བཞུགས་སྒར་དུ་ཉིན་བཞིའི་རིང་སམ་བྷོ་ཊ་བོད་སློབ་ཀྱི་ཁྱབ་ཁོངས་སློབ་གྲྭ་ཁག་གི་སློབ་སྤྱི་དང་དགེ་ཆེ་རྣམས་ཀྱི་ལོ་འཁོར་ཚོགས་འདུ་ཐེངས་བཅུ་དྲུག་པ་འཚོག་གི་འདུག
དེ་རིང་ཕྱི་ཚེས་ ༦ ནས་ ༩ བར་ཉིན་གྲངས་བཞིའི་རིང་དྷ་སའི་ནོར་བུ་གསོལ་མགྲོན་ཁང་དུ། སམ་བྷོ་ཊ་བོད་སློབ་ཚོགས་པའི་གོ་སྒྲིག་འོག སམ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་ཁག་གི་ལོ་འཁོར་འགན་འཛིན་ལྷན་ཚོགས་ཐེངས་བཅུ་དྲུག་པ་དབུ་འཛུགས་གནང་ཡོད་ཅིང་། ལྷན་ཚོགས་ཐོག་སྐུ་མགྲོན་གཙོ་བོ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་དམིགས་བསལ་སྐུ་མགྲོན་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། སམ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་དང་ངེས་སྟོན་པ་གཞན་བསྟན་འཛིན་ངག་སྒྲོན་ལགས། དེ་བཞིན་སློབ་གྲྭ་ཁག་གི་སློབ་སྤྱི་དང་དགེ་ཆེ་གྲངས་ ༣༠ མཉམ་ཞུགས་ཀྱིས། འདས་ལོའི་ཚོགས་འདུའི་གྲོས་ཆོད་ཁག་ལ་བསྐྱར་ཞིབ་དང་། སློབ་མའི་ཤེས་ཡོན་ཡར་རྒྱས་གཏོང་ཕྱོགས་ཀྱི་ཐབས་ལམ་གསར་བཏོད་དང་དཀའ་ངལ་སེལ་ཐབས། ཆོས་ལུགས་ལ་མ་བརྟེན་པའི་བཟང་སྤྱོད་སློབ་འཁྲིད་གནང་ཕྱོགས། ཡིག་རྒྱུགས་ཚགས་ཚུད་གཏོང་ཕྱོགས་སོགས་ཁྱོན་གྲོས་གཞི་དྲུག་གི་ཐོག་གོ་བསྡུར་གནང་གི་ཡོད་འདུག
སྐབས་དེར་སམ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་ཀྱིས་ཕེབས་བསུའི་གསུང་བཤད་གནང་ཞིང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་དེང་སྐབས་འཕྲུལ་རིག་ཡར་རྒྱས་འགྲོ་བཞིན་པ་དང་བསྟུན། སློབ་གྲྭ་ཁག་ཏུ་གློག་ཀླད་དང་བརྙན་སྟོན་འཕྲུལ་ཆས་སོགས་ཀྱི་མཐུན་རྐྱེན་མཁོ་སྤྲོད་གནང་སྟེ་འབྱུང་འགྱུར་སློབ་ཁྲིད་གནང་ཕྱོགས་ལའང་དུས་བསྟུན་ལེགས་བཅོས་ཀྱིས། སློབ་མའི་བསམ་བློ་ཡར་རྒྱས་གཏོང་ཐབས་ཀྱི་གོ་སྐབས་དང་སློབ་ཁྲིད་ཐབས་ལམ་བསྟེན་དགོས་པའི་གསུང་བཤད་གནང་ཡོད་འདུག
ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས། ཚོགས་འདུའི་ཐོག་གྲོས་ཆོད་གཏན་འབེབས་བྱུང་བ་རྣམས་ས་གནས་སློབ་གྲྭ་སོ་སོར་ལག་བསྟར་གནང་རྒྱུ་གལ་ཆེ་ཞིང་། སློབ་སྤྱི་དང་དགེ་ཆེ་རྣམས་ཀྱིས་དགེ་ལས་སློབ་ཕྲུག་ཕན་ཚུན་བར་འབྲེལ་ལམ་དམ་གཙང་ཡོང་འབད་བརྩོན་གནང་དགོས་པའི་ལམ་སྟོན་དང་སྦྲགས། འདི་ལོ་ནས་ཤེས་རིག་ལས་ཁུངས་ཀྱིས་བོད་སློབ་ཁག་གི་སློབ་མའིཤེས་ཚད་གནས་བབ་རྟོགས་ཞིབ་གནང་རྒྱུའི་ལས་གཞི་སྤེལ་འཆར་ཡོད་སྟབས། སློབ་གྲྭ་ཁག་གིས་ཤེས་ཡོན་སྲིད་བྱུས་ཀྱི་དགོངས་དོན་བཞིན་སློབ་མའི་ཤེས་ཡོན་ཡར་རྒྱས་ལ་སྨན་པའི་ལས་གཞི་ལས་འཆར་གང་འོས་སྤེལ་དགོས་པ་སོགས་ཀྱི་གསུང་བཤད་གནང་ཡོད་འདུག
