རྒྱ་ནག་གཞུང་གི་གནོན་ཤུགས་འོག་བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས་གོ་ལའི་མཛངས་མའི་འགྲན་སྡུར་ཁྲོད་ནས་ཕྱིར་འབུད་བཏང་འདུག
མཛངས་མ་བསྟན་འཛིན་དཔལ་སྒྲོན་ལགས་ཀྱི་པར་རིས་ཕྱོགས་སྒྲིག
ཕྱི་ལོ་ ༢༠༢༣ ལོའི་གོ་ལའི་མཛངས་མའི་འགྲན་སྡུར་དེ་ཟླ་འདིའི་ཕྱི་ཚེས་ ༢ ནས་ ༡༨ བར་ཉིན་གྲངས་ ༡༧ ཁོམ་བྷོ་ཌི་ཡ་(Cambodia) དང་ཝེ་ཐི་ནམ་ (Vietnam) དུ་བསྡུ་མུས་ཡིན་ལ། མཛངས་མའི་འགྲན་ཚོགས་དེའི་ཁྲོད་བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས་ཀྱང་མཉམ་ཞུགས་གནང་ཡོད་ཀྱང་། རྒྱ་ནག་གཞུང་གི་གནོན་ཤུགས་ཀྱི་འོག ཁོང་མོས་བོད་རྒྱལ་དར་དང་། བོད་གོས་སོགས་གྱོན་མི་ཆོག་པའི་བཀག་རྒྱ་བྱས་པ་དང་ལེན་མ་གནང་བར་བརྟེན། ཁོང་མོ་གོ་ལའི་མཛངས་མའི་འགྲན་སྡུར་ཁྲོད་ནས་ཕྱིར་འབུད་བཏང་འདུག་ལ། ལོ་མང་གོང་ནས་བཟུང་རྒྱ་ནག་གཞུང་གིས་བོད་ཀྱི་མཛངས་མ་རྒྱལ་སྤྱིའི་སྡིངས་ཆའི་ཐོག་ཞུགས་པར་གནོན་ཤུགས་སྤྲད་ཡོད་པ་རེད།
གནད་དོན་དེ་དང་འབྲེལ་ནས་བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས་ཀྱིས་སྒེར་གྱི་ཨིན་སི་ཊི་ར་གྷ་རམ་(Instagram) དུ་སྐར་མ་གཅིག་དང་སྐར་ཆ་ ༢༦ ཅན་གྱི་བརྙན་ཐུང་ཞིག་སྤེལ་བའི་ནང་། ང་རང་ཝེ་ཐི་ནམ་གྱི་ས་མཚམས་སུ་བསླེབས་དུས། གོ་སྒྲིག་ཚོགས་ཆུང་གི་ཚོགས་མི་ཞིག་བརྒྱུད། རྒྱ་ནག་གཞུང་གིས་ངས་བོད་ཀྱི་སྐུ་ཚབ་དང་། བཙན་བྱོལ་ལ་ཇི་ལྟར་ཡོང་སྟངས། བོད་རྒྱལ་ལོ་ཞེས་བཤད་ཡོད་པ་མཐོང་བས། རྒྱ་ནག་གཞུང་གིས་མཛངས་མའི་འགྲན་བསྡུར་གོ་སྒྲིག་ཚོགས་ཆུང་ལ་ཡིག་ངག་གཉིས་ཀའི་ཐོག་ནས་གནོན་ཤུགས་སྤྲད་ཡོད་པ་མ་ཟད། ཁོམ་བྷོ་ཌི་ཡའི་སྲིད་བློན་ལའང་གནོན་ཤུགས་སྤྲད་ཡོད་སྐོར་དང་། བོད་དང་ཐའེ་ཝན་གཉིས་འགྲན་ཚོགས་སུ་ཞུགས་འདོད་ཡོད་ཚེ། རྒྱ་ནག་མི་མང་སྤྱི་མཐུན་རྒྱལ་ཁབ་ཅེས་རྒྱལ་ཁབ་བརྗེ་དགོས་པ་མ་ཟད། བོད་ཅེས་བྲིས་པའི་དཔུང་རྟགས་དེ་ཁུར་མི་ཆོག་ཟེར་བས། ངས་ཁས་ལེན་བྱས་མེད། ཅེས་བརྗོད་འདུག
ཁོང་མོས། ང་རང་ཕྱིར་ཁོམ་བྷོ་ཌི་ཡ་ལ་ལོག་ཀྱང་། ངའི་ཅ་དངོས་ཚང་མ་ཝེ་ཐི་ནམ་ལ་ཡོད་ཙང་། ང་རང་ལ་གྱོན་གོས་སོགས་གང་ཡང་མེད་པར་ཁོམ་བྷོ་ཌི་ཡ་རུ་བདུན་ཕྲག་གཅིག་ཙམ་ལྷག་བྱུང་བས། ང་རང་མགྲོན་ཁང་དུ་ངུས་ནས་བསྡད་ཡིན། ཞེས་དང་། ཕྱིས་སུ་དགོན་པ་ཁག་ཏུ་ཕྱིན་ནས་སེམས་ཁམས་ལྷོད་ལ་ཕབ་ཐབས་བྱས་ཏེ། ལེའུ་གསར་པ་ཞིག་མགོ་བརྩམས་ཐབས་བྱས་པ་ཡིན། ཞེས་བརྗོད་འདུག
དེ་དང་འབྲེལ་ནས་ནེའུ་ཡོག་དང་ནེའུ་འཇར་སི་ས་གནས་བོད་ཀྱི་བུད་མེད་ལྷན་ཚོགས་ཀྱིས་གསལ་བསྒྲགས་ཤིག་སྤེལ་བའི་ནང་། བོད་ཀྱི་མཛངས་མ་བསྟན་འཛིན་དཔལ་སྒྲོན་ལགས་ཡུལ་དེའི་ཕྱི་ཚེས་ ༡༠ ཉིན་གྱི་ཞོགས་པ་ཆུ་ཚོད་བདུན་པའི་ཐོག་ནེའུ་ཡོག་གི་JFK གནམ་ཐང་དུ་འབྱོར་གྱི་ཡོད་པས། ཁོང་མོར་རྒྱབ་སྐྱོར་དང་བསྔགས་བརྗོད་སླད། ས་གནས་མང་ཚོགས་གང་མང་མང་ཞིག་སྣེ་ལེན་དུ་ཡོང་དགོས་པའི་འབོད་སྐུལ་གནང་འདུག
མཛངས་མ་དཔལ་སྒྲོན་ལགས་ཀྱིས་ཆུ་ཚོད་བཅུ་བཞི་ཡི་སྔོན་དུ་སྤེལ་བའི་བརྙན་ཐུང་དེར། ད་བར་མི་གྲངས་འབུམ་གཅིག་དང་ཁྲི་བཞི་དང་བཞི་སྟོང་ལྷག་གིས་བལྟ་ཉན་བྱས་ཡོད་ཅིང་། མི་གྲངས་ ༤༣༣ གྱིས་ཞབས་མཆན་བྲིས་ནས་ཁོང་མོས་བོད་ཀྱི་དཔུང་རྟགས་གྱོན། བོད་ཀྱི་རྒྱལ་དར་འཁུར་ནས་རྒྱལ་སྤྱིའི་སྡིངས་ཆའི་ཐོག་ཕེབས་པ་དེར་ཡི་རང་བསྔགས་བརྗོད་བྱས་དང་བྱེད་བཞིན་འདུག་ལ། ཕྱི་ལོ་ ༢༠༢༣ ལོའི་ (Miss Glam World) མཛངས་མའི་འགྲན་སྡུར་ཁྲོད་ཨང་རིམ་དང་པོ་ཐོབ་མཁན་བོད་ཀྱི་བུ་མོ་བསྟན་འཛིན་འཛོམས་སྐྱིད་ལགས་ཀྱིས། དོན་དངོས་ཐོག་ཁྱེད་རང་གིས་བོད་ཀྱི་སྐོར་བཤད་པ་དེས་ཆོག་པ་རེད། དེས་ང་ཚོའི་ཆོས་རིག་གིས་འཛམ་གླིང་ལ་ཤུགས་རྐྱེན་སྤྲད་ཡོད་པ་མཚོན་ཐུབ། ཅེས་བརྗོད་འདུག
ད་ལྟ་རང་ལོ་ ༢༧ ཡིན་པའི་བསྟན་འཛིན་དཔལ་སྒྲོན་ལགས་སུ་ཕྱི་ལོ་ ༢༠༡༧ ལོའི་བོད་ཀྱི་མཛངས་མའི་འགྲན་བསྡུར་སྐབས་བཅོ་ལྔ་པའི་ཁྲོད་ཨང་དང་པོ་ཐོབ་ཡོད་ཅིང་། ཕྱི་ལོ་ ༢༠༡༨ ལོར་གོ་ལའི་མཛངས་མའི་འགྲན་སྡུར་ཁྲོད་མཉམ་ཞུགས་གནང་ནས་རྒྱལ་སྤྱིའི་བུད་མེད་དྲུག་ཅུ་ལྷག་གི་ཁྲོད་ནས་མཛངས་མ་ཉི་ཤུའི་ཁོངས་སུ་ཚུད་ཡོད་པ་རེད།
གཞན་ཡང་། འདས་གྲོངས་སུ་གྱུར་བའི་བོད་ཀྱི་མཛངས་མ་ཚེ་རིང་ཆུང་བདག་ལགས་ཀྱིས། ཕྱི་ལོ་ ༢༠༠༧ ལོར་མཱ་ལེ་ཞི་ཡ་ནང་ཚོགས་པའི་(Miss Tourism Queen International) ཞེས་པའི་རྒྱལ་སྤྱི་རང་བཞིན་གྱི་མཛངས་མའི་འགྲན་སྡུར་ནང་ཞུགས་ཡོད་ཀྱང་། རྒྱ་གཞུང་གི་གནོན་ཤུགས་འོག་རྒྱ་ནག་བོད་ཀྱི་མཛངས་མ་ཞེས་པའི་མཚན་ཐོག་ནས་མཉམ་ཞུགས་དགོས་སྐོར་བརྗོད་ཡོད་པར་བརྟེན། ཁོང་མོས་རྒྱ་ནག་ཞེས་པའི་མིང་དེ་དང་ལེན་མ་བྱས་པར་ཕྱིར་ལོག་ཡོད་པ་མ་ཟད། གསར་འགོད་གསལ་བསྒྲགས་སྤེལ་ཏེ་རྒྱ་གཞུང་གི་གནོན་ཤུགས་འོག་མཛངས་མ་འགྲན་སྡུར་གོ་སྒྲིག་པས་མོའི་མཚན་གནས་བརྗེ་བསྒྱུར་བྱེད་ཐབས་ལ་སྐྱོན་བརྗོད་བྱས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
