ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་སྐབས་དགུ་པ་དེ་ཉིན་གྲངས་གསུམ་རིང་འཚོག་མགོ་བརྩམས་སོང་།
དེ་རིང་ནས་ཉིན་གྲངས་གསུམ་རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དགུ་པ་དེ་དབུ་འཛུགས་ཞུས་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དམིགས་བསལ་སྐུ་མགྲོན་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་དང་། རྒྱ་བལ་གཉིས་ནས་ཚོགས་བཅར་བ་ ༣༠ བཅས་འཛོམས་པའི་ཐོག བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཚོགས་འདུ་དབུ་འབྱེད་ཀྱི་གསུང་བཤད་གནང་སྐབས། བོད་མི་ཚོས་ལོ་རྒྱུས་ཐོག་ནས་བོད་རང་བཙན་གྱི་རྒྱལ་ཁབ་ཅིག་ཡིན་པ་གཞིར་བཞག་ཐོག་བོད་པ་རང་གི་ལོ་རྒྱུས་དང་རིག་གཞུང་གི་ཁྱད་ཆོས་འབུར་དུ་ཐོན་པར་བྱས་ཏེ་རྒྱལ་སྤྱིའི་སྟེང་ངོས་འཛིན་ལྡན་པའི་དཔྱད་རྩོམ་འབྲི་རྒྱུ་གལ་ཆེན་ཡིན་པ་དང་། བོད་མི་རིགས་ཀྱི་འཐབ་རྩོད་རྒྱུན་སྐྱོང་དང་གྲུབ་འབྲས་ལྡན་པ་ཞིག་ཡོང་བར་དཔའ་བློ་ཁོག་ཁོ་ནའི་མི་འགྲིག་པར་ཤེས་ཅན་ལྡན་པའི་མི་རབས་དགོས་གལ་ཆེ་སྐོར་སོགས་གསུངས་སོང་།
དེ་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས། རྒྱ་ནག་གཞུང་གིས་བོད་མི་རིགས་ཀྱི་ངོ་བོ་སྐད་ཡིག་རིག་གཞུང་དང་བཅས་པ་རྩ་མེད་གཏོང་ཐབས་བྱས་དང་བྱེད་མུས་ཡིན་སྟབས། བཙན་བྱོལ་བོད་མི་ཚོས་བོད་ཀྱི་སྐད་ཡིག་དང་རིག་གཞུང་བདག་ཉར་བྱ་རྒྱུ་གལ་ཆེན་ཡིན་པ་དང་། ད་རེས་ཚོགས་འདུའི་ཐོག་གཞོན་སྐྱེས་མང་པོ་ཞིག་གིས། བོད་ཀྱི་ལོ་རྒྱུས་རྒྱལ་རབས་དང་སྐད་ཡིག་རིག་གཞུང་མཚོན་པའི་དཔྱད་རྩོམ་གང་མང་ཞིག་བྲིས་ཡོད་པར་ཡི་རངས་བྱེད་ཀྱི་ཡོད་སྐོར་གསུངས་སོང་།
བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས། བོད་ཀྱི་ལོ་རྒྱུས་ཀྱི་གནས་བབ་དང་བད་ནང་དཔལ་ཡོན་དར་བའི་བརྒྱུད་རིམ་སོགས་ངོ་སྤྲོད་དང་སྦྲགས། དེང་སང་བོད་པའི་སྤྱི་ཚོགས་ནང་ཉམས་ཞིབ་པ་མང་པོ་མེད་པའི་གནས་སྟངས་དང་། བོད་ནང་གི་བོད་མི་ཚོར་ཉམས་ཞིབ་ཀྱི་རྒྱུ་ཆ་མང་བ་རག་གི་ཡོད་ཀྱང་། ཕྱི་ཕྱོགས་སུ་ཡོད་པའི་བོད་མི་ཚོ་བོད་ནང་ཞིབ་འཇུག་སླད་བསྐྱོད་ཁག་པོ་ཆགས་ཡོད་སྟབས། བོད་ཀྱི་ཉམས་ཞིབ་པ་ཚོས་རང་རང་གི་ཤེས་པའི་གནས་ཚུལ་ཙམ་མ་ཡིན་པར་ཞིབ་འཇུག་གི་གྲུབ་དོན་གང་ཡོད་ཞིབ་སྡུར་བྱས་ཏེ། ཁ་གསལ་དོན་ཟབ་ཀྱི་དཔྱད་རྩོམ་འབྲི་གལ་ཆེ་བ། དེ་བཞིན། དེང་སྐབས་རྒྱ་གར་དང་ཕྱིའི་མི་རིགས་ནང་བོད་ཀྱི་རྒྱལ་རབས་ལོ་རྒྱུས་ལ་དོ་སྣང་ཡོད་མཁན་རྣམས་དང་ལྷན་དུ་བགྲོ་གླེང་བྱས་ཏེ། བོད་ཀྱི་ལོ་རྒྱུས་སོགས་ལ་ངེས་ཤེས་རྙེད་ཐུབ་པ་ཞིག་བཟོ་རྒྱུ་གལ་ཆེན་ཡིན་སྐོར་སོགས་གསུངས་སོང་།
བོད་ཀྱི་སྲིད་བྱུས་ཉམས་ཞིབ་ཁང་གིས་གཙོ་སྒྲུབ་བྱས་པའི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དགུ་པའི་སྟེང་། ཧི་མ་ལ་ཡའི་རི་རྒྱུད་ཀྱི་ཉམས་ཞིབ་པ་ཚུད་པའི་རྒྱ་བལ་གཉིས་ནས་གཞོན་སྐྱེས་ཉམས་ཞིབ་པ་ ༣༠ ཡིས་རང་རང་གི་དཔྱད་རྩོམ་སྒྲོག་སྦྱངས་གནང་གི་ཡོད་ཅིང་། ཚོགས་འདུའི་སྟེང་བོད་ཀྱི་རྒྱལ་རབས་ལོ་རྒྱུས་དང་རིག་གནས། ཆབ་སྲིད་སོགས་བརྗོད་གཞི་མི་འདྲ་བ་ ༣༡ ཙམ་འདུག
