ཨོ་གླིང་ནས་བློ་བཟང་།
དེང་སྐབས་སུ་དགེ་འདུན་པའི་སྡེས་ཁྱིམ་པ་སུན་འབྱིན་ཀྱི་ལས་གསོག་ན་འགྲིག་པའི་དུས་སྐབས་ཞིག་ལ་གཟིགས་སམ།
ཆོས་བརྒྱུད་སྤྱི་འཐུས་ཀྱི་བྱ་སྤྱོད་ཀྱིས་མང་ཚོགས་ཁྲོད་སེར་མོའི་སྤྱི་ཚོགས་ལ་ལོ་རེ་ནས་ལོ་རེར་སྡང་སེམས་ཇེ་ཆེར་འགྲོ་བཞིན་པ་ཐབས་ཤེས་གང་ཡོད་ཀྱིས་འགོག་མི་དགོས་སམ།
སྤྱི་ཚོགས་ནང་གླང་དམར་གྱི་མཚན་གནས་བཞེས་པའི་མཁན་སློབ་དང་དགེ་བཤེས་མིང་འཛིན་པ་དེ་ཚོས་དགེ་འདུན་ཀྱི་སྡེའི་མཚན་ཞབས་འདྲེན་པ་མ་གཟིགས་སམ།
དགེ་འདུན་པའི་ནང་ལ་བསྟན་པའི་ཞབས་འདྲེན་པའི་ཆབ་སྲིད་པ་སླེབས་སྐབས་མ་གོ་མ་ཐོས་པའི་བརྟུལ་ཞུགས་དེ་ཚོ་འོས་འཚམས་ཞིག་ཡིན་ནམ།
༸གོང་ས་མཆོག་གིས་རྒྱུན་ལྡན་གསུངས་དོན། མར་མེ་རླུང་གི་བསད་ན་འཛུམ་ཤུགས། ལྷ་ཁང་མེས་ཚིག་ན་འཛུམ་ཤུགས། ཟེར་བའི་དཔེ་ལྟར་འགྲོ་ན་འགྲིག་གི་མ་རེད་ཞེས་ཞལ་གདམས་གནང་བ་མི་དྲན་ནམ།
ཆོས་བརྒྱུད་ཁག་གི་སྤྱི་འཐུས་ཀྱི་བྱ་སྤྱོད་ཀྱིས་མང་ཚོགས་ཀྱི་དད་སེམས་ལ་དོ་ཕོག་འགྲོ་གི་ཡོད་ཚུལ་གྱི་གཏམ་གླེང་ལ་ཞིབ་འཇུག་ཞིག་ཀྱང་བྱ་འདོད་མེད་དམ།
བོད་བརྒྱུད་ནང་བསྟན་གྱི་མཁན་པོ་དང་དགེ་བཤེས་ཀྱི་མཚན་སྙན་ལ་དོ་ཕོག་འགྲོ་བཞིན་པ་འདི་ལ་ཕངས་སེམས་ཞིག་ཀྱང་མེད་དམ།
ཆོས་བརྒྱུད་ཀྱི་སྤྱི་འཐུས་རྣམས་ཀྱིས་གྲོས་ཚོགས་ནང་གཏམ་གླེང་ཅི་འདྲ་གནང་གི་ཡོད་པ་ཅུང་ཙམ་ཡང་མི་མཁྱེན་ནམ།
ཆོས་བརྒྱུད་སྤྱི་འཐུས་ཚོས་གྲོས་ཚོགས་དང་མང་ཚོགས་ནང་གཏམ་གླེང་གནང་སྐབས་སུ་སྡང་སེམས་དང་འཐེན་འཁྱེར་གྱི་དབང་གིས་སྐད་ཤུགས་ཆེ་ལ། བཞིན་སྡུག་པའི་བྱ་སྤྱོད་དེ་ཚོས་སེར་མོ་བའི་སྤྱི་ཚོགས་ཀྱི་མཚན་སྙན་དོང་ཞབས་སུ་གཡུག་མི་འདུག་གམ།
ཆོས་བརྒྱུད་ཀྱི་སྤྱི་འཐུས་ཚོས་མི་གཅིག་རྒྱབ་ལ་དཔུང་བསྒྲིགས་ཀྱིས་ཕྱོགས་རིས་འཐེན་འཁྱེར་གནང་བ་མ་གཟིགས་སམ།
བོད་མིའི་སྒྲིག་འཛུགས་ཀྱི་འགྲོ་གྲོན་ཆེན་པོ་བཏང་ནས་གྲོས་ཚོགས་འཚོགས་སར་ཕེབས་ཀྱང་བོད་ནང་གདུང་སེམས་མཉམ་སྐྱེད་ཀྱི་གྲོས་འགོ་ནས་བཟུང་རྙོག་གླེང་རྒྱུན་མཐུད་ནས་གཅིག་བརྒྱབ་གཅིག་ལངས་ཀྱི་དཔེ་ལྟར་སྨོན་ལམ་མཐར་ཕྱིན་གྱི་རྒྱབ་དུ་ལངས་ནས་སྐད་ཆ་ཅི་འདྲ་བཤད་པ་དང་མཐར་གྲོས་ཚོགས་འཚོགས་མ་ཐུབ་པས་གཞུང་དངུལ་འཕྲོ་བླངས་ཏུ་བཏང་བ་འོས་འཚམས་ཞིག་ལ་གཟིགས་སམ།
༸གོང་ས་མཆོག་གིས་ཆབ་སྲིད་ཀྱི་སྐུ་དབང་མི་མང་ལ་གནང་བའི་ལམ་སྲོལ་བཞིན་སྤྱི་ཚོགས་ནང་རྙོག་གླེང་ཆེ་བའི་སེར་མོ་བའི་སྤྱི་འཐུས་མི་དགོས་པའི་ཐུགས་བསམ་རེ་གནང་གི་མེད་དམ།
ཆོས་བརྒྱུད་སྤྱི་འཐུས་ཚོ་འཛིན་སྐྱོང་དང་བོད་དོན་བདེན་མཐའ་གསལ་བར་ཕན་ལས་གནོད་ཆེ་བའི་དཔེ་ལྟར་སོང་བ་མ་གཟིགས་སམ།
ཆོས་བརྒྱུད་སྤྱི་འཐུས་དེ་ཚོ་གནམ་ཐང་སོགས་འགྲིམ་འགྲུལ་གྱི་ས་ཚིགས་སོགས་ན་གྲོགས་མེད་ཁེར་རྐྱང་དང་། མང་ཚོགས་ཀྱིས་གཡོལ་གང་ཐུབ་གནང་བཞིན་པ་དང་དགེ་འདུན་གྱི་སྡེ་ལ་ཡང་སྡང་སེམས་ཆེ་རུ་འགྲོ་བཞིན་པ་མ་ཚོར་རམ།
དགེ་འདུན་པས་ཆོལ་ཁའི་ཕྱོགས་ཞེན་དང་ཆགས་སྡང་གི་དབང་གིས་འོས་ཤོག་གི་ཆ་ཤས་བླངས་རྐྱེན་འོས་ཤོག་བླུག་མཁན་གྱི་དགེ་འདུན་པའི་སྡེ་ལ་ཡང་དད་ལོག་བྱེད་མཁན་ཆར་རྗེས་ཀྱི་ཤ་མོ་བརྡོལ་བའི་དཔེ་ལྟར་སོང་བ་མ་གཟིགས་སམ།
ཐབས་སྐྱོ་བའི་གནས་ཚུལ་འདི་དག་སྐབས་སྤྱི་ཚོགས་ནང་གཅིག་རྗེས་གཉིས་མཐུད་ཀྱིས་སླེབས་སྐབས་ཆོས་དད་ཅན་རྣམས་ཡིད་ཆད་པ་དང་ཆོས་ལ་སྡང་སེམས་ཆེ་བའི་རང་རིགས་དག་གིས་དགའ་འབོད་བྱེད་བཞིན་པ་མ་ཐོས་སམ།
ཆོས་བརྒྱུད་སྤྱི་འཐུས་རྣམས་ཀྱི་སྐྱུག་མེར་ལངས་པའི་བྱ་སྤྱོད་ཀྱིས་སངས་རྒྱས་པའི་ཆོས་སྦྱོང་ན་སེམས་པ་བཟང་དུ་འགྲོ་བའི་བསླབ་བྱ་ལ་མང་ཚོགས་ནང་དོགས་པ་ཆེ་རུ་འགྲོ་བཞིན་པ་མ་གཟིགས་སམ།
སངས་རྒྱས་ཀྱི་བསྟན་པ་དགེ་འདུན་པའི་སྡེ་ལ་རག་ལས་པ་དང་དགེ་འདུན་པའི་སྡེ་དད་ལྡན་མང་ཚོགས་ལ་འབྲེལ་ནས་ཡོད་པ་ཐུགས་དྲན་མི་སོས་པའི་དུས་ཞིག་ཡིན་ནམ།
༸གོང་ས་མཆོག་གིས་ཧི་མ་ལ་ཡིའི་དགེ་འདུན་པ་ཚོར་ཆབ་སྲིད་ཚོགས་པའི་ནང་ལ་ཞུགས་ན་བདེ་བོ་མེད་པའི་བཀའ་སློབ་ལམ་སྟོན་གནང་བ་ཐུགས་ངེས་སུ་མེད་དམ།
སྐབས་དུས་འདི་འདྲ་ཞིག་ལ་དགེ་འདུན་པའི་སྡེ་ལ་ཁྲིམས་སྒྲིག་གསར་བཟོ་དང་ཁྱིམ་པ་སུན་འབྱིན་གྱི་ལས་འགོག་པའི་དུས་ཞིག་ལ་མ་གཟིགས་སམ།
དེང་སྐབས་ཀྱི་བཙན་བྱོལ་ནང་གི་ཆོལ་ཞེན་གྱིས་རུལ་སུངས་སུ་སོང་བའི་དགེ་འདུན་པའི་སྡེ་འདི་མགོ་རུལ་རྣ་བས་མི་ཚོར་བའི་དཔེ་ལྟར་སོང་མི་འདུག་གམ།
ངོ་སྲུང་དང་མཚན་སྙན་ལ་གནོད་དོགས་ཀྱིས་བསྟན་པའི་གཞི་མ་དགེ་འདུན་གྱི་སྡེ་ལ་ཁྱིམ་པ་སུན་འབྱིན་གྱི་ལས་འདི་ལྟ་བུ་བྱུང་དང་འབྱུང་བཞིན་པ་མ་གཟིགས་མདོག་གནང་ན་འགྲིག་གམ།
ཆོལ་ཞེན་གྱིས་གཟི་བའི་བླ་གྲྭ་འདི་དག་གིས་སངས་རྒྱས་ཀྱི་བསྟན་པ་ལ་སློབ་ཀྱང་ནད་པའི་སྨན་མ་བསྟེན་པར་སྨན་མཆོག་ལག་དུ་བཟུང་ནས་ཤུ་བའི་དཔེ་དོན་ཚང་མི་འདུག་གམ།
ཁ་སང་དེ་རིང་གདན་སའི་དགེ་བཤེས་ཚོ་ཡང་དགེ་ལུགས་སྤྱི་འཐུས་ཀྱིས་ཤུགས་རྐྱེན་འོག་ཆོལ་ཁའི་ཕྱོགས་ཞེན་གྱིས་མཁན་པོ་སོགས་ལས་སྣེ་ལ་ངོ་རྒོལ་བྱེད་བཞིན་པ་མ་ཐོས་སམ།
ཕྱོགས་ཞེན་གྱིས་བཟི་བའི་དགེ་བཤེས་མིང་འཛིན་པ་དེ་ཚོས་ཆོས་ལུགས་ཆོས་བརྒྱུད་དང་བཅས་པའི་ཆེ་མཐོང་རྨང་ནས་བཤིགས་ཟིན་པ་མ་མཐོང་སམ།
༸གོང་ས་མཆོག་གདན་ས་ཁག་ལ་ཕེབས་འཆར་ཡོད་པ་དེ་དག་ཕྱིར་འཐེན་བྱས་སྐབས་མི་སྐྱའི་སྤྱི་ཚོགས་ཀྱིས་༼དག་དག་རེད་དེ་ཚོ་ལ་༸གོང་ས་མཆོག་གི་བཀའ་སློབ་ཀྱིས་ཕན་གྱི་མི་འདུག་༽ཟེར་ནས་དགའ་སྣང་བྱེད་བཞིན་པ་མ་ཐོས་སམ།
སྤྱི་ལོ་༢༠༢༡ ལོར་ཆོས་བརྒྱུད་སྤྱི་འཐུས་དང་འབྲེལ་བའི་བློ་གླིང་མཁན་པོས་བསྒྲགས་གཏམ་སྤེབ་བ་དང་། ཉེ་ཆར་སྦེལ་ཀོབ་མི་མང་གིས་དགེ་ལུགས་སྤྱི་འཐུས་གཉིས་ལ་ངོ་རྒོལ་བྱས་པ་དང་དེའི་སྔོན་ཙམ་ལ་སེ་ར་བྱེས་སྨད་གཉིས་ཀྱི་མཁན་རིན་པོ་ཆེ་རྣམ་པ་གཉིས་ཀྱིས་སྐད་ངན་ཤོར་པའི་གནས་ཚུལ་ལ་བསམ་གཞིག་ཞིག་བྱ་མི་འདོད་དམ།
༢༠༢༣/༡༢/༡༥
མཆན། གོང་བཀོད་རྩོམ་ཡིག་འདི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་ཚུལ་ཡིན་པས་མ་ཁྱབ།
གོང་འཁོད་དྲི་བ་ཉེར་བདུན་དེ་རྣམས་བསྟན་བདག་རྣམས་སྨོས་ཅི། དོ་བདག་ཆོས་རྒྱུད་སྤྱི་འཐུས་ཚོས་དོ་ནན་ངང་གཟིགས་རེ་དོན་དངོས་དང་མཐུན་པའི་བསམས་གཞིག་ཞིག་གནང་ན་ཅི་མ་རུང་། འོན་ཏེ་དེ་ལས་ལྡོག་ཏེ་དེ་ལ་དགག་ལན་གང་འདྲ་ཞིག་འདེབ་དགོས་མིན་ཁོ་ན་སེམས་རྒྱུའི་ཉེན་ཆེ།