བོད་རྔ་བ་ཁུལ་བཙན་ལྷ་རྫོང་ནས་ཡིན་པའི་བོད་མོ་སྒྲོལ་མ་སྐྱིད་ལགས་རྒྱ་ནག་རྒྱལ་ཡོངས་ཀྱི་བུད་མེད་རྐང་སྤོལ་རུ་ཁག་ཏུ་འདེམས་ཐོན་བྱུང་འདུག་ལ་འདི་ལོའི་ལོ་མཇུག་ཏུ་ཨ་རིའི་རྒྱལ་ཡོངས་བུད་མེད་རྐང་སྤོལ་རུ་ཁག་དང་འགྲན་བསྡུར་བྱ་རྒྱུ་ཡིན་འདུག
རྒྱ་ནག་རྒྱལ་ཡོངས་བུད་མེད་རྐང་སྤོལ་རུ་ཁག་ནང་ཚུད་པའི་བོད་པའི་བུ་མོ་སྒྲོལ་མ་སྐྱིད་ལགས།
བོད་ནང་གི་ན་གཞོན་ཆེད་ལས་པ་མང་པོ་ཞིག་གིས་རྒྱ་ནག་དང་རྒྱལ་སྤྱིའི་སྡིངས་ཆ་མང་པོར་མཉམ་ཞུགས་བྱས་ཏེ། གྲུབ་འབྲས་མི་དམན་པ་ཞིག་བླངས་དང་ལེན་མུས་ཡིན་པ་ལྟར། ཟླ་འདིའི་ཕྱི་ཚེས་ ༡༠ ཉིན་བོད་རྔ་བ་བོད་རིགས་ཆང་རིགས་རང་སྐྱོང་ཁུལ་ཟེར་བའི་བཙན་ལྷ་རྫོང་ནས་ཡིན་པའི་བུ་མོ་སྒྲོལ་མ་སྐྱིད་ལགས་རྒྱ་ནག་རྒྱལ་ཡོངས་ཀྱི་བུད་མེད་རྐང་སྤོལ་རུ་ཁག་ཏུ་འདེམས་ཐོན་བྱུང་ཡོད་འདུག
དེའི་ཐད་སྒྲོལ་མ་སྐྱིད་ལགས་ཀྱིས་རྒྱ་ནག་གི་ཧྥོ་པ་(PHORPA) དུས་དེབ་ལ། ང་རང་བོད་ཀྱི་རྐང་སྤོལ་བ་ཞིག་ཡིན་པའི་ཆ་ནས། མི་མང་པོ་ཞིག་གིས་ངའི་ཆེད་ལས་འདིར་ཕ་མ་གཉིས་ཀྱི་ལྟ་ཚུལ་གང་འདྲ་ཡོད་མེད་ཀྱི་ཐད་ལ་དོ་སྣང་ཆེན་པོ་བྱེད་ཀྱི་ཡོད་པ་རེད། སྤྱིར་ངས་རྐང་སྤོལ་རྩེ་མགོ་འཛུགས་དུས་ནས་ཕ་མ་གཉིས་ཀྱི་རྒྱབ་སྐྱོར་ཧ་ཅང་ཡག་པོ་ཡོད་ལ། ང་རང་ལ་ཕ་མ་གཉིས་གཙོས་ནང་མི་ཚོས་རྒྱབ་སྐྱོར་བྱས་པ་བསོད་ནམས་ཆེན་པོ་ཡིན། གང་ཡིན་ཟེར་ན། དེས་ངའི་རྐང་སྤོལ་ཆེད་ལས་ལ་མུ་མཐུད་དོ་སྣང་བྱེད་པར་ཕན་ཐོགས་ཆེན་པོ་འདུག ཅེས་བརྗོད་འདུག
བོད་ཀྱི་བུ་མོ་སྒྲོལ་མ་སྐྱིད་ལགས་ནི་བོད་རྔ་བ་ཁུལ་བཙན་ལྷ་རྫོང་ནས་ཡིན་ཞིང་། རང་ལོ་ ༡༠ ཙམ་ནས་རྩེད་འཇོ་དང་འགྲོགས་ནས་རྐང་རྩེད་སྤོ་ལོ་རྩེད་མགོ་བཙུགས་ཏེ། ཁོང་མོའི་ཆུང་དུས་ཀྱི་རྐང་རྗེས་རེ་རེའི་ཁྲོད་ནས་རྐང་སྤོལ་ལ་བཅངས་པའི་བརྩེ་འདང་མ་ལྷོད་པར་འབད་འབུངས་བྱས་མཐར། ཕྱི་ལོ ༢༠༡༩ ལོར་སི་ཁྲོན་བུད་མེད་རྐང་སྤོལ་རུ་ཁག་ཏུ་ཚུད་འདུག
རྔ་བའི་རྐང་རྩེད་སྤོ་ལོའི་མཐུན་ཚོགས་ཀྱིས་བསྒྲགས་པའི་གནས་ཚུལ་ནང་། བོད་མོ་སྒྲོལ་མ་སྐྱིད་ལགས་ཀྱིས་སི་ཁྲོན་རྐང་སྤོལ་རུ་ཁག་ཏུ་རྩེད་འགྲན་བྱས་པའི་ཁྲོད། རྒྱ་ནག་གི་བུད་མེད་ཀྱི་རྐང་སྤོལ་འགྲན་ཚོགས་ཀ་པའི་རྩེད་འགྲན་གྱི་ཁྲོད་དུ་རྒྱལ་ཁ་བླངས་ཡོད་ལ། འདི་ལོའི་རྩེད་འགྲན་ཁྲོད་སྤོ་ལོ་གཉིས་བླུགས་ཡོད་པས། ཁོང་མོས་རྩེད་རིགས་ལ་དགའ་བའི་མི་བུ་མང་དག་ཅིག་གི་མིག་དབང་བཀུག་ཡོད་སྐོར་སོགས་གསལ་འདུག
ཕྱི་ལོ་ ༢༠༡༩ ལོར་སྒྲོལ་མ་སྐྱིད་ལགས་ལོ་བཅུ་དགུ་མན་གྱི་ཨེ་ཤ་ཡའི་བུད་མེད་རྐང་སྤོལ་རྩེད་འགྲན་ནང་ཞུགས། ༢༠༢༠ ལོར་ཁོང་མོས་སླར་ཡང་ལོ་བཅུ་དགུ་མན་གྱི་ཨེ་ཤ་ཡའི་བུད་མེད་རྐང་སྤོལ་རྩེད་འགྲན་ནང་མཉམ་ཞུགས་བྱས་ཏེ་ཁོང་མོའི་རུ་ཁག་ལ་རྒྱལ་ཁ་ཐོབ། ཕྱི་ལོ ༢༠༢༢ ལོར་རྒྱ་ནག་གི་བུད་མེད་རྐང་སྤོལ་འགྲན་ཚོགས་ (Chinese Women’s Super League ) ཀྱི་རྩེད་འགྲན་རིམ་པ་གསུམ་པ་དེ་སི་ཁྲོན་རུ་ཁག་དང་ཤན་ཞི་རུ་ཁག་གཉིས་བར་རྩེད་འགྲན་བྱེད་སྐབས། སྒྲོལ་མ་སྐྱིད་ལགས་ཀྱིས་སྤོ་ལོ་གཅིག་བླུགས་ཡོད་ཅིང་། དེ་ནི་རྒྱ་ནག་གི་བུད་མེད་རྐང་སྤོལ་འགྲན་ཚོགས་ཁྲོད་བོད་ཀྱི་བུད་མེད་ཅིག་གིས་སྤོ་ལོ་བླུགས་ཐེངས་དང་པོར་གྱུར་ཡོད་འདུག
བོད་མོ་སྒྲོལ་མ་སྐྱིད་ལགས་རྒྱལ་ཡོངས་རྐང་སྤོལ་རུ་ཁག་ཏུ་འདེམས་ཐོན་བྱུང་རྗེས། གཞིས་བྱེས་གཉིས་ཀྱི་བོད་པ་མང་པོ་ཞིག་གིས་ཁོང་མོའི་པར་སོགས་དྲ་ལམ་དུ་སྤེལ་ཏེ་བསྟོད་བསྔགས་དང་དགའ་བསུ་ཆེན་པོ་བྱེད་ཀྱི་འདུག་ལ། འདི་ལོའི་ཕྱི་ཟླ་ ༡༢ ཚེས་ ༣ དང་ ༦ བཅས་ཉིན་གཉིས་ལ་ཨ་རིའི་བུད་མེད་རྐང་སྤོལ་རུ་ཁག་དང་རྒྱ་ནག་རྒྱལ་ཡོངས་ཀྱི་བུད་མེད་རྐང་སྤོལ་རུ་ཁག་གཉིས་ཀྱི་བར་ཨ་རིའི་ཌི་ཨར་ཝི་ (DRV PNK ) དང་ཀྲོ་ཡ་ཊ(Toyota ) རྩེད་ཐང་གཉིས་སུ་རྩེད་འགྲན་བྱ་རྒྱུ་ཡིན་འདུག
གསར་འགོད་པ། དཔལ་ལྡན།
