ཧྥ་རན་སི་ཉེན་རྟོག་པས་རླངས་འཁོར་གཏོང་མཚམས་འཇོག་ཆེད་མེ་མདས་བརྒྱབ་སྟེ་ན་གཞོན་ཞིག་བསད་པས་ཁོང་གི་ནང་མི་སོགས་ཀྱིས་ངོ་རྒོལ་ཤུགས་ཆེན་བྱས་འདུག
ཁ་སང་ཕྱི་ཚེས་ ༢༨ ཉིན་ཧྥ་རན་སི་རྒྱལ་ཁབ་ཀྱི་པེ་རེ་སི་གྲོང་ཁྱེར་དུ་ཉེན་རྟོག་པ་ཞིག་གིས་ལོ་ ༡༧ ཅན་གྱི་རླངས་འཁོར་ཁ་ལོ་བ་ཞིག་ལ་མེ་མདས་བརྒྱབ་ནས་བསད་པའི་དོན་རྐྱེན་བྱུང་རྗེས། མི་ ༣༠༠ ལྷག་གིས་ཉེན་རྟོག་ལས་ཁུངས་མདུན་གྱི་རླངས་འཁོར་མེ་སྒྲོན་ཏེ་ངོ་རྒོལ་བྱས་ཡོད་རྐྱེན། ད་ལྟའི་ཆར་ངོ་རྒོལ་བྱེད་མཁན་མི་ ༧༧ ལྷག་འཛིན་བཟུང་བཀག་ཉར་བྱས་ཡོད་འདུག
ཐེངས་འདིའི་དོན་རྐྱེན་འདི་ནི་ཟླ་འདིའི་ཕྱི་ཚེས་ ༢༧ ཉིན་པེ་རི་སི་གྲོང་ཁྱེར་མཐའ་རུ་ཆགས་པའི་ནཱན་ཌེ་རེ་ (Nanterre ) ཁུལ་གྱི་འགྲིམ་འགྲུལ་རྟོག་ཞིབ་ས་ཚིགས་སུ་བྱུང་ཡོད་པ་དང་། བྱང་ཨ་ཧྥི་རི་ཁ་ནས་ཡིན་པའི་ནཱ་ཧེལ་ཨེམ་ (Nahel M) ཡིས་ཉེན་རྟོག་པའི་མདུན་དུ་རླངས་འཁོར་གཏོང་མཚམས་མ་བཞག་པར་བྲོས་ཡོད་པས། ཉེན་རྟོག་པས་མེ་མདས་བརྒྱབ་ནས་འདས་གྲོངས་སུ་གྱུར་ཏེ། འདས་པོའི་ནང་མིས་ཧྥ་རན་སིའི་གཞུང་ལ་ཁྲིམས་གཏུགས་བྱེད་བཞིན་འདུག
དེའི་སྐོར་ལ་ཧྥ་རན་སི་སྲིད་འཛིན་ཨེམ་མཱ་ནུལ་མཱ་ཁི་རོན་ (Emmanuel Macron) མཆོག་གིས། ཧྥ་རན་སི་རྒྱལ་ཡོངས་ཀྱིས་ནཱ་ཧེལ་རྐྱེན་འདས་སུ་ཕྱིན་པར་སེམས་ཚོར་བྱུང་ཡོད་ཅིང་། ཁོང་གི་ནང་མི་ཚང་མར་གདུང་སེམས་མཉམ་བསྐྱེད་ཞུས་ཡོད། དོན་རྐྱེན་འདི་ནི་འགྲེལ་བརྗོད་བྱེད་དཀའ་བ་དང་། གུ་ཡངས་གཏོང་མི་ཐུབ་པ་ཞིག་ཡིན་པ་མ་ཟད། འཆི་རྐྱེན་འདི་བདེན་པ་ར་སྤྲོད་བྱ་རྒྱུ་ཅི་ཡང་མེད་པས། ཁྲིམས་ཁང་ནས་འཕྲལ་མར་དྲང་བདེན་གསལ་སྟོན་ཞུ་ངེས་རེད། ཅེས་གསུངས་འདུག
ཧྥ་རན་སི་ཉེན་རྟོག་པའི་མཐུན་ཚོགས་ ( Alliance Police union) ཀྱི་གསལ་བསྒྲགས་ཤིག་སྤེལ་བའི་ནང་དུ། སྲིད་འཛིན་མཆོག་གི་གསུང་བཤད་ལ་ཡིད་ཆེས་བྱེད་ཐབས་མེད་པ་ཞིག་རེད། ཐེངས་སྔོན་མར་ཉེན་རྟོག་པར་རྒྱབ་སྐྱོར་བྱེད་པ་ལས་ལྡོག་ཕྱོགས་སུ་ལངས་ཡོད་འདུག རྒྱབ་སྐྱོར་བྱེད་སྟངས་རྣམ་པ་གཉིས་སུ་གྱུར་འདུག་པས། ཉེས་འཛུགས་བྱས་པའི་ལས་གྲོགས་རྣམས་ཀྱི་ཆེད་དུ་དྲང་བདེན་གྱི་ལམ་ནས་སྐད་ཆ་བཤད་པའི་རེ་བ་ཆེ་སྐོར་བརྗོད་འདུག
འདས་པོའི་ཁྲིམས་རྩོད་པ་ཡཱ་སི་ནེ་བྷུ་ཛི་རུ་(Yassine Bouzrou) ལགས་ཀྱིས། བརྙན་ཐུང་སྟེང་དུ་ཧ་ཅང་གསལ་བོ་མཐོང་ཐུབ་པ་ལྟར། ཉེན་རྟོག་པས་མེ་མདས་བརྒྱབ་ནས་ནཱ་ཧེལ་ཨེམ་བསད་ཡོད་པ་རེད། འདི་ལྟར་མེ་མདས་བརྒྱབ་ནས་མི་གསོད་ཆོག་པ་རྩ་ཁྲིམས་གང་དུའང་གསལ་མེད། ཅེས་བརྗོད་འདུག
འདས་པོའི་ཨ་མ་མོའུ་ནི་ཡས་(Mounia ) སྤྱི་ཚོགས་དྲ་ལམ་དུ་ཉེན་རྟོག་པས་ཁོ་མོའི་བུ་བསད་ཡོད་པས། མི་མང་གིས་དྲན་གསོའི་གོམ་བགྲོད་ལ་མཉམ་ཞུགས་བྱེད་པར་འབོད་སྐུལ་ཞུས་ཡོད་པ་དང་། ད་དུང་ཁོ་བྱིས་པ་ཞིག་ཡིན་པས། ཁོ་ལ་ཨ་མ་དགོས་ཀྱི་ཡོད། ཞོགས་པར་ང་ལ་མཇལ་ཡོང་ཞེས་བུད་སོང་། ཆུ་ཚོད་གཅིག་གི་རྗེས་སུ་མི་ཁ་ཤས་ཀྱིས་ངའི་བུ་ལ་མེ་མདས་བརྒྱབ་འདུག་ཅེས་བཤད་བྱུང་། ཁོ་ནི་ངའི་མི་ཚེ་ནང་གི་ཡོད་ཚད་ཡིན། ཞེས་འགྲེལ་བརྗོད་གནང་འདུག
དོན་རྐྱེན་དེ་ནི་འདི་ལོའི་ཧྥ་རན་སིའི་ནང་ཉེན་རྟོག་པས་རླངས་འཁོར་གཏོང་མཚམས་འཇོག་ཆེད་མེ་མདས་བརྒྱབ་པའི་དོན་རྐྱེན་བྱུང་ཐེངས་གསུམ་པ་དེ་ཡིན་པ་དང་། ཧྥ་རན་སི་འགྲིམ་འགྲུལ་ཡིག་ཚགས་ལྟར་ན་དོན་རྐྱེན་འདི་འདྲ་ཁྱོན་བསྡོམས་ཐེངས་ ༡༣ བྱུང་ཡོད་ཅིང་། ཕྱི་ལོ་ ༢༠༢༡ ནང་དུ་ཐེངས་ ༣ དང་། ཕྱི་ལོ་ ༢༠༢༠ དང་ཕྱི་ལོ་༢༠༡༧ ནང་དུ་ཐེངས་གཉིས་རེ་བྱུང་འདུག རྐྱེན་འདས་སུ་ཕྱིན་ཡོད་པ་མང་ཆེ་ཤོས་ནི་ཨ་རབ་ཀྱི་མི་རིགས་ནག་པོ་ཡིན་འདུག་ལ། ད་ཐེངས་ཀྱི་དོན་རྐྱེན་དེ་ནི་ཕྱི་ལོ་ ༢༠༢༢ དང་ཕྱི་ལོ་ ༢༠༢༣ ནང་དུ་ཐེངས་དྲུག་པ་བྱུང་ཡོད་འདུག
གསར་འགོད་པ། བྱམས་པ་ཚེ་རིང་།
