༧གོང་ས་རྒྱལ་བ་རིན་པོ་ཆེ་མཆོག་ནས་འགྲོ་བ་མིའི་ཐོབ་ཐང་རྩོད་ལེན་པ་ལྕམ་ནཱར་གྷེ་སི་མོ་ཧན་མཱ་དཱི་ལགས་སུ་འདི་ལོའི་ནོ་སྦེལ་ཞི་བདེའི་གཟེངས་རྟགས་ཐོག་པར་འཚམས་འདྲི་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་དང་ལྕམ་ནཱར་གྷེ་སི་མོ་ཧན་མཱ་དཱི་ལགས། བོད་ཀྱི་དུས་བབ་ཀྱིས་སྒྲིག་བཟོ་བྱས། ༢༠༢༣། ༡༠།༩
ཟླ་འདིའི་ཕྱི་ཚེས་ ༦ ཉིན་ནོ་སྦེལ་གཟེངས་རྟགས་ཚོགས་ཆུང་གིས་ཕྱི་ལོ་ ༢༠༢༣ ལོའི་ནོ་སྦེལ་ཞི་བདེའི་གཟེངས་རྟགས་དེ། ད་ལྟ་བཙོན་ཁང་དུ་ཡོད་པའི་ཨི་རན་གྱི་རང་དབང་འཐབ་རྩོད་པ་དང་བུད་མེད་དང་འགྲོ་བ་མིའི་ཐོབ་ཐང་རྩོད་ལེན་པ་ལྕམ་ནཱར་གྷེ་སི་མོ་ཧན་མཱ་དཱི་( Narges Mohammadi) ལགས་སུ་དབུལ་གཏན་འཁེལ་བ་ཡོངས་ཁྱབ་གསལ་བསྒྲགས་བྱས་ཡོད་པ་ལྟར། ཟླ་འདིའི་ཕྱི་ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཁོང་མོའི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་བསྩལ་ནས། ཁོང་མོས་བློ་སྤོབས་ཆེན་པོས་འགྲོ་བ་མིའི་ཐོབ་ཐང་དང་། རང་དབང་། འདྲ་མཉམ་བཅས་ཀྱི་ཆེད་དུ་ལས་འགུལ་སྤེལ་བར་བསྔགས་བརྗོད་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། དེང་གི་ཆར་དམངས་གཙོའི་རིན་ཐང་དང་། ཕྱི་གསལ་ནང་གསལ། འགྲོ་བ་མིའི་ཐོབ་ཐང་ལ་གུས་བརྩི། འདྲ་མཉམ་བཅས་ལ་འཛམ་གླིང་ཁྱོན་ཡོངས་ནས་གུས་བརྩི་དང་རིན་ཐང་ཆེན་པོ་བཞག་གི་ཡོད་ཅིང་། དེ་ང་ཚོར་ཁེ་ཕན་ཆེན་པོ་ཡོད་པའི་ཁར། ངོས་རང་གིས་སྐུ་ཉིད་ཀྱི་ལས་རོགས་ལྕམ་ཤི་རིན་(Shirin Ebadi)ཚུད་པའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་འགའ་དང་ལྷན་དུ་ཐུག་འཕྲད་དང་གོ་བསྡུར་བྱས་མྱོང་། ཁོང་ཅག་གིས་བུད་མེད་ལ་གཉའ་གནོན་མཚམས་འཇོག་དང་སྤྱི་ཚོགས་ཡར་རྒྱས་གཏོང་སླད། ཞི་བའི་ལམ་ནས་འབད་བརྩོན་གནང་བར་ཡིད་སྨོན་སྐྱེ་ཡི་ཡོད། ངོས་རང་གིས་ནོ་སྦེལ་ཞི་བདེའི་གཟེངས་རྟགས་དེ། བུད་མེད་རྣམས་ཀྱིས་ང་ཚོ་སྐྱེས་པའི་ཉིན་དང་པོ་ནས་ང་ཚོའི་མི་ཚེར་འགན་ཁུར་ཆེན་པོས་གཟིགས་སྐྱོང་བྱེད་པར་ངོས་འཛིན་མཚོན་ཆེད་ཕུལ་བ་ཞིག་ཡིན་པར་ཡིད་ཆེས་བྱེད་ཀྱི་ཡོད། ཅེས་གསུངས་འདུག
ཡང་༧མགོན་པོ་གང་ཉིད་ཀྱིས། དེང་གི་ཆར་འཛམ་གླིང་འདིའི་དཀའ་རྙོག་དེ་དག་གྲོས་མོལ་དང་འཚེ་མེད་ཞི་བའི་ལམ་ནས་སེལ་ཏེ། འཛམ་གླིང་ལ་འགྱུར་བ་གཏང་རྒྱུར་འདོད་མོས་བྱེད་མཁན་ཇེ་མང་དུ་འགྲོ་མུས་ཡིན་ཞིང་། དེ་ནི་གཞན་ཕན་དང་། བྱམས་བརྩེ། འགྲོ་བ་མིའི་འགན་ཁུར་གྱི་འདུ་ཤེས་བཅས་ཀྱི་གཞི་རྟེན་བྱས་ཡོད། ངོས་རང་གིས་ཤེས་ཡོན་གྱི་ལམ་ནས་འགྲོ་བ་མི་གཅིག་འགྱུར་གྱི་འདུ་ཤེས་གོང་མཐོར་བཏང་ནས་དམིགས་ཡུལ་དེ་འགྲུབ་ཐུབ་པར་ཡིད་ཆེས་བྱེད་ཀྱི་ཡོད། ང་ཚོ་གཅིག་ལ་གཅིག་རྟེན་བྱས་ཡོད་ཅིང་། དེ་ནི་འཚོ་བའི་ཆོས་ཉིད་དུ་གྲུབ་ཡོད། ཅེས་གསུངས་འདུག
ལྕམ་ནཱར་གྷེ་སི་མོ་ཧན་མཱ་དཱི་ལགས་ནི་ཨི་རན་གྱི་བུད་མེད་གསར་འགོད་པ་ཞིག་དང་། སྙིང་སྟོབས་ཞུམ་པ་མེད་པའི་འགྲོ་བ་མིའི་ཐོབ་ཐང་འཐབ་རྩོད་པ་ཞིག་ཡིན་སྟབས། ཁོང་མོ་ཐེངས་མང་འཛིན་བཟུང་བཙོན་འཇུག་བྱས་ཡོད་པ་མ་ཟད། ཕྱི་ལོ་ ༢༠༡༥ ལོར་ཨི་རན་གྱི་རྒྱལ་སྲིད་ལ་ཉེན་ཁ་བཟོས་པའི་ཉེས་མིང་འོག་ལོ་བཅུའི་བཙོན་འཇུག་ཁྲིམས་ཐག་བཅད་དེ་ད་ལྟ་བཙོན་ཁང་དུ་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
