༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཞིག་བརྒྱུད་སྤེལ་བྱས་པའི་ཉེས་མིང་འོག བོད་ཀྱི་བུད་མེད་དབང་ཕྱུག་མཚོ་ལགས་འཛིན་བཟུང་བྱས་འདུག
ཉེ་སྔོན་ཕྱི་ཟླ ༡༠ ཚེས་ ༢༦ ཉིན། རྒྱ་ནག་ཉེན་རྟོག་པས་མཚོ་སྔོན་ཞིང་ཆེན་མཚོ་བྱང་ཁུལ་མདོ་ལ་རྫོང་འབྲོང་ལུང་ཡུལ་ཚོ་ནས་ཡིན་པའི་བོད་རིགས་བུད་མེད་དབང་ཕྱུག་མཚོ་ཞེས་པ་ཞིག་གིས། རྒྱ་ནག་གི་སྤྱི་ཚོགས་བརྒྱུད་ལམ་དོ་ཡེན་(抖音)ནམ་དབྱིན་སྐད་དུ་(TikTok)དང་། སྐད་འཕྲིན་ཚོགས་པ་ཞིག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་བརྙན་ཞིག་གི་པར་བསྐུར་བའི་རྐྱེན་གྱིས། མཚོ་བྱང་ཁུལ་དང་མདོ་ལ་རྫོང་གི་ཉེན་རྟོག་པས་ཁོང་མོ་འཛིན་བཟུང་བྱས་ཏེ་བདུན་ཕྲག་གཉིས་ཙམ་འགྲོ་བཞིན་ཡོད་ཀྱང་། ནང་མི་གཉེན་འབྲེལ་ཚོར་གནས་ཚུལ་གང་ཡང་མཁོ་སྤྲོད་བྱས་མི་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་གནས་ཚུལ་མཁོ་སྤྲོད་པས། ཉེ་ལམ་དབང་ཕྱུག་མཚོའི་ནང་མི་དང་གཉེན་ཉེ་ཁག་ཅིག་མདོ་ལ་རྫོང་ཉེན་རྟོག་ཁང་དུ་ཕྱིན་ནས་མོའི་སྐོར་སྐད་ཆ་འདྲི་སྐབས། ཁོང་མོས་ཕྱི་ཕྱོགས་སུ་འབྲེལ་བ་བྱས་པ་དང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཞིག་དྲ་ཚོམས་སུ་བསྐུར་བ། དེ་བཞིན་བཙན་བྱོལ་དུ་ཡོད་པའི་བོད་མི་ཁག་ཅིག་ལ་ཡིག་ཐོག་ནས་འབྲེལ་བ་བྱས་ཡོད་ལུགས་བཤད་ནས་ཁོང་མོར་ཐུག་འཕྲད་བྱེད་དུ་བཅུག་མེད་པ་མ་ཟད། ཁོང་མོའི་བཟའ་ཟླའི་ཁ་པར་ཡང་གློ་བུར་དུ་བཙན་འཕྲོག་བྱས་ཏེ་ཕྱིར་སྤྲད་མེད་སྐོར་བརྗོད་བྱུང་།
རྒྱ་ནག་གི་སྤྱི་ཚོགས་བརྒྱུད་ལམ་དོ་ཡེན་(抖音) སྟེང་སྤེལ་བའི་སྐུ་བརྙན་དེའི་འོག་ཏུ་མཆན་འདེབས་མཁན་མང་པོ་བྱུང་འདུག་པ་དང་། མཆན་འབྲི་མཁན་ཞིག་གིས་རྒྱ་ཡིག་ནང་ནམ་ལངས་པ་དང་འཛམ་གླིང་གི་ཉི་མ་སེར་པོ་མཇལ་བྱུང་། གཞན་ཞིག་གིས་ཁོང་ང་ཚོའི་རྩ་བའི་བླ་མ་མ་རེད་དམ་ཞེས་དོགས་འབྲི་དང་བཅས་མཆན་བྲིས་ཡོད་པ་དང་། ཡང་མི་གཞན་ཞིག་གིས་༧རྒྱལ་བ་རིན་པོ་ཆེའི་ཞལ་མཇལ་བ་དང་བོད་མཐོང་བ་གཅིག་མཚུངས་རེད་ཅེས་བརྗོད་པ་སོགས་མཐོང་རྒྱུ་འདུག
བུད་མེད་དབང་ཕྱུག་མཚོ་ལགས་ནི་རྒྱ་ནག་གཞུང་གིས་དབྱེ་བགོས་བྱས་པའི་མཚོ་སྔོན་ཞིང་ཆེན་མཚོ་བྱང་ཁུལ་མདོ་ལ་རྫོང་འབྲོང་ལུང་ཡུལ་ཚོ་ནས་ཡིན་འདུག ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མ་སོང་།
