བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཁྱོན་ཡོངས་ཀྱི་དཔལ་འབྱོར་གནས་སྟངས་བོད་མི་མང་སྤྱི་འཐུས་ལྷན་ཚོགས་དང་མི་མང་ལ་ངོ་སྤྲོད་བྱེད་ཐུབ་ཚེ་འཛིན་སྐྱོང་བཀའ་ཤག་གིས་མ་འོངས་པའི་ལས་དོན་བང་བསྒྲིག་པར་ཁྱད་པར་ཆེན་པོ་བཟོ་པའི་རེ་བ་ཡོད་སྐོར་གསུངས་སོང་།
ཟླ་འདིའི་ཕྱི་ཚེས་ ༣༡ ནས་ཉིན་གཉིས་རིང་གངས་ཅན་སྐྱིད་གཤོངས་ཀྱི་ལས་བྱེད་གསོལ་ཚིགས་ཁང་གི་ཐོག་ཁར་ཡོད་པའི་ཚོགས་ཁང་དུ། བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་ཀྱི་གོ་སྒྲིག་འོག ཕྱི་ལོ་ ༢༠༢༣ ལོའི་བོད་མིའི་སྒྲིག་འཛུགས་ཀྱི་རོགས་ཚོགས་ཚོགས་ཆེན་ཐེངས་གཉིས་པ་མགོ་འཛུགས་གནང་སོང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་བཀའ་བློན་རྣམ་པ་གསུམ་དང་། དེ་བཞིན་བོད་མིའི་སྒྲིག་འཛུགས་ཀྱི་རོགས་ཚོགས་ཁག་ ༢༠ ལྷག་གི་སྐུ་ཚབ་མི་སྣ་ ༣༠ ལྷག་དང་། བོད་མིའི་སྒྲིག་འཛུགས་ཀྱི་དྲུང་ཆེ་རྣམ་པ་སོགས་མི་གྲངས་ ༤༠ ལྷག་མཉམ་ཞུགས་གནང་འདུག་ལ། བོད་མིའི་སྒྲིག་འཛུགས་ཀྱི་རོགས་ཚོགས་ཚོགས་ཆེན་དང་པོ་དེ་ཕྱི་ལོ་ ༢༠༠༥ ལོར་འཚོགས་ཡོད་འདུག
ཐེངས་འདིའི་རོགས་ཚོགས་ཚོགས་ཆེན་སྐོར་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་བཙན་བྱོལ་དུ་བཙུགས་པ་ནས་ད་ལྟ་བར་དུ་རོགས་ཚོགས་མང་པོ་ཞིག་གི་རྒྱབ་སྐྱོར་ལ་བརྟེན་ནས་འཚོ་བསྡད་ཡོད་པ་རེད། བོད་རྒྱའི་དཀའ་ངལ་སེལ་བར་བོད་ནང་གི་བོད་མི་ཚོའི་ཞུམ་པ་མེད་པའི་སྙིང་སྟོབས་ལ་བརྟེན་ནས་བཙན་བྱོལ་ནང་གི་བོད་མི་ཚོས་རེ་བ་ཞིག་བྱེད་བཞིན་ཡོད། བོད་ནང་གི་བོད་མི་ཚོས་༧གོང་ས་རྒྱལ་བ་རིན་པོ་ཆེ་མཆོག་ནས་དབུ་འཁྲིད་པའི་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། རྒྱལ་སྤྱིའི་ཐོག་བོད་དོན་གོ་རྟོགས་སྤེལ་ཕྱོགས་ལ་བརྟེན་ནས་སྙིང་སྟོབས་བསྐྱེད་ཀྱི་ཡོད། ང་ཚོས་བོད་ཕྱི་ནང་གཉིས་ཀའི་སྙིང་སྟོབས་སྤེལ་པར་ལས་ཀ་བྱས་ཡོད་དུས། ལས་དོན་དང་ལས་གཞི་མང་པོ་ཞིག་བང་སྒྲིག་གི་ཡོད། ལས་གཞི་གང་ཞིག་འགྲུབ་པར་དཔལ་འབྱོར་གྱི་རྒྱབ་རྟེན་མེད་པར་ཡོང་གི་མི་འདུག འདས་པའི་ལོ་ ༦༤ རིང་དུ་གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་། རྒྱལ་སྤྱིའི་སྤྱི་ཚོགས། རྒྱ་གར་གཞུང་བཅས་ཀྱི་རྒྱབ་སྐྱོར་ལ་བརྟེན་ནས་ད་ལྟ་བར་ང་ཚོ་ཡག་ཐག་ཆོད་འགྲོ་ཐུབ་པ་བྱུང་ཡོད། ཡིན་ནའང་འཛམ་བུ་གླིང་གི་གནས་སྟངས་ལ་འགྱུར་བ་མང་པོ་ཞིག་འགྲོ་བཞིན་ཡོད་ལ། ང་ཚོའི་སྤྱི་ཚོགས་ནང་དུའང་འགྱུར་བ་འགྲོ་མུས་རེད། བཀའ་ཤག་སྐབས་ ༡༦ པ་སླེབས་ནས་ལོ་གཉིས་རིང་གཞིས་ཆགས་ཁག་ཚང་མར་བསྐོར་བ་བརྒྱབ་སྟེ། མི་མང་གི་དགོས་མཁོ་གང་ཡིན་པ་དེར་ལྟ་བའི་གོ་སྐབས་བྱུང་ཡོད། མི་མང་ལ་ཐུག་འཕྲད་བྱས་པ་ཙམ་མ་ཡིན་པར་དཀའ་ངལ་གང་བཤད་པ་དེ་དངོས་ཡོད་ཡིན་མིན་ཞིབ་འཇུག་བྱས་ཡོད། དེ་ལྟར་བྱས་པ་ཙམ་གྱིས་མི་མང་གི་དགོས་མཁོ་ཆ་ཚང་ཡར་སྒྲུག་ཐུབ་ཡོད་པ་མ་རེད། ད་དུང་མི་མང་གི་དགོས་མཁོ་གསར་པ་ཡོང་སྲིད་པ་ཡིན་དུས། ང་ཚོའི་མ་འོངས་པའི་ལས་ཀ་བྱེད་སྟངས་དང་། འཆར་གཞི་སྒྲིག་སྟངས་ཐོག་ད་ལྟ་ནས་བསམ་བློ་གཏིང་ཟབ་མ་བཏང་ཚེ། དེ་སྔ་ང་ཚོར་གང་ཟག་སྒེར་དང་སྒྲིག་འཛུགས་ཁག་གི་ངོས་ནས་རོགས་པ་བྱེད་མུས་ཡོད་ཀྱང་། ད་ལྟའི་ཆར་རོགས་ཚོགས་ཕྲན་བུ་ཕྲན་བུ་ཉུང་དུ་འགྲོ་བཞིན་པའི་གནས་སྟངས་ཤིག་མཐོང་བཞིན་འདུག དེ་ནི་ཕྱོགས་གཅིག་ནས་སྒྲིག་འཛུགས་སོ་སོའི་ཚོགས་མི་མང་ཉུང་གི་ཐོག་ནས་རྒྱུན་གནས་ཐུབ་མིན་གྱི་གནས་སྟངས་ལ་རག་ལས་པ་དང་། ཕྱོགས་གཞན་ཞིག་ནས་འཛམ་བུ་གླིང་དུ་འགྱུར་བ་མང་པོ་ཞིག་འགྲོ་བཞིན་ཡོད་པས། ཚོགས་པ་སོ་སོའི་དགོས་པ་དང་དམིགས་ཡུལ་ཡང་འགྱུར་བ་འགྲོ་བའི་ཉེན་ཁ་ཡོད་བསྡད་པ་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། ང་ཚོས་རོགས་ཚོགས་ཁག་གི་རྒྱབ་སྐྱོར་ལ་བརྟེན་ནས་འཚོ་ཐུབ་པར་བཀའ་དྲིན་རྗེས་དྲན་ཞུ་རྒྱུ་དང་། རོགས་ཚོགས་ཁག་མུ་མཐུད་དུ་གནས་པར་ཚོགས་པ་སོ་སོའི་དགོས་མཁོ་དང་། དམིགས་ཡུལ། ནུས་པ་བཅས་ཤེས་རྟོགས་བྱུང་བ་ཡིན་ན། ཁོང་ཚོའི་དགོས་དམིགས་ལ་བསྟུན་ནས་ང་ཚོས་འགྱུར་བ་གཏོང་ཐུབ་མིན་ཤེས་དགོས་ཀྱི་འདུག ང་ཚོའི་དགོས་མཁོ་ཆེ་ཤོས་དེ་ལྕགས་སོགས་ཉོ་བར་རོགས་པ་བྱེད་མཁན་ཉུང་ཉུང་རེད། དེ་བཞིན་ལམ་དང་ཁང་པའི་འཛུགས་སྐྲུན་གྱི་ལས་གཞིའི་ཐོག་ཨ་རིའི་གཞུང་ངོས་ནས་རོགས་དངུལ་ཐོན་ཐུབ་ཀྱི་ཡོད་པ་མ་རེད། དེ་མཚུངས་རྒྱུན་གྲོན་ལ་མཚོན་ན་ཨ་རི་གཞུང་ནས་ལོ་གཅིག་རིང་ཨ་སྒོར་ས་ཡ་ ༡༠ ཙམ་གཏོང་བཞིན་ཡོད་པ་འཛིན་སྐྱོང་ལ་འགྲོ་སོང་གཏོང་བཞིན་ཡོད་པ་དེས། ད་ལྟ་བར་དུ་ང་ཚོར་འགྲིག་བསྡད་ཡོད་ལ། མ་འོངས་པའི་ལོ་ཁ་ཤས་ནང་དུའང་དཀའ་ངལ་མི་འཕྲད་ཀྱང་། ཕུགས་རྒྱང་རིང་བོར་གཞུང་ཁག་ནས་ལོ་ག་ཚད་རོགས་པ་བྱེད་དགོས་པའི་སྐད་ཆ་ཡོང་གི་ཡོད་པ་རེད། ཨ་རིའི་རོགས་ཚོགས་ཀྱི་མིང་ཡང་བོད་མིའི་རང་ཁ་རང་གསོ་བྱེད་ཐུབ་པ་དང་། གནས་སྟངས་སྡུག་པོའི་འོག་ཏུ་གདོང་ལེན་བྱེད་ཐུབ་པའི་ཆེད་དུ་རེད། ཁོང་ཚོས་ཀྱང་ང་ཚོའི་གནས་སྟངས་ཡར་རྒྱས་ག་ཚད་འགྲོ་མིན་ཐད་ཞིབ་ཚགས་ཀྱིས་ལྟ་བཞིན་ཡོད་པ་རེད། ང་ཚོའི་སྤྱི་ཚོགས་ལ་མཚོན་ན་གང་ཟག་སྒེར་དང་ཁྱིམ་ཚང་གི་གནས་སྟངས་ཐོག་ནས་ཡར་རྒྱས་འགྲོ་བཞིན་ཡོད་ཅིང་། སྒྲིག་འཛུགས་སྤྱིའི་མཐུན་རྐྱེན་འཐུས་ཤོར་རམ་འདོད་པ་ལྟར་ཡོང་མ་ཐུབ་པ་ཆགས་ཡོད། ཕྱི་ལོ་ ༢༠༢༣ ནས་ ༢༠༢༤ལོར་གྲོས་ཚོགས་སུ་ལས་གཞི་ཁག་ལ་བཀའ་འཁྲོལ་ཞུས་ཏེ། ནང་སྲིད་ལས་ཁུངས་ཀྱི་ཚོགས་ཁང་དང་ཁང་པའི་འཛུགས་སྐྲུན་འགྲོ་བཞིན་པ་ད་ལོ་མང་ཤོས་ཆགས་ཡོད་རྒྱུ་རེད། ང་ཚོའི་གཏན་འཇགས་ཀྱི་རོགས་དངུལ་ཤེས་ཡོན་གྱི་ཐོག་ཏུ་དགོས་ཀྱི་འདུག་ལ། འཕྲོད་བསྟེན་གྱི་ཐོག་ཏུའང་མུ་མཐུད་དུ་དགོས་ཀྱི་ཡོད། ལྷན་ཁང་ཁག་ཅིག་གི་ལས་གཞི་དུས་ཚོད་ངེས་ཅན་ཞིག་ནང་དུ་ཚར་ཐུབ་པའི་གནས་སྟངས་ཤིག་དགོས་པ་མ་གཏོགས། རོགས་དངུལ་མཚམས་མ་ཆད་པར་དགོས་མཁོ་སྐོང་བར་རྫོགས་རྒྱུ་མེད་པའི་གནས་སྟངས་འོག་ནས་བསྡད་ཚེ་ང་ཚོའི་ཁུངས་འཁྱོལ་གྱི་མ་རེད། མ་འོངས་པར་ང་ཚོས་འཆར་གཞི་དང་ལྡན་པའི་ཐོག་ནས་ལས་གཞི་གང་ཞིག་བསྒྲུབ་པར་མཇུག་སྒྲིལ་བའི་མཐའ་ཡོད་དགོས། དེ་རིང་རོགས་ཚོགས་རྣམས་ལ་ཐུགས་རྗེ་ཆེ་ཞུ་རྒྱུ་ཙམ་མིན་པར། རོགས་ཚོགས་སོ་སོས་ད་ལྟ་བར་དུ་ལས་ཀ་གང་བྱས་ཡོད་མེད་དང་། མ་འོངས་པར་འཆར་གཞི་ག་རེ་ཡོད་མེད། དེ་ལ་ནུས་པ་གང་ཡོད་མེད་ཤེས་ན་མ་འོངས་པར་ང་ཚོའི་འཆར་གཞི་སྒྲིག་སྟངས་དང་དངུལ་འཛིན་བཟོ་བར་ཞེ་བོ་ཕན་ཐོགས་ཀྱི་རེད། ད་ལྟའི་བཀའ་ཤག་གིས་ཁྱོན་ཡོངས་དང་རྒྱ་ཆེ་ས་ནས་བསམ་བློ་གཏོང་བཞིན་ཡོད། བོད་མིའི་སྒྲིག་འཛུགས་ལ་ཡར་ཞུ་མཁན་ཡོད་ཚེ་ལྟ་དགོས་པ་དང་། ཞུ་མཁན་མ་བྱུང་ཚེ་ལྟ་མི་དགོས་ལྟར་མ་ཡིན་པར། སྤྱི་སྙོམས་དྲང་བདེན་དང་། ནུས་པ་མཉམ་སྤུངས། གོམ་པ་མདུན་སྤོས་ཀྱི་བསྒྲགས་ཚིག་ལ་གཞི་བཞག་ནས་ལས་ཀ་རྒྱ་ཆེ་བ་བྱེད་བཞིན་ཡོད།
བོད་མིའི་སྒྲིག་འཛུགས་ཀྱིས་དཔལ་འབྱོར་ལས་ཁུངས་བརྒྱུད་ནས་ཡོང་བའི་རོགས་དངུལ་མ་གཏོགས། ལྷན་ཁང་ཁག་ལ་རོགས་ཚོགས་གཞན་ནས་ཡོང་བཞིན་པའི་གནས་སྟངས་ཤེས་ཀྱི་ཡོད་པ་མ་རེད། བོད་མིའི་སྒྲིག་འཛུགས་ཁྱོན་ཡོངས་ཀྱི་དཔལ་འབྱོར་གནས་སྟངས་མི་མང་དང་། བོད་མི་མང་སྤྱི་ལྷན་ཚོགས་སུ་ངོ་སྤྲོད་བྱེད་ཐུབ་པ་དང་། འདི་དག་ཤེས་པའི་ཐོག་ནས་འཛིན་སྐྱོང་བཀའ་ཤག་གིས་མ་འོངས་པའི་ལས་དོན་བང་བསྒྲིག་པར་ཁྱད་པར་ཆེན་པོ་བཟོ་པའི་རེ་བ་ཡོད། དེ་རིང་འདིར་རོགས་ཚོགས་ཆ་ཚང་ཕེབས་ཐུབ་ཡོད་པ་མ་རེད། ཚོགས་ཆེན་འདི་ལྷན་ཁང་ཚང་མར་འབྲེལ་བ་ཡོད་ཙང་བཀའ་ཤག་ལྷན་རྒྱས་བཅར་ཡོད། ང་རང་དཔལ་འབྱོར་བཀའ་བློན་ཡིན་པས་ཆུ་ཚོད་གང་ཐུབ་གཏོང་རྒྱུ་ཡིན། རོགས་ཚོགས་ཁག་གི་བསམ་ཚུལ་ནང་དུ་བོད་མིའི་སྒྲིག་འཛུགས་ཀྱི་ལས་ཀ་བྱེད་ཕྱོགས་ཐོག་ནས་ག་རེ་ཡར་རྒྱས་གཏོང་དགོས་པ་དང་། ཁོང་ཚོས་དཀའ་ངལ་ག་རེ་མཐོང་གི་ཡོད་མེད། གདོང་ལེན་གང་དག་བྱེད་དགོས་པའི་ཕྱོགས་ཆ་ཚང་ལ་ཉན་ཐུབ་པ་ཡིན་ན། ང་ཚོ་ཚང་མས་གཅིག་ཕན་གཅིག་གྲོགས་ཀྱི་ལས་ཀ་བྱེད་ཐུབ་པའི་རེ་བ་རྒྱག་བཞིན་ཡོད། ཅེས་གསུངས་སོང་།
ཐེངས་འདིའི་རོགས་ཚོགས་ཚོགས་ཆེན་སྐོར་ལ་བོད་མིའི་སྒྲིག་འཛུགས་ཀྱི་སྤྱི་ཚོགས་ཡར་རྒྱས་ཐེབས་རྩ་ཁང་གི་ལས་བྱེད་བསྟན་འཛིན་ནོར་བཟང་ལགས་ཀྱིས། ཚོགས་འདུའི་དམིགས་ཡུལ་གཙོ་བོ་བོད་མིའི་སྒྲིག་འཛུགས་ཀྱི་ལས་གཞི་མང་པོ་ཞིག་བང་བསྒྲིགས་ནས་ཡོད་པ་དེ་རོགས་ཚོགས་ཁག་ལ་གོ་བརྡ་ཡག་པོ་སྤྲོད་རྒྱུ་དེ་ཡིན། དེ་བཞིན་རོགས་ཚོགས་ཁག་གི་དམིགས་ཡུལ་གང་ཡིན་པ་དང་། མ་འོངས་པར་བོད་པའི་སྤྱི་ཚོགས་དང་བོད་མིའི་སྒྲིག་འཛུགས་ཀྱི་བར་དུ་དམིགས་ཡུལ་ག་འདྲ་བསྒྲིག་གི་ཡོད་པ་ཤེས་དགོས་པ་རེད། རོགས་ཚོགས་དང་ང་ཚོས་གྲོས་བསྡུར་བྱས་ནས་མ་འོངས་པའི་ལས་གཞི་ཁག་ལ་འཆར་འགོད་བྱ་རྒྱུ་དེ་རེད། གལ་སྲིད་ལས་གཞི་ཁ་ཤས་ལ་རོགས་དངུལ་ཐོབ་ཁག་པོ་ཆགས་ཚེ། ང་ཚོའི་ངོས་ནས་འཆར་གཞི་གང་སྒྲིག་དགོས་མིན་བལྟ་རྒྱུ་རེད། གཙོ་བོ་མཉམ་རུབ་ཐོག་ས་ཆ་གཅིག་ལ་འཛོམས་ནས་མ་འོངས་པའི་ལས་དོན་བྱེད་ཕྱོགས་ལ་གྲོས་བསྡུར་བྱ་རྒྱུ་དེ་ཡིན་སྐོར་བརྗོད་བྱུང་།
གསར་འགོད་པ། བྱམས་པ་ཚེ་རིང་།
