༧གོང་ས་རྒྱལ་བ་རིན་པོ་ཆེ་མཆོག་གིས་ཧྥིན་ལེན་ཌིའི་སྲིད་བློན་གསར་པར་འཚམས་འདྲི་མཛད་དེ་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུར་འབད་འབུངས་གནང་དགོས་སྐོར་སོགས་གསུངས་འདུག
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཞབས་པི་ཌར་རི་ཨོར་པོ་(Petteri Orpo) ལགས་ཧྥིན་ལེན་ཌིའི་སྲིད་བློན་གསར་པར་འདེམས་ཐོན་བྱུང་བར་གསུང་འཕྲིན་ཞིག་བསྩལ་ཏེ་འཚམས་འདྲི་གནང་བ་དང་སྦྲགས། སྲིད་བློན་ཁོང་གི་མ་འོངས་པར་ཧྥིན་ལེན་ཌི་རྒྱལ་ཁབ་དེ་སྣེ་ཁྲིད་པར་བྱ་གཞག་མཐའ་དག་ལམ་ལྷོང་དང་ཞི་བདེ་ལྡན་པའི་འཇིག་རྟེན་ཞིག་བསྐྲུན་ཐབས་གནང་དགོས་པའི་བཀའ་སློབ་བསྩལ་འདུག
༧གོང་ས་རྒྱལ་བ་རིན་པོ་ཆེ་མཆོག་གིས་བསྩལ་བའི་གསུང་འཕྲིན་ནང་། འདས་པའི་ལོ་ཤས་རིང་ངོས་རང་ཁྱེད་ཀྱི་རྒྱལ་ཁབ་ཏུ་ཐེངས་འགར་བསྐྱོད་རྒྱུའི་གོ་སྐབས་བྱུང་ལ། ཧྥིན་ལེན་ཌིའི་རྒན་གཞོན་གཙོས་མི་མང་རྣམས་ཀྱིས་ངོས་རང་གིས་བྱམས་བརྩེ་གོང་མཐོར་དང་། འཛམ་གླིང་གཅིག་འགྱུར། ཆོས་ལུགས་མཐུན་འབྲེལ་གྱི་ཐད་ལ་འཆད་ཀྱིན་པར་དོ་དབྱིངས་བྱས་པར་ངོས་རང་ལའང་བློ་སྤོབས་བྱིན་སོང་། ཞེས་དང་། དེང་གི་འཛམ་གླིང་འདིར་དཀའ་ངལ་ཆེས་མང་བ་མ་ཟད། འཛམ་གླིང་ས་ཕྱོགས་གང་སར་དྲག་སྤྱོད་སོགས་ལ་བརྟེན་ནས་མི་མང་དཀྱུས་མ་རྣམས་ལ་དཀའ་ངལ་ཞིག་འབྱུང་མུས་ཡིན་པ་ནི་ཞེ་སྨྲེང་བའི་གནད་དོན་ཞིག་ཡིན་པས། རྒྱལ་སྤྱིའི་ཚོགས་སྡེ་ཁག་གིས་ཞི་བདེའི་ཐོག་ནས་རྩོད་རྙོག་དེ་དག་ཞི་འགྲིག་བྱ་དགོས་ཤིང་། གྲོས་མོལ་གྱི་ལམ་ནས་ཞི་འགྲིག་བྱ་རྒྱུ་ནི་གོ་མཚོན་གྱི་འཇིག་པ་ལས་བྲལ་ནས་རང་དབང་ལྡན་པའི་འཇིག་རྟེན་ཞིག་བསྐྲུན་རྒྱུའི་ལམ་བུ་ཁོ་ན་ཡིན། ཞེས་གསུངས་འདུག
ཡང་༧མགོན་པོ་གང་ཉིད་ཀྱིས། ངོས་ནས་བློན་ཆེན་མཆོག་གིས་ཧྥིན་ལེན་ཌིའི་མི་མང་གི་རེ་བ་དང་མངོན་འདོད། དེ་བཞིན་ཞི་བདེ་དང་བྱམས་བརྩེ་ལྡན་པའི་འཇིག་རྟེན་ཞིག་བསྐྲུན་པར་བྱ་གཞག་ལམ་ལྷོང་ཡོང་བའི་རེ་སྨོན་ཞུ། ཞེས་གསུངས་འདུག
ད་ལྟ་དགུང་ལོ་ ༥༣ ཡིན་པའི་སྐུ་ཞབས་པི་ཌར་རི་ཨོར་པོ་(Petteri Orpo) ལགས་ནི་ཕྱི་ལོ་ ༡༩༦༩ ཕྱི་ཟླ་ ༡༡ ཚེས་ ༣ ཉིན་ཀོའོ་ལོ་(Köyliö་) རུ་སྐུ་འཁྲུངས་ཤིང་། ཁོང་ནི་དེ་སྔ་ཧྥིན་ལེན་ཌི་རྒྱལ་ཁབ་ཀྱི་མཉམ་འབྲེལ་ཆབ་སྲིད་ཚོགས་པ་(National Coalition Party) པའི་ཚོགས་མི་དང་། ཕྱི་ལོ ༢༠༡༦ ལོ་ནས་ཚོགས་པ་དེའི་ཚོགས་གཙོ་བདམས། ཕྱི་ལོ ༢༠༡༦ ནས་ ༢༠༡༩ བར་ཧྥིན་ལེན་ཌི་རྒྱལ་ཁབ་ཀྱི་སྲིད་བློན་གཞོན་པ་དང་། ཕྱི་ལོ ༢༠༡༦ ནས་༢༠༡༩ བར་དཔལ་འབྱོར་བློན་ཆེན་གནང་སྟེ། ད་ལོར་ཁོང་ཉིད་ཧྥིན་ལེན་ཌིའི་སྲིད་བློན་སྐབས་ ༤༧ པར་འདེམས་ཐོན་བྱུང་།
གསར་འགོད་པ། དཔལ་ལྡན།
