ) ལགས་དང་། ཕྱི་ཟླ་ ༩ ཚེས་ ༡ ཉིན་འདས་གྲོངས་ཕྱིན་པའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ཨུ་རུ་སུའི་སྲིད་ཟུར་སྐུ་ཞབས་མེ་ཁེལ་གྷོར་བྷ་ཆོབ་ལགས། ཕྱི་ཟླ་ ༩ ཚེས་ ༨ ཉིན་དབྱིན་ཇིའི་རྒྱལ་མོ་ཨེ་ལི་ཛེ་བྷེ་ཐི་གཉིས་པ་ (Queen Elizabeth II) ལགས། ཕྱི་ལོ་ ༢༠༢༣ ཟླ་ ༡ ཚེས་ ༢ ཉིན་ཡེ་ཤུའི་ཆོས་དཔོན་ཟུར་བ་བྷེ་ནེ་ཌིག་ཊི་ལགས་བཅས་དང་ཕྱི་ཟླ་ ༢ ཚེས་ ༧ ཉིན་དཀྱིལ་ཤར་ཨེ་ཤ་ཡའི་རྒྱལ་ཁབ་ཏུར་ཀི་དང་སི་རི་ཡའི་ནང་ས་ཡོམ་ཚད་རིམ་ ༧།༨ ཅན་ཞིག་བརྒྱབ་སྟེ་གནོད་འཚེ་ཕོག་པ་རྣམས་དང་། ཕྱི་ལོ་ ༢༠༢༢  ཟླ་ ༨ ཚེས ༢༠ ཉིན་རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་ནང་ས་རུད་དང་ཆུ་ལོག་གི་གནོད་འཚེ་བྱུང་སྟེ། མི་གྲངས་ ༢༢  འདས་གྲོངས་སུ་ཕྱིན་པ་རྣམས་དང་། ཕྱི་ཟླ་ ༡༠ ཚེས་ ༣༡ ཉིན་རྒྱ་གར་མངའ་སྡེ་གྷོ་ཇཱོ་རེ་ཊིའི་གྲོང་ཁྱེར་མཱོར་བྷེའི་(Morbi)ནང་ཐག་ཟམ་ཆད་པའི་དོན་རྐྱེན་ཁྲོད་འདས་གྲོངས་ཕྱིན་པ་རྣམས་བཅས་ལ་ཐུགས་གསོ་མཛད།

ལྡི་ལིའི་སློབ་གྲྭ་ཆེ་འབྲིང་གི་དགེ་སློབ་ལྔ་སྟོང་བརྒལ་བར་བཀའ་སློབ་བསྩལ།

ཕྱི་ཟླ་ ༡༢ ཚེས་ ༢༡ ཉིན་ ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་རྒྱལ་ས་ལྡི་ལི་གུ་རུ་གྷ་རམ་ (Gurugram) ཁུལ་དུ་རྟེན་གཞི་བྱས་པའི་སཱལ་ཝན་མི་མང་སློབ་གྲྭ་ (Salwan Public School) རུ་ལྡི་ལི་ཁུལ་གྱི་སློབ་གྲྭ་ཆེ་འབྲིང་ ༦༡ གི་སློབ་ཕྲུག་སྟོང་ཕྲག་མང་པོར་ཆོས་ལུགས་ལ་མ་རྟེན་པའི་བཟང་སྤྱོད་ (Secular Ethics) ཀྱི་བརྗོད་གཞིའི་ཐོག་བཀའ་སློབ་བསྩལ་སྐབས། སྐབས་དེར་༧མགོན་པོ་གང་ཉིད་མཆོག་གིས། དགུན་ཁ་འཆར་ཅན་རྡོ་རྗེ་གདན་ལ་འགྲོ་ཡི་ཡོད་དུས། དེའི་ཞོར་དུ་ལྡི་ལིར་བརྟག་དཔྱད་བྱ་རྒྱུ་བྱས་ནས་ལྡི་ལིར་འགྲོ་མི་དགོས་པ་བྱས་ཡིན། ང་འདིར་ལྷོད་ལྷོད་བྱས་ནས་སྡོད་ཀྱི་ཡིན། གཟུགས་པོའི་གནས་སྟངས་བདེ་པོ་ཞེ་དྲག་ཡིན། མོ་དང་བརྟག་དཔྱད་བྱས་པ་ཡིན། འདི་ག་དྷ་རམ་ས་ལར་ལྷོད་ལྷོད་བྱས་ནས་བསྡད་པ་ཡིན་ན་དེ་ཡག་པོ་འདུག གནས་སྐབས་ལྡི་ལི་རུ་འགྲོ་བའི་འཆར་གཞི་དེ་མི་དགོས་པ་བྱས། ཁྱེད་རང་ཚོ་བློ་བདེ་པོ་བྱས་ནས་བཞུགས་རོགས། ང་སྐུ་འབུམ་ནས་ཡོང་བའི་བླ་མ་འདིར་བདེ་ཐང་ངང་བསྡད་ཡོད། དེར་བརྟེན་ཁྱེད་རང་ཚོ་བློ་བདེ་པོ་བྱས་ནས་བཞུགས་རོགས། ཞེས་གསུངས།

གོ་ལའི་ཉིན་མོར་མཁར་གདོང་ལའི་འཁྱག་རྡོག་ཅིག་སྤྱན་འབུལ་ཞུས།

ཕྱི་ཟླ་ ༤ ཚེས་ ༢༢ ཉིན་གོ་ལའི་ཉིན་མོ་དང་སྟབས་བསྟུན། རྒྱ་གར་གྱི་གནམ་གཤིས་འགྱུར་ལྡོག་གི་ལས་འགུལ་བ་དང་སློབ་གསོ་བ་བསོད་ནམས་དབང་ཕྱུག་ལགས་ཀྱིས་སྣེ་འཁྲིད་པའི་ཚོགས་ཆུང་ཞིག་གིས་བཞུགས་སྒར་རྒྱལ་བའི་ཕོ་བྲང་དུ་མཇལ་བཅར་ཞུས་ཏེ།  ལ་དྭགས་ཀྱི་རི་བོ་མཐོ་ཤོས་མཁར་གདོང་ལ་ནས་ཁྱེར་ཡོང་བའི་འཁྱག་རྡོག་ཅིག་༧གོང་ས་རྒྱལ་བ་རིན་པོ་ཆེ་མཆོག་ལ་སྤྱན་འབུལ་ཞུས། སྐབས་དེར་༧གོང་ས་མཆོག་ནས་དེང་དུས་འཛམ་གླིང་ནང་འཕྲད་བཞིན་པའི་དཀའ་ངལ་ཐོག་ཐུགས་འཚབ་གནང་བ་དང་འབྲེལ། འཇིག་རྟེན་འདིའི་ནང་ང་ཚོ་ཚང་མར་སོ་སོའི་སྤྱི་ཚོགས་ལ་འགན་ཡོད་པ་དང་། ས་གནས་དང་ཆོས་ལུགས་སོགས་ཀྱི་དབྱེ་བ་མེད་པའི་ཐོག་ནས་མ་འོངས་པའི་མདུན་ལམ་གྱི་ཐོག་ལ་ཚང་མས་མཉམ་རུབ་ཀྱིས་དཀའ་ལས་བརྒྱག་དགོས་པ་སོགས་ཀྱི་བཀའ་སློབ་ལམ་སྟོན་མཛད།

 ཨ་རིའི་དམིགས་བསལ་བོད་དོན་འབྲེལ་མཐུད་པས་མཇལ་བཅར་ཞུས།

ཕྱི་ལོ་ ༢༠༢༢ ཟླ་ ༥ ཚེས་ ༡༩ ཉིན་གྱི་སྔ་དྲོར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨ་ཛི་ར་ཛེ་ཡ་ (Uzra Zeya) མཆོག་གིས་སྣེ་འཁྲིད་པའི་ཨ་རིའི་གཞུང་འབྲེལ་སྐུ་ཚབ་ཚོགས་ཆུང་ཞིག་གིས་༧གོང་ས་མཆོག་ལ་མཇལ་བཅར་ཞུས་ཏེ་ཆུ་ཚོད་ ༡ དང་ཕྱེད་ཀ་ལྷག་གི་རིང་བོད་དོན་སོགས་ཀྱི་སྐོར་ནས་བཀའ་མོལ་གནང་བ་དང་། དེ་ནས་གངས་ཅན་སྐྱིད་གཤོངས་ཀྱི་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་བོད་མི་མང་སྤྱི་འཐུས་ལྷན་ཁང་སོགས་སུ་གཟིགས་སྐོར་གནང་། གཞན་ཡང་། ཕྱི་ཟླ་ ༡༢ ཚེས་ ༥ ཉིན་སྔ་དྲོར་བཞུགས་སྒར་ཕོ་བྲང་དུ། ཨ་རིའི་ཨོ་ཧའོ་མངའ་སྡེའི་ (Ohio) སིན་སིན་ན་ཊི་(Cincinnati) གྲོང་ཁྱེར་སྤྱི་ཁྱབ་པ་ཨབ་ཊབ་ཀརྨ་སིང་པུ་རི་ཝལ་ལགས་དང་། ཀེན་ཊོར་ཀེ་མངའ་སྡེའི་གྲོང་ཁྱེར་ལོའུ་སི་ཝེལ་ (Louisville) གྱི་སྤྱི་ཁྱབ་པ་གྷི་རིག་ཧྥེ་ཤིར་(Greg Fischer)ལགས་སོགས་ཨ་རིའི་གྲོང་ཁྱེར་ཁག་བདུན་གྱི་སྤྱི་ཁྱབ་པ་དྷ་རམ་ས་ལར་ཆེད་ཕེབས་ཀྱིས་༧གོང་ས་མཆོག་ལ་མཇལ་བཅར་ཞུས།

༧སྐུའི་གཅེས་པོའི་ཡང་སྲིད་མཆོག་ལ་མཇལ་ཁ་བསྩལ།

ཕྱི་ཟླ་ ༡༡ ཚེས་ ༢༣ ཉིན་བཞུགས་སྒར་ཕོ་བྲང་གི་མཇལ་འཕྲང་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་༸སྐུའི་གཅེན་པོ་སྟག་འཚེར་སྐུ་ཕྲེང་དྲུག་པ་ཐུབ་བསྟན་འཇིགས་མེད་ནོར་བུ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་བསྟན་འཛིན་ཡོན་ཏན་རྒྱ་མཚོ་མཆོག་དང་ཁོང་གི་སྐུ་མཆེད་ཁ་ཤས། དེ་བཞིན་སྟག་འཚེར་རིན་པོ་ཆེ་སྐུ་གོང་མའི་སློབ་ཕྲུག་ཁག་གཅིག་དང་། ཐའེ་ཝན་ནས་ཕེབས་པའི་སྦྱིན་བདག་ཁག་གཅིག་བཅས་ལ་མཇལ་ཁ་དང་བཀའ་སློབ་བསྩལ་སྐབས། སྟག་འཚེར་རིན་པོ་ཆེ་ང་ཚོ་སྐུ་འབུམ་དགོན་པའི་བླ་མ་གལ་ཆེ་བ་ཞིག་རེད། འདི་གྲྭ་ས་ལ་བསྡད་ནས་འབྲས་སྤུངས་སུ་དཔེ་ཆར་བལྟས་ནས་བསྡད་ཡོད། མ་འོངས་པར་སྐུ་འབུམ་དགོན་པ་གཙོ་བོར་གྱུར་པའི་མདོ་སྨད་ཀྱི་ས་ཆ་ལ་ཕན་ཐོགས་རྒྱ་ཆེན་པོ་བྱེད་ཐུབ་པ་ཞིག་ཏན་ཏན་ཡོང་གི་རེད། དཔེ་ཆ་ཡག་པོ་བལྟ་དགོས་པ་རེད། ཅེས་བཀའ་བསྩལ།

རྒྱལ་སྤྱིའི་རང་བཞིན་གྱི་དྲ་ལམ་ཚོགས་འདུའི་ཚོགས་མགོན་དུ་ཕེབས།

ཕྱི་ཟླ་ ༥ ཚེས་ ༡༦ ཉིན་གནས་བརྟན་སྡེ་བའི་ལུགས་ཀྱི་སངས་རྒྱས་བཅོམ་ལྡན་འདས་སྐུ་འཁྲུངས་པ་དང་། སངས་རྒྱས་པ། མྱ་ངན་ལས་འདས་པ་བཅས་དུས་ཚིགས་གསུམ་ལྡན་གྱི་ཉིན་མོ་དང་བསྟུན། རྒྱལ་སྤྱིའི་ནང་པའི་ལྷན་ཚོགས་ཀྱི་གོ་སྒྲིག་དང་རྒྱ་གར་གྱི་རིག་གཞུང་ལྷན་ཁང་གི་རྒྱབ་སྐྱོར་འོག་རྒྱལ་སྤྱིའི་རང་བཞིན་གྱི་དྲ་ལམ་ཚོགས་འདུ་ཞིག་འཚོགས་པའི་ཐོག ༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་འཛམ་གླིང་གི་ནང་པའི་བླ་ཆེན་མང་པོ་ཞིག་ཕེབས་ཏེ་བཀའ་སློབ་གནང་ཡོད་པ་དང་། ཚོགས་ཐོག་ཏུ་༧མགོན་པོ་གང་ཉིད་མཆོག་གིས། སངས་རྒྱས་ཀྱི་ཆོས་ལ་ཇི་ཙམ་དཔྱད་པ་བྱས་ན་དེ་ཚོད་ཀྱིས་སེམས་ལ་ངེས་པ་རྙེད་རྒྱུ་ཡོད་པས།  སྟོན་པའི་གསུང་གི་འཕྲིན་ལས་ལ་དོ་སྣང་དང་སློབ་སྦྱོང་ཡག་པོ་བྱས་ཏེ་བྱང་ཆུབ་ཀྱི་སེམས་སྒོམ་པ་སོགས་བྱས་ཚེ། ཕྱི་ནང་གཉིས་ལ་ཞི་བདེ་ཡོང་གི་ཡོད་པ་ཚང་མས་དགོངས་པར་འཇགས་རོགས་གནང་། ཞེས་གསུངས།

དགོང་གྲངས་ ༨༧ ལ་ཕེབས་པའི་༧སྐུའི་འཁྲུངས་སྐར་གྱི་དགའ་སྟོན་ལ་རོལ།

ཕྱི་ཟླ་ ༧ ཚེས་ ༦ ཉིན་བཞུགས་སྒར་ཐེག་ཆེན་གཙུག་ལག་ཁང་གི་ཆོས་རའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་དགོང་གྲངས་ ༨༧ ལ་ཕེབས་པའི་༧སྐུའི་འཁྲུངས་སྐར་གྱི་གཞུང་འབྲེལ་དགའ་སྟོན་མཛད་སྒོ་འཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐ་གོར་( Jai Ram Thakur) མཆོག་དང་། དམིགས་བསལ་སྐུ་མགྲོན་དུ་ཨ་རིའི་བོད་དོན་རྒྱབ་སྐྱོར་བ་དང་གློག་བརྙན་འཁྲབ་སྟོན་པ་གྲགས་ཅན་རི་ཆའ་ཌི་གྷེ་རི་( Richard Gere) ལགས་ཕེབས་ཡོད་པ་རེད། འཁྲུངས་སྐར་གྱི་མཛད་སྒོའི་སྟེང་༧གོང་ས་མཆོག་གིས་དྲ་ལམ་བརྒྱུད།  ངོས་ནས་ཉིན་ལྟར་ཇི་སྲིད་ནམ་མཁའ་གནས་པ་དང་། །འགྲོ་བ་དེ་སྲིད་གནས་གྱུར་བ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག་ཟེར་ནས་སྨོན་ལམ་རྒྱག་གི་ཡོད། ཚེ་རབས་ནས་ཚེ་རབས་ཏུ་གཞན་དོན་བསྒྲུབ་ས་ཞིག་ལ་སྐྱེ་རྒྱུའི་སེམས་ཀྱི་དམ་བཅའ་བརྟན་པོ་ཡོད། ཅེས་བཀའ་སློབ་བསྩལ།

 ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་གནང་།

ཕྱི་ཟླ་ ༧ ཚེས་ ༦ ཉིན་༧གོང་ས་མཆོག་གི་སྐུའི་འཁྲུངས་སྐར་དང་བསྟུན་བཞུགས་སྒར་དྷ་སའི་ལྷ་རྒྱལ་རིར་༧གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་གནང་ཡོད་པ་དང་། ༧གོང་ས་མཆོག་གིས། ངོས་རང་ཟི་ལིང་གི་ས་ཁུག་ལུང་ཁུག་ཞིག་ནས་སྐྱེས་རྗེས་ལྷ་སར་བསླེབས་ནས་སློབ་གཉེར་བྱས། དེ་ནས་བཙན་བྱོལ་དུ་འབྱོར་ནས་མི་མང་པོར་ཐུག་པའི་གྲུབ་འབྲས་སུ་ང་ཚོ་བོད་ཀྱི་རིག་གཞུང་དང་། སེམས་ཁམས་རིག་པ། སེམས་ཀྱི་ཞི་བདེ་ག་འདྲ་བསྒྲུབ་དགོས་ཀྱི་ཡོད་མེད། དེའི་ཐོག་ནས་འཛམ་གླིང་ནང་ཞི་བདེ་ག་འདྲ་བསྐྲུན་དགོས་ཀྱི་ཡོད་མེད་དེ་དག་ང་ཚོས་གཞན་དང་མི་འདྲ་བའི་འགྲེལ་བཤད་བརྒྱབ་ཐུབ་པ་ཞིག་བྱུང་ཡོད།  ཅེས་བཀའ་སློབ་བསྩལ།

རླབས་ཆེན་གྱི་མཛད་པར་ཆེ་བསྟོད་དུ་ཕུལ་བའི་གཟེངས་རྟགས་འགའ།

ཕྱི་ཟླ་ ༩  ཕྱི་ཚེས་ ༢ ཉིན་ཨ་རིའི་ཁཱ་ལི་ཧྥོར་ནི་ཡ་གཙུག་ལག་སློབ་གླིང་གི་མཱར་སི་ཞིབ་འཇུག་ཁང་གིས་ལོ་འཁོར་གཟེངས་རྟགས་(Alice and Clifford Spendlove Prize ) ཐེངས་ ༡༥ པ་དེ་༧གོང་ས་རྒྱལ་བ་རིན་པོ་ཆེ་མཆོག་ལ་སྤྱི་ཚོགས་དྲང་བདེན་དང་། འབྲེལ་ལམ། བཟོད་སྒོམ་བཅས་ཀྱི་ཐོག་རླབས་ཆེ་བའི་མཛད་འཕྲིན་བསྐྱངས་པའི་ཆེ་བསྟོད་ཆེད་དྲ་ལམ་བརྒྱུད་ནས་ཕུལ། ཕྱི་ཟླ་ ༡༡ ཚེས་ ༡༩ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བདག་ཉིད་ཆེན་པོ་གྷན་དྷི་མཆོག་དང་ནལ་སན་མན་ཌ་ལ་མཆོག་རྣམ་གཉིས་ཀྱི་མཚན་ཐོག་ཏུ་བཙུགས་པའི་རྒྱ་གར་གྱི་ཐེབས་རྩ་ཁང་ཞིག་གིས། ཧི་མ་ཅལ་མངའ་སྡེའི་སྲིད་སྐྱོང་སྐུ་ཞབས་རཱ་ཇི་ཌ་རཱ་ཨར་ལེག་ལགས་བརྒྱུད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་ཕྱི་ལོ་ ༢༠༡༩ ལོའི་གྷན་དྷི་མན་ཌ་ལའི་གཟེངས་རྟགས་ཐོག་མ་དེ་འབུལ་བཞེས་མཛད། ཕྱི་ཟླ་ ༡༢ ཚེས་ ༩ ཉིན་དྷ་རམ་ས་ལའི་༧གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དུ་བསྡུས་པའི་བློ་གྲོས་དང་བྱམས་བརྩེ་སྤེལ་བའི་གོ་ལ་སྤྱི་ཁྱབ་ཀྱི་ལས་གཞི་སཱི་ཤེས་ཡོན་སློབ་གསོ་དང་འབྲེལ་བའི་ཚོགས་འདུའི་ཐོག ཨེ་མོ་རི་གཙུག་ལག་སློབ་གཉེར་ཁང་ངོས་ནས་༧གོང་ས་རྒྱལ་བ་རིན་པོ་ཆེ་མཆོག་གི་བྱམས་བརྩེ་གོང་སྤེལ་གྱི་མཛད་འཕྲིན་རླབས་པོ་ཆེར་ཆེ་བསྟོད་ཀྱི་གཟེངས་རྟགས་ཕྱག་འཁྱེར་ཞིག་འབུལ་ལམ་ཞུས། ཕྱི་ཟླ་ ༨ ཚེས་ ༥ ཉིན་ལ་དྭགས་སན་དྷོ་གྷ་(Sindhu Ghat)རུ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་ལ་དྭགས་མི་མང་ཡོངས་ཀྱི་ཚབ་བྱས་ཏེ། ཕྱི་ལོ་ ༢༠༢༢ ལོའི་ལ་དྭགས་དཔལ་རྔམ་གྱི་གཟེངས་རྟགས་དེ་ཁྲེག་སེ་རིན་པོ་ཆེ་ནས་༧གོང་ས་མཆོག་རྒྱལ་བ་རིན་པོ་ཆེ་མཆོག་ལ་འབུལ་ལམ་ཞུས། ལྷོ་ཨ་ཕི་རི་ཀར་རྟེན་གཞི་བྱས་པའི་འཛམ་གླིང་ཞི་བདེ་ཐེབས་རྩ་ཚོགས་པས་ (Sivananda World Peace Foundation) ཕྱི་ལོ་ ༢༠༢༢ ལོའི་ Sivananda ཞི་བདེའི་གཟེངས་རྟགས་དེ་ཕྱི་ཟླ་ ༡༡ ཚེས་ ༡ ཉིན་བཞུགས་སྒར་དུ་༧གོང་ས་མཆོག་ལ་འབུལ་ལམ་ཞུས་ཡོད།

གསར་འགོད་པ་སྐལ་བཟང་སྦྱིན་པས་ཕྱོགས་བསྒྲིགས་བྱས།