༧གོང་ས་མཆོག་གིས་ང་ཚོ་ཆོས་པ་ཡིན་ཟེར་ནས་བསམ་བློ་གུ་དོག་པོ་མིན་པར་ཤེས་བྱའི་རྣམ་གཞག་ལ་བརྟག་དཔྱད་བྱས་ཏེ་ཕྱི་དངོས་པོའི་རིམ་པ་གཏན་ལ་ཕབ་པ་དང་། སེམས་འདུལ་བའི་རིམ་པ་འགྲོ་བར་གལ་ཆེན་ཡིན་སྐོར་བཀའ་སློབ་བསྩལ་སོང་།
དེ་རིང་ཕྱི་ཚེས་ ༤ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཕྱི་རྒྱལ་ཡུལ་གྲུ་ཁག་ཅིག་གི་བོད་རིགས་གཞོན་སྐྱེས་རྣམས་ལ་མཇལ་ཁ་སྩལ་སྐབས། ངོས་ཀྱི་ཉམས་མྱོང་གི་ཐོག་ནས་བྱང་ཆུབ་ཀྱི་སེམས་ཀྱིས་གཞན་ཕན་གྱི་བློ་བསམ་གཏོང་ཡོང་དུས། ངོས་ཀྱི་སེམས་ལ་རང་བཞིན་གྱི་ཞི་བདེ་ཞིག་ཡོང་བར་ཕན་ཐོགས་ཞེ་བོ་འདུག བྱས་ཙང་ང་ཚོ་ཚང་མས་སེམས་པོ་བཟང་པོ་བྱེད་དགོས་རེད། འཕགས་པ་སྤྱན་རས་གཟིགས་ཀྱི་འདུལ་ཞིང་ནས་སྐྱེས་པའི་མི་རེད། ལོ་ངོ་སྟོང་ཕྲག་རིང་དུ་བོད་པར་སེམས་པ་བཟང་པོ་བྱེད་དགོས་པའི་མིག་དཔེ་ཡོད་པ་རེད། མ་འོངས་བ་ཡང་སེམས་པ་བཟང་པོ་བྱེད་དགོས་པའི་གོམས་གཤིས་མུ་མཐུད་བསྡད་དགོས་པའི་འབད་བརྩོན་བྱ་དགོས། འཛམ་བུ་གླིང་གི་ཞི་བདེ་ཟེར་བ་དེ་མེ་མདའ་འཁྱེར་ནས་ཡོང་ཐབས་ཡོད་པ་མ་རེད། སེམས་པ་བཟང་པོས་ཞི་བདེ་ཡོང་གི་རེད། དེ་བོད་པའི་ཐུན་མོང་མ་ཡིན་པ་རེད། སེམས་པ་བཟང་པོ་བྱེད་པར་སོ་སོའི་ཉམས་ལེན་དང་། སོ་སོའི་སྤུན་ཟླ་དང་བུ་ཕྲུག་ཚོའང་སེམས་པ་བཟང་པོ་བྱ་དགོས་པའི་འགྲེལ་བཤད་ཡག་པོ་བྱས། ཞེས་གསུངས།
ཡང་༧མགོན་པོ་གང་ཉིད་ཀྱིས། སློབ་གྲྭའི་ཆོས་ཀྱི་དགེ་རྒན་ལ་ཆོས་དགེ་མ་བཏགས་པར། ལྟ་གྲུབ་དགེ་རྒན་བཏགས་དགོས་ཀྱི་འདུག བོད་ཀྱི་སངས་རྒྱས་པའི་ཆོས་དེ་ལྟ་གྲུབ་ཀྱི་ཐོགས་ནས་འགྲེལ་བཤད་རྒྱག་རྒྱུ་ཞེ་དྲགས་ཡོད་པ་རེད། ང་ཚོའི་ཆོས་ནི་དཔལ་ནལེནྡྲ་ནས་བརྒྱུད་ཡོང་བ་ཞིག་རེད། ནལེནྡྲའི་མཁས་པའི་དབང་བོ་ཚོས་ཐོས་བསམ་སྒོམ་གསུམ་ཟུང་འབྲེལ་བྱས་ཡོད་པ་དང་། རིག་པ་བེད་སྤྱོད་ཀྱིས་ཕྱི་དངོས་བོའི་གནས་ཚུལ་དང་། ནང་སེམས་ཀྱི་རྣམ་གཞག་དེ་དག་དཔྱད་པ་བཏང་ཡོད་པ་མ་གཏོགས། བླ་མས་གསུང་ཆོས་གནང་ནས་བསྡད་ཡོད་པ་འདྲ་ཞིག་ཆགས་ཀྱི་ཡོད་པ་མ་རེད། ཆོས་དགེ་མ་བཏགས་པར་ལྟ་གྲུབ་དགེ་རྒན་དགོས་དོན་ཡང་ཆོས་པ་དང་ནང་པ་ཡིན་དགོས་པ་ཡོད་པ་མ་རེད། གང་ལྟར་མིའི་བསམ་བློ་རྒྱ་ཆེན་པོ་འཁོར་བར་ཕན་ཐོགས་ཞེ་དྲགས་ཡོད་བསྡད་པ་ཞིག་རེད། སྔོན་མའི་ཆོས་དགེ་མིང་འགྱུར་བ་བཏང་ནས་ལྟ་གྲུབ་དགེ་རྒན་ཞེས་མིང་བཏགས་པའི་རྒྱུ་མཚན་དེ་འདྲ་ཡིན། ནང་པའི་ཆོས་ཀྱི་འགྲོ་སྟངས་དེ་ལྟ་གྲུབ་ཀྱི་ཐོག་ནས་བསམ་བློ་རྒྱ་ཆེན་པོ་བཏང་ཡོོད།
དེང་སང་ཚན་རིག་པའི་ནང་ནས་དོ་སྣང་བྱས་ཡོང་གི་འདུག ང་ཚོས་ཆོས་ཀྱི་འགྲོ་སྟངས་བྱས་ནས་འདོན་པ་བཏོན་པ་དང་། གཟུངས་སྔགས་བགྲངས་བསྡད་ན་ཚན་རིག་པས་དོ་སྣང་བྱེད་ཀྱི་མ་རེད། ལྟ་གྲུབ་ཀྱི་སྐོར་ནས་བཤད་དུས་ཚན་རིག་པའི་ནང་ནས་དགའ་བོ་བྱེད་མཁན་ཞེ་དྲགས་འདུག ཁྱེད་ཚོས་ཀྱང་སྨོན་ལམ་བརྒྱབ་བསྡད་པ་གཅིག་པོ་མ་ཡིན་པར། དཔལ་ནལེནྡྲའི་མཁས་པའི་དབང་བོ་ཚོས་མཛད་པའི་གཞི་ལམ་འབྲས་གསུམ་གྱི་རྣམ་གཞག་ཐོག་ནས་ལྟ་གྲུབ་ཡག་པོ་ཞིག་ཤེས་དགོས། ཡིད་ཆེས་བྱེད་མིན་སོ་སོའི་རང་དབང་རེད། གང་ལྟར་ལྟ་གྲུབ་གཏིང་ཟབ་པོ་ཞིག་ཡོད་པ་དེར་དོ་སྣང་བྱས་ནས་ཤེས་པ་བྱས་པ་ཡིན་ན། བློ་གྲོས་རྒྱ་བསྐྱེད་པར་ཕན་ཐོགས་ཞེ་དྲགས་ཡོད་པ་རེད། ཕྱི་དངོས་པོའི་གནས་ཚུལ་དང་། ལམ་བགྲོད་པའི་རིམ་པ། འབྲས་བུ་མངོན་ཏུ་བྱས་ཚུལ་ཟེར་བ་དེ་བསམ་བློ་རྒྱ་ཆེན་པོ་བཏང་ནས་ཤེས་པ་ཡིན་ན་ཕན་ཐོགས་ཡོད་པ་རེད། ངོས་ཀྱིས་ཆོས་རྒྱལ་སྲོང་བཙན་སྒམ་པོ་གྲུང་པོ་མཐོང་གི་འདུག རྒྱ་བཟའ་མཉམ་དུ་ཆང་ས་བསྐྱོན་པ་མ་ཟད། རྒྱ་མིའི་ཁ་ལག་བཞེས་ཡོད་པ་རེད་དེ། ང་ཚོ་བོད་པ་བསམ་བློ་བཏང་ནས་རྒྱ་སྐད་དང་རྒྱ་ཡིག་ལ་དོ་སྣང་མ་གནང་བ་རེད། བོད་པ་རང་ལ་ཡི་གེ་ཞིག་དགོས་ཀྱི་འདུག་དགོངས་ནས་བོད་ཡིག་བཟོས་པ་རེད། དེ་བ་ན་གྷར་ལ་དཔེ་བལྟས་ནས་བོད་ཡིག་བཟོས་པ་རེད། དེ་ནས་ཆོས་རྒྱལ་ཁྲི་སྲོང་ལྡེའུ་བཙན་ཕེབས་ཡོང་དུས་ཙ་ན། བོད་ཀྱི་ནང་ཆོས་འདོན་པ་བཏོན་པ་ཙམ་མ་ཡིན་པར། དཔལ་ནལེནྡྲའི་མཁས་པ་ཚོའི་གཞུང་ཆེན་མོ་ལས། ལྟ་སྒོམ་དཔྱོད་གསུམ་གྱི་རྣམ་གཞག་གཏིང་ཟབ་མོ་གཏོང་རྒྱུ་ཡོད་པ་དེར། མཁན་ཆེན་ཞི་བ་འཚོ་བོད་དུ་གདན་ཞུ་གནང་སྟེ། ལྟ་སྒོམ་དཔྱོད་གསུམ་ལ་རིག་པའི་ལམ་ནས་དཔྱད་པ་གཏོང་བར་དཔེ་ཆ་བསླབ་པར་གལ་ཆེན་པོ་ཡིན་པར་ལམ་སྟོན་གནང་བ་རེད། སྔོན་གྱི་ཆོས་རྒྱལ་ཚོའི་ཐུགས་རེ་གནང་བ་བཞིན། ལྟ་གྲུབ་སྐོར་ལ་བསམ་བློ་བཏང་ནས་ནང་ཆོས་སློབ་སྦྱོང་བྱེད་པར་བོད་པ་ཡག་ཤོས་རེད། ངོས་ཀྱིས་ཐེ་ལན་ཌི་དང་ཝི་ཏི་ནམ་གྱི་ནང་པ་མང་པོ་ཐུག་གི་ཡོད། དེ་འདྲའི་ལྟ་གྲུབ་སྐོར་ལ་བཤད་རྒྱུ་མི་འདུག བོད་པ་ཚོས་ལྟ་གྲུབ་སྐོར་ལ་སློབ་སྦྱོང་བྱས་པ་ཡིན་དུས། བསམ་བློ་གྲུང་བོ་དང་རྒྱ་ཆེ་བ་འདུག བོད་ཀྱི་ནང་ཆོས་གཙོ་བོ་ལྟ་གྲུབ་ཀྱི་ཐོག་ནས་ཡག་པོ་ཤེས་དགོས་པ་དང་། དེ་ནས་ཚན་རིག་པ་དང་མཉམ་དུ་གོ་བསྡུར་བྱེད་ཐུབ་ཀྱི་ཡོད་པ་རེད། ང་ཚོ་ཆོས་པ་ཡིན་ཟེར་ནས་བསམ་བློ་གུ་དོག་པོ་མིན་པར་ཤེས་བྱའི་རྣམ་གཞག་ལ་བརྟག་དཔྱད་བྱས་ནས་བཤད་ཐུབ་རྒྱུ་གལ་ཆེན་པོ་རེད། དེ་དག་གིས་ཕྱི་དངོས་པོའི་རིམ་པ་གཏན་ལ་ཕབ་པ་དང་། སེམས་འདུལ་བའི་རིམ་པར་འགྲོ་དུས་ཞེ་བོ་ཡག་པོ་རེད་འདུག་ཅེས་བཀའ་སློབ་བསྩལ་སོང་།
གསར་འགོད་པ། བྱམས་པ་ཚེ་རིང་།
