རྒྱ་གར་དང་པ་སི་ཐན་གྱི་མི་མང་ ༡༥༠༠༠༠ ལྷག་ཉེན་གཡོལ་གནས་སྤོར་བྱས་འདུག

རྒྱ་གར་ཞི་བདེ་རྒྱ་མཚོའི་དྲག་རླུང་གཡུགས་ཏེ་ཉེ་འཁྲིས་རྒྱ་གར་གྱི་གྷུ་ཇུ་ར་ཏི་དང་པ་ཀི་སི་ཐན་གྱི་གྲོང་ཁྱེར་ཁག་ཏུ་ཆུ་ལོག་དང་ས་རུད་རྒྱུག་རྒྱུའི་ཉེན་ཁ་ཡོད་འདུག

Cyclone Biparjoy: PM Modi held a review meeting yesterday.

དེ་རིང་རྒྱ་གར་གྱི་མངའ་སྡེ་གྷུ་ཇུ་ར་ཏི་དང་ཁྱིམ་མཚེས་པ་ཀི་སི་ཐན་གཉིས་བར་མཚོ་རླུང་དྲག་པོ་ཞིག་གཡུག་རྒྱུ་ཡིན་པའི་ཉེན་བརྡ་བཏང་ཡོད་པ་ལྟར། ཉེ་བའི་ཉིན་འགའི་རིང་རྒྱ་གར་གྱི་མངའ་སྡེ་གྷུ་ཇུ་ར་ཏིའི་ (Mandvi) དང་པ་ཀི་སི་ཐན་གྱི་ (Keti Bandar) མཚོ་འགག་གི་བརྒྱུད་དུ་ཆགས་པའི་གྲོང་ཚོ་ཁག་གི་ནང་རྒྱ་གར་ཞི་བདེ་རྒྱ་མཚོའི་མཚོ་རླུང་ (cyclone biparjoy) དྲག་པོ་ཞིག་གིས་རྐྱེན་བྱས་ཏེ་ཆུ་ལོག་དང་ས་རུད་རྒྱུག་ཉེན་ཡོད་པའི་གནས་སྟངས་འོག དེ་རིང་ཕྱི་ཚེས་ ༡༥ བར་རྒྱལ་ཁབ་གཉིས་ཀྱི་ཉེན་ཁའི་ས་ཁོངས་ནས་ད་སྔ་བར་ཡུལ་མི་གྲངས་ ༡༥༠,༠༠༠ ལྷག་གནས་སྤོར་བྱས་ཡོད་སྐོར་བསྒྲགས་འདུག

རྒྱ་གར་གྱི་གནམ་གཤིས་སྔོན་བརྡ་ལས་ཁུངས་ཀྱིས་ཛ་དྲག་ཉེན་བརྡ་བཏང་བ་ལྟར་ན། དེ་རིང་ཕྱི་དྲོར་རྒྱ་གར་གྱི་མངའ་སྡེ་གྷུ་ཇུ་ར་ཏིའི་ (Mandvi) ས་ཁུལ་དུ་མཚོ་རླུང་དྲག་པོ་གཡུག་ཉེན་ཡོད་པའི་ཉེན་བརྡའི་འོག་ནས་ཡུལ་མི་ ༦༧,༠༠༠ ཙམ་གནས་སྤོས་བྱས་ཡོད་པ་དང་། ད་ལྟ་གྷུ་ཇུ་ར་ཏིའི་མེ་འཁོར་གང་མང་ཞིག་ལས་མཚམས་བཞག་ཡོད་ཅིང་། དམིགས་བསལ་གྷུ་ཇུ་ར་ཏིའི་མཚོ་གྲུ་འབབ་ཚིགས་ཆེ་ཤོས་ཀན་དྷི་ལ་ (Kandla) དང་མུན་དྷ་ར་ (Mundra) གཉིས་གནས་སྐབས་རིང་སྒོ་བརྒྱབ་ཡོད་པ་མ་ཟད། མི་མང་དང་ཉ་པ་རྣམས་བཀག་སྡོམ་བྱས་ཏེ། རང་བྱུང་གོད་ཆག་མྱུར་སྐྱོབ་ཚན་པ་ ༦ ཙམ་ཆེད་དུ་མངག་གཏོང་བྱས་ནས་བཞག་ཡོད་འདུག་ལ། ཁ་སང་ཕྱི་ཚེས་ ༡༤ ཉིན་རྒྱ་གར་གྱི་གྷུ་ཇུ་ར་ཏི་མངའ་སྡེའི་ནང་ཆར་རླུང་དྲག་པོ་བརྒྱབ་ཡོད་པ་རེད།དེ་བཞིན་པ་ཀི་སི་ཐན་གྱི་ (Keti Bandar) གྲོང་ཁྱེར་དུ་དེ་རིང་ཕྱི་དྲོ་ཆུ་ཚོད་ ༤ ནས་ ༨ བར་མཚོ་རླུང་རྒྱག་ཉེན་ཡོད་པའི་གནས་སྟངས་འོག་ད་བར་ཡུལ་མི་ ༨༡,༠༠༠ ཙམ་ངལ་སེལ་སྡོད་ཁང་དུ་གནས་སྤོས་བྱས་ཡོད་པ་མ་ཟད། མང་ཚོགས་དང་ཉ་པ་རྣམས་གནས་སྐབས་རིང་མཚོ་འགྲམ་དུ་བསྐྱོད་མི་ཆོག་པའི་བཀའ་བཏང་ཡོད་འདུག

More than 100,000 people in India and Pakistan have been evacuated from the path of a fierce cyclone

རྒྱ་གར་གྱི་ས་གནས་གནམ་གཤིས་དཔྱད་རིག་པས། མཚོ་རླུང་དྲག་པོ་གཡུགས་ཏེ་རླུང་འཚུབ་ཀྱི་མགྱོགས་ཚད་དེ་ཆུ་ཚོད་རེར་ཀེ་ལོ་མེ་ཊར་ ༡༣༥ ནས་ ༡༥༠ བར་ཡིན་པས། མཚོ་རླུང་གིས་རྐྱེན་བྱས་ཏེ་རྒྱ་མཚོའི་རྦ་རླབས་ཤུགས་ཆེན་འཕྱུར་ནས་མཚོ་འགྲམ་དུ་ཁེལ་བའི་ཡུལ་མི་རྣམས་ལ་ཉེན་ཁ་ཡོད་པ་རེད། ཅེས་ཉེན་བརྡ་བཏང་ཡོད་འདུག་ལ། ཁ་སང་རྒྱ་གར་གྱི་སྲིད་བློན་མུ་དྷི་མཆོག་གིས་དྲག་རླུང་གི་ཛ་དྲག་དཀའ་ངལ་ཐོག་འཕྲལ་མར་ཚོགས་འདུ་ཞིག་འཚོགས་ཏེ། རྒྱ་གར་དབུས་གཞུང་ནས་གྷུ་ཇུ་ར་ཏི་མངའ་གཞུང་དང་ས་གནས་ཡུལ་དངོས་སོགས་ལ་ལམ་སྟོན་དང་རོགས་སྐྱོར་བྱ་རྒྱུ་ཡིན་སྐོར་བརྗོད་ཡོད་པ་རེད། ཡང་པ་ཀི་སི་ཐན་གྱི་གནམ་གཤིས་འགྱུར་ལྡོག་གི་བློན་ཆེན་ཤེ་རི་ (Sherry Rehman) ལགས་ཀྱིས། ཡུལ་མི་ས་ཡ་ ༢༠ ལྷག་ཡོད་པའི་ (Karachi) མཚོ་ཁུལ་དུ་འཕྲད་སེལ་གྱི་ཉེན་ཁ་མེད་ཀྱང་། ཛ་དྲག་གི་མྱུར་སྐྱོབ་གྲ་སྒྲིག་བྱས་ཟིན་སྐོར་བརྗོད་འདུག

འདས་པའི་ལོ་ངོ་ ༢༥ གོང་ལ་གྷུ་ཇུ་ར་ཏི་མངའ་སྡེའི་ནང་མཚོ་རླུང་བྱུང་སྟེ། མི་རྒྱུ་གཉིས་ལ་གནོད་སྐྱོན་ཚབས་ཆེན་ཕོག་པ་དང་། ཡུལ་མི་ ༤༠༠༠ ལྷག་རྐྱེན་འདས་སུ་གྱུར་ཡོད་པ་རེད།

གསར་འགོད་པ། བསྟན་འཛིན་ཕུར་བུ།