བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་ ༦ སྤྱི་མོས་གཏན་འབེབ་གནང་།
དེ་རིང་སྐབས་ ༡༧ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༥ པའི་ལས་ཉིན་གཉིས་པའི་ཉིན་རྒྱབ་ཏུ། བོད་གནང་གི་ཛ་དྲག་གནས་སྟངས་ཐོག་གཞུང་འབྲེལ་གྱི་གདུང་སེམས་མཉམ་སྐྱེད་ཀྱི་གྲོས་ཆོད་ ༦ སྤྱི་མོས་གཏན་འབེབས་གནང་སོང་བ་དང་། ལྷག་པར་ཉེ་ལམ་རྒྱ་ནག་གཞུང་གིས་རྒྱལ་ཁབ་ཁ་བྲལ་གཏོང་བའི་བྱ་སྤྱོད་སྤེལ་ཡོད་ལུགས་ཀྱི་ཉེས་མིང་གཡོགས་ཏེ་ལོ་བཞི་ཡི་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་དང་སྐད་སྒྱུར་བ་ཟངས་དཀར་འཇམ་དབྱངས་ལགས་སུ་གཞུང་འབྲེལ་གྱི་ཐོག་ནས་གདུང་སེམས་མཉམ་སྐྱེད་བྱ་དགོས་པའི་གླེང་སློང་བཅས་གནང་སོང་།
བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཐད་སྤྱི་འཐུས་བསྟན་འཛིན་འཇིགས་བྲལ་ལགས་ཀྱིས། བོད་མི་མང་སྤྱི་འཐུས་ཞིག་ཡིན་པའི་ཆ་ནས་ལོ་གཅིག་དང་ཕྱེད་ཀའི་ནང་རྒྱ་གར་བྱང་ཕྱོགས་ཁུལ་གྱི་བོད་མི་ཡོད་ས་ཕལ་ཆེ་བར་འབྱོར་སོང་། བརྒྱུད་རིམ་དེའི་ནང་དུ་གཞིས་ཆགས་ཁག་ ༢༠ ཙམ་དང་། སློབ་གྲྭ་ཁག་ ༡༡ ནང་དུ་འགྲོ་རྒྱུ་བྱུང་ཡོད་པ་མ་ཟད་གནད་དོན་མང་པོའི་ཐོག་དོ་སྣང་ཡང་མང་པོ་བྱུང་། འབྱུང་འགྱུར་གྱི་ལོ་ལྔ་དང་བཅུའི་ནང་དུ། བོད་མིའི་འཐབ་རྩོད་དང་། བོད་མིའི་སྒྲིག་འཛུགས། བཙན་བྱོལ་བོད་མིའི་གནས་བབ་ཀྱི་ཐོག་མདུན་བསྐྱོད་ཀྱི་གྲ་སྒྲིག་བྱེད་དགོས་པའི་དུས་ལ་བབ་འདུག དེ་ལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སློབ་གྲྭ དགོན་པ། གཞིས་ཆགས་ཁག བོད་རིགས་ཚོགས་པ་ཁག་གི་ཚོགས་གཙོ་རྣམས་ལྷན་འཛོམས་ཀྱིས་བོད་ཀྱི་ཐོག་མཐའ་བར་གསུམ་ལ་རྒྱང་བཤེར་ཡག་པོ་ཞིག་བྱེད་ཐུབ་ཚེ། མ་འོངས་བོད་ཀྱི་རྒྱུད་འཛིན་གྱི་ཁ་ཕྱོགས་གསར་བ་རྙེད་ཐུབ་སྐོར་དང་། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས། རྒྱ་ནག་གི་མགོ་ཁྲིད་ཞི་ཅིན་ཕིན་གྱི་ལས་ཡུན་ཐེངས་གསུམ་པའི་མགོ་ཚུགས་ཡོད་པ་དང་། རྒྱ་ནག་དམར་ཤོག་ཚོགས་པའི་དབང་འཛིན་གྱི་དུས་ཡུན་ཡུན་རིང་གནས་པའི་ཆེད་དུ། བོད་དང་། ནང་སོག ཤིན་ཅང་། ཡུ་གུར་བཅས་ཀྱི་མི་རིགས་ཀྱི་ངོ་བོ། རང་དབང་། འགྲོ་བ་མིའི་ཐོབ་ཐང་སོགས་འཆར་གཞི་ལྡན་པའི་ཐོག་རྩིས་མེད་རྡོག་རོལ་གཏོང་བཞིན་ཡོད་པར་བློ་འཚབ་དང་ངོ་རྒོལ་ཡོད། དེ་བཞིན་རྒྱ་ནག་གི་ཏོག་དབྱིབས་གཉན་རིམས་གཙང་བཟོའི་སྲིད་ཇུས་ལམ་ལྷོང་བྱུང་མེད་པ་མ་ཟད། རྒྱ་ནག་མི་མང་གིས་ངོ་རྒོལ་བྱས་ཡོད་པ་དང་། དེང་སང་རྒྱ་ནག་ནང་ཁུལ་གྱི་གནས་སྟངས་ག་འདྲ་ཆགས་ཡོད་པ་མིག་མཐོང་ལག་ཟིན་རེད་ལ། བོད་ནང་དུའང་རྒྱ་གཞུང་གིས་ཉེན་ཚབས་ཆེ་བའི་དྲག་སྤྱོད་སྤེལ་བཞིན་ཡོད་པ་གསར་བ་མིན་ཡང་། ཉེ་ཆར་རྒྱ་གཞུང་གིས་ཧམ་པས་རྒྱལ་སྤྱིའི་སྟེང་དུའང་ལག་པ་བརྐྱང་གི་ཡོད་པ་སོགས་ཀྱི་ཐད་ལ་གླེང་སློང་བྱ་དགོས་གལ་ཆེ་སྐོར་གསུངས་སོང་།
སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་བྱེད་པའི་སྐབས་སུ། བཙན་བྱོལ་ནང་གི་གནད་དོན་ཁ་ཤས་ལ་བལྟས་པ་ཙམ་གྱིས་བོད་དོན་འཐབ་རྩོད་ཀྱི་ནུས་པ་ཉམས་བཞིན་པ་ཞིག་མཐོང་གི་འདུག རྒྱ་ནག་གཞུང་ཚབ་ཁང་གི་གོ་སྒྲིག་བྱེད་བཞིན་པའི་དུས་སྟོན་ཐོག་ཏུ་བཙན་བྱོལ་བོད་མི་ཁག་ཅིག་མངོན་སུམ་འཛེམས་མེད་ཐོག་འཛུལ་ཞུགས་བྱས་ཡོད་པ་མ་ཟད། འཛེམས་ཟོན་མེད་པར་དྲ་ལམ་དུ་བཀྲམས་པ་དང་དེའི་ཐོག་མཆན་འདེབས་མཁན་དག་གིས་དབུ་མའི་ལམ་གྱི་ཐོག་ནས་དེ་ལྟར་བྱས་ན་འགྲིག་གི་ཡོད་པའི་རྣམ་པ་བསྟན་འདུག་པ་དེ་ཡིད་སྐྱོ་བ་དགོས་པ་ཞིག་ཡིན་སྐོར་དང་། སྤྱི་འཐུས་བསྟན་པ་ཡར་འཕེལ་ལགས་ཀྱིས། བོད་ནང་གི་ཛ་དྲག་གནས་སྟངས་དཀའ་ལས་ཁག་པོ་ཆགས་ཡོད་པ་ཚང་མས་ཤེས་ཀྱི་ཡོད་པས། བཙན་བྱོལ་ནང་གི་བོད་མི་ཡོད་དོ་ཅོག་གིས་བོད་ཀྱི་ཆོས་དང་རིག་གཞུང་ལ་ཐུགས་འགན་འཁུར་དགོས་ཀྱི་འདུག དེང་སང་སྤྱི་ཚོགས་སྟེང་དུ་དེའི་འགན་འཁུར་མཁན་མི་ཁ་ཤས་ལ་མ་གཏོགས་ཇུས་གཏོགས་མེད་པའི་སྲོལ་ཞིག་ཏུ་ཆགས་ཡོད་པས། བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེད་བྱེད་སྟངས་ངོ་མ་དེ་བོད་ཀྱི་སྐད་དང་ཡི་གེའི་སྤྱོད་སྒོ་ཇེ་མང་དུ་གཏང་རྒྱུ་དང་། ད་ལྟའི་སློབ་གྲྭ་ཁག་ནང་བོད་ཕྲུག་རྣམས་ཀྱི་བོད་སྐད་ཡིག་མུ་མཐུད་དུ་འཐུས་ཤོར་དུ་ཕྱིན་ཚེ། བོད་མི་རིགས་ཀྱི་སྐད་ཡིག་ནམ་ཡང་ཡར་རྒྱས་གཏོང་ཐུབ་ཀྱི་མེད་པས། བཅན་བྱོལ་དུ་ཡོད་པའི་བོད་མི་ཚོས་བོད་ཀྱི་སྐད་ཡིག་སྦྱང་བརྩོན་བྱ་རྒྱུ་ནི་བོད་མི་དག་གི་སྐད་ཡིག་སྲུང་སྐྱོང་བྱེད་སྟངས་ཆེས་ཡག་ཤོས་ཤིག་ཡིན་སྐོར་སོགས་གསུངས་སོང་།
གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གཏན་ལ་ཕབ་པའི་རྒྱལ་སྤྱིའི་འགྲོ་བ་མིའི་ཁྲིམས་ཡིག་ཁས་ལེན་བྱས་ཡོད་པ་མ་ཟད། རྒྱ་ནག་གི་རྩ་ཁྲིམས་ནང་དུ་ཁྲིམས་ཡིག་གང་འཚམ་གཏན་འབེབས་བྱས་ཡོད་ཀྱང་། ཡིག་ཐོག་ཏུ་འཁོད་པའི་ཁྲིམས་ཡིག་རྩིས་མེད་དུ་བཏང་ནས་བོད་ཀྱི་ཆོས་དང་རིག་གཞུང་རྩ་མེད་གཏོང་བའི་སྲིད་ཇུས་ལག་བསྟར་གྱིས་རྒྱ་ནག་གཅིག་ཅན་དུ་བསྒྱུར་བཞིན་ཡོད། རྒྱལ་སྤྱིའི་ཐོག་ནས་གདོད་མའི་མི་རིགས་ཀྱི་ཐོབ་ཐང་ལ་མཐོང་ཆུང་ཁྱད་གསོད་བྱས་ཡོད་པར་དགོངས་སེལ་ཞུས་ཡོད་པའི་གནད་དོན་ཤེས་བཞིན་དུ། བོད་པའི་སློབ་ཕྲུག་རྣམས་རྒྱ་གཞུང་གི་མི་སེར་སྤེལ་བའི་སྲིད་ཇུས་ཀྱི་གཏན་འཇགས་སློབ་གྲྭར་བཙན་གྱིས་གཏོང་མུས་ཡིན་པ་དང་། འཕྲུལ་རིག་གི་ལྟ་རྟོག་འོག་ཏུ་བོད་མིའི་འགྲོ་འདུག་དམ་དྲག་བྱེད་བཞིན་ཡོད་པ་དང་། ཚན་རིག་ལྟ་ཞིབ་ཀྱིས་བོད་མི་རིགས་ཀྱི་རིགས་རྫས་ལ་ཞིབ་འཇུག་བྱས་ཏེ་བོད་ཀྱི་རིགས་རྫས་ལ་ཚོད་འཛིན་བྱེད་པའི་ཉེན་ཁ་ཆགས་འདུག་ཞེས་དང་། བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་ཁྱབ་ཁོངས་ནས་རྒྱལ་སྤྱིའི་ཐོག་ཏུ་བསྐྱོད་པར་འབད་བརྩོན་བྱེད་ཀྱི་ཡོད་ཅིང་། ཡུ་རོབ་རྒྱལ་ཁབ་ཁག་གི་གལ་ཆེན་རང་བཞིན་ཤེས་པའི་ཐོག་འབྲེལ་འདྲིས་བྱེད་མུས་ཡིན་པ་དང་། ད་ལྟའི་རྒྱ་ནག་གི་རྒྱ་ནག་ཏོག་དབྱིབས་གཙང་སེལ་གྱི་སྲིད་ཇུས་མེད་པར་བཟོས་པ་དང་། རྒྱ་ནག་གི་ཚོང་ལས་ཐོན་ཁུངས་མང་དུ་སོང་བ་དང་ཚོང་འགྲིམ་བྱེད་ཡུལ་ཇེ་ཉུང་དུ་སོང་བ། ཨ་རྒྱ་གཉིས་ཀྱི་འབྲེལ་བ་སྡུག་ཏུ་ཕྱིན་པའི་དབང་གིས། རྒྱ་ནག་གི་ཚོང་རྭ་ཡུ་རོབ་ནང་དུ་འཁོར་རྒྱུག་བྱེད་པར་འབད་པ་བྱེད་ཀྱི་ཡོད་པ། དེ་བཞིན་རྒྱ་ནག་གིས་ཨུ་རུ་སུ་ལ་འབྲེལ་བ་བྱེད་བཞིན་ཡོད་པ་དེས་ཡུ་རོབ་ལ་ཚོང་འབྲེལ་བྱེད་པར་རྒྱལ་སྤྱིའི་ཐོག་ནས་ཡིད་ཆེས་རྙེད་ཐུབ་ཀྱི་མེད་སྐོར་སོགས་གསུངས་སོང་།
གསར་འགོད་པ། དཔལ་ལྡན། བྱམས་པ་ཚེ་རིང་།
