རྒྱལ་ཚོགས་ཀྱི་དམིགས་བསལ་རྟོག་ཞིབ་སྡེ་ཚན་གསུམ་གྱིས། རྒྱ་ནག་གཞུང་ནས་འཛིན་བཟུང་བཀག་ཉར་འོག་ཡོད་པའི་བོད་མི་ཁོར་ཡུག་སྲུང་སྐྱོབ་པ་དགུའི་གནས་སྟངས་གསལ་བཤད་དགོས་པའི་སྐུལ་མ་བཏང་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་པའི་དམིགས་བསལ་རྟོག་ཞིབ་སྡེ་ཚན་དང་། ཆོས་དད་རང་དབང་གི་རྟོག་ཞིབ་སྡེ་ཚན། ཁོར་ཡུག་སྲུང་སྐྱོབ་ཀྱི་རྟོག་ཞིབ་སྡེ་ཚན་བཅས་རྒྱལ་ཚོགས་ཀྱི་དམིགས་བསལ་སྡེ་ཚན་གསུམ་གྱིས། བོད་ཀྱི་ཁོར་ཡུག་སྲུང་སྐྱོབ་དང་འབྲེལ། རྒྱ་ནག་གཞུང་གིས་འཛིན་བཟུང་བཙན་འཁྲིད་བྱས་པའི་བོད་ཀྱི་ཁོར་ཡུག་སྲུང་སྐྱོབ་པ་དགུའི་ད་ལྟའི་གནས་སྟངས་དང་བཙོན་འཇུག་བྱེད་དོན་ཅི་ཡིན་སོགས་ཀྱི་རྒྱུ་མཚན་གསལ་བཤད་དགོས་པའི་སྐུལ་མ་བཏང་འདུག
དེ་འབྲེལ་གནས་ཚུལ་ནང་། རྒྱལ་ཚོགས་ཀྱི་ཚོགས་པ་དེ་དག་གིས། རྒྱ་ནག་གཞུང་ནས་བོད་མི་དགུ་ལ་དུས་ཐོག་སྨན་བཅོས་ལྟ་སྐྱོང་དང་ནང་མིར་ཐུག་འཕྲད་སོགས་བྱེད་དུ་འཇུག་དགོས་པ་མ་ཟད། རྒྱ་ནག་གཞུང་གིས་བོད་མི་དེ་དག་གི་གནས་ཚུལ་གསང་རྒྱ་བྱས་ནས་འཇོག་དོན་ནི། བོད་ཀྱི་ཁོར་ཡུག་སྲུང་སྐྱོབ་དང་འབྲེལ་བའི་གནས་ཚུལ་རྒྱལ་སྤྱིའི་དོ་སྣང་བྱེད་པར་བཀག་འགོག་བྱེད་ཐབས་ཤིག་ཡིན་པའི་འགྲེལ་བརྗོད་བྱས་འདུག
འཇར་མན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཀཱེ་མོའུ་ལཱར་ལགས་ཀྱིས། ང་ཚོས་རྒྱལ་ཚོགས་ཀྱི་དམིགས་བསལ་རྟོག་ཞིབ་ཚན་པས་རྒྱ་ནག་གཞུང་ལ་ཁོར་ཡུག་སྲུང་སྐྱོབ་ཀྱི་གནད་དོན་ཐོག་གདོང་ལེན་ཤུགས་ཆེན་བྱས་པར་དགའ་བསུ་ཞུ་ཡི་ཡོད། ཅེས་དང་། རྒྱ་ནག་གཞུང་གིས་རྒྱལ་སྤྱིའི་མདུན་དུ་ཁོར་ཡུག་སྲུང་སྐྱོབ་གལ་ཆེན་དུ་རྩི་ཡི་ཡོད་ཟེར་བ་ཙམ་ལས། བོད་ཀྱི་ཁོར་ཡུག་གཏོར་བརླག་གཏོང་གི་ཡོད་པའི་གནས་སྟངས་སོགས་ཕྱི་གསལ་ནང་གསལ་བཟོ་དགོས་པ་མ་ཟད། བོད་ཀྱི་ཁོར་ཡུག་སྲུང་སྐྱོབ་པར་ཉེས་ཆད་གཅོད་རྒྱུ་མཚམས་འཇོག་དང་བོད་མི་ཁོར་ཡུག་སྲུང་སྐྱོབ་པ་རྣམས་ཀློད་གྲོལ་བཏང་བའི་ཐོག་ནས་རྒྱ་ནག་གིས་ཁོར་ཡུག་སྲུང་སྐྱོབ་གལ་ཆེར་བརྩི་ཡི་ཡོད་པའི་བདེན་དབང་ར་སྤྲོད་བྱ་དགོས་ཞེས་བརྗོད་འདུག
ཡང་མོའུ་ལཱར་ལགས་ཀྱིས། རྒྱལ་སྤྱིའི་ཚོགས་སྡེ་ཁག་གིས། ཕྱི་ལོ་ ༢༠༢༤ ལོའི་རྒྱལ་ཚོགས་ཀྱི་ཡོངས་ཁྱབ་རེས་འཁོར་སྙན་ཐོ་བསྐྱར་ཞིབ་ཚོགས་ཆེན་སྟེང་བོད་ཀྱི་ཁོར་ཡུག་སྲུང་སྐྱོབ་དང་འབྲེལ་ནས་བོད་མི་ཁོར་ཡུག་སྲུང་སྐྱོབ་པ་དེ་དག་ལ་ཉེས་མེད་བཙོན་འཇུག་བྱས་པའི་གནད་དོན་སོགས་གླེང་སློང་དགོས་པའི་འབོད་སྐུལ་ཡང་བྱས་འདུག
རྒྱལ་ཚོགས་ཀྱི་དམིགས་བསལ་རྟོག་ཞིབ་སྡེ་ཚན་གྱིས་མིང་འདོན་བྱས་པའི་བོད་མི་ཁོར་ཡུག་སྲུང་སྐྱོབ་པ་དག་ནི། ཨ་ཉ་སེང་སྒྲ་ལགས་དང་སྐལ་བཟང་མཆོག་གླིང་། རྡོ་རྗེ་འབྲུག་གྲ། དོན་རྒྱས། རིན་ཆེན་རྣམ་གྲོལ། ཚུལ་ཁྲིམས་མགོན་པོ། བྱང་ཆུབ་དངོས་གྲུབ། སོག་རུ་ཨ་བྷོ། རྣམ་སྲས་བཅས་ཡིན་པ་དང་། ཁོང་ཚོ་ཚང་མས་རྒྱ་ནག་གི་གཏེར་ཁ་སྔོག་འདོན་དང་ཡང་ན་རི་སྐྱེས་སེམས་ཅན་སོགས་ལ་གནོད་འཚེའི་བྱ་སྤྱོད་རིགས་ལ་ངོ་རྒོལ་བྱས་སྟབས་འཛིན་བཟུང་བྱས་ཡོད་པ་དང་། རིན་ཆེན་རྣམ་གྲོལ་དང་ཚུལ་ཁྲིམས་མགོན་པོ། དོན་རྒྱས་དང་བྱང་ཆུབ་དངོས་གྲུབ། སོག་རུ་ཨ་བྷོ་དང་རྣམ་སྲས་བཅས་ལ་ལོ་ ༡༡ བར་གྱི་བཙོན་འཇུག་ཁྲིམས་ཐག་བཅད་ཡོད་འདུག འོན་ཀྱང་། རྒྱ་ནག་གཞུང་གིས་ཁོ་ཚོའི་གནས་སྟངས་སྐོར་གྱི་གནས་ཚུལ་གཅིག་ཀྱང་ཡོངས་བསྒྲགས་བྱེད་ཀྱི་མེད་པ་རེད།
ཉེ་བའི་ལོ་མང་རིང་རྒྱ་ནག་གཞུང་གིས་གཏེར་ཁ་སྔོག་འདོན་དང་འཛུགས་སྐྲུན། ཆུ་མཛོད་བརྒྱབ་པ། གྲོང་ཁྱེར་ཅན་དུ་བསྒྱུར་བ་སོགས་ཀྱི་མིང་ཐོག་ནས་བོད་ས་ཁྱོན་ཡོངས་ཀྱི་ཁོར་ཡུག་ལ་གཏོར་སྐྱོན་ཚབས་ཆེན་བཟོས་དང་བཟོ་མུས་ཡིན་པ་དང་། བོད་ཀྱི་ཁོར་ཡུག་སྲུང་སྐྱོབ་པ་མང་པོ་ཞིག་གིས་ཀྱང་བོད་ཀྱི་ཁོར་ཡུག་སྲུང་སྐྱོབ་ཀྱི་ལས་འགུལ་སྤེལ་དང་སྤེལ་མུས་ཡིན་པའི་གནས་སྟངས་འོག་འཛིན་བཟུང་བྱས་དང་བྱེད་བཞིན་པ་ཡིན་འདུག
