ཨོ་གླིང་རྒྱལ་ཡོངས་བོད་རིགས་ཚོགས་ཆེན་སྟེང་དུ་ཆབ་སྲིད་བཙོན་པ་བཙོན་གྲོལ་ཆེད་དུ་ལས་འགུལ་སྤེལ་བ་དང་གཟའ་མཇུག་སློབ་གྲྭ་ཡར་རྒྱས་གཏོང་བ་སོགས་ཀྱི་གྲོས་ཆོད་ཁག་ཅིག་སྤྱི་མོས་གཏན་འབེབ་བྱུང་ཡོད་འདུག
ཕྱི་ཚེས་ ༩ ཉིན་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་དགུ་པ་འཚོགས་ཡོད་འདུག ཚོགས་ཐོག་ཏུ་དམིགས་བསལ་སྐུ་མགྲོན་སྐུ་ཚབ་དོན་གཅོད་ཀརྨ་སེང་གེ་ལགས་དང་། སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས། ཨོ་གླིང་རྒྱལ་ཡོངས་བོད་རིགས་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས། ཝིག་ཊོ་ར་ཡ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཐོབ་ཚང་དཔལ་ལྡན་དོན་འགྲུབ་ལགས། སྤྱི་ཟུར་རྒྱ་རིགས་ཐར་ལགས་བཅས་ཨོ་གླིང་ས་གནས་ཁག་བདུན་གྱི་མི་གྲངས་ ༢༠༠ ལྷག་ཚོགས་བཅར་གནང་འདུག
དེ་བཞིན་ཟླ་འདིའི་ཕྱི་ཚེས་ ༧ ནས་ཉིན་གྲངས་བཞིའི་རིང་ཨོ་གླིང་ཝིག་ཊོ་རི་ཡ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག བུད་མེད་ཀྱི་ནུས་སྟོབས་གོང་འཕེལ་ལ་དམིགས་ནས་ཨོ་གླིང་བོད་ཀྱི་གཞོན་སྐྱེས་ལུས་རྩལ་འགྲན་ཚོགས་ཤིག་འཚོགས་ཡོད་ཅིང་། ཐེངས་འདིའི་ལུས་རྩལ་འགྲན་ཚོགས་ནང་དུ་ཨོ་གླིང་གི་ས་གནས་ཁག་བདུན་གྱི་རྩལ་འགྲན་པ་ ༡༥༠ ལྷག་འགྲན་ཞུགས་བྱས་འདུག
ཝིག་ཊོ་རི་ཡ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཐོབ་ཚང་དཔལ་ལྡན་དོན་འགྲུབ་ལགས་ཀྱིས། ཕྱི་ལོ་ ༢༠༡༨ ནས་ད་ལྟ་བར་དུ་ཏོག་དབྱིབས་ནད་ཡམས་རྐྱེན་གྱིས་ཨོ་གླིང་རྒྱལ་ཡོངས་ཚོགས་ཆེན་འཚོགས་ཐུབ་མེད་པ་དང་། དེ་རིང་དངོས་སུ་ཚོགས་ཐུབ་པ་ནི་དགའ་སྤྲོ་སྐྱེས་དགོས་པའི་དོན་བཟང་ཞིག་ཡིན་ལ། རྒྱ་ནག་ལའང་བརྡ་ལན་གསལ་བོ་ཞིག་སྤྲད་ཡོད་ཅེས་འགྲེལ་བརྗོད་གནང་འདུག
ཚོགས་ཐོག་ཏུ་ཨོ་གླིང་རྒྱལ་ཡོངས་བོད་རིགས་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས་ཀྱིས། ཨོ་གླིང་དུ་ཕེབས་ཡོད་པའི་བོད་པ་རྣམས་བོད་ནང་དུ་རྒྱ་ནག་གི་གདུག་རྩུབ་མནར་གཅོད་འོག་ཏུ་བཙོན་བཅུག་བྱས་པ་དང་། གཉེན་མི་སོགས་ལ་ཆབ་སྲིད་ཀྱི་དཀའ་ངལ་འཕྲད་པའི་འབྲེལ་ཡོད་རྐྱང་ཡིན་པས། ཕྱི་རྒྱལ་གྱི་བོད་པ་གཞན་དང་བསྡུར་ན་ལས་འགན་དམིགས་བསལ་རེ་ཡོད་པས། བོད་དོན་འཐབ་རྩོད་ཀྱི་ལས་དོན་ཐོག་འབད་འབུངས་བྱེད་དགོས་ཀྱི་ཡོད་པ་མ་ཟད། ཐེངས་འདིའི་ཚོགས་ཆེན་དུ་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་ཕྱོགས་དང་། ཆབ་སྲིད་ཀྱི་ལས་འགུལ་སྤེལ་སྟངས། བོད་རིགས་མཐུན་ཚོགས་པ་ཁག་ཡར་རྒྱས་གཏོང་ཕྱོགས་ཀྱི་གྲོས་གཞིའི་ཐོག་བགྲོ་གླེང་གནང་དགོས་པའི་སྐོར་བརྗོད་ཡོད་འདུག
ཨོ་གླིང་རྒྱལ་ཡོངས་བོད་རིགས་ཚོགས་པའི་དྲུང་ཆེ་མགུར་འབུམ་རྒྱལ་ལགས་ཀྱིས། ཨོ་གླིང་རྒྱལ་ཡོངས་བོད་རིགས་འགན་འཛིན་ཚོགས་པའི་ཚོགས་ཐེངས་དྲུག་པའི་སྐབས་སུ་གསུམ་བཅུའི་དུས་དྲན་སྐབས་སུ་འཕྲེད་དར་འབོད་ཚིག་གཅིག་གྱུར་བཟོ་རྒྱུ་དང་། ས་གནས་ཁག་ཏུ་བོད་དོན་ཞུ་གཏུགས་བྱེད་ཕྱོགས། བོད་མིའི་དྭང་བླང་དཔྱ་ཁྲལ་སྤྲོད་ཕྱོགས་སོགས་གྲོས་གཞི་ཁག་ལྔའི་ཐོག་ཏུ་དོན་ཚན་མི་འདྲ་བ་ ༡༤ འཁྱེར་ཡོང་ཡོད་སྐོར་འགྲེལ་བརྗོད་གནང་ཡོད་འདུག
ཨོ་གླིང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས། ཨོ་གླིང་རྒྱལ་ཡོངས་ཚོགས་ཆེན་ཐེངས་དགུ་པའི་སྟེང་དུ་འགན་འཛིན་ལྷན་ཚོགས་ཀྱི་གྲོས་འཆར་བཏོན་ཐུབ་པ་ཡག་པོ་བྱུང་ཞིང་། གྲོས་འཆར་དག་ཀྱང་༧གོང་ས་མཆོག་གི་དགོངས་གཞི་དང་། བོད་མིའི་སྒྲིག་འཛུགས་ཀྱི་སྲིད་ཇུས་དང་མཐུན་པ་མ་ཟད། གཞི་རྒྱ་ཆེ་བའི་གནད་འགག་གི་གྲོས་འཆར་ཞིག་ཡིན་པས། བོད་མི་ནང་ཁུལ་དུ་མཐུན་སྒྲིལ་རྡོག་རྩ་གཅིག་སྒྲིལ་གྱི་ལས་དོན་བྱེད་ཕྱོགས་འཛིན་རྒྱུ་གལ་ཆེ་ཡིན་སྐོར་གསུངས་ཡོད་འདུག
སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས། ཨོ་གླིང་རྒྱལ་ཡོངས་སྤྱི་མཐུན་ཚོགས་པས་གྲོས་ཆོད་གཞིར་བཟུང་ལྟར་གྲུབ་འབྲས་ཅི་བྱུང་སོགས་ལ་ཁ་གསལ་བཏོན་ཡོད་ཅིང་། ང་ཚོས་བོད་ཀྱི་རྩ་དོན་དང་འགྲོ་བ་མིའི་ཐོབ་ཐང་གི་གནས་སྟངས་རྒྱལ་སྤྱིའི་སྟེང་རྟག་ཏུ་ཞུ་གཏུགས་བྱེད་དགོས་པ་དང་། ཨོ་གླིང་གྲོས་ཚོགས་འཐུས་མི་བརྒྱུད་ནས་བོད་ནང་གི་དཀའ་ངལ་གྱི་གནས་སྟངས་གྲོས་ཚོགས་སུ་གླེང་སློང་བྱེད་པར་འབད་བརྩོན་བྱེད་མུས་ཡིན་ལ། ལྷག་པར་དུ་༧གོང་ས་མཆོག་གི་མ་འོངས་པའི་ཡང་སྲིད་ཐོག་རྒྱ་གཞུང་གིས་ཐེ་ཇུས་བྱེད་པའི་དབང་ཆ་ཅི་ཡང་མེད་པའི་སྐོར་སྙན་སེང་ཞུས་ཡོད་པ་དང་། རྒྱ་རིགས་མི་མང་དང་མཉམ་དུ་འབྲེལ་ལམ་ཟབ་ཏུ་གཏོང་བའི་ཐབས་ལམ་བྱེད་མུས་ཡིན་སྐོར་གསུངས་ཡོད་འདུག
ཐེངས་འདིའི་ཚོགས་བཅར་བ་རྣམས་ཚོགས་ཆུང་གསུམ་དུ་བགོས་ནས་གྲོས་གཞི་གསུམ་དེ། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྒྱུད་འཛིན་བྱེད་ཕྱོགས་སྐོར་དང་། བོད་དོན་ལས་འགུལ་གྱི་ནུས་པ་གོང་མཐོར་གཏོང་ཕྱོགས་སྐོར། བོད་རིགས་མཐུན་ཚོགས་ཁག་སྲ་བརྟན་གོང་མཐོར་གཏོང་ཕྱོགས་བཅས་ཀྱི་ནང་གསེས་དོན་ཚན་ཁག་ལས། གཟའ་མཇུག་སློབ་གྲྭ་མུ་མཐུད་དུ་ཡར་རྒྱས་གཏོང་ཕྱོགས་དང་། དགུན་ཁའི་གུང་སེང་ལ་ཕྲུ་གུ་རྒྱ་གར་ལ་ཟབ་སྦྱོང་དུ་མུ་མཐུད་གཏོང་དགོས་པའི་སྐོར། བོད་ཡིག་ཨོ་གླིང་གི་གཞུང་འབྲེལ་སྐད་ཡིག་ནང་དུ་འཇོག་པར་འབད་བརྩོན་བྱེད་པ། བོད་པའི་དུས་ཆེན་སྐབས་སུ་བོད་ཆས་གྱོན་པ། ༧གོང་ས་མཆོག་ལ་མཚན་སྨད་ཞུ་མཁན་ལ་གཞུང་འཛིན་ཐོག་ནས་གདོང་ལེན་བྱེད་ཕྱོགས། ཆབ་སྲིད་བཙོན་པ་བཙོན་གྲོལ་ཆེད་དུ་ལས་འགུལ་སྤེལ་བ་སོགས་ཀྱི་དོན་ཚན་ཁག་སྤྱི་མོས་གཏན་འབེབ་བྱུང་ཡོད་འདུག
གསར་འགོད་པ། བྱམས་པ་ཚེ་རིང་།
