དེ་རིང་གནས་མཆོག་རྡོ་རྗེ་གདན་དུ་དཔལ་༧ས་སྐྱ་བའི་འདུས་མང་ཡོངས་ཀྱིས་༸གོང་མ་བདག་ཁྲི་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་།
དཔལ་ས་སྐྱའི་འདུས་མང་ཡོངས་ཀྱིས་ཇི་ལྟར་གསོལ་བ་བཏབ་པ་ལྟར། དེ་རིང་ཕྱི་ཟླ་ ༡༢ ཚེས་ ༢༧ ཉིན་དཔལ་༧ས་སྐྱ་བའི་དད་ལྡན་སེར་སྐྱ་མང་ཚོགས་ཀྱིས་གནས་མཆོག་རྡོ་རྗེ་གདན་དུ་༧གོང་མ་བདག་ཁྲི་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་ཅིང་། ༸དཔལ་ས་སྐྱའི་༸གོང་མ་ཁྲི་འཛིན་ཞེ་གསུམ་པ་ཛྙ་ན་བཛྲ་རིན་པོ་ཆེ་མཆོག་གིས་རྡོ་རྗེ་སློབ་དཔོན་མཛད་དེ་མཎྜལ་རྟེན་གསུམ་འདེགས་འབུལ་ཞུས་སོང་།
དེ་རིང་གི་བརྟན་བཞུགས་བསྟར་འབུལ་དང་འབྲེལ་ནས་ས་སྐྱའི་སྨོན་ལམ་ཆེན་མོའི་གོ་སྒྲིག་ཚོགས་ཆུང་གི་ཚོགས་གཞོན་མཁན་པོ་ཨ་འཕྲིན་ལགས་ཀྱིས་འདི་གའི་གསར་འགོད་པར། སྤྱིར་བརྟན་བཞུགས་ཞེས་པ་ནི་བླ་མ་ཞིག་སེམས་ཅན་གྱི་དོན་དུ་སྐུ་ཚེ་བརྟན་རྒྱུ་དང་། བླ་མའི་ཐུགས་བཞེད། མཛད་པ་འཕྲིན་ལས་ཡུན་ནས་ཡུན་དུ་རྒྱས་རྒྱུའི་ཆེད་དུ་ཡིན་ཞིང་། དེ་ཡང་མང་ཚོགས་ཀྱིས་གསོལ་བ་བཏབ་པ་ཞིག་ཡིན། དེ་འདྲ་ཞིག་ཡིན་ཙང་། དམ་པ་དང་དམ་ཚིག་གི་རྟེན་འབྲེལ་ལ་དཔེ་ཁྱད་པར་ཡོད་པ་རེད། ཅེས་དང་། བརྟན་བཞུགས་ཀྱི་ཆོ་ག་འབུལ་མཁན་དབུ་བླ་ཞེ་གསུམ་པ་ཛྙ་ན་བཛྲ་རིན་པོ་ཆེ་མཆོག་དང་། ས་སྐྱ་མ་དགོན་གྱི་སྤྲུལ་སྐུ་རྣམས། དེ་བཞིན་སེར་སྐྱ་མི་མང་བཞི་སྟོང་ཙམ་འཛོམས་ཡོད་པའི་ཁྲོད། ས་སྐྱའི་ཆོས་བརྒྱུད་འཛིན་མཁན་ཉིས་སྟོང་ཙམ་ཞིག་ཡོད་རེད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། གནས་མཆོག་ཁྱད་པར་ཅན་འདི་རུ་བརྟན་བཞུགས་འབུལ་མཁན་མང་དག་ཅིག་ནི་༧གོང་མ་ཁྲི་ཆེན་མཆོག་གི་སློབ་མ་དང་ཁོང་ཉིད་ལ་རྩེ་གཅིག་ཏུ་དད་པ་ཡོད་མཁན་ཤ་སྟག་ཡིན་ལ། དེ་རིང་བླ་མ་རྩ་ཆེན་བསམ་གྱིས་མི་ཁྱབ་པ་མང་དག་ཅིག་ཕེབས་ཡོད་པས། ཁོང་ཅག་གིས་རྩེ་གཅིག་གིས་གསོལ་བ་སྨོན་ལམ་བཏབ་པ་ཡིན་ན། བླ་མ་སྐུ་ཚེ་ཡུན་རིང་བརྟན་པ་དང་། མཛད་འཕྲིན་རྒྱས་རྒྱུར་ཕན་རླབས་ཆེན་པོ་ཡོད་པ་མ་ཟད། བསྟན་འཛིན་སྐྱེ་བོ་དེ་དག་གི་སྐུ་ཚེ་སྲིང་རྒྱུར་ཕན་ཐོགས་ཆེན་པོ་ཡོད་སྐོར་སོགས་འགྲེལ་བརྗོད་གནང་བྱུང་།
ཟླ་འདིའི་ཕྱི་ཚེས་ ༢༥ ནས་ཉིན་གྲངས་བཅུ་རིང་གནས་མཆོག་རྡོ་རྗེ་གདན་གྱི་བྱང་ཆུབ་ཤིང་དྲུང་དུ་དཔལ་ས་སྐྱའི་སྨོན་ལམ་ཆེན་མོ་འཚོག་གི་འདུག་ལ། སྨོན་ལམ་དེར་རྒྱ་བལ་འབྲུག་གསུམ་གྱི་དཔལ་༧ས་སྐྱ་བའི་དགོན་སྡེ་ཁག་ ༤༧ ལྷག་ནས་གྲྭ་བཙུན་མང་པོ་ཕེབས་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
