རྒྱལ་སྤྱིའི་ཉེས་ཡངས་ཚོགས་པས་ཕྱི་ལོ་ ༢༠༢༢ དང་ ༢༠༢༣ ལོའི་འགྲོ་བ་མིའི་ཐོབ་དང་འབྲེལ་བའི་སྙན་ཐོའི་ནང་དུ་རྒྱ་ནག་གཞུང་གིས་བོད་དང་གྲངས་ཉུང་མི་རིགས། དེ་བཞིན་མཚན་མཐུན་ཕོ་ལོག་མོ་ལོག་རྣམས་ལའང་བཙན་གནོན་དམ་དྲག་བྱེད་བཞིན་ཡོད་སྐོར་བརྗོད་འདུག
Amnesty International report 2022-2023
རྒྱལ་སྤྱིའི་ཉེས་ཡངས་ཚོགས་པས་ཕྱི་ལོ་ ༢༠༢༢ དང་ ༢༠༢༣ ལོའི་འཛམ་གླིང་རྒྱལ་ཁབ་ ༡༥༦ ནང་འགྲོ་བ་མིའི་གཞི་རྩའི་ཐོབ་ཐང་དང་། བུད་མེད་དང་། བྱིས་པ། བཙོན་པ་སོགས་ཀྱི་ཐོབ་ཐང་སོགས་ཀྱི་ཐད་ལ་ཞིབ་འཇུག་གནང་སྟེ་སྙན་ཐོ་ཞིག་བཏོན་པའི་ནང་དུ། རྒྱ་ནག་གཞུང་གིས་བོད་དང་གྲངས་ཉུང་མི་རིགས་རྣམས་ལ་ཚད་ལས་འདས་པའི་དྲག་གནོན་དང་། ལྷག་པར་དུ་འདས་ལོར་རྒྱ་ནག་གཞུང་གིས་ཏོག་དབྱིབས་གཙང་སེལ་གི་སྲིད་ཇུས་འོག་ནས་མི་མང་གིས་སྡུག་བསྔལ་ཚད་མེད་མྱངས་ཡོད་སྐོར་སོགས་གསལ་འདུག་པ་མ་ཟད། རྒྱལ་སྤྱིའི་ཚོགས་པ་དང་སྒྲིག་འཛུགས་ཁག་གི་མགོ་འཁྲིད་རྣམས་ཀྱིས་འགྲོ་བ་མིའི་ཐོབ་ཐང་དང་རང་དབང་སོགས་ལ་སྲུང་སྐྱོབ་གནང་དགོས་པའི་རེ་སྐུལ་ཞུས་འདུག
དེ་ཡང་རྒྱལ་སྤྱིའི་ཉེས་ཡངས་ཚོགས་པས་བཏོན་པའི་སྙན་ཐོ་དེའི་ནང་། རྒྱ་ནག་གཞུང་གིས་བོད་ནང་དུ་མི་རིགས་དབྱེ་འབྱེད་བྱས་ཏེ། བོད་མི་རྣམས་ལ་ཚད་ལས་འདས་པའི་དྲག་གནོན་བྱས་ཏེ། བོད་མིའི་སྨྲ་བརྗོད་དང་འགྲོ་འདུག་གི་རང་དབང་ལ་ཚོད་འཛིན་ནན་མོ་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་ལངས་ཕྱོགས་དང་ལྟ་བ་སོགས་ལ་ངོ་རྒོལ་བྱེད་མཁན་གྱི་བོད་མི་རྣམས་གང་བྱུང་འཛིན་བཟུང་བཀག་ཉར་བྱས་དང་བྱེད་བཞིན་པ་ཐེར་འདོན་དང་སྦྲགས། འདས་ལོའི་ཕྱི་ཟླ་ ༩ པའི་ནང་རྒྱ་ནག་གཞུང་གི་དཀར་མཛེས་ཁུལ་འབྲིང་རིམ་མི་མང་ཁྲིམས་ཁང་ཟེར་བས། རྒྱལ་ཁབ་ཁ་བྲལ་གལ་ངན་སྐུལ་དང་རྒྱལ་ཁབ་བདེ་འཇགས་ལ་གནོད་སྐྱོན་བཟོས་ཡོད་ལུགས་ཀྱི་ཉེས་མིང་འོག རྩོམ་པ་པོ་གངས་སྐྱེས་སྒྲུབ་པ་སྐྱབས་དང་། སྲས་རྣམ། གངས་བུ་གཡུ་བྷྲུཾ། གངས་ཚེ་རིང་སྒྲོལ་མ། བསམ་སྒྲུབ། པདྨ་རིན་ཆེན་བཅས་ལ་ལོ་དྲུག་ནས་བཅུ་བཞི་བར་བཙོན་འཇུག་ཁྲིམས་ཐག་བཅད་ཡོད་ཅིང་། ཁོང་རྣམས་ཀྱིས་འདས་པའི་ལོ་ཤས་གོང་ནས་རྒྱ་ནག་གཞུང་གིས་བོད་ཐོག་འཛིན་པའི་སྲིད་ཇུས་ལ་ཡིད་མ་རང་བའི་རྣམ་འགྱུར་བསྟན་ནས་རྩོམ་ཡིག་སོགས་བྲིས་རྐྱེན་འཛིན་བཟུང་བཀག་ཉར་བྱས་ཏེ། གཅར་རྡུང་ཚད་མེད་བཏང་ཡོད་པས་གཟུགས་གཞིའི་གནས་སྟངས་ཀྱང་ཛ་དྲག་ཏུ་གྱུར་ནས་སྨན་ཁང་དུ་བསྟེན་གཏུགས་བྱ་དགོས་བྱུང་བའི་སྐོར་དང་། རྒྱ་ནག་གཞུང་གིས་རྔ་བ་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ལགས་ཀྱིས་ཕྱི་རྒྱལ་གྱི་ཁྱིམ་མིིར་འབྲེལ་བ་བྱས་པའི་ཉེས་མིང་འོག ཁྲིམས་རྩོད་པ་སོགས་གང་ཡང་མེད་པར་ཁོང་ལ་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་པ་བཅས་གསལ་འདུག
ཡང་སྙན་ཐོའི་ནང་། རྒྱ་ནག་གཞུང་གིས་གྲངས་ཉུང་མི་རིགས་རྣམས་ཀྱི་ཆོས་ལུགས་ཀྱི་བྱེད་སྒོ་ཁག་ལ་དམ་དྲག་དང་བཀག་སྡོམ་ལན་མང་བྱེད་ཀྱི་ཡོད་པའི་ཁར། ཕྱི་ལོ་ ༢༠༢༢ ལོར་རྒྱ་ནག་གཞུང་གིས་བོད་ཀྱི་གྲྭ་བཙུན་དང་། ཡུ་གུར་གྱི་ཨི་མཱམ(Imams)རྒྱ་ནག་གི་རྩ་རླུང་སྒོ་སྒྲུབ་པ་སོགས་ཆོས་ལུགས་ཁག་གི་དབུ་ཁྲིད་རྣམས་གཙོས་ཆོས་ལུགས་པ་མང་པོ་ཞིག་གང་བྱུང་འཛིན་བཟུང་བཀག་ཉར་བྱས་ཡོད་པ་མ་ཟད། ལྷག་པར་དུ་གྲངས་ཉུང་མི་རིགས་ཀྱི་ཆོས་ལུགས་ཉམས་ལེན་བྱེད་མཁན་གྱི་མི་སྒེར་མང་པོ་ཞིག་ལ་བཙན་གཡེམ་དང་འཛིན་བཟུང་བྱས་ཡོད་སྐོར་དང་། རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་འོག་ནས་ཏོག་དབྱིབས་གཉན་རིམས་འགོས་པའི་མི་རྣམས་བཙན་གྱིས་འཇུ་བཟུང་བྱས་ནས་ཟུར་བཀག་ཁང་དག་ཏུ་བསྐྱལ་ཡོད་ཀྱང་། ཏོག་དབྱིབས་གཉན་རིམས་འགོས་པའི་ཆེས་ཛ་དྲག་གི་ས་ཚིགས་ཁག་ཏུ་སྨན་བཅོས་ལྟ་སྐྱོང་དང་ཟས་རིགས་ཀྱི་མཐུན་རྐྱེན་ལེགས་པོ་མེད་པའི་ཁར། ཕ་མ་དང་བུ་ཕྲུག་ཀྱང་ཟུར་བཀག་ནང་དུ་ལོགས་སུ་བཞག་སྟེ། མི་མང་གི་ལུས་སེམས་གཉིས་ལ་དཀའ་ངལ་ཆེན་པོ་བཟོས་ཡོད་སྐོར་སོགས་འཁོད་འདུག
དེ་བཞིན་སྙན་ཐོའི་ནང་། རྒྱ་ནག་གཞུང་གིས་རྒྱུད་གཅིག་ལམ་གཅིག་གི་སྲིད་ཇུས་ཀྱི་འོག་ནས་རྒྱལ་ཁབ་མང་པོ་ཞིག་ཏུ་གཞུང་ལམ་གསར་རྒྱག་གི་ལས་གཞི་སྤེལ་ནས་འཛམ་གླིང་སྤྱི་ཡོངས་ཀྱི་རང་བྱུང་ཁོར་ཡུག་ལ་གནོད་སྐྱོན་ཆེན་མོ་གཏོང་མུས་ཡིན་པ་མ་ཟད། གྲངས་ཉུང་མི་རིགས་ཀྱི་ས་ཁུལ་ཁག་གི་རང་བྱུང་ཁོར་ཡུག་ལ་གནོད་འཚེ་བཏང་ཡོད་སྐོར་དང་། འདས་པའི་ལོ་ཤས་རིང་རྒྱ་ནག་གཞུང་གིས་ཧོང་ཀོང་གི་རང་བཙན་འཐབ་རྩོད་པ་དང་དམངས་གཙོ་དོན་གཉེར་བ་སོགས་ལ་སྔར་ལས་ལྷག་པའི་དམ་དྲག་བྱེད་ཀྱི་ཡོད་སྐོར་དང་། གྲངས་ཉུང་མི་རིགས་ས་ཁུལ་གྱི་བུད་མེད་གཙོས་བུད་མེད་མང་དག་ཅིག་ལ་བཙན་གཡེམ་དང་། བཙན་གྱིས་མངལ་ཤོར་དུ་འཇུག་གི་ཡོད་པ་མ་ཟད། མཚན་མཐུན་ཕོ་ལོག་མོ་ལོག(LGBTI)རྣམས་ལ་དམ་དྲག་དང་དྲག་གནོན་ཤུགས་ཆེན་བྱས་ཏེ། མཚན་མཐུན་ཕོ་ལོག་མོ་ལོག་བཅུ་གཉིས་ཀྱི་སྤྱི་ཚོགས་དྲ་གནས་ཀྱི་ཁ་བྱང་(account)དང་། དེ་བཞིན་གློག་བརྙན་དང་དྲ་རྒྱ་སོགས་ཀྱང་མེད་པར་བཟོས་ཡོད་སྐོར་སོགས་འཁོད་འདུག
གསར་འགོད་པ། དཔལ་ལྡན།
