རྒྱ་ནག་གཞུང་གིས་བོད་ཁུལ་གྱི་སློབ་གྲྭ་མང་པོ་སྒོ་བརྒྱབ་སྟེ་རྒྱ་ནག་ནང་ལོགས་སུ་བོད་ལྗོངས་འཛིན་གྲྭའམ་བོད་ལྗོངས་སློབ་གྲྭ་ཟེར་བ་འཛུགས་སྐྲུན་བྱས་ཏེ་ཆབ་སྲིད་ཀྱི་ལས་འགན་ཧ་ཅང་གལ་ཆེན་ཡིན་པའི་བཀོད་མངགས་འོག་ཤུགས་གནོན་རྒྱག་བཞིན་འདུག
ཕྱི་ཟླ་ ༡༠ ཚེས་ ༢༦ ཉིན་བོད་རང་སྐྱོང་ལྗོངས་ཤེས་རིག་ལས་ཁུངས་དང་། རྒྱ་ནག་སི་ཁྲོན་ཞིང་ཆེན་ཐེན་ཧྥུ་ས་ཁུལ་གསར་པའི་མའེ་ཧྲན་དོ་དམ་མཐུན་ཚོགས་གཉིས་ཀྱིས། མའེ་ཧྲན་ཐེན་ཧྥུ་ས་གནས་གསར་པ་ཞེས་པ་རུ་བོད་ལྗོངས་སློབ་གྲྭ་ཞེས་པ་ཞིག་གསར་དུ་འཛུགས་སྐྲུན་བྱ་རྒྱུའི་མཉམ་ལས་མིང་རྟགས་འགོད་པའི་མཛད་སྒོ་ཞིག་བསྡུས་ཡོད་པ་དང་། མཛད་སྒོའི་གནས་ཚུལ་དྲ་ལམ་དུ་སྤེལ་རྗེས་དཔྱད་མཆན་འགོད་མཁན་ཚོས་བོད་རང་སྐྱོང་ལྗོངས་དང་གཞིས་ཀ་རྩེ་རུ་བོད་ཀྱི་སློབ་གྲྭ་འཛུགས་སྐྲུན་བྱ་སའི་ས་ཆ་མེད་པ་རེད་དམ་ཞེས་བོད་ཀྱི་སློབ་གྲྭ་ཞིག་རྒྱ་ནག་ནང་ག་རེ་བྱས་ནས་འཛུགས་ཀྱི་ཡོད་མེད་ཐད་དོགས་འདྲི་བྱས་འདུག
རྒྱ་ནག་གཞུང་འབྲེལ་གྱི་གསར་ལམ་དུ་གནས་ཚུལ་སྤེལ་བའི་ནང་། སློབ་གྲྭ་དེ་ནི་གཞུང་གིས་བཙུགས་པའི་བོད་རང་སྐྱོང་ལྗོངས་རྒྱུགས་གཞི་ལྟེ་གནས་དང་བོད་རང་སྐྱོང་ལྗོངས་དགེ་རྒན་སྐྱེད་སྲིང་གི་ལྟེ་གནས་ཤིག་ཏུ་བསྐྲུན་རྒྱུ་དང་། སློབ་གྲྭའི་ནང་དམའ་འབྲིང་དང་མཐོ་འབྲིང་གི་སྡེ་ཁག་གཉིས་སུ་དབྱེ་བའི་ཐོག་ནས་ཐོག་མའི་ཆར་སློབ་ཕྲུག་གྲངས་ ༣༠༠༠ བསྡུ་རྒྱུ་དང་། སློབ་གྲྭའི་འཛུགས་སྐྲུན་བཅས་ཕྱི་ལོ་ ༢༠༢༥ ཟླ་ ༦ པའི་ནང་འགྲུབ་པ་བྱ་རྒྱུ་ཡིན་སྐོར་སོགས་བཀོད་འདུག
རྒྱ་ནག་གཞུང་གིས་བོད་ཁུལ་གྱི་སློབ་གསོ་གོང་འཕེལ་དུ་ཁ་གཡར་ནས་འདས་པའི་ལོ་ཤས་ནང་བོད་ཀྱི་གྲོང་ཚོ་མང་པོའི་སློབ་ཆུང་དང་། ལྷག་པར་དུ་བོད་ཀྱི་སྒེར་གཉེར་སློབ་གྲྭ་རྣམས་སྒོ་བརྒྱབ་སྟེ་སྲིད་གཞུང་གི་བཅའ་སྡོད་སློབ་གྲྭར་རང་ལོ་ ༤ ནས་ ༡༨ བར་གྱི་སློབ་ཕྲུག་ས་ཡ་གཅིག་ཙམ་བཅུག་ཡོད་པ་རེད། དཔེར་ན། འདས་པའི་ལོ་ངོ་གསུམ་གྱི་ནང་ཉུང་མཐར་བོད་ཁུལ་གྱི་སྒེར་གཉེར་སློབ་གྲྭ་བརྒྱད་སྒོ་བརྒྱབ་ཡོད་པ་རེད། དེ་ཡང་ཕྱི་ལོ་ ༢༠༢༡ ལོར་མགོ་ལོག་ཁུལ་དུ་ཡོད་པའི་དམངས་སྒྲུབ་སློབ་གྲྭ་དང་། སེང་འབྲུག་སྟག་རྩེའི་བཅའ་སྡོད་སློབ་གྲྭ་སོགས་ཚུད་པའི་སྒེར་གཉེར་སློབ་གྲྭ་ ༧ སྒོ་བརྒྱབས་པ་དང་། ལོ་དེའི་ཕྱི་ཟླ་ ༡༡ ནང་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་ཡོད་པ་རེད།
དེ་བཞིན། ཕྱི་ལོ་ ༢༠༠༠ ཙམ་ནས་བཟུང་རྒྱ་ནག་གཞུང་གིས་བོད་སྐྱོར་སློབ་གསོའི་མིང་ཐོག་ནས་བོད་ཁུལ་གྱི་རྫོང་རེ་རེའི་དམའ་འབྲིང་སློབ་གྲྭ་ཁག་ནས་ལོ་འཁོར་རྒྱུགས་སྤྲོད་ནང་འཛིན་གྲྭ་རེ་རེའི་ཨང་རིམ་རྩེ་བཏོགས་གསུམ་རེ་བསྡུས་ནས་ཡིག་ངག་གཉིས་ཀྱི་ཐོག་ནས་ཡིག་ཚད་བཏང་རྗེས། ཆེས་ཕུལ་དུ་བྱུང་བའི་སློབ་མ་རྩེ་ཕུད་གཅིག་གཉིས་རེ་བདམས་ནས་རྒྱ་ནག་ནང་ལོགས་ཀྱི་ཧྲིན་ཀྲིན་སོགས་གྲོང་ཁྱེར་ཆེ་ཁག་གི་སློབ་གྲྭ་དག་གི་ནང་བཅུག་དང་འཇུག་བཞིན་ཡོད་ལ། ལས་གཞི་དེའི་འོག་ནས་བོད་ཁུལ་དུ་རྒྱ་ནག་ནང་ལོགས་ཀྱི་དགེ་རྒན་སྟོང་ཕྲག་མང་པོ་བོད་ཁུལ་དུ་ཡོང་སྟེ་དགེ་རྒན་གྱི་བྱ་བ་གཉེར་བཞིན་ཡོད་སྟབས། བོད་ཁུལ་གྱི་གཞོན་སྐྱེས་རྣམས་སློབ་མཐར་ཕྱིན་རྗེས་ལས་ཞུགས་འགྲན་རྩོད་ཁྲོད་ཕམ་སྟེ་རང་བཞིན་གྱིས་ཚོང་ལས་དང་ལག་རྩལ་སོགས་ཀྱི་ཐོག་དོ་དབྱིངས་ཞུགས་དགོས་པའི་གནས་སྟངས་ཆགས་བཞིན་ཡོད་པ་རེད།
གཞན། ཕྱི་ལོ་ ༡༩༩༦ ལོར་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་རྒྱ་ནག་པེ་ཅིན་དང་ཐེན་ཅིན། ཧྲང་ཧེ། ཧུའུ་པེ། ལོའུ་ལིན། ཅང་སུའུ། ཀྲི་ཅང་། ཧྥུ་ཅན། ཧྲན་ཏུང་། ཧའེ་ནན། ཧུའུ་ནན། ཧུའུ་པའེ། ཀང་ཏུང་། སི་ཁྲོན། ཧྲན་ཞི། ཁྲུང་ཆིན་སོགས་ཞིང་ཆེན་དང་གྲོང་ཁྱེར་ ༡༦ ཏུ། ནང་ལོགས་ཀྱི་བོད་ལྗོངས་འཛིན་གྲྭའམ་སློབ་གྲྭ་དང་འབྲེལ་བའི་ཡིག་ཆ་<<关于内地西藏班（校）扩大规模有关问题的请示》ཞེས་པ་གཏན་འབེབས་བྱས་ཡོད་པ་དང་། ཡིག་ཆ་དེའི་སྔོན་གླེང་ནང་དུ། ལས་དོན་འདི་ནི་ཆབ་སྲིད་ཀྱི་ལས་འགན་ཞིག་ཡིན་ལ། ཚད་མཐོའི་དོན་གཉེར་དང་སྒྲིག་འཛུགས་དོ་ནན། རྒྱབ་སྐྱོར་ཤུགས་ཆེན་བྱས་ཏེ་ལས་དོན་ལེགས་འགྲུབ་དགོས་ཞེས་བཀོད་འདུག་ལ། ཕྱི་ལོ་ ༢༠༢༡ ལོར་རྒྱ་ནག་གཞུང་ཕྱོགས་ནས་རྒྱ་ནག་ནང་ལོགས་ཀྱི་བོད་ལྗོངས་འཛིན་གྲྭ་ཟེར་བ་བཙུགས་ཏེ་ལོ་ངོ་ ༣༦ འཁོར་བའི་ལས་བསྡོམས་ཤིག་གི་ནང་། ཕྱི་ལོ་ ༡༩༨༤ ལོར་བོད་ཁུལ་གྱི་སློབ་གསོའི་བྱ་བ་རྗེས་ལུས་དང་ཤེས་ལྡན་མི་སྣ་ཉུང་བར་དམིགས་ཏེ་ནང་ལོགས་ཀྱི་བོད་ལྗོངས་འཛིན་གྲྭའམ་སློབ་གྲྭ་གཉེར་ཏེ། བོད་ཁུལ་གྱི་སློབ་ཕྲུག་དང་བོད་ཁུལ་དུ་བྱ་བ་གཉེར་བཞིན་པའི་མི་རིགས་གཞན་གྱི་བྱིས་པ་བཅས་སློབ་ཕྲུག་ཁྲི་ ༡༤.༣ སློབ་འཇུག་བྱས་པའི་ཁྲོད་ནས་སློབ་ཕྲུག་ཁྲི་ ༥.༦ ལྷག་བོད་ལྗོངས་སུ་བཏང་ཡོད་སྐོར་བསྒྲགས་འདུག་ལ། རྒྱ་ནག་ནང་ལོགས་ཀྱི་བོད་ལྗོངས་འཛིན་གྲྭའམ་སློབ་གྲྭ་ཟེར་བ་དེའི་ནང་དམའ་འབྲིང་དང་མཐོ་འབྲིང་གཉི་ག་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
