སེམས་སྐྱིད་པོ་བྱས་ནས་མ་ཎི་ཡག་པོ་བགྲོངས། ངོས་རང་གི་དགེ་ཕྲུག་ཡིན་བསམ་ནས་སེམས་པ་ཡག་པོ་བྱོས་ཞེས་གསུངས་བྱུང་།
དེ་རིང་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བོད་རིགས་དད་ལྡན་པ་ཁག་ཅིག་ལ་མཇལ་ཁ་དང་བཀའ་སློབ་བསྩལ་ཏེ། བོད་མི་ཚོས་༧གོང་ས་རྒྱལ་བ་རིན་པོ་ཆེ་མཆོག་ལ་ཡིད་ཆེས་དང་རེ་བ། དགའ་བོ། དད་པ་བྱེད་མཁན་ཚོར་འཕགས་པ་སྤྱན་རས་གཟིགས་ཀྱི་བྱིན་རླབས་གནང་བར་གསོལ་བ་འདེབས་བཞིན་ཡོད་སྐོར་སོགས་གསུངས་སོང་།
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། ཁྱེད་ཚོ་ཁ་ཤས་ཀྱིས་མ་ཎི་ལུང་བགྲང་ན་ཟེར་གྱི་འདུག ངོས་ཀྱིས་ཆོས་སྦྱངས་བར་ཤེས་རབ་ཞེ་བོ་གལ་ཆེན་པོ་རེད་དྲན་གྱི་འདུག བསམ་བློ་གཏང་རྒྱུ་ཞེ་དྲགས་གལ་ཆེན་པོ་རེད། སངས་རྒྱས་ཀྱི་ཆོས་དེ་རྒྱུ་མཚན་ལ་བསམ་བློ་བཏང་ནས་འགྲོ་ཡི་ཡོད་པ་རེད། དད་པ་གཅིག་པུ་མ་རེད། ཡི་ཤུའི་ཆོས་དང་། ཁ་ཆེ་ཆོས་ལུགས་བཅས་ཀྱིས་དད་པ་གཙོ་བོ་བྱས་ནས་འགྲོ་བཞིན་འདུག ང་ཚོའི་ནང་པའི་ཆོས་དང་། ལྷག་པར་དུ་བོད་གངས་ཅན་ལྗོངས་ལ་ཡོད་པའི་ནང་པའི་ཆོས་དེ་རྒྱུ་མཚན་བསམ་བློ་བཏང་ནས་སྐྱབས་སུ་འགྲོ་བ་ལས། སྐྱབས་སུ་མཆི་ཟེར་བའི་དད་པ་གཅིག་པུ་མིན་པར་བསམ་བློ་མང་པོ་བཏང་ནས་འགྲོ་དགོས་པ་ཞིག་རེད། ང་ཚོའི་སེམས་ཀྱི་རྒྱུད་དུ་མ་སྐྱིད་པའི་བློ་གང་ཡོད་པ་དེར། རྒྱུ་མཚན་གྱི་ཐོག་ནས་ཤུགས་ཆུང་དུ་གཏང་དགོས། ཞེས་གསུངས་སོང་།
ཡང་༧གོང་ས་རྒྱལ་བ་རིན་པོ་ཆེ་མཆོག་གིས། སྙིང་རྗེ་དང་དད་པ་སོགས་ཀྱི་ཕན་ཐོགས་ཡོད་པའི་རྒྱུ་མཚན་ལ་བརྟེན་ནས་ཤུགས་ཆེ་རུ་གཏང་དགོས། དེ་ནི་བོད་པའི་ནང་ཆོས་དཔལ་ན་ལེནྡྲ་ནས་བརྒྱུད་ཡོང་བའི་རྒྱུ་མཚན་ལ་བརྟེན་ཡོད་པ་གལ་ཆེན་རེད། དེ་འདྲ་ཡིན་དུས། རྗེ་བཙུན་འཇམ་དཔལ་དབྱངས་ཞེ་བོ་གལ་ཆེན་པོ་ཆགས་ཡོད། རྗེ་བཙུན་འཇམ་དཔལ་དབྱངས་ཤེས་རབ་ཀྱི་ལྷ་ཡིན་པས། ང་ཚོའི་སེམས་ཀྱི་རྨོངས་པའི་མུན་པ་ག་ལེར་སད་དེ། མཐར་ཐུག་རྣམ་པ་ཐམས་ཅད་མཁྱེན་པའི་ཡི་ཤེས་མངོན་དུ་འགྱུར་བ་ང་ཚོའི་དམིགས་ཡུལ་རེད། འཕྲལ་སེལ་གྱི་སྐྱབས་སུ་མཆི་ཟེར་བ་གཅིག་པུ་མིན་པར། ཆོས་ཕྱོགས་ཀྱི་ཐོག་ནས་བསམ་བློ་བཏང་ནས་རྣམ་དཔྱོད་ཀྱི་ཤེས་རབ་དེ་གོང་ནས་གོང་དུ་འཕེལ་བ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་མངོན་འགྱུར་ཐུབ་པའི་དམིགས་ཡུལ་རེད། སྲིད་པའི་འཁོར་བ་ནི་མ་རིག་པའི་དབང་གིས་འཁོར་བཞིན་ཡོད་པ་རེད། ཉོན་མོངས་པའི་རྩ་བ་དེ་མ་རིག་པ་རེད། མ་རིག་པ་སད་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ང་ཚོའི་རྒྱུད་དུ་སྐྱེ་ཐུབ་པ་དེ། རྗེ་བཙུན་འཇམ་དཔལ་དབྱངས་ཀྱིས་ཤེས་རབ་སྒྲོན་མེ་རབ་ཏུ་གསལ་ཞེས་པ་དེ་རེད། ཆོས་རིག་པ་རྣམ་དཔྱོད་གོང་ནས་གོང་དུ་འཕེལ་བར་རྗེ་བཙུན་འཇམ་དཔལ་དབྱངས་ལ་གསོལ་བ་འདེབས་པར་གལ་ཆེན་པོ་རེད། ཅེས་གསུངས་སོང་།
ཡང་མགོན་པོ་གང་ཉིད་ཀྱིས། རྗེ་བཙུན་འཇམ་དཔལ་དབྱངས་ཀྱི་བྱིན་རླབས་ལ་བརྟེན་ནས་རྒྱ་ཆེ་ས་ནས་བྱང་ཆུབ་ཀྱི་སེམས་ལ་དོ་སྣང་ཤུགས་ཆེན་པོ་སླེབས་ཀྱི་ཡོད་པ་རེད། བྱང་ཆུབ་སེམས་ཀྱི་རྒྱལ་བ་ཀུན་གྱི་བརྩེ་བའི་རང་གཟུགས་འཕགས་པ་སྤྱན་རས་གཟིགས་ང་ཚོའི་སྙིང་རྗེ་ལྷ་གཙོ་བོ་ཆགས་ཀྱི་ཡོད། རྗེ་བཙུན་འཇམ་དཔལ་དབྱངས་ཀྱི་གཟུངས་སྔགས་བགྲངས་ཏེ་ང་ཚོའི་ཀླད་པ་གྲུང་པོ་ཆགས་ཡོང་དུས། རང་གཞན་གྱི་འཕྲལ་ཕུགས་ཀྱི་ཁེ་ཕན་བསམ་བློ་འཁོར་ཡོང་བ་དང་། ཀུན་ལ་ཕན་པ་སེམས་པ་བཟང་པོ་བྱ་རྒྱུ་དེ་རེད། ང་ཚོའི་སེམས་ཀྱི་རྨོངས་པ་རྣམས་ག་ལེར་སད་པ་དང་། རང་གཞན་གྱི་བདེ་སྐྱིད་རྩ་བ་དེ་བྱང་ཆུབ་ཀྱི་སེམས་ཡིན་པ་ཤེས་པའི་ཐོག་ནས་མ་ཎི་བགྲངས་པ་དང་། འཕགས་པ་སྤྱན་རས་གཟིགས་ལ་གསོལ་བ་ཐོབས། བོད་གངས་ཅན་པ་ནི་སྤྱན་རས་གཟིགས་ཀྱི་འདུལ་ཞིང་ཆགས་བསྡད་ཡོད་པས། སྤྱན་རས་གཟིགས་བསྒྲུབ་ན་སྒྲུབ་ཐག་ཉེ་བ་ཆགས་ཡོད། ང་ཚོ་བོད་གངས་ཅན་པའི་ལྷ་སྐལ་རེད། དེ་འདྲ་ཡིན་དུས་ང་ཚོས་རྒྱུན་ཏུ་མ་ཎི་བགྲངས་བ་དང་། འཕགས་པ་སྤྱན་རས་གཟིགས་ལ་གསོལ་བ་བཏབ། ངོས་ལ་ཆ་བཞག་ན་འཕགས་པ་སྤྱན་རས་གྲོགས་པོ་ཆགས་བསྡད་ཡོད། འཕགས་པ་སྤྱན་རས་གཟིགས་ཕྱག་མཛོད་ཀྱི་བཟོ་འདྲ་བོ་ཆགས་བསྡད་ཡོད། བོད་མི་མང་པོས་ངོས་ལ་ཡིད་ཆེས་དང་རེ་བ་བྱེད་བཞིན་ཡོད་པ་རེད། ངོས་ཀྱིས་ཀྱང་དགའ་བོ་དང་དད་པ་བྱེད་མཁན་ཚོར་འཕགས་པ་སྤྱན་རས་གཟིགས་ཀྱི་བྱིན་རླབས་གནང་བར་གསོལ་བ་འདེབས་བཞིན་ཡོད། བོད་གངས་ཅན་གྱི་ཁྱད་ཆོས་གཙོ་བོ་དེ་འཕགས་པ་སྤྱན་རས་ཀྱི་ཡི་དམ་དུ་མཇལ་ནས་གཟུངས་སྔགས་ཡིག་དྲུག་བགྲངས། སེམས་པ་བཟང་པོ་བྱེད་པ་དེ་བོད་ཀྱི་རིག་གཞུང་ཐུན་མོང་མ་ཡིན་པ་རེད། སེམས་སྐྱིད་པོ་བྱས་ནས་མ་ཎི་ཡག་པོ་བགྲོངས། ངོས་རང་གི་དགེ་ཕྲུག་ཡིན་བསམ་ནས་སེམས་པ་ཡག་པོ་བྱོས། ཞེས་གསུངས་སོང་།
གསར་འགོད་པ། བྱམས་པ་ཚེ་རིང་།
