རྗེ་བཙུན་མི་ལའི་མཛད་རྣམ་ཐང་ག་རིང་ཤོས་ཤིག་ལེགས་འགྲུབ་བྱུང་།

ལྷ་རིས་པ་སྐལ་བཟང་དམ་ཆོས་ལགས་ཀྱིས་རྗེ་བཙུན་མི་ལ་རས་པའི་མཛད་རྣམ་གྱི་བརྒྱུད་རིམ་ཆ་ཚང་ཐང་གའི་ནང་དུ་འཆར་འགོད་གཙོ་བོ་བྱས་ཡོད་ཅིང་། རི་མོའི་འབྲི་སྲོལ་དང་ཐིག་རྩ་གཉིས་སྨན་བླ་དོན་གྲུབ་རྒྱ་མཚོའི་གཞུང་ལ་བསྟུན་ཡོད་པ་དང་། ཡུལ་ལྗོངས་ཀྱི་བཀོད་པ་ནི་སྤྲུལ་བའི་ལྷ་བཟོ་ནམ་མཁའ་རྒྱན་གྱི་རི་མོའི་འབྲི་སྲོལ་ལྟར་བྲིས་ཡོད་ཅེས་འགྲེལ་བརྗོད་གནང་སོང་།

དེ་རིང་བཞུགས་སྒར་གཙུག་ལག་ཁང་གི་ཉེ་འགྲམ་བོད་ཀྱི་འགྲེམས་སྟོན་ཁང་དུ། སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གིས་ལོ་གཉིས་ལྷག་རིང་རྗེ་བཙུན་མི་ལ་རས་པའི་མཛད་རྣམ་ཐང་གའི་ལམ་དུ་འབྲི་བཞེང་བྱས་པ་ལེགས་འགྲུབ་བྱུང་བའི་འགྲེམས་སྟོན་མཛད་སྒོ་ཞིག་འཚོགས་སོང་། ཐེངས་འདིའི་ཚོགས་ཐོག་ཏུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་རྣམ་གཉིས་དང་། དེ་བཞིན་དྷ་སའི་སེར་སྐྱ་མི་མང་ཁག་ཅིག་དང་གསར་འགོད་པ་བཅས་ཀྱིས་མཉམ་ཞུགས་གནང་འདུག

འདི་གའི་གསར་འགོད་པས་རྗེ་མི་ལའི་མཛད་རྣམ་ཐང་གའི་སྐོར་ལ་བཅར་འདྲི་བྱས་པར་ལྷ་རིས་པ་སྐལ་བཟང་དམ་ཆོས་ལགས་ཀྱིས། མཛད་རྣམ་འདི་བཞེངས་པའི་དགོས་པ་དང་དམིགས་ཡུལ་གཙོ་བོ་ནི་བོད་ཀྱི་ཐང་ག་འཛམ་གླིང་དུ་ངོ་སྤྲོད་བྱ་རྒྱུ་དང་། ལྷག་པར་བོད་ཀྱི་གྲུབ་ཆེན་མི་ལ་རས་པའི་མཛད་པ་འཕྲིན་ལས་ཐང་གའི་སྒྱུ་རྩལ་གྱི་ལམ་ནས་བོད་ཀྱི་གཞོན་སྐྱེས་རྣམས་ལ་དོ་སྣང་ཡོང་ཆེད་དུ་ཡིན། འཁྲུངས་སྐར་དང་བསྟུན་ནས་འགྲེམས་སྟོན་བྱེད་དོན་ཡང་ཐང་ག་འདི་བཞེངས་པའི་ཚོགས་དང་བསོད་ནམས་ཀྱིས་༧གོང་ས་མཆོག་གི་སྐུ་ཚེ་བསྐལ་བརྒྱར་བརྟན་པའི་ཆེད་དུ་ཡིན། འདིར་རྗེ་བཙུན་མི་ལ་རས་པའི་མཛད་པ་བྲིས་པའི་ཐང་ག་ཁྱོན་ ༨༠༠ ལྷག་ཡོད་ཅིང་། ཐང་ག་ཚང་མ་མཐུད་བརྒྱབ་ཚེ་ཁྱོན་ཧྥེ་ཊི་ ༧༠ ལྷག་དང་། ཐང་གའི་མཐོ་ཚད་ལ་ཧྥེ་ཊི ༣ ཡོད།  ཐང་གའི་ནང་དུ་རྗེ་མི་ལ་རས་པའི་མཛད་རྣམ་གྱི་བརྒྱུད་རིམ་འཆར་འགོད་གཙོ་བོ་བྱས་ཡོད་ཅིང་། རི་མོའི་འབྲི་སྲོལ་དང་ཐིག་རྩ་གཉིས་སྨན་བླ་དོན་གྲུབ་རྒྱ་མཚོའི་གཞུང་ལ་བསྟུན་ཡོད་པ་དང་། ཡུལ་ལྗོངས་ཀྱི་བཀོད་པ་ནི་སྤྲུལ་བའི་ལྷ་བཟོ་ནམ་མཁའ་རྒྱན་གྱི་རི་མོའི་འབྲི་སྲོལ་ལྟར་བྲིས་ཡོད་ལ།  རྗེ་མི་ལ་རས་པའི་མཛད་རྣམ་ཐང་ག་འདི་ཉིད་ལོ་ ༢ ལྷག་གི་རིང་ལྷ་བྲིས་པ་ ༡༥ ལྷག་གིས་འབྲི་བཞེངས་བྱས་ཤིང་། ཐེངས་འདིའི་འབྲི་བཞེང་གི་ཁྲོད་དུ་མཛད་རྣམ་ནང་གི་བརྡ་རྙིང་སོགས་ལ་གོ་བ་མ་ལོན་པ་དང་། མཛད་རྣམ་ནང་གི་མི་སྣ་འབྲི་བཞེངས་བྱས་པའི་ཉམས་མྱོང་མེད་པས། འགྲོ་སོང་དང་ལས་ཀ་ལས་ཕྱོགས་ཐད་གདོང་ལེན་གང་འཚམ་བྱས་ཡོད་ཅེས་འགྲེལ་བརྗོད་གནང་སོང་།

བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། བོད་དུ་ནང་བ་སངས་རྒྱས་པའི་བསྟན་པ་དར་ནས་ཕྱིའི་བརྩིགས་པ་བཤིག་ཀྱང་། ནང་གི་དཔེ་ཆའི་བརྩིགས་པ་མི་བཤིག་ཅེས་བཤད་སྲོལ་ཡོད་པ་ཞིག་ཡིན་ཡང་། རྒྱ་གཞུང་གིས་གཏོར་བཤིག་བཏང་ནས་མེད་པར་བཟོས་པ་རེད། ང་ཚོ་སྐྱབས་བཅོལ་དུ་སླེབས་ནས་༧གོང་ས་རྒྱལ་བ་རིན་པོ་ཆེ་མཆོག་གི་གཙོས། སྐྱེས་ཆེན་དམ་པ་མང་པོའི་བཀའ་དྲིན་ལ་བརྟེན་ནས་ཉམས་པ་སླར་གསོ་དང་། མི་ཉམས་གོང་འཕེལ་གྱི་ལས་ཀ་མང་པོ་ཞིག་བྱེད་བཞིན་ཡོད་ཅིང་། སྐལ་བཟང་གི་ལྷ་བྲིས་ཚོགས་པས་ཀྱང་ལོ་མང་རིང་༧གོང་ས་མཆོག་གི་གྱ་སྟོན་གྱི་མཛད་རྣམ་འབྲི་བཞེང་གི་མཚོན་པའི་ལས་ཀར་བསྔགས་བརྗོད་ཞུ་ཡུལ་ཞིག་རེད། ཐང་གའི་ཡག་སྡུག་ནི་ལྟ་མཁན་ལ་རག་ལས་ཡོད་པ་ཞིག་རེད། སྨན་ཐང་པས། མཁས་པས་གཞི་དང་ཚུགས་ལ་བལྟ་བར་བྱེད།། བླུན་པོས་བཀྲག་དང་འོད་ལ་བལྟ་བར་བྱེད།། བྱིས་པས་བྱ་དང་ཤིང་ལ་བལྟ་བར་བྱེད།། དེས་ན་བཟོ་ཡི་མཁས་པ་རང་གིས་ནི།། བློ་ཡི་དཔྱད་ནས་ལེགས་པར་འབྲི་བར་བྱ།། ཞེས་པ་བཞིན། རྗེ་མི་ལ་རས་པའི་མཛད་རྣམ་ཐང་གར་ལེགས་ཆ་གཉིས་ཡོད་པར་གོང་དུ་བཀའ་གནང་སོང་། མགུར་གྱི་ངོས་ནས་བོད་ལ་རྗེ་བཙུན་མི་ལའི་མགུར། ཞབས་དཀར་ཚོགས་དྲུག་རང་གྲོལ་གྱི་མགུར། ཤར་སྐལ་ལྡན་རྒྱ་མཚོའི་མགུར་སོགས་མང་པོ་ཞིག་ཡོད། དེ་དག་ནི་ཆོས་འགུགས་པའི་ཐབས་ལམ་ཞིག་ཡིན་ཡང་། དེང་སང་ཕལ་ཆེར་བོད་དུ་རྒྱུན་ཆད་པ་འདྲ་མཐོང་གི་འདུག་པས། མགུར་དེ་ཡང་ཉམས་གསོ་གནང་རྒྱུ་གལ་ཆེན་པོ་རེད་ཅེས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་ཐོག་མར་འདིར་སླེབས་པ་དང་ཚོར་བ་ཞིག་བྱུང་སོང་། ལྷ་རིས་པ་སྐལ་བཟང་ལགས་ཀྱིས་ཕྱག་ལས་རྒྱ་ཆེན་པོ་གནང་བཞིན་ཡོད་པ་རེད། དུས་ཚོད་ཡོད་པ་མ་རེད་མ་གཏོགས་མཛད་སྒོ་འདི་ལས་རྒྱ་ཆེ་ཙམ་གནང་དགོས་པ་ཞིག་བསམ་བློའི་ནང་དུ་འཁོར་སོང་། ང་ཚོའི་མཛད་སྒོ་འཚོག་རྒྱུ་དེ་འཁྲབ་སྟོན་གྱི་རྣམ་པ་གང་ཡང་མ་རེད། རིག་གཞུང་འཛིན་སྐྱོང་སྤེལ་གསུམ་བྱས་ཏེ་དཀའ་ལས་བརྒྱབ་པར་ཚང་མ་གོ་རྟོགས་ཡོང་བའི་ཆེད་དུ་རེད། འདིའི་ཐོག་ཏུ་གནད་ཡོད་མི་སྣ་དང་། དོ་སྣང་ཅན། མི་མང་པོ་ཡོང་བ་ཡིན་ན་ཁྱབ་རྒྱ་ཆེ་རུ་འགྲོ་ཐུབ་རྒྱུ་རེད། རྗེ་མི་ལའི་མཛད་རྣམ་ཐང་ག་འབྲི་བཞེངས་བྱས་པར་ལོ་གཉིས་ལྷག་འགོར་འདུག་ཅིང་། ལྷ་བྲིས་པ་སྐལ་བཟང་གཙོས་མི་མང་པོས་རྣམ་དཔྱོད་དང་དཀའ་ལས་བརྒྱབ་ནས་མིག་ལམ་དུ་མཐོང་རྒྱུ་ཡོད་པ་ཞིག་བཞེངས་འདུག་པས། བྱས་རྗེས་ཆེན་པོ་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།