ཨ་རིའི་ནང་རྒྱ་ནག་གིས་ཕྱི་རྒྱལ་ཉེན་རྟོག་ལས་ཁུངས་ཟེར་བ་བཙུགས་པར་ངོ་རྒོལ་བྱས་འདུག

ཨ་རིའི་གྲོང་ཁྱེར་སན་ཧྥི་རན་སི་ཁོའི་རྒྱ་རིགས་ཤེས་ཡོན་ཅན་དང་སློབ་ཕྲུག་ཚོས། རྒྱ་ནག་གཞུང་གིས་ཨ་རིའི་ནང་ཕྱི་རྒྱལ་ཉེན་རྟོག་ཁང་དང་ཞབས་ཞུ་ཁང་ཟེར་བ་གཉིས་བཙུགས་པར་ངོ་རྒོལ་བསྒྲགས་གཏམ་སྤེལ་འདུག

People from all walks of life in the San Francisco Bay Area of the United States held a press conference in Chinatown on May 4.

ཟླ་འདིའི་ཕྱི་ཚེས་ ༤ ཉིན་ཨ་རིའི་གྲོང་ཁྱེར་སན་ཧྥི་རན་སི་ཁོར་ (San Francisco) ཡོད་པའི་རྒྱ་གྲོང་ (Chinatown) དུ་རྒྱ་ནག་གི་སློབ་གཉེར་བ་དང་ཤེས་ཡོན་ཅན་རྣམས་ཀྱིས། རྒྱ་ནག་གཞུང་གིས་ཨ་རིའི་གྲོང་ཁྱེར་ནེའུ་ཡོག་ཏུ་རྒྱ་རིགས་དང་རྒྱ་ནག་གཞུང་གི་ཁ་གཏད་དུ་ལངས་མཁན་རྣམས་ལ་དམིགས་པའི་ཉེན་རྟོག་ཁང་གསར་འཛུགས་བྱས་པར་ངོ་རྒོལ་མཚོན་པའི་གསར་འགོད་ལྷན་ཚོགས་ཤིག་བསྐངས་ཡོད་འདུག

གསར་འགོད་ལྷན་ཚོགས་སྐབས་ཧོང་མན་(Hongmen) གི་མགོ་ཁྲིད་ཀྲའོ་ (Zhao Bingxian) ཡིས། དེ་རིང་གསར་འགོད་ལྷན་ཚོགས་ཚོགས་དགོས་པའི་དམིགས་ཡུལ་ནི། རྒྱ་ནག་གཞུང་གིས་ནེའུ་ཡོག་ཏུ་ཧྥུ་ཀྲུའུ་ཕྱི་རྒྱལ་ཉེན་རྟོག་ཁང་ (Fuzhou Overseas Police Station) དང་རྒྱ་ནག་གི་ཕྱི་རྒྱལ་ཞབས་ཞུ་ཁང་ཟེར་བ་གཉིས་གསར་འཛུགས་བྱས་ཡོད་པ་དང་། དེ་ནི་རྒྱལ་སྤྱིའི་དྲག་སྤྱོད་པའི་ཚོགས་པ་ཞིག་རེད། ཅེས་བརྗོད་ཡོད་འདུག

འདི་ལོའི་ཕྱི་ཟླ་ ༤ པའི་ནང་ཨ་རིའི་ཉེས་དཔྱོད་ལས་ཁུངས་ཀྱིས། ཨ་རིའི་ནང་ཡོད་པའི་ (Changle Association) ཚོགས་པའི་ཚོགས་གཙོ་ཟུར་པ་ལུ་ཅན་ཝང་ (Lu Jianwang) དང་སྤྱི་ཁྱབ་དྲུང་ཆེ་ཁྲན་ཅིན་པིིང་ (Chen Jinping) གཉིས་ཀྱིས་ཨ་རིའི་གྲོང་ཁྱེར་(Manhattan) གྱི་རྒྱ་གྲོང་ནང་ཉེན་རྟོག་ས་ཚིགས་བཙུགས་པའི་ཉེས་མིང་འོག་འཛིན་བཟུང་བྱས་ཡོད་འདུག

ཕྱི་ལོ་ ༡༩༨༩ ལོའི་རྒྱ་ནག་གི་སློབ་མའི་ངོ་རྒོལ་གྱེན་ལངས་ལས་འགུལ་གྱི་མགོ་ཁྲིད་ཧྥང་ཚུང་དི་ (Feng Congde) ཡིས། རྒྱ་ནག་གཞུང་གིས་འཛམ་གླིང་ཡོངས་སུ་སྲིད་དབང་སྒེར་འཛིན་གྱི་ལམ་ལུགས་གོང་སྤེལ་གཏོང་ཐབས་བྱེད་ཀྱི་ཡོད་པ་དང་། ད་ལྟའི་ཆར་འཛམ་གླིང་ཡོངས་ལ་སྟངས་འཛིན་བྱ་འདོད་ཡོད་པ་རེད། རྒྱ་ནག་གི་མགོ་ཁྲིད་ཞི་ཅིན་ཕིན་གྱིས། སྲིད་དབང་སྒེར་འཛིན་གྱི་ལམ་ལུགས་ནི་ཕུགས་མདུན་གཅིག་པའི་མིའི་སྤྱི་ཚོགས་ཤིག་རེད། ཅེས་བརྗོད་ཀྱི་ཡོད་པ་རེད། དེ་ཡང་ཁོང་ཚོས་མི་གཅིག་དབང་སྒྱུར་རིང་ལུགས་བེད་སྤྱོད་བྱེད་པའི་ཐོག་ནས་མི་རྣམས་ལ་སྟངས་འཛིན་བྱ་འདོད་ཡོད་པ་རེད། ཅེས་བརྗོད་འདུག

འདི་ལོའི་ཕྱི་ཟླ་ ༤ པའི་ནང་ཨ་རིའི་ཁྲིམས་འཛིན་ལྷན་ཁང་གི་ཕྱག་རོགས་ཁྲིམས་ཞིབ་སྤྱི་ཁྱབ་པ་མེ་ཐིའུ་ཨོལ་སན་ (Matthew G. Olsen) ལགས་ཀྱིས། རྒྱ་ནག་དམར་ཤོག་སྲིད་གཞུང་གིས་གསང་བའི་ཉེན་རྟོག་ས་ཚིགས་གསར་འཛུགས་བྱས་ཏེ། ཕྱོགས་འགལ་བ་དང་རྒྱ་ནག་གཞུང་ལ་ཉེན་ཚབས་ཆེ་བའི་མི་རྣམས་ལ་སོ་ལྟ་དང་འཇིགས་སྐུལ་བྱེད་ཀྱི་ཡོད་པ་རེད། ཅེས་བརྗོད་འདུག

གསར་འགོད་ལྷན་ཚོགས་སྟེང་ཨ་རིའི་གཞུང་ལ་རྒྱབ་སྐྱོར་མཚོན་ཆེད་དུ་སན་ཧྥ་རན་སི་ཁོ་རུ་ཡོད་པའི་རྒྱ་ནག་གི་ཤེས་ཡོན་པ་དང་སློབ་ཕྲུག་སྡེ་ཁག་གིས་མཉམ་འབྲེལ་གྱི་བསྒྲགས་གཏམ་སྤེལ་བའི་ནང་། རྒྱ་ནག་གཞུང་གིས་རྒྱལ་སྤྱིའི་སྒང་རྒྱ་ནག་གི་ཉེན་རྟོག་ས་ཚིགས་དང་ཞབས་ཞུ་ཁང་ཟེར་བ་གཉིས་གསར་འཛུགས་བྱས་པར་སྐྱོན་འཛུགས་དང་ངོ་རྒོལ་བྱེད་བཞིན་ཡོད་པ་མ་ཟད། ཨ་རིའི་གཞུང་གིས་ལུ་ཅན་ཝང་ (Lu Jianwang) དང་ཁྲན་ཅིན་པིང་ (Chen Jinping) གཉིས་འཛིན་བཟུང་བྱས་པར་རྒྱབ་སྐྱོར་ཡོད་སྐོར་དང་། རྒྱ་ནག་གཞུང་གིས་ཐབས་ཤེས་ཡོད་རྒུ་བཏོན་ནས་ཨ་རིའི་ནང་སིམ་འཛུལ་གྱིས་གནས་ཚུལ་རྫུན་བཟོ་དང་། སྤྱི་ཚོགས་ཁ་བྲལ། གྱེན་ལོག་པར་ངན་པ་ཁོག་རྒྱོང་སོགས་བྱེད་ཀྱི་ཡོད་པ་རེད།

གསར་འགོད་པ། བསྟན་འཛིན་ཕུར་བུ།