རྒྱ་གར་དངུལ་རྩིས་ཞིབ་འཇུག་ཚན་པས་ཝི་ཝོ་ཁ་པར་བཟོ་སྐྲུན་ཁང་གི་ལས་བྱེད་རྒྱ་མི་ཞིག་གིས་ཁྲིམས་འགལ་གྱི་དངུལ་བརྗེ་ལེན་བྱས་པའི་ནག་ཉེས་འོག་འཛིན་བཟུང་བྱས་འདུག
ཉིན་ཤས་གོང་དུ་རྒྱ་གར་གྱི་རྒྱལ་ས་ལྡི་ལི་རུ་ཡོད་པའི་རླུང་འཕྲིན་དང་དྲ་ཐོག་གསར་ཁང་ (NewsClick) གི་རྩོམ་སྒྲིག་པ་སོགས་འཛིན་བཟུང་བྱས་ཡོད་པ་མ་ཟད། གསར་ཁང་དེ་ལ་རྒྱ་གར་ནང་གི་ཁ་པར་ཚོང་གཉེར་ཁང་ཆེ་ཤོས་གཉིས་པར་གྱུར་བའི་རྒྱ་ནག་གི་ཝི་ཝོ་ཁ་པར་བཟོ་སྐྲུན་ཁང་གིས་ཁྲིམས་འགལ་ལྐོག་དངུལ་སྤྲད་ཡོད་པའི་དོགས་གཞིའི་འོག་ཞིབ་འཇུག་བྱེད་ཀྱི་ཡོད་པ་དང་། ཟླ་འདིའི་ཕྱི་ཚེས་ ༡༠ ཉིན་རྒྱ་གར་དངུལ་རྩིས་ཞིབ་འཇུག་ཚན་པས་ཝི་ཝོ་ཁ་པར་བཟོ་སྐྲུན་ཁང་གི་ལས་བྱེད་རྒྱ་མི་མིང་ལ་ཨན་ཌུའུ་ཁང་ (Andrew Kuang) ཟེར་བ་ཞིག་གིས་ཁྲིམས་འགལ་གྱི་དངུལ་བརྗེ་ལེན་བྱས་པའི་ནག་ཉེས་འོག་འཛིན་བཟུང་བྱས་ཡོད་འདུག
ཁ་སང་ཝི་ཝོ་ཁ་པར་བཟོ་སྐྲུན་ཁང་གིས། ལས་ཁུངས་ཀྱི་ལས་བྱེད་གཅིག་འཛིན་བཟུང་བྱས་ཡོད་པ་དང་། གནད་དོན་དེའི་ཐོག་ལ་སེམས་འཚབ་ཆེན་པོ་བྱུང་གི་ཡོད་སྐོར་དང་། ལས་ཁུངས་ཀྱི་ངོས་ནས་ཁྲིམས་འགལ་བྱ་སྤྱོད་གང་ཡང་སྤེལ་མེད་ལ། རྒྱ་གར་གྱི་ཁྲིམས་ལུགས་ལ་གུས་བརྩི་དང་ལག་བསྟར་བྱེད་ཀྱི་ཡོད་སྐོར་སོགས་བརྗོད་འདུག
ཡང་ལྡི་ལིར་ཡོད་པའི་རྒྱ་ནག་གཞུང་ཚང་ཁང་གིས། རྒྱ་གར་གཞུང་གིས་རྒྱ་ནག་གི་ཚོང་ལས་སྒྲིག་འཛུགས་ལ་ཡང་ནས་ཡང་དུ་རྟོག་ཞིབ་བྱས་པ་དེས་ཚོང་གི་ལས་དོན་ལ་དཀའ་ངལ་འཕྲད་པ་དང་དོ་ཕོག་བྱུང་གི་ཡོད་སྐོར་བརྗོད་འདུག
བདུན་ཕྲག་སྔོན་མའི་ནང་རུའུ་ཊར་གསར་ཁང་གིས་དེ་འབྲེལ་གནས་ཚུལ་སྤེལ་བ་ལྟར་ན། རྒྱ་གར་གྱི་ཉེན་རྟོག་པས། ཝི་ཝོ་ཁ་པར་བཟོ་སྐྲུན་ལས་ཁུངས་དང་ཞའོ་མི་ཁ་པར་བཟོ་སྐྲུན་ལས་ཁུངས་གཉིས་ཀྱིས་རླུང་འཕྲིན་དང་དྲ་ཐོག་གི་གསར་ཁང་ (NewsClick) ལ་ཁྲིམས་འགལ་གྱི་དངུལ་གཏོང་ལེན་བྱས་ཡོད་པའི་སྐྱོན་འཛུགས་བྱས་འདུག དེ་འབྲེལ་ཞའོ་མི་ཁ་པར་བཟོ་སྐྲུན་ལས་ཁུངས་ཀྱི་མགྲིན་ཚབ་པས་སྐྱོན་འཛུགས་དེར་ངོས་ལེན་བྱས་མེད་པ་དང་། ཝི་ཝོ་ཁ་པར་བཟོ་སྐྲུན་ལས་ཁུངས་ཀྱི་མགྲིན་ཚབ་པས་ལན་འདེབས་གང་ཡང་སྤྲད་མི་འདུག
འདི་ལོར་རྒྱ་གར་གྱི་འཕྲུལ་རིག་བློན་ཆེན་ར་ཇི་ཧྥི་ (Rajeev Chandrashekhar) ལགས་ཀྱིས། རྒྱ་ནག་གི་ཚོས་ལས་ཁང་གིས་ཨ་སྒོར་ཐེར་འབུམ་ ༡།༡ མགོ་སྐོར་བཏང་ཡོད་པ་དང་། རྒྱ་གར་གཞུང་གིས་དངུལ་སྒོར་དེ་ནས་བརྒྱ་ཆ་ ༡༨ ཕྱིར་ལེན་ཐུབ་ཡོད་སྐོར་སོགས་བརྗོད་འདུག
འདས་ལོར་ཝི་ཝོ་ཁ་པར་བཟོ་སྐྲུན་ཁང་གིས་རྒྱ་གར་ནས་ཁྲིམས་འགལ་གྱི་དངུལ་གཏོང་ལེན་བྱས་པའི་ནག་ཉེས་འོག རྒྱ་གར་གྱི་ཉེན་རྟོག་པས་ལས་ཁུངས་སུ་བསྔོག་བཤེར་བྱས་ཏེ། ཨ་སྒོར་ས་ཡ་ ༦༠ བླངས་ཡོད་འདུག དེ་བཞིན། འདས་ལོའི་ཕྱི་ཟླ་ ༥ པའི་ནང་རྒྱ་ནག་གི་ཁ་པར་བཟོ་སྐྲུན་ཁང་ཞའོ་མི་ (Xiaomi) ཡིས་ཨ་སྒོར་ས་ཡ་ ༧༠༠ ལྷག་ཁྲིམས་འགལ་གྱིས་དངུལ་གཏོང་ལེན་བྱས་པའི་དོགས་གཞིའི་འོག་སྔོག་བཤེར་བྱས་པ་དང་། ཨ་སྒོར་ས་ཡ་ ༦༧༠ བཀག་སྡོམ་བྱས་འདུག
ཉེ་ལམ་རྒྱ་གར་གཞུང་གིས་རྒྱ་ནག་གི་ཚོང་ལས་ཁང་དང་བཟོ་སྐྲུན་ཁང་མང་པོར་ཡང་ནས་ཡང་དུ་ཞིབ་འཇུག་དང་རྟོག་ཞིབ་སོགས་བྱས་ཏེ། རྒྱ་ནག་གི་ཁ་པར་བཟོ་སྐྲུན་ཁང་ཨོ་པོ་ (Oppo) དང་ཞའོ་མི་ (Xiaomi) སོགས་ཀྱིས་ཁྲིམས་འགལ་ཐོག་དངུལ་གཏོང་ལེན་བྱས་པའི་སྐྱོན་འཛུགས་བྱས་ཡོད་ཀྱང་། ཁ་པར་བཟོ་སྐྲུན་ཁང་དེ་གཉིས་ཀྱིས་སྐྱོན་འཛུགས་ངོས་ལེན་བྱས་མེད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
