དེ་རིང་ཕྱི་ཚེས་ ༡༣ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཞབས་པེ་ཊར་པཱ་ཝེལ་ (Petr Pavel)ལགས་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དུ་བདམས་ཐོན་བྱུང་བར་འཚམས་འདྲིའི་གསུང་འཕྲིན་སྩལ་ཏེ། འཛམ་གླིང་ཡོངས་གཉན་འཕྲེང་ཅན་གྱི་དུས་ཚོད་དང་འཕྲད་བཞིན་པའི་སྐབས་འདིར། སྐུ་ཞབས་པེ་ཊར་པཱ་ཝེལ་ལགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་རེ་བ་དང་མངོན་འདོད་བསྒྲུབ་པར་འདོད་པའི་དཀའ་ངལ་ཡོངས་ལ་གདོང་ལེན་དང་ལེགས་འགྲུབ་ཡོང་བའི་སྨོན་འདུན་ཡོད་སྐོར་གསུངས།
དེ་ཡང་གསུང་འཕྲིན་ནང་༧གོང་ས་རྒྱལ་བ་རིན་པོ་ཆེ་མཆོག་གིས། ཕྱི་ལོ་ ༡༩༩༠ ཟླ་གསུམ་པའི་མགོ་སྟོད་ལ་༧ངོས་རང་སྲིད་འཛིན་ཝཱ་ཁི་ལེ་ཝ་མཆོག་གིས་དམར་ཤོག་རིང་ལུགས་མཇུག་སྒྲིལ་བའི་སྐབས་སུ་ཅེག་སྤྱི་མཐུན་རྒྱལ་ཁབ་ནང་དུ་བསྐྱོད་རྒྱུ་བྱུང་བ་དྲན་གྱི་འདུག ཅེག་སྤྱི་མཐུན་རྒྱལ་ཁབ་ཀྱི་ཉེ་བའི་ལོ་རྒྱུས་ཁྲོད་ཀྱི་ཝེལ་ཝེ་ཌི་གསར་བརྗེའི་སྐབས་སུ། ཅེག་མི་མང་གིས་འཛམ་གླིང་ཡོངས་སུ་འཚེ་མེད་ཞི་བདེ་དང་། རང་དབང་། དམངས་གཙོ་བཅས་ཀྱི་རིན་ཐང་གི་མིག་དཔེ་བསྟན་ཡོད་ཅིང་། དེ་ནི་༧ངོས་རང་ཁྱེད་ཀྱི་རྒྱལ་ཁབ་དུ་ཐེངས་མང་བསྐྱོད་པའི་གཟི་བརྗིད་ཅིག་ཡིན། ངོས་ལ་ཅེག་རྒྱལ་ཁབ་ཀྱི་རྒན་གཞོན་ཚང་མས་འགྲོ་བ་མི་གཅིག་ཡིན་པའི་འདུ་ཤེས་དང་། ཆོས་ལུགས་ནང་ཁུལ་མཐུན་སྒྲིལ་བྱེད་པའི་གལ་ཆེན་གྱི་རིན་ཐང་ལ་འབད་པ་བྱེད་དགོས་པའི་སེམས་ཚོར་གཏིང་ཟབ་བསྟན་བྱུང་། འཛམ་གླིང་ཡོངས་གཉན་འཕྲེང་ཅན་གྱི་དུས་ཚོད་དང་འཕྲད་བཞིན་པའི་སྐབས་འདིར། སྐུ་ཉིད་ཀྱིས་ཅེག་སྤྱི་མཐུན་རྒྱལ་ཁབ་ཀྱི་རེ་བ་དང་མངོན་འདོད་བསྒྲུབ་པར་འདོད་པའི་དཀའ་ངལ་ཡོངས་གདོང་ལེན་གནང་ཐུབ་པའི་སྨོན་འདུན་ཡོད། ཅེས་གསུངས་འདུག
ཕྱི་ཟླ་ ༡ ཚེས ༢༨ ཉིན་སྐུ་ཞབས་པེ་ཊར་པཱ་ཝལ་མཆོག་ཅེག་རྒྱལ་ཁབ་ཀྱི་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་པ་གསལ་བསྒྲགས་གནང་ཡོད་པ་དང་། ཟླ་འདིའི་ཕྱི་ཚེས་ ༩ ཉིན་སྲིད་འཛིན་མཆོག་གི་དམ་འབུལ་མཛད་སྒོ་འཚོགས་ཡོད་འདུག ཁོང་ནི་ཅེག་སྤྱི་མཐུན་རྒྱལ་ཁབ་ཀྱི་འདེམས་ཐོན་སྲིད་འཛིན་སྐབས་བཞི་པ་དང་། དམག་མིའི་ཁྱིམ་རྒྱུད་ཀྱི་རྒྱབ་ལྗོངས་ཡོད་པའི་སྲིད་འཛིན་གཉིས་པ་དེ་ཆགས་ཡོད་འདུག ཁོང་ཕྱི་ལོ་ ༡༩༦༡ ལོའི་ཟླ་ ༡༡ ཚེས་ ༡ ཉིན་པ་ལཱ་ནཱ་རུ་དམག་མིའི་ཁྱིམ་རྒྱུད་ཞིག་ཏུ་སྐྱེས་ཤིང་། འཛིན་རིམ་བཅུ་གཉིས་སློབ་མཐར་ཕྱིན་རྗེས་ཅེག་མི་མང་དམག་མིར་ཞུགས་པ་དང་། ཕྱི་ལོ་ ༡༩༨༥ ལོར་ཅེག་སྤྱི་མཐུན་ཚོགས་པའི་ནང་དུ་ཞུགས། ཝེལ་ཝེ་ཊ་གསར་བརྗེའི་སྐབས་སུ་ཁོང་ཅེག་དམག་མིའི་ཁོངས་སུ་འཛུལ་ཏེ། ཅེག་དང་སི་ལོ་ཝཱ་ཁི་གཉིས་ཀྱི་དམག་མི་མཉམ་འབྲེལ་ཀྱིས་ཁི་རོ་ཌི་ཡ་རུ་ཧྥ་རན་སི་དམག་མི་མཐར་སྐྲོད་གཏོང་སྐབས་པཱ་ཝལ་ལགས་ལ་སྐད་གྲགས་རྒྱས་ཏེ་རྒྱལ་སྤྱིའི་ཐོག་ཁོ་རང་ངོ་ཤེས་པར་གྱུར། ཕྱི་ལོ་ ༢༠༡༢ ནས་ ༢༠༡༥ བར་ཅེག་རྒྱལ་ཁབ་ཀྱི་དམག་སྤྱི་གནང་བ་མ་ཟད། ཕྱི་ལོ་ ༢༠༡༥ ནས་ ༢༠༡༨ བར་དུ་བྱང་ཆིངས་མཉམ་འབྲེལ་སྒྲིག་འཛུགས་(NATO) ཀྱི་དམག་དོན་དབུ་ཁྲིད་དུ་འདེམས་ཐོན་བྱུང་འདུག ཁོང་གིས་བྱང་ཆིངས་མཉམ་འབྲེལ་སྒྲིག་འཛུགས་ཀྱི་མཐུན་འགྱུར་འོག་ཡུ་རོབ་གླིང་དུ་ཡུ་ཁི་རིན་ལ་རྒྱབ་སྐྱོར་བྱེད་དགོས་པའི་གླེང་སློང་ཤུགས་ཆེན་བྱས་ཡོད་འདུག
གསར་འགོད་པ། བྱམས་པ་ཚེ་རིང་།
