ཁ་སང་ཕྱི་ཚེས་ ༡༧ ཉིན་ནས་བཟུང་བཙན་བྱོལ་བོད་མིའི་སྒྲིག་འཛུགས་ཀྱི་བཅའ་ཁྲིམས་དང་དེ་འབྲེལ་ཁྲིམས་སྒྲིག་ཁག་ལ་བསྐྱར་བཅོས་ཀྱི་འཆར་ཟིན་ཚོགས་ཆུང་གིས་བསྐྱར་བཅོས་ཀྱི་ལས་དོན་དབུ་འཛུགས་གནང་ཡོད་འདུག
བཙན་བྱོལ་བོད་མིའི་ཁྲིམས་སྒྲིག་ཁག་ནང་ཁ་གསལ་མེད་པའི་སྐྱོན་གནད་གང་ཙམ་ཞིག་ཡོང་གི་ཡོད་པ་བསྐྱར་བཅོས་ཆེད། འདི་ལོའི་ཕྱི་ཟླ་ ༣ པ་ནང་འཚོགས་པའི་སྐབས་ ༡༧ པའི་གྲོས་ཚོགས་ཚོགས་དུས་ལྔ་པའི་ཐོག བཅའ་ཁྲིམས་བསྐྱར་བཅོས་འཆར་ཟིན་ཆེད་ཚོགས་གཙོ་སྤྲེལ་པོས་ཚོགས་མི་ལྔ་ལས་གྲུབ་པའི་ཆེད་འཛུགས་ཚོགས་ཆུང་ཞིག་བསྐོ་འཛུགས་གནང་དགོས་ཞེས་མང་མོས་གཏན་འབེབ་བྱུང་བ་བཞིན། ཚོགས་གཙོ་སྦྲེལ་པོས་ཆོལ་ཁ་གསུམ་ནས་སྤྱི་འཐུས་རེ་རེ་དང་། ཆོས་བརྒྱུད་ནས་སྤྱི་འཐུས་གཅིག ཕྱི་རྒྱལ་ཡུལ་གྲུ་ཁག་ནས་སྤྱི་འཐུས་གཅིག་བཅས་ཚོགས་མི་ལྔ་ལས་གྲུབ་པའི་ཚོགས་ཆུང་ཞིག་ཆེད་འཛུགས་གནང་ཟིན་ཡོད་པ་རེད།
ཁ་སང་ཉིན་རྒྱབ་ཏུ་ཚོགས་ཆུང་གི་ཚོགས་མི་
གྲོས་ཚོགས་ཚོགས་དུས་ལྔ་པའི་ཐོག་ཚོགས་ཆུང་དེས་བཙན་བྱོལ་བོད་མིའི་བཅའ་ཁྲིམས་ཀྱི་སྒྲོམ་གཞི་རང་སོར་གནས་ཐོག་ད་དུང་གསལ་ཁ་དགོས་ངེས་ཡོད་པར་བསྐྱར་བཅོས་ཇི་དགོས་དང་། དེ་འབྲེལ་ཁྲིམས་སྒྲིག་གཞན་ཁག་ལའང་བསྐྱར་བཅོས་ཇི་དགོས་བསྐྱར་ཞིབ་གནང་ནས་བསྐྱར་བཅོས་ཟིན་བྲིས་བཟོ་འགོད་གནང་ཕྱོགས་གོ་བསྡུར་གྱིས་ཚོགས་ཆུང་གི་གྲུབ་དོན་སྙན་ཐོ་དང་འཆར་འབུལ་གྱི་ཟིན་བྲིས་བཅས་ཕྱི་ལོ་ ༢༠༢༤ ཟླ་ ༢ པའི་ཟླ་མཇུག་ཏུ་སྤྱི་འཐུས་ཚོགས་དྲུང་ལས་ཁུངས་སུ་ཕུལ་ཟིན་པ་དགོས་པའི་མང་མོས་གྲོས་ཆོད་བཞག་པ་ལྟར། ཁ་སང་ནས་རྩིས་པའི་དུས་ཡུན་ཟླ་བ་ ༩ ཙམ་ནང་བསྐྱར་བཅོས་ཀྱི་འཆར་ཟིན་འགྲུབ་པ་གནང་དགོས་ཀྱི་ཡོད་འདུག་ལ། ཐེངས་འདིའི་བཅའ་ཁྲིམས་བསྐྱར་བཅོས་འདི་ནི་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་གནང་བ་ཐེངས་ ༣༦ པ་དེ་ཆགས་ཀྱི་ཡོད་འདུག
གཞི་རིམ་མི་མང་གི་བསམ་ཚུལ་དང་མངོན་འདོད་གཞི་ལ་བཞག་ནས་བཅའ་ཁྲིམས་ལ་བསྐྱར་བཅོས་འགྲོ་དགོས་པ་དེ་མང་གཙོ་ཁྲིམས་ཀྱི་དབང་ཟེར་བའི་ཐ་སྙད་ལ་འགན་འཁུར་དགོས།