བོད་རང་སྐྱོང་ལྗོངས་དིང་རི་རྫོང་གད་དམར་ཤང་ནུབ་ལུང་གྲོང་སྡེའི་ལ་སྟོད་ལྷོའི་ཤྭ་རི་དཔལ་གྱི་ལྷ་གདོང་དགོན་པའི་དགེ་འདུན་པ་བཞི་འཛིན་བཟུང་བྱས་པའི་གནས་ཚུལ་ཐོན་འདུག
ནུབ་ལུང་གྲོང་སྡེའི་ནང་དུ་ལོ་ལྟར་ཞབས་རིམ་གསོག་སྒྲུབ་བྱེད་པའི་སྐབས་སུ༧གོང་ས་མཆོག་གི་ཞབས་རིམས་དང་སྨོན་ལམ་སོགས་བསྒྲུབ་བཞིན་ཡོད་པར་ཁ་གཡར་ནས་དིང་རི་རྫོང་ཉེན་རྟོག་པ་ལྔ་ཡོང་ནས་ཞབས་རིམ་གསོག་སྒྲུབ་བྱེད་མཁན་དགེ་འདུན་པ་བསོད་ནམས་དང་། སྐལ་བཟང་ཚེ་རིང་། ཉི་མ། ཕུན་ཚོགས་བཅས་འཛིན་བཟུང་བྱས་ཏེ་ཟླ་གསུམ་ཙམ་འགྲོ་བཞིན་ཡོད་ཀྱང་ཡུལ་མི་གཉེན་འབྲེལ་ཚོས་ད་ལྟའང་ཁོང་ཚོས་ས་གནས་གང་ཞིག་ཏུ་ཁྲིད་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། དགོན་པ་དེར་ནམ་རྒྱུན་ནས་གྲྭ་བ་ ༡༤ ་ཙམ་མ་གཏོགས་མེད་ནའང་ཁོང་ཚོ་འཛིན་བཟུང་བྱས་རྗེས། དགོན་པའི་ནང་དུ་རྒྱུན་ལྡན་ལྟ་རྟོག་དོ་དམ་ལས་བྱེད་གཉིས་མི་མཐུད་དུ་བསྐོ་བཞག་བྱས་ནས་ད་ལྟ་ད་དུང་ཡང་དགོན་པ་དེ་རྒྱ་ནག་གི་ལྟ་རྟོག་འོག་ཡོད་པ་རེད་འདུག
རྒྱ་གཞུང་ཉེན་རྟོག་པས། ལྷ་གདོང་དགོན་པའི་དགེ་འདུན་པ་བཞི་འཛིན་བཟུང་བྱས་རྗེས་དགོན་པའི་གྲྭ་ཤག་སོགས་ལ་སྔོག་བཤེར་བྱས་པ་དང་། ད་དུང་ནུབ་ལུང་གྲོང་སྡེའི་ཡུལ་མི་དང་སྡེ་དཔོན་སོགས་ཁག་ཅིག་འབོད་འགུག་གིས་འདྲི་རྩད་དང་བཀག་ཉར་བྱས་ཡོད་པའི་གནས་ཚུལ་བྱུང་ཡོད་པ་དང་། རྒྱ་གཞུང་ཉེན་རྟོག་པས། རྗེས་ཕྱོགས་ཡུལ་མི་དང་སྡེ་དཔོན་དག་གིས་དུས་ཆེན་སོགས་ཀྱི་སྐབས་སུ། དགོན་པ་དང་སྤྱི་སྤྱོད་ར་བ་སོགས་ནས་༧གོང་ས་མཆོག་གི་གསོལ་འདེབས་སྨོན་ལམ་འདོན་མི་ཆོག་པའི་ཁས་ལེན་ཡི་གེ་འབྲི་བཅུག་ཡོད་པ་རེད།
རྩོམ་སྒྲིག་པ། སྐལ་བཟང་སྦྱིན་པ།
