བྷང་ལོར་སན་ཊི་ཇོན་སི་སྨན་ཞབས་མཐོ་སློབ་ཀྱི་ཉེ་བའི་གཙུག་ལག་རབ་འབྱམས་ཀྱི་སློབ་ཐོན་པ་རྒྱལ་ཐང་ཆོས་འཕེལ་ལྷ་སྒྲོན་ལགས་སུ་རྒྱུགས་འབྲས་ཨང་དང་པོ་དང་སློབ་ཐོན་རྩེར་སོན་སོགས་ཀྱི་བྱ་དགའ་ཁག་གསུམ་ཐོབ་འདུག
ཁ་སང་རྒྱ་གར་ལྷོ་ཕྱོགས་ཀར་ན་ཌ་ཀ་མངའ་སྡེའི་བྷང་ལོར་སན་ཊི་ཇོན་སི་སྨན་ཞབས་མཐོ་སློབ་(Bangalore St.John’s College of Nursing)ཀྱི་སློབ་ཐོན་མཛད་སྒོའི་ཐོག སྨན་ཞབས་ཉེ་བའི་གཙུག་ལག་རབ་འབྱམས་(BSc Nursing)ཀྱི་སློབ་ཐོན་པ་རྒྱལ་ཐང་ཆོས་འཕེལ་ལྷ་སྒྲོན་ལགས་སུ་འཛིན་གྲྭའི་ནང་རྒྱུགས་འབྲས་ཨང་དང་པོ་དང་། སློབ་ཐོན་རྩེར་སོན་སློབ་མའི་གསེར་གྱི་གཟེངས་རྟགས། དེ་བཞིན་མཐོ་སློབ་དེའི་Bishop perceval fernandez Cash Award དངུལ་སྨར་བྱ་དགའ་བཅས་ཐོབ་ཡོད་འདུག
རྒྱལ་ཐང་ཆོས་འཕེལ་ལྷ་སྒྲོན་ལགས་ནི་མོན་གྷོར་གཞིས་གྲོང་བདུན་པ་ནས་ཡིན་འདུག་ལ། འཛིན་རིམ་ ༡༢ བར་མོན་གྷོར་གཏན་སློབ་ནས་སློབ་སྦྱོང་བྱས་ཡོད་པ་དང་། དེའི་རྗེས་བྷང་ལོར་སན་ཊི་ཇོན་སི་སྨན་ཞབས་མཐོ་སློབ་ནས་ཕྱི་ལོ་ ༢༠༡༦ ནས་ ༢༠༡༩ བར་(General Nursing)སྤྱིར་བཏང་སྨན་ཞབས་དང་། ཕྱི་ལོ་ ༢༠༢༠ ་ནས་ ༢༠༢༣ བར་(BSc Nursing)སྨན་ཞབས་ཀྱི་ཉེ་བའི་གཙུག་ལག་རབ་འབྱམས་ཀྱི་བསླབ་པ་མཐར་སོན་ཡོད་འདུག
ཁོང་མོས་འདི་གའི་གསར་འགོད་པར། གཟེངས་རྟགས་ཐོབ་དུས་སེམས་པ་ཧ་ཅང་དགའ་བོ་བྱུང་། གང་ཡིན་ཟེར་ན། ༧གོང་ས་མཆོག་གི་ཐུགས་རྗེ་བཀའ་དྲིན་དང་ནང་མིའི་རེ་བ་འགྲུབ་པ་རེད་བསམ་གྱི་འདུག་ལ། གྲོགས་གྲོགས་མོ་དང་གཉེན་ཉེ་ཚང་མས་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་ཡི་ཡོད་ཅེས་དང་། མ་འོངས་པར་ལོ་ཤས་རིང་སྨན་ཞབས་ཐོག་ཉམས་མྱོང་བསགས་རྗེས་ཨ་རིར་ཡིག་ཚད་གཏོང་འཆར་ཡོད་སྐོར་བརྗོད་བྱུང་།
