ལྡི་ལི་རུ་རྒྱ་གར་རྒྱལ་ཡོངས་ཀྱི་ཆོས་ལུགས་མཐུན་སྒྲིལ་གྱི་ཚོགས་ཆེན་ཞིག་འཚོག་འཆར་ཡོད་པ་ལྟར་༧གོང་ས་རྒྱལ་བ་རིན་པོ་ཆེ་མཆོག་ཚོགས་མགོན་དུ་ཕེབས་གནང་ཡོང་བའི་གསོལ་འདེབས་ཞུས་པ་བཞིན་ཞལ་བཞེས་མཛད་ཡོད་འདུག
དེ་རིང་ཕྱི་ཚེས་ ༤ ཉིན་གྱི་སྔ་དྲོར་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་གྱི་སིག་དང་། གཅེར་བུ་བ། ཧིན་རྡུ་བཅས་ཀྱི་བླ་ཆེན་གསུམ་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་མ་ཟད། རྒྱ་གར་གྱི་རྒྱལ་ས་ལྡི་ལི་རུ་ཆོས་ལུགས་མཐུན་འབྲེལ་གྱི་ཚོགས་ཆེན་འཚོག་འཆར་ཡོད་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ཚོགས་མགོན་དུ་ཆིབས་སྒྱུར་བཀའ་དྲིན་སྐྱོང་གནང་ཡོང་བའི་གསོལ་འདེབས་ཞུས་པ་ལྟར་ཞལ་བཞེས་མཛད་ཡོད་འདུག
མཇལ་བཅར་གྲུབ་རྗེས་གཅེར་བུ་བའི་བླ་ཆེན་ལོ་ཀེ་ཤི་མུ་ནི་ཇི་ (Lokesh Muni Ji) མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་ཡོངས་ལ་ཞི་བདེ་དང་བྱམས་སྙིང་རྗེ་གོང་སྤེལ་གྱི་བཀའ་སློབ་ལམ་སྟོན་མཛད་ཀྱི་ཡོད་པར་བརྟེན། ཆོས་ལུགས་མཐུན་སྒྲིལ་གྱི་ཚོགས་ཆེན་དེའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ལ་འཚེ་མེད་ཞི་བའི་གཟེངས་རྟགས་ཤིག་ཀྱང་འབུལ་འཆར་ཡོད། ཅེས་དང་། འཛམ་གླིང་ནང་དཀའ་ངལ་གང་འདྲ་ཞིག་འཕྲད་རུང་དམག་འཁྲུག་དང་འཚེ་བའི་ལམ་ནས་དཀའ་ངལ་སེལ་ཐུབ་ཀྱི་མེད་པར་བརྟེན། ཞི་བའི་གྲོས་མོལ་གྱི་ལམ་ནས་དཀའ་ངལ་སེལ་ཐུབ་ཀྱི་ཡོད་སྐོར་དང་། གྲོས་མོལ་གྱི་ལམ་ནས་ཨུ་རུ་སུ་དང་ཡུ་ཀེ་རེན་གྱི་དམག་འཁྲུག་ཀྱང་མཚམས་འཇོག་བྱེད་ཐུབ་ཀྱི་ཡོད་སྐོར་སོགས་གསུངས་བྱུང་།
ཡང་བླ་ཆེན་ཁོང་གིས། མཇལ་འཕྲད་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། ཁོང་ཉིད་དགེ་སློང་དཀྱུས་མ་ཞིག་ཡིན་ལ། འཛམ་གླིང་འདི་ལ་ཞི་བདེ་ཡོང་བ་དང་། ཆོས་ལུགས་མཐུན་སྒྲིལ། བྱམས་སྙིང་རྗེའི་སྒོ་ནས་འགྲོ་བ་མི་ལ་ཕན་ཐོགས་བསྒྲུབ་རྒྱུ་སོགས་ཁོང་ཉིད་ཀྱི་ལས་འགན་ཡིན་པས། ཕན་ཐོགས་ཀྱི་ཕྱག་ལས་ག་རེ་ཡིན་ནའང་གནང་རྒྱུ་ཡིན་སྐོར་གྱི་བཀའ་སློབ་སྩལ་ཡོད་སྐོར་གསུངས་བྱུང་།
ཐེངས་འདིའི་མཇལ་བཅར་གོ་སྒྲིག་ཞུ་མཁན་ཧི་མ་ལ་ཡའི་རིག་གཞུང་ལྟེ་གནས་ཁང་གི་འགན་འཛིན་བློ་བཟང་ཕུན་ཚོགས་ལགས་ཀྱིས། ང་ཚོས་སྔོན་མ་ནས་གཅེར་བུ་བའི་བླ་ཆེན་དེ་ངོ་ཤེས་ཀྱི་ཡོད། དེ་སྔ་ནས་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་མཇལ་དགོས་ཡོད་ཟེར་གྱི་ཡོད་པ་རེད། དེར་བརྟེན། དེ་རིང་གོ་སྐབས་བཟུང་བའི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པ་དང་། རྒྱ་གར་གྱི་རྒྱལ་ས་ལྡི་ལི་རུ་ཆོས་ལུགས་མཐུན་འབྲེལ་གྱི་ཚོགས་ཆེན་འཚོག་འཆར་ཡོད་པས། ༧གོང་ས་རྒྱལ་བ་རིན་པོ་ཆེ་མཆོག་ཚོགས་མགོན་དུ་ཆིབས་སྒྱུར་བཀའ་དྲིན་སྐྱོང་གནང་ཡོང་བའི་གསོལ་འདེབས་ཞུས་པ་ལྟར་ཞལ་བཞེས་མཛད་སོང་ལ། ཐུགས་མཉེས་པོ་གནང་སོང་། ཞེས་བརྗོད་བྱུང་།
ཡང་ཁོང་གིས། ང་ཚོ་བོད་མི་ཡོངས་ཀྱིས་སོ་སོའི་དཔག་ཚོད་ལ་གང་ཐུབ་ཐུབ་ཀྱིས་ཞབས་ཕྱི་ཞུ་རྒྱུའི་འགན་འཁུར་ཡོད་པ་རེད། ང་ཚོས་འགན་འཁུར་ལེན་མ་ལེན་ཞིག་རེད། ཀུན་སློང་ཡག་པོ་ཡོད་པའི་ཐོག་ནས་སོ་སོའི་ཕྱོགས་ནས་གང་ཐུབ་ཐུབ་བྱེད་ན་ལས་ཀ་ཡག་པོ་འགྲུབ་ས་རེད། ཅེས་དང་། རྒྱ་གར་རྒྱལ་ཡོངས་ཀྱི་ཆོས་ལུགས་ཡོངས་རྫོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་ཞི་བདེའི་གཟེངས་རྟགས་འབུལ་འཆར་ཡོད་སྐོར་འགྲེལ་བརྗོད་གནང་བྱུང་།
གསར་འགོད་པ། བསྟན་འཛིན་ཕུར་བུ།
