བོད་ཀྱི་སྐྱིད་རོང་ས་མཚམས་ནས་ཧི་མ་ལ་ཡར་འཛེགས་མཁན་ཨ་རིའི་མི་སེར་གཉིས་བོད་ནང་བསྐྱོད་རྒྱུ་བཀག་འགོག་བྱས་ཡོད་འདུག
བལ་ཡུལ་གྱི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཨ་རིའི་རི་འཛེགས་པ་རྩེ་ཕུད་ཀྱི་གྲས་སྐུ་ཞབས་ཁོན་ར་ཌི་ཨན་ཀར་ (Conrad Anker) ལགས་དང་། སྐུ་ཞབས་ཇིམ་མེ་ཆིན་ (Jimmy Chin)ལགས་གཉིས་བལ་ཡུལ་ནས་སྐྱིད་རོང་བརྒྱུད་བོད་ཀྱི་རི་བོ་ཧི་མ་ལ་ཡར་ལྟ་སྐོར་རྟོག་ཞིབ་བྱེད་པར་འགྲོ་རྩིས་བྱེད་སྐབས། རྒྱ་ནག་གཞུང་གི་འབྲེལ་ཡོད་ལས་བྱེད་ཀྱིས་ཁོ་གཉིས་བོད་ནང་དུ་བསྐྱོད་པར་བཀག་སྡོམ་བྱས་ཡོད་པ་རེད།
དེ་འབྲེལ་ཧི་མ་ལ་ཡ་དུས་བབ་གསར་ཁང་གིས་སྤེལ་བའི་གནས་ཚུལ་ནང་། སྐུ་ཞབས་ཁོན་ར་ཌི་ཨན་ཀར་ལགས་ནི་ཧི་མ་ལ་ཡར་རྟོག་ཞིབ་ལྟ་སྐོར་དེའི་སྣེ་འཁྲིད་མཁན་ཡིན་པ་དང་། སྐྱིད་རོང་ས་མཚམས་རྒྱ་ནག་ལས་བྱེད་པས་བོད་ནང་བསྐྱོད་རྒྱུ་བཀག་སྡོམ་བྱས་པ་དང་ཕྱིར་བལ་ཡུལ་གྱི་རྒྱལ་ས་ཀ་ཐི་མན་ཊིར་ལོག་དགོས་བྱུང་ཡོད་པ་དང་། སྐུ་ཞབས་ཇིམ་མེ་ཆིན་ལགས་ནི་རི་འཛེགས་རུ་ཁག་དེའི་བརྙན་ལེན་ཕབ་བསྐྲུན་སྡེ་ཚན་གྱི་འགན་འཛིན་ཡིན་པ་དང་ཁོ་ལའང་ཐོངས་མཆན་སྤྲད་མེད་སྐོར་ཙམ་བརྗོད་པ་ལས། ཨ་རིའི་རི་འཛེགས་པ་གཉིས་ཐེངས་འདིར་བོད་ནང་བསྐྱོད་རྒྱུ་བཀག་སྡོམ་བྱེད་དོན་གཞན་ཅི་ཡིན་ཁ་གསལ་མི་འདུག རི་འཛེགས་རྟོག་ཞིབ་ཚན་པ་དེའི་ཁོངས་སུ་ཨ་རི་དང་བལ་ཡུལ། རྒྱ་རིགས་བཅས་ཀྱི་མི་ཡོད་ཅིང་། ཧི་མ་ལ་ཡར་འཛེགས་མཁན་ཨ་རིའི་སྐུ་ཞབས་ཇེམ་ཆིན་ལགས་དང་སྐུ་ཞབས་ཨན་ཁར་གཉིས་གཙོ་བྱས་པའི་ཨ་རིའི་རི་འཛེགས་མཁན་བཞི་ཁོ་ན་ཡིན་འདུག་ལ།
ཇིམ་མེ་ཆིན་ (Jimmy Chin) ནི་ཕྱི་ལོ་ ༡༩༧༣ ཟླ་ ༡༠ ཚེས་ ༡༢ ཉིན་མི་ནི་སོ་ཌ་རུ་སྐྱེས་ཤིང་། ཝེ་ལེན་ཌི་སློབ་གྲྭ་ (Wayland Academy) ནས་སློབ་སྦྱོང་བྱས། དེ་ནས་ཀར་ལེ་ཊོན་མཐོ་རིམ་སློབ་གཉེར་ཁང་དུ་སྒྱུ་རྩལ་རིག་པའི་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན། ཕ་མ་གཉིས་ཀྱི་ངོས་ལེན་མེད་ཀྱང་རི་འཛེགས་བྱས་པ་དང་། རིམ་པས་པར་པ་བྱས་ཏེ་ཨ་སྒོར་ ༥༠༠ ལ་པར་བཙོང་ཡོད་པ་རེད། སྐུ་ཞབས་ཇིམ་མེ་ཆིན་ནི་རེ་འཛེགས་ལུས་རྩལ་བ་དང་ཨ་རིའི་རྒྱལ་ཡོངས་སྐྱེས་ཁམས་ཀྱི་པར་བ། གཟེངས་སུ་ཐོན་པའི་གློག་བརྙན་འཁྲབ་འཁྲིད་པ་དང་ནེའུ་ཡོག་དུས་བབ་ཀྱི་ཆེས་བྲིན་རྒྱུག་ཆེ་བའི་བརྩམས་སྒྲུང་རྩོམ་པ་པོ་བཅས་ཡིན་འདུག
ཁོན་ར་ཌི་ཨན་ཀར་ (Conrad Anker) ནི་ཕྱི་ལོ་ ༡༩༦༢ ཟླ་ ༡༡ ཚེས་ ༢༧ ཉིན་སྐྱེས་ཤིང་། ཁོང་ནི་ཨ་རིའི་རི་ལ་འཛེགས་མཁན་དང་། རྩོམ་པ་པོ་ཡང་རེད་འདུག ཕྱིས་སུ་ཁོང་ནད་པ་ཆགས་པར་བརྟེན། རི་འཛེགས་བྱ་རྒྱུ་མཚམས་བཞག་ཡོད་པ་རེད། ཕྱི་ལོ་ ༢༠༠༨ ལོར་ཁོར་ཡུག་བཟོ་བཀོད་ལེགས་ཤོས་ཀྱི་གཟེངས་རྟགས་ཐོབ་པ་དང་། ཕྱི་ལོ་ ༢༠༡༠ ལོར་འཛམ་གླིང་གི་རི་རྒྱུད་སྲུང་སྐྱོབ་བྱས་པའི་གཟེངས་རྟགས་དང་། ཕྱི་ལོ་ ༢༠༡༥ ལོར་ཇོར་ཇི་མེ་ལོ་རི་ (George Mallory) དྲན་རྟེན་ཐོག་རི་འཛེགས་ཀྱི་གཟེངས་རྟགས་སོགས་ཐོབ་ཡོད་པ་རེད། ཕྱི་ལོ་ ༡༩༩༩ ལོར་དབྱིན་ཇིའི་རི་འཛེགས་མཁན་གྲགས་ཅན་ (George Mallory) ལགས་ཀྱི་ཕུང་པོ་འཚོལ་ཞིབ་ཐུབ་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
