བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བདུན་ཕྲག་གཅིག་རིང་ཉི་ཧོང་གི་རྒྱལ་ས་ཊོག་ཡོར་གྲོས་ཚོགས་འཐུས་མིར་མཇལ་འཕྲད་དང་མཐོ་སློབ་ནང་གསུང་བཤད་སོགས་ཀྱི་གཞུང་འབྲེལ་ཕྱོགས་ཕེབས་མགོ་འཛུགས་གནང་འདུག
དེ་རིང་སྔ་དྲོར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཉི་ཧོང་རྒྱལ་ས་ཊོག་ཡོར་ཕེབས་འབྱོར་བྱུང་སྟེ། དེ་རིང་ཉིན་རྒྱབ་ཏུ་ཉི་ཧོང་གི་བོད་དོན་རྒྱབ་སྐྱོར་གྱི་ཚོགས་པ་ཁག་ ༡༥ ཡི་ཚོགས་མི་རྣམས་དང་མཇལ་འཕྲད་གནང་ཡོད་པ་དང་། སྐབས་དེར་ཕྱི་དྲིལ་བཀའ་བློན་མཆོག་གིས། ཁོང་རྣམས་ཀྱིས་བོད་དོན་ལ་མུ་མཐུད་རྒྱབ་སྐྱོར་གནང་དང་གནང་མུས་ཡིན་པར་ཐུགས་རྗེ་ཆེ་ཞུས་པ་དང་། བོད་མིའི་སྒྲིག་འཛུགས་ཀྱི་དམིགས་ཡུལ་གཙོ་བོ་ནི་བོད་དོན་བདེན་མཐའ་གསལ་རྒྱུ་དང་། བཙན་བྱོལ་བོད་མིའི་བདེ་སྡུག་ལ་གཟིགས་སྐྱོང་གནང་རྒྱུ་དེ་ཡིན་ལ། བཙན་བྱོལ་ནང་གི་དམངས་གཙོ་དང་། དབུ་མའི་ལམ་གྱི་སྲིད་ཇུས་སྐོར་ངོ་སྤྲོད་གནང་ཡོད་འདུག
ཉི་ཧོང་གྲོས་ཚོགས་འཐུས་མི་ཟུར་པ་དང་བོད་སྐྱོབ་འབྲེལ་མཐུད་ཁང་གི་འགན་འཛིན་མ་ཀི་ནོ་སི་ཤུ་ (Makino Seishu) ལགས་ཀྱིས། ཉི་ཧོང་ནང་གི་བོད་དོན་རྒྱབ་སྐྱོར་ཚོགས་པའི་གནས་སྟངས་དང་། ཚོགས་པ་དེ་དག་གིས་༸གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་བོད་དོན་བདེན་མཐའ་གསལ་ཐབས་ལ་འབད་བརྩོན་གནང་མུས་ཡིན་སྐོར་སོགས་བརྗོད་འདུག
གཞན་ཡང་། ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཟུར་པ་ན་ག་ཧོ་ཏ་ཀ་ཤི་ (Nagao Takashi) ལགས་ཀྱིས། ཉི་ཧོང་གྲོས་ཚོགས་འཐུས་མི་རྣམས་ནས་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་མདུན་དུ་བོད་དོན་ལ་ཆབ་སྲིད་ཀྱི་རྒྱབ་སྐྱོར་ཐོབ་སླད། ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་ཞུ་རྒྱུ་དང་། བཙན་བྱོལ་བོད་མིའི་སྤྱི་ཚོགས་ཡུན་གནས་ཆེད་ཕན་གྲོགས་རྒྱབ་སྐྱོར་ཞུ་རྒྱུ་ཡིན་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་དབུ་ཁྲིད་འོག་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་ཞུ་རྒྱུ་ཡིན་སྐོར་འགྲེལ་བརྗོད་གནང་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་ད་ལན་ཕྱི་དྲིལ་བཀའ་བློན་མཆོག་ལ་མཛད་འཆར་གང་ཡོད་དྲིས་པར་ཁོང་གིས། བཀའ་བློན་མཆོག་གིས་བདུན་ཕྲག་གཅིག་རིང་ཉི་ཧོང་གྲོས་ཚོགས་འཐུས་མི་རྣམ་པར་མཇལ་འཕྲད་གནང་རྒྱུ་དང་། མཐོ་སློབ་ཁག་གཉིས་ཀྱི་སློབ་ཕྲུག་རྣམས་ལ་བོད་དོན་སྐོར་ལ་གསུང་བཤད། དེ་བཞིན་ཉི་ཧོང་ནང་བོད་དོན་དྲིལ་བསྒྲགས་སླད་གསར་འགོད་གསལ་བསྒྲགས་གནང་རྒྱུ་དང་། དཔེ་དེབ་དབུ་འབྱེད། ས་གནས་བོད་རིགས་རྣམས་ལ་མཇལ་འཕྲད་དང་གསུང་བཤད། བོད་སོག་རིག་གཞུང་དང་ཆོས་ཕྱོགས་ཚོགས་འདུའི་ཐོག་གསུང་བཤད་སོགས་ཀྱི་ལས་རིམ་བསྒྲིགས་གནང་ཡོད་སྐོར་འགྲེལ་བརྗོད་གནང་བྱུང་།
གསར་འགོད་པ། བསྟན་འཛིན་ཕུར་བུ།
