འཕགས་ཡུལ་རྙིང་མ་ཀཿཐོག་དགོན་དང་ཀཿཐོག་བོད་མིའི་གཞིས་ཆགས་གཉིས་ཀྱིས་ཀཿཐོག་གཞིས་བྱེས་གཉིས་ཀྱི་ཚབ་བྱས་ཏེ་༧གོང་ས་མཆོག་ལ་བརྟན་བཞུགས་ཕུལ།
ཟླ་འདིའི་ཕྱི་ཚེས་ ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་བཞུགས་སྒར་རྒྱལ་བའི་ཕོ་བྲང་དུ་འཕགས་ཡུལ་རྙིང་མ་ཀཿཐོག་དགོན་པ་དང་། ཁམས་ཀཿཐོག་བོད་མིའི་གཞིས་ཆགས་གཉིས་ཀྱི་མི་གྲངས་ ༡༡༣ ལྷག་གིས་ཀཿཐོག་གཞིས་བྱེས་གཉིས་ཀྱི་ཚབ་བྱས་ཏེ། ཕྱི་ཟླ་ ༣ ཚེས་ ༥ ནས་ཟླ་ ༣ ཚེས་ ༣༠ བར་ཉིན་གྲངས་ ༢༥ རིང་ཀཿཐོག་དགོན་པའི་དབུ་འཛིན་རྒྱ་ཤོད་སྐྱབས་སྤྲུལ་རིན་པོ་ཆེ་དང་། མཁན་ཆེན་རྫི་བླ་བརྩོན་འགྲུས་རྒྱ་མཚོ་རིན་པོ་ཆེ་མཆོག་དབུ་བཞུགས་ཐོག་མཁན་སློབ་གྲངས་ ༧༠ ལྷག་གིས་གོང་ས་རྒྱལ་བ་རིན་པོ་ཆེ་མཆོག་ལ་གཏེར་ཆེན་རིག་འཛིན་བདུད་འདུལ་རྡོ་རྗེ་དང་གཏེར་ཆེན་རིག་འཛིན་ཀློང་གསལ་སྙིང་པོ་གཉིས་ཀྱི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་དང་། དེ་ཡང་ཀཿཐོག་དགོན་པའི་མཁན་སློབ་རྣམས་ནས་གཏེར་ཆེན་རིག་འཛིན་བདུད་འདུལ་རྡོ་རྗེ་དང་། གཏེར་ཆེན་རིག་འཛིན་ཀློང་གསལ་སྙིང་པོ་གཉིས་ཀྱི་གསུང་ཚེ་སྒྲུབ་ཁག་ ༡༡ གཞུང་ལྟར་གནད་སྨིན་སྒྲུབ་ཞག་གིས་བརྟན་བཞུགས་དངོས་གཞིར་བསྟར་འབུལ་ཞུས་ཡོད་འདུག
