རྒྱ་ནག་གིས་བོད་ཀྱི་ས་ཁུལ་མང་པོར་རང་སྐྱོང་ཁུལ་བཙུགས་ནས་ལོ་བདུན་ཅུ་འཁོར་བའི་དུས་དྲན་ཟེར་བ་དང་བསྟུན་ཨ་རི་དང་ཡུ་རོབ་སོགས་ཀྱི་བོད་མི་མང་པོར་ཐོངས་མཆན་སྤྲད་ཀྱང་བོད་ནང་སོང་རྗེས་དཀའ་ངལ་འཕྲད་ཡོད་འདུག
Passengers line up at border checkpoints at Beijing Capital International Airport on January 8, 2022. Photo:Globa Times
ཉེ་ལམ་ཕྱི་ཟླ་ ༨ པའི་མགོ་ཙམ་ནས་རྒྱ་ནག་གཞུང་གིས། བོད་ཀྱི་ས་ཁུལ་མང་པོར་བོད་རིགས་རང་སྐྱོང་ཁུལ་ཟེར་བ་བཙུགས་ནས་ལོ་ངོ་ ༧༠ སོགས་འཁོར་བའི་དུས་དྲན་སྲུང་གཙི་དང་འབྲེལ། བོད་ནང་དམ་དྲག་ཤུགས་ཆེན་བྱས་ཡོད་པ་མ་ཟད། འདི་གའི་གསར་འགོད་པས་ཤེས་རྟོགས་བྱུང་བའི་གནས་ཚུལ་ལྟར་ན། སྐབས་དེར་རྒྱ་ནག་གཞུང་གིས་ཨ་རི་དང་ཡུ་རོབ་སོགས་ནས་བོད་མི་མང་པོ་ཞིག་ལ་ཕ་ཡུལ་དུ་ལོག་ཆོག་པའི་ཐོངས་མཆན་སྤྲད་འདུག་ཀྱང་། ཁོ་ཚོ་ཕ་ཡུལ་དུ་འབྱོར་རྗེས་དམ་དྲག་ཆེ་ཁར་འགྲོ་འདུག་ལ་རང་དབང་དེ་ཙམ་མེད་པ་རེད།
བོད་མི་ཞིག་གིས། ཉེ་ལམ་ཡུ་རོབ་དང་ཨ་རིའི་བོད་མི་མང་པོ་ཞིག་ལ་ཐོངས་མཆན་སྤྲད་དེ། ཕྱོགས་གཅིག་ནས་བོད་རིགས་རང་སྐྱོང་ཁུལ་ཟེར་བ་དབུ་བརྙེས་པའི་དུས་ཆེན་དང་བསྟུན་ཆབ་སྲིད་ཀྱི་དྲིལ་བསྒྲགས་ལ་དམིགས་ཡོད་པ་དང་། གཉིས་ནས་དེང་སྐབས་རྒྱ་ནག་གི་དཔལ་འབྱོར་ཉམས་རྒུད་དུ་འགྲོ་ཡི་ཡོད་སྟབས། ཕྱི་ཕྱོགས་སུ་ཡོད་པའི་བོད་མི་རྣམས་ཕྱིར་བོད་ནང་དུ་ལོག་བཅུག་སྟེ་དཔལ་འབྱོར་ཡོང་འབབ་ལ་དམིགས་ཡོད་སྐོར་སོགས་བརྗོད་བྱུང་ལ། རྒྱལ་སྤྱིའི་དབྱེ་ཞིབ་པ་མང་པོས་ཀྱང་། དེང་སྐབས་རྒྱ་ནག་གི་དཔལ་འབྱོར་ཉམས་རྒུད་དུ་འགྲོ་བཞིན་པའི་སྐབས་འདིར། རྒྱ་ནག་ནང་ཡུལ་སྐོར་ལ་ཡོང་མཁན་ཕྱི་མི་ཉུང་ཉུང་ཡིན་སྟབས། རྒྱ་ནག་ནང་ཡུལ་སྐོར་བར་ལྷ་བཞིན་བརྩི་བཀུར་བྱེད་ཀྱིན་ཡོད་སྐོར་བརྗོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ནམ་རྒྱུན་བོད་མི་མང་པོ་ཞིག་ལ་ཐོངས་མཆན་རག་གི་མེད་ཀྱང་། ད་ལོ་ཉུང་མཐར་ཡང་བོད་མི་བརྒྱ་སྐོར་འགའ་ལ་ཐོངས་མཆན་སྤྲད་ཡོད་པ་དང་། ཐོངས་མཆན་རག་པའི་བོད་མི་ཚོ་ཕྱིར་རང་ཡུལ་དུ་འབྱོར་རྗེས། ཞིང་ཆེན་གཞན་གྱི་ནང་དུ་ཡོད་པའི་རང་ཉིད་ཀྱི་གཉེན་ཉེ་སྤུན་མཆེད་སོགས་ལ་ཐུག་འཕྲད་བྱེད་པར་བསྐྱོད་ཆོག་གི་མེད་ཁར། ཁོ་ཚོ་ཕ་ཡུལ་དུ་འབྱོར་བ་དང་མི་ཚོགས་ཁྲོད་ནས་ཁ་བཏགས་སོགས་གཡོགས་ནས་སྣེ་ལེན་ཟབ་རྒྱས་བྱེད་ཆོག་གི་མེད་པ་དང་། བོད་མི་ཁག་ཅིག་ས་གནས་ཉེན་རྟོག་ཁང་དུ་བོས་ཏེ་ལག་ནས་ཕྱིའི་རྒྱལ་ཁབ་ཀྱི་ཐོབ་ཐང་ལག་འཁྱེར་ཡར་བསྡུ་ལེན་བྱེད་པ་སོགས་ཀྱི་འཇིགས་སྐུལ་ཡང་བྱེད་བཞིན་ཡོད་པ་རེད།
ཡང་མིང་བརྗོད་འདོད་མེད་ཅིང་ཉེ་ལམ་ཐོངས་མཆན་རག་པའི་བོད་མི་ཞིག་ལ་ཉིན་གཉིས་རིང་གནམ་ཐང་ནས་འདྲི་གཅོད་བྱས་རྗེས། རྒྱལ་ཁབ་ཀྱི་ཁྲིམས་དང་འགལ་བའི་ལས་ཀ་བྱས་འདུག་ཟེར་ནས་ཕྱིར་ལོག་བཏང་ཡོད་པ་དང་། དེ་ནི་རྒྱ་ནག་གི་གནམ་ཐང་བདེ་འཇགས་ལྟ་སྲུང་ཚན་པས། བོད་མི་ཁོང་གི་རྒྱབ་ཁུག་ཙམ་དུ་མ་ཟད། ཁ་པར་སོགས་ལ་སྔོག་བཤེར་བྱས་ཏེ། ༧གོང་ས་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་འབྲེལ་བའི་པར་རིས་སོགས་ལག་སོན་བྱུང་བར་བརྟེན། བོད་ནང་གཉེན་ཉེ་ཐུག་འཕྲད་དུ་འགྲོ་མ་བཅུག་པར་ཕྱིར་ལོག་བཏང་ཡོད་པ་རེད། བོད་མི་རྣམས་རྒྱ་ནག་གི་གནམ་ཐང་དུ་འབྱོར་བ་དང་རྒྱལ་ཁབ་གཞན་གྱི་མི་སེར་ནང་བཞིན་བརྟག་དཔྱད་ས་ཚིགས་བརྒྱུད་དགོས་པ་སྨོས་ཅི་དགོས། འོན་ཀྱང་བོད་མི་ཚོ་བརྟག་དཔྱད་ཁང་གཞན་གྱི་ནང་འཁྲིད་དེ་ལག་གི་རྒྱབ་ཁུག་ནས་ནང་གི་ཅ་དངོས་རེ་རེ་བཞིན་བརྟག་དཔྱད་གཏོང་བ་དང་། ཐ་ན་ཁ་པར་སོགས་ཅ་དངོས་ཡོད་ཚད་ལ་བརྟག་དཔྱད་བྱས་རྗེས། མ་ཎི་རིལ་བུ་དང་རིན་ཆེན་རིལ་བུ་སོགས་འཁྱེར་ཆོག་གི་མེད་པ་རེད།
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། སྤྱིར་རྒྱ་ནག་གཞུང་གི་ཐོངས་མཆན་ཞུ་བར་རྒྱལ་ཁབ་གཞན་གྱི་མི་སེར་ཚོར་ཉིན་གཅིག་གཉིས་ཙམ་ལས་འགོར་གྱི་མེད་ཀྱང་། བོད་མི་ཚོས་ཐོ་འགོད་བྱེད་པའི་བརྒྱུད་རིམ་ལ་བདུན་ཕྲག་གསུམ་ནས་བཞིའི་བར་འགོར་བ་མ་ཟད། ཐོ་འགོད་བྱས་རྗེས་ཟླ་གསུམ་ནས་བཞིའི་རྗེས་སུ་གཞི་ནས་ཐོངས་མཆན་རག་ཡོད་མེད་ཀྱི་བརྡ་ལན་སྤྲོད་ཀྱི་ཡོད་འདུག་ལ། ཐོངས་མཆན་ཞུ་སྐབས་བོད་མིའི་སྒྲིག་འཛུགས་ཀྱི་གཙོས་གཞུང་འབྲེལ་མིན་པའི་ཚོགས་སྡེ་ཁག་དང་བོད་རིགས་ཚོགས་པའི་ནང་ལས་ཀ་བྱེད་མྱོང་ཡོད་མེད་དང་། བཟའ་ཚང་ཡོད་མེད། ད་སྔ་བར་ས་ཆ་གང་ནས་གང་དང་ཚོགས་སྡེ་གང་དང་གང་དུ་ལས་ཀ་ཅི་བྱས་སོགས་ཚུད་པའི་དྲི་བ་ཁྱོན་ ༣༠ ཞིབ་འབྲི་བྱེད་ཀྱིན་ཡོད་འདུག འདི་གའི་གསར་འགོད་པར་རྒྱ་ནག་གཞུང་གི་ཐོ་འགོད་ཀྱི་འགེང་ཤོག་ཅིག་འབྱོར་བའི་ནང་། བོད་ནང་གཉེན་འཕྲད་དུ་འགྲོ་མཁན་ཚོས་ཕྱིར་བོད་ནང་ལོག་པའི་ཐོངས་མཆན་ཞུ་བར། བོད་ནང་གི་སོ་སོའི་ཡུལ་ཚོའམ་གྲོང་ཚོ་དང་། ས་གནས་ཉེན་རྟོག་ལས་ཁུངས་དང་བདེ་འཇགས་ལས་ཁུངས། རྫོང་རིམ་པའི་འཐབ་ཕྱོགས་གཅིག་གྱུར་ཁང་བཅས་ཀྱི་ངོས་ལེན་ཡི་གེ་ཐོབ་རྗེས། གཞི་ནས་ཐོངས་མཆན་སྤྲོད་ཀྱི་ཡོད་འདུག
དབྱིན་ཡིག་གསར་འགྱུར། Tibetan facing trouble even after getting an entry visa
