རྒྱ་ནག་བཅིངས་གྲོལ་དམག་གི་མེ་ཤུགས་འཕུར་མདའ་དོ་དམ་ཚན་པའི་དམག་སྤྱི་གསུམ་གར་སོང་ཆ་མེད་དུ་གྱུར་ནས་ཟླ་གཅིག་ཙམ་རྗེས་ནས་ཁོ་ཚོར་ལྐོག་ཟ་རུལ་སུངས་ཀྱི་ནག་ཉེས་འོག་འདྲི་གཅོད་གཏོང་གི་ཡོད་སྐོར་བརྗོད་འདུག
རྒྱ་ནག་གཞུང་འབྲེལ་གྱི་གསར་ལམ་ཁག་ཏུ་ཐོན་པའི་གནས་ཚུལ་ལྟར་ན། དེ་རིང་ཕྱི་ཚེས་ ༡ ཉིན་རྒྱ་ནག་གི་རྒྱལ་ས་པེ་ཅིན་བརྒྱད་གཅིག་ཐོག་བརྩེགས་ཁང་ཟེར་བའི་ནང་དུ། རྒྱ་ནག་བཅིངས་གྲོལ་དམག་མི་དབུ་བརྙེས་ཏེ་ལོ་ ༩༦ འཁོར་བའི་དུས་དྲན་གྱི་ཉིན་མོ་དང་བསྟུན། ཝང་ཧོའུ་པིན་ (Wang Houbin)བཅིངས་གྲོལ་དམག་མིའི་མེ་ཤུགས་འཕུར་མདའི་དམག་སྤྱི་ཆེན་མོར་བསྐོ་གཞག་བྱས་པ་དང་། ཞུས་ཞི་ཧྲེང་ (Xu Xisheng) མེ་ཤུགས་འཕུར་མདའི་དམག་གི་ཆབ་སྲིད་ཇུས་འགོད་པར་བསྐོ་གཞག་བྱས་པ་ཡོངས་བསྒྲགས་བྱས་འདུག
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བར་གཞིགས་ན། ཝང་ཧོའུ་པིན་ནི་དེ་སྔ་རྒྱ་ནག་བཅིངས་གྲོལ་དམག་གི་མཚོ་དམག་སྡེ་ཚན་གྱི་གཞོན་པ་ཡིན་པ་དང་ཞུས་ཞི་ཧྲེང་ལྷོ་རྒྱུད་དམག་བཅིངས་གྲོལ་དམག་ཁོངས་ནས་ཡིན་པ་དང་། ད་ལྟ་ཁོ་གཉིས་གསར་དུ་བཀོད་འདོམ་དཔོན་གྱི་གོ་གནས་ནས་ཐད་ཀར་དམག་སྤྱི་ཆེན་མོའི་གོ་གནས་ལ་བསྐོ་གཞག་བྱས་པ་དང་། གོ་གནས་དེ་ནི་རྒྱ་ནག་གི་དམག་སྲིད་ལས་དོན་ཁྲོད་ཀྱི་ཆེས་མཐོ་བའི་གོ་གནས་ཤིག་ཡིན་པ་རེད་ལ། ཁོ་གཉིས་ཀྱི་ནང་ནས་གཅིག་གིས་ཀྱང་ད་སྔ་བར་མེ་ཤུགས་འཕུར་མདའི་དམག་གི་ཁོངས་སུ་ལས་ཀ་བྱེད་མྱོང་མེད་སྐོར་བཤད་འདུག
རྒྱ་ནག་གི་དམག་དོན་གསར་འགྱུར་ཁག་ཏུ། ད་རེས་བཅིངས་གྲོལ་དམག་གི་མེ་ཤུགས་འཕུར་མདའི་དམག་སྤྱི་སྟེ། རྒྱ་ནག་གི་འཐབ་འཁྲུག་དམག་སྲིད་ཀྱི་ཆེས་གལ་འགངས་ཆེ་བའི་དམག་སྤྱི་འཕོ་འགྱུར་བྱེད་དོན་ནི། དེ་སྔའི་མེ་ཤུགས་འཕུར་མདའི་དམག་སྤྱི་ལི་ (Li Yuchao) དང་དམག་སྤྱི་གཞོན་པ་ཀྲང་ཀྲན་ཀྲོང་(Zhang Zhenzhong) དང་ལིའུ་(Liu Guangbin)བཅས་ལ་དབུས་སྒྲིག་ཁྲིམས་ཞིབ་བཤེར་ཁང་གིས་འདྲི་གཅོད་འོག་ཡོད་སྐོར་བརྗོད་འདུག་པ་མ་ཟད། དམག་སྤྱི་གསུམ་པོ་གར་ཡོད་མ་ཤེས་པར་གྱུར་ནས་ཟླ་གཅིག་ཙམ་འགྲོ་ཡི་ཡོད་པ་དང་། ད་རེས་དམིགས་བསལ་ཞི་ཅིན་ཕིན་དངོས་སུ་དམག་སྤྱིའི་གོ་གནས་བརྗེ་བསྒྱུར་གྱི་ལས་རིམ་ནང་ཞུགས་ཏེ། མེ་ཤུགས་འཕུར་མདའི་དམག་སྤྱི་གཉིས་གསར་དུ་བསྐོ་གཞག་བྱས་པ་དེས། རྒྱ་ནག་གི་དམག་སྲིད་ལས་དོན་མི་སྣའི་བར་འགལ་ཟླ་དང་ཞི་ཅིན་ཕིན་གྱི་བཀའ་ལ་ལགས་སོ་མི་ཟེར་མཁན་གྱི་དམག་སྤྱི་ཁག་ཅིག་གི་མགོ་གནོན་ཐབས་བྱས་ཡོད་སྐོར་དབྱེ་ཞིབ་པས་བརྗོད་འདུག
ཨ་རིའི་ཨེ་ཤ་ཡའི་སྲིད་ཇུས་ཞིབ་འཇུག་ལྟེ་གནས་ཁང་གི་ཉམས་ཞིབ་པ་ (Lyle Morris) ལགས་ཀྱིས། ཞི་ཕིན་གྱིས་བཅིངས་གྲོལ་དམག་གི་འགན་དབང་ཡོངས་རྫོགས་ལ་ད་བར་བྱུང་མྱོང་མེད་པའི་སྟངས་འཛིན་བྱེད་ཐུབ་ཡོད་ཀྱང་། དམར་ཤོག་དཔོན་རིགས་ཚོས་ལྐོག་ཟ་རུལ་སུངས་མཚམས་འཇོག་བྱས་ཏེ་དམར་ཤོག་ཚོགས་པར་བློ་དཀར་གཞུང་དྲང་ཡིན་པའི་ངེས་བརྟན་མེད་སྟབས། ཞི་ཅིན་ཕིན་ད་དུང་དམར་ཤོག་དཔོན་རིགས་ཚོར་ཡིད་ཆེས་མེད་པ་དང་། དམིགས་བསལ་ད་ལྟ་མེ་ཤུགས་འཕུར་མདའ་ཚན་པའི་དམག་སྤྱི་ལི་དང་ཉེ་ལམ་ཕྱི་སྲིད་བློན་ཆེན་ཆིན་གཱང་སོགས་ཀྱི་གོ་གནས་བརྗེ་བསྒྱུར་བྱ་དགོས་བྱུང་བ་དེས་ཞི་ཅིན་ཕིན་གྱིས་མགོ་ཁྲིད་པའི་རྒྱ་ནག་དམར་ཤོག་ཚོགས་པར་དཀའ་ཁག་ཆེན་པོ་བཟོས་ཡོད་སྐོར་སོགས་བརྗོད་འདུག
རྒྱ་ནག་གི་བཅིངས་གྲོལ་དམག་མིའི་མེ་ཤུགས་འཕུར་མདའ་དོ་དམ་དམག་མི་ནི། རྒྱ་ནག་གཞུང་གི་རྡུལ་ཕྲན་མཚོན་བཀོལ་སྤྱོད་ཀྱི་ཁ་ཕྱོགས་དང་ཐད་ཀར་འབྲེལ་བ་ཡོད་ཅིང་། དམིགས་བསལ་རྒྱ་ནག་གིས་ཐའེ་ཝན་ལ་དམག་སྲིད་ཀྱི་གནོན་ཤུགས་སྤྲོད་ཀྱིན་པ་དང་འབྲེལ་བ་དམ་པོ་ཡོད་པ་ཞིག་ཡིན་འདུག་ལ། ད་རེས་བཅིངས་གྲོལ་དམག་མིའི་མཚོ་དམག་དམག་སྤྱི་ཞིག་མེ་ཤུགས་འཕུར་མདའ་དོ་དམ་དམག་སྤྱིར་བསྐོ་གཞག་བྱས་པ་ནི་ཕྱོགས་གཅིག་ནས། རྒྱ་ནག་གིས་སོ་སོའི་ས་མཚོ་གནམ་གསུམ་གྱི་དམག་མིའི་འཇོན་ཐང་ངོམ་གྱི་ཡོད་པ་དང་། གཉིས་ནས་གོ་མཚོན་མ་ལག་གི་དམག་སྲིད་ལས་དོན་ཐོག་ཁྲག་ཚ་པོ་ཡིན་པའི་དམག་སྤྱི་ཞིག་བསྐོ་གཞག་བྱས་པ་ནི་ཏག་ཏག་གནད་ལ་ཁེལ་ཡོད་སྐོར་ཧྲང་ཧེ་ཆབ་སྲིད་ཚན་རིག་སློབ་གྲྭ་ཆེན་མོའི་དམག་དོན་ཉམས་ཞིབ་པ་ནེ་ལི་ཞོན་ (Ni Lexiong)ལགས་ཀྱིས་བརྗོད་འདུག
གསར་འགོད་པ། སྐལ་བཟང་སྦྱིན་པ།
