ཨ་རིའི་རྒྱལ་སྲུང་ལས་ཁུངས་ཀྱིས་རྒྱ་ནག་དང་འབྲེལ་བའི་སྙན་ཐོ་ཞིག་བཏོན། 

ཨ་རིའི་རྒྱལ་སྲུང་ལས་ཁུངས་ཀྱིས་རྒྱ་ནག་དང་འབྲེལ་བའི་སྙན་ཐོ་ཞིག་བཏོན་ཏེ་རྒྱ་ནག་གཞུང་གིས་དྲག་པོའི་མཚོན་ཆ་འབོར་ཆེན་བཟོ་སྐྲུན་བྱས་ཏེ་དམར་ཤོག་གི་དབང་ཤུགས་རྒྱས་ཐབས་བྱེད་ཀྱི་ཡོད་སྐོར་སོགས་གསལ་འདུག

ཟླ་འདིའི་ཕྱི་ཚེས་ ༡༩ ཉིན་ཨ་རིའི་རྒྱལ་སྲུང་ལས་ལྷན་ཁང་ (US Department of of defense) གིས་ཕྱི་ལོ་༢༠༢༣ ལོའི་རྒྱ་ནག་གཞུང་གི་དམག་དོན་དང་རྒྱལ་སྲུང་སོགས་ཀྱི་སྐོར་གྱི་ཤོག་ངོས་ ༢༡༢ ཅན་གྱི་སྙན་ཐོ་ཞིག་འདོན་སྤེལ་བྱས་ཡོད་ཅིང་། དེའི་ནང་རྒྱ་ནག་དམར་ཤོག་སྲིད་གཞུང་གིས་འདས་པའི་ལོ་ཤས་རིང་ཆབ་སྲིད་དང་། དམག་དོན། ཚོང་དོན་སོགས་རྒྱ་སྐྱེད་ནས་འཛམ་གླིང་ཡོངས་སུ་རྒྱ་ནག་དམར་ཤོག་སྲིད་གཞུང་གི་དབང་ཤུགས་གོང་མཐོར་གཏོང་བའི་ཐབས་ཇུས་འདོན་བཞིན་ཡོད་པ་མ་ཟད། དམག་དོན་མཚོན་ཆའང་འཕེལ་རྒྱས་ཆེན་པོ་གཏོང་མུས་ཡིན་སྐོར་སོགས་གསལ་འདུག

 དེའི་ཐད་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་མའོ་ཉིང་ (Mao Ning) ཟེར་བས། ཨ་རིའི་སྙན་ཐོ་དེ་སྙན་ཐོ་སྔ་མ་དག་དང་གཅིག་མཚུངས་རེད། དངོས་ཡོད་ཀྱི་གནས་ཚུལ་ལ་སྣང་མེད་དང་། ཕྱོགས་ཞེན་ཤུགས་ཆེན་གྱི་ཐོག་ནས་རྒྱ་ནག་ལ་འཇིགས་སྣང་སྐུལ་གྱི་ཡོད། དེའི་དམིགས་ཡུལ་ནི་ཁོང་ཚོས་མུ་མཐུད་དུ་དམག་དོན་གྱི་སྣེ་འཁྲིད་བྱ་འདོད་པས་རེད། རྒྱ་ནག་གཞུང་གིས་མཐའ་གཅིག་ཏུ་ངོ་རྒོལ་ཡོད། ཅེས་བཤད་འདུག 

དེ་ཡང་སྙན་ཐོ་དེའི་ནང་། ཕྱི་ལོ ༢༠༤༩ བར་རྒྱ་ནག་དམར་ཤོག་སྲིད་གཞུང་གིས་ཆབ་སྲིད་དང་། དམག་དོན། ཚོང་འབྲེལ་སོགས་ཀྱི་ཐོག་ནས་དམར་ཤོག་སྲིད་གཞུང་གི་ཁེ་ཕན་དང་ལང་ཕྱོགས་སོགས་སྲ་བརྟན་བཟོས་ཐབས་བྱེད་ཀྱི་ཡོད་ཅིང་། ཨ་རི་ཚུད་པའི་མཐུན་ཕྱོགས་རྒྱལ་ཁབ་ཁག་གིས་རྒྱ་ནག་གཞུང་གི་སྟོབས་ཤུགས་ཟེར་བ་གོང་མཐོར་གཏོང་བར་འགོག་རྒོལ་དང་། ཕྱོགས་ཡོངས་ནས་རྒྱ་ནག་དར་རྒྱས་གོང་འཕེལ་གཏོང་བའི་ཐབས་ཇུས་ལ་གཏོར་རྒོལ་བྱེད་མཁན་ཞིག་ཏུ་ངོས་འཛིན་བྱེད་ཀྱི་ཡོད་པའི་སྐོར་དང་། དེ་བཞིན་རྒྱ་ནག་གཞུང་གི་ཏང་སྲིད་དམག་གསུམ་གྱི་མགོ་ཁྲིད་ཞི་ཅིན་ཕིན་དང་དམར་ཤོག་སྲིད་གཞུང་གི་ཁེ་ཕན་ཁོ་ནར་དམིགས་ནས། རྒྱལ་སྤྱིའི་སྤྱི་ཚོགས་ནང་དབང་ཆ་དང་གོ་གནས་སྐྱེད་ཐབས་བྱེད་ཀྱི་ཡོད་པ་ལས། རྒྱ་ནག་མི་མང་གི་བདེ་སྡུག་དང་འཚོ་བའི་གནས་བབ་སོགས་ཀྱི་ཐད་ལ་ལྟ་རྟོག་གང་ཡང་མ་བྱས་པར། འཛམ་གླིང་གི་མི་འབོར་མང་ཤོས་ཀྱི་གྲས་སུ་ཡོད་པའི་རྒྱ་ནག་མི་མང་གི་ཁེ་ཕན་ལས་དམར་ཤོག་སྲིད་གཞུང་ཁོ་ནའི་ཁེ་ཕན་གལ་ཆེ་བར་འཛིན་གྱི་ཡོད་སྐོར་སོགས་གསལ་འདུག 

སྙན་ཐོའི་ནང་ཕྱི་ལོ་ ༢༠༢༡ ལོར་རྒྱ་ནག་ལ་རྡུལ་ཕྲན་མཚོན་ཆའི་སྐོར་ལ། རྒྱ་ནག་གཞུང་གིས་དམག་དོན་གྱི་ཐད་ནས་ཡར་རྒྱས་གཏོང་མུས་ཡིན་པ་མ་ཟད། རྒྱ་ནག་བཅིངས་གྲོལ་དམག་གིས་སྔར་ལས་ལྷག་པའི་དམག་དོན་སྦྱོང་བརྡར་ཟེར་བ་ཞིག་བྱས་ཏེ། རྒྱ་ནག་གི་དམག་གི་སྟོབས་ཤུགས་དེ་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཏུ་སྐྱེད་ཐབས་བྱེད་ཀྱི་ཡོད་པའི་ཁར། ལྷག་པར་དུ་དམག་དོན་སྦྱོར་བརྡར་ཟེར་བ་ཞིག་ལ་ཁ་གཡར་ནས་ཐའེ་ཝན་གྱི་མཚོ་གླིང་དུ་མཁའ་དམག་འཕུར་སྐྱོད་བྱས་ཏེ། མི་མང་ལ་འཇིགས་སྐུལ་ཡང་ཡང་བྱེད་ཀྱི་ཡོད་སྐོར་སོགས་གསལ་འདུག་ལ། ད་བར་རྒྱ་ནག་དམར་ཤོག་སྲིད་གཞུང་ལ་རྡུལ་ཕྲན་མཚོན་ཆ་ ༥༠༠ ལྷག་ཡོད་པའི་ཚོད་དཔག་བྱེད་ཀྱི་ཡོད་ཅིང་། ཕྱི་ལོ་ ༢༠༢༣ ལོར་རྡུལ་ཕྲན་མཚོན་ཆ་གྲངས་ ༡༠༠༠ ལ་སྤར་ཏེ་ཡར་རྒྱས་ཆེན་པོ་གཏང་འཆར་ཡོད་སྐོར་སོགས་གསལ་འདུག 

ཡང་རྒྱ་ནག་གཞུང་གི་ཕྱི་འབྲེལ་གྱི་ལྟ་བ་སྟེ་མིའི་རིགས་ཀྱི་ཐུན་མོང་གི་ལས་དབང་ (community of common destiny) ཟེར་བའི་འོག་ནས། རྒྱ་ནག་གཞུང་གི་ལངས་ཕྱོགས་དང་མཐུན་པའི་རྒྱལ་ཁབ་རྣམས་ལ་དམིགས་བསལ་འབྲེལ་ལམ་བཙུགས་ནས། རྒྱལ་ཁབ་དེ་དག་ལྷན་དུ་རྒྱལ་སྤྱིའི་ཁྲིམས་སྒྲིག་མང་དག་ཅིག་ལ་རྩིས་མེད་དང་བཟོ་བཅོས་གཏོང་ཐབས་བྱེད་ཀྱི་ཡོད། དཔེར་ན། འདས་ལོར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་སྐབས། རྒྱ་ནག་གཞུང་གིས་མི་མང་གི་ཁེ་ཕན་དང་། ཚོང་འབྲེལ་ལ་སྣང་བ་གང་ཡང་མི་གཏོང་བར་ཨུ་རུ་སུ་དང་མཉམ་འབྲེལ་བྱས་པ་མ་ཟད། ཨུ་རུ་སུར་དམག་དོན་ཀྱི་མཚོན་ཆ་སོགས་གསང་སྟབས་ཀྱིས་དབོར་འདྲེན་དང་ཚོང་འགྲེམས་བྱས་ནས། རྒྱལ་སྤྱིའི་ཁྲིམས་སྒྲིག་དང་རྒྱལ་ཁབ་མང་དག་ཅིག་གི་བདེ་འཇགས་ཀྱི་ཐད་ལ་གནོད་འཚེ་ཆེན་པོ་བཟོས་དང་བཟོ་མུས་ཡིན་སྐོར་གསལ་སྟོན་བྱས་འདུག  

སྙན་ཐོའི་ནང་དུ། རྒྱུད་གཅིག་ལམ་གཅིག་གི་སྲིད་ཇུས་འོག་ནས་འཛམ་གླིང་རྒྱལ་ཁབ་མང་དག་ཅིག་ཏུ་ཚོང་འབྲེལ་གྱི་འབྲེལ་ལམ་ཤུགས་ཆེ་རུ་གཏོང་གི་ཡིན་ཟེར་གྱི་ཡོད་ཀྱང་། ལས་གཞི་འདིའི་འོག་ནས་རྒྱལ་ཁབ་སྐྱོ་བོ་མང་པོ་ཞིག་ཏུ་མ་འཇོག་མང་པོ་བྱས་རྗེས། ཚོང་དོན་གྱི་ཐོག་ནས་གནོན་ཤུགས་སྤྲོད་ཀྱིན་ཡོད་པ་མ་ཟད། ཚོང་དོན་དང་འབྲེལ་ནས་ཆབ་སྲིད་སོགས་ཀྱི་ཐོག་ནས་ཀྱང་ཐེ་གཏོགས་བྱེད་ཀྱི་ཡོད་སྐོར་གསལ་འདུག 

གསར་འགོད་པ། དཔལ་ལྡན། 

རྩོམ་སྒྲིག་པ། པདྨ་མཚོ།