བོད་མི་མང་སྤྱི་འཐུས་ལྷན་ཚོགས་ནས་སྤྱི་ཟུར་གྲའུ་དཔོན་རིན་ཆེན་ཚེ་རིང་ལགས་འདས་གྲོངས་སུ་གྱུར་བར་ཐུགས་གསོ་གནང་།

དེ་རིང་བོད་མི་མང་སྤྱི་འཐུས་ལྷན་ཚོགས་ནས་སྤྱི་ཟུར་གྲའུ་དཔོན་རིན་ཆེན་ཚེ་རིང་ལགས་འདས་གྲོངས་སུ་གྱུར་བར་དམ་པ་ཁོང་གི་ཤུལ་ལུས་ནང་མི་ཉེ་འབྲེལ་རྣམས་ལ་ཐུགས་གསོ་གནང་འདུག

བོད་མི་མང་སྤྱི་འཐུས་ལྷན་ཚོགས་ཀྱི་ཐུགས་གསོའི་ནང་། བོད་མི་མང་སྤྱི་འཐུས་སྐབས་དང་པོ་དང་། གཉིས་པ། གསུམ་པ། དྲུག་པ་བཅས་ཀྱི་སྤྱི་འཐུས་ཀྱི་ལས་འཁུར་བཞེས་མྱོང་མཁན་སྤྱི་འཐུས་ཟུར་པ་གྲའུ་དཔོན་རིན་ཆེན་ཚེ་རིང་མཆོག་དགུང་ལོའི་བབ་དང་བར་ལམ་ནས་སྐུ་སྙུང་བཞེས་བཞིན་ཡོད་པ་བཅས་ལ་བརྟེན་སྡེ་ར་ལྡུན་མེག་སེ་སྨན་ཁང་ (Max Hospital, Dehradun) དུ་སྨན་བཅོས་གནང་ནས་ཅུང་དྲག་སྐྱེད་བྱུང་ནས་བདེ་སྐྱིད་གླིང་གཞིས་ཆགས་སུ་སྐུ་ངལ་གསོ་བཞིན་པའི་ཐོག་ཕྱི་ལོ་ ༢༠༢༣ ཟླ་ ༡༠ ཚེས་ ༢༧ ཉིན་གྱི་ཕྱི་དྲོར་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར། བོད་མི་མང་སྤྱི་འཐུས་ལྷན་ཚོགས་ནས་དམ་པ་གང་གི་ཤུལ་ལུས་ནང་མི་ཉེ་འབྲེལ་རྣམས་ལ་ཐུགས་གསོའི་འཕྲིན་ཡིག་ཕུལ་བའི་ནང་འཁོད་དོན། སྐུ་ཚེ་མ་ཟིན་པའི་གནས་ཚུལ་ཐོན་པར་ཤིན་ཏུ་བློ་ཕམ་གྱི་གནས་སུ་གྱུར་པ་དང་། དམ་པ་གང་གི་ཤུལ་ལུས་ནང་མི་ཉེ་འབྲེལ་རྣམས་ཀྱང་ཐུགས་ཡིད་གདུང་ཆེན་པོའི་ངང་གནས་ཡོད་ངེས་ཀྱང་། འཇིག་རྟེན་གྱི་སྐྱེ་འགྲོ་ཀུན་ལ་སྐྱེ་འཆིའི་རང་དབང་མེད་པར་ཆོས་ཉིད་ལ་སོང་དགོངས་རྒྱ་ཆེ་བཞེས་དང་འབྲེལ་དམ་པ་དེ་ཉིད་ཀྱི་ཆེད་རྣམ་དཀར་དགེ་ཚོགས་ཀྱི་གནང་སྒོ་རིམ་པ་གནང་བཞིན་ཡོད་པར་གཞིར་བཅས། འདི་ནས་གྲོས་ཚོགས་སྐོང་ཚོགས་སྐབས་སྤྱི་མཚུངས་ལྟར་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་འཇོག་རྒྱུ་ཡིིན་པ་དང་། དམ་པ་དེ་ཉིད་ཀྱིས་བོད་བསྟན་སྲིད་མི་རིགས་དང་། བོད་གཞུང་། བོད་རྒྱ་ཆེའི་མང་ཚོགས་བཅས་ཀྱི་དོན་དུ་ཞབས་ཞུ་མཐར་སོན་གནང་བའི་མཛད་རྗེས་ལ་ཡི་རངས་བསྔགས་བརྗོད་དང་། མཆོག་གསུམ་རྒྱལ་བའི་སྤྱན་སྔར་མཆོད་སྤྲིན་དང་བཅས་གང་གིས་ཚེ་རབས་ཀུན་ཏུ་བྱས་བསགས་སྡིག་ལྟུང་རྣམས་བྱང་ཞིང་དག་སྟེ། འཕགས་མཆོག་ཕྱག་ན་པདྨོའི་རྗེས་སུ་བཟུང་སྟེ་རྣམ་མཁྱེན་རྒྱལ་བའི་གོ་འཕང་ལ་མྱུར་དུ་རེག་པའི་སྨོན་འདུན་དང་སྦྲགས། ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན་ཞེས་འཁོད་འདུག

འདི་ལོའི་ཕྱི་ཟླ་ ༦ ནང་བཞུགས་སྒར་རྒྱལ་བའི་ཕོ་བྲང་དུ་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས། ཀམ་རའོ་གཞིས་ཆགས་སུ་རྟེན་གཞི་བྱས་པའི་སྒ་སྐྱེ་རྒུ་མདོའི་ས་སྐྱ་བརྩེ་ཆེན་བསམ་སྒྲུབ་གླིང་དགོན་གྱི་དགེ་འདུན་པ་གཙོ་བོར་འགྱུར་བའི་གཞིས་མི་དང་གྲྭའུ་དཔོན་རིན་ཆེན་ཚེ་རིང་ལགས་ཀྱི་བུ་མོ་ཚེ་བརྟན་བུ་ཁྲིད་ལགས་སུ་དམིགས་བསལ་མཇལ་ཁ་སྩལ་སྐབས་༸གོང་ས་མཆོག་གིས་གྲྭའུ་དཔོན་རིན་ཆེན་ཚེ་རིང་ལགས་ནི་ངོས་ཀྱི་གྲོགས་པོ་ཡིན་ཞེས་བཀའ་སྩལ་ཡོད་འདུག

སྤྱི་ཟུར་གྲའུ་དཔོན་རིན་ཆེན་ཚེ་རིང་ལགས་ཟླ་འདིའི་ཕྱི་ཚེས་ ༢༧ གྱི་ཕྱི་དྲོར་དགུང་གྲངས་  ༩༣ ཐོག་བདེ་སྐྱིད་གླིང་བོད་མིའི་གཞིས་ཆགས་སུ་འདས་གྲོངས་སུ་ཕྱིན་ཡོད་པ་དང་། འདས་པོ་དམ་པ་ཁོང་ནི་ཕྱི་ལོ་ ༡༩༥༨ ལོར་བོད་ནང་མདོ་ཁམས་ཆུ་བཞི་སྒང་དྲུག་ཐོག་མར་འཛུགས་མཁན་གྱི་གྲས་ཡིན་པ་དང་། བོད་དུ་རྒྱ་ནག་གི་དམག་མིར་རྒོལ་འཛིང་ཐེངས་གནང་མྱོང་བ་མ་ཟད།  ཕྱི་ལོ་ ༡༩༥༩ ལོར་༧གོང་ས་མཆོག་བཙན་བྱོལ་དུ་ཕེབས་སྐབས་སྐུ་སྲུང་མི་གཙོ་གྲས་ཤིག་ཡིན་པ་རེད། བཙན་བྱོལ་དུ་མི་གྲངས་ ༡༣ གྱིས་གྲུབ་པའི་བོད་མི་མང་སྤྱི་འཐུས་སྐབས་དང་པོ་དང་གཉིས་པ། གསུམ་པ་དང་དྲུག་པ་བཅས་སྐབས་བཞིའི་སྤྱི་འཐུས་གནང་མྱོང་ཞིང་། ཕྱི་ལོ་ ༡༩༨༥ ལོར་བཙན་བྱོལ་བོད་གཞུང་གི་སྐུ་ཚབ་ཐེངས་ལྔ་བའི་འཐུས་མི་བྱས་ཏེ་བོད་ནང་ཕེབས། འདས་པོ་ཁོང་ནང་ཆེན་ཉེར་ལྔའི་དཔོན་ཆེན་བཞིའི་ཡ་གྱལ་ཞིག་དང་།  གྲའུ་མེར་རྒན་སོགས་ཀྱི་རྒྱུད་པ་གྲའུ་ཚང་གི་ཁྱིམ་ཚང་དུ་ཕྱི་ལོ་ ༡༩༣༠ ལོར་འཁྲུངས་ཡོད་འདུག

གསར་འགོད་པ། སྐལ་བཟང་སྦྱིན་པ།