འདི་ལོར་རྒྱ་ནག་གཞུང་གིས་བོད་ནང་དམ་དྲག་སྔར་ལྷག་བྱ་རྒྱུ་ཡིན་པ་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་གྱི་ཟ་དང་ཟུར་ནས་མངོན་ཡོང་གི་འདུག
རྒྱ་ནག་ཞི་ཧྥ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༧ ནས་ ༡༠ བོད་ཀྱི་རྒྱལ་ས་ལྷ་སར་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གཉིས་པ་ཟེར་བ་འཚོགས་ཡོད་ཅིང་། ཚོགས་ཐོག་ཏུ་ཕྱི་ལོ་ ༢༠༢༤ ལོར་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་དངོས་ཤུགས་བརྒྱུད་གསུམ་གྱི་ཐོག་ནས་འགྱུར་བ་མང་པོ་ཞིག་གཏོང་རྒྱུ་ཡིན་ཚུལ་བརྗོད་དེ་བོད་ནང་དམ་དྲག་སྔར་ལྷག་བྱ་རྒྱུ་ཡིན་པ་མངོན་གསལ་བསྒྲགས་འདུག
དེ་འབྲེལ་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ། ཕྱི་ལོ་ ༢༠༢༤ ལོར་རྒྱ་གཞུང་གིས་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བར་སྐུལ་འདེད་ཤུགས་ཆེན་བཏང་སྟེ། བོད་ཀྱི་དགོན་སྡེ་ཁག་དང་ཆོས་ལུགས་ཀྱི་བྱེད་སྒོ་སྤེལ་ཡུལ་ལ་དམ་དྲག་བྱེད་ཤུགས་ཆེ་རུ་གཏོང་རྒྱུའི་མ་ཟད། དམིགས་བསལ་དགོན་སྡེ་དོ་དམ་ལྷན་ཁང་ཟེར་བའི་ནུས་ཤུགས་རྒྱ་བསྐྱེད་དེ་དགོན་ཁག་གི་གྲྭ་བཙུན་ལ་དམ་དྲག་སྔར་ལྷག་བྱ་རྒྱུ་ཡིན་པ་གསལ་འདུག
དེ་བཞིན། འདི་ལོར་བོད་རང་སྐྱོང་ལྗོངས་ཟེར་བའི་ནང་སྤྱི་སྐད་བཀོལ་སྤྱོད་བྱེད་པའི་ནུས་ཤུགས་ཆེ་རུ་བཏང་སྟེ། ཕྱི་ལོ་ ༢༠༢༥ ལོར་རྒྱ་ནག་རྒྱལ་ཡོངས་ཀྱི་རྒྱའི་སྐད་ཡིག་གི་ཁྱབ་ཚད་བརྒྱ་ཆ་ ༨༥ ལོན་པ་དང་ཕྱི་ལོ་ ༢༠༣༥ ལོར་རྒྱའི་སྐད་ཡིག་རྒྱ་ནག་རྒྱལ་ཡོངས་ཀྱི་མི་མང་གི་སྲོག་ཤིང་ལྟ་བུའི་སྐད་ཡིག་ཁོ་ནར་བསྒྱུར་བར་དམིགས་ཡོད་སྟབས། བོད་མི་རིགས་གཙོས་པའི་རྒྱ་ནག་གི་དབང་སྒྱུར་འོག་གནས་པའི་གྲངས་ཉུང་མི་རིགས་ཀྱི་སྐད་ཡིག་རྩ་མེད་བཟོ་ཐབས་བྱེད་ཀྱི་ཡོད་པ་རེད་ལ། ཕྱི་ལོ་ ༢༠༢༡ ལོར་རྒྱ་ནག་གཞུང་གིས་སྤྱི་ཡོངས་ནས་དུས་རབས་གསར་བའི་སྐད་ཡིག་ལས་དོན་གྱི་བསམ་འཆར་ཟེར་བའི་སྲིད་ཇུས་ཤིག་ཡོངས་ཁྱབ་གསལ་བསྒྲགས་བྱས་ཏེ། བོད་དང་ཡུ་གུར་སོགས་གྲངས་ཉུང་མི་རིགས་རྣམས་ཚུད་པའི་རྒྱ་ནག་རྒྱལ་ཡོངས་ཀྱི་སློབ་གྲྭ་ཁག་ཏུ་སྤྱི་སྐད་དེ། རྒྱ་སྐད་རྒྱ་ཡིག་སློབ་འཁྲིད་བྱེད་པའི་སྲིད་ཇུས་ལག་བསྟར་བྱས་ཡོད།
ཡང་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་ཟེར་བའི་སྟེང་། ཕྱི་ལོ་ ༢༠༢༤ ལོར་རྒྱ་གཞུང་གིས་ཨ་སྒོར་ཐེར་འབུམ་ ༡༡ ལྷག་གི་འགྲོ་གྲོན་བཏང་སྟེ། བོད་རང་སྐྱོང་ལྗོངས་ཟེར་བའི་ནང་འཛུགས་སྐྲུན་རྒྱ་སྐྱེད་ཀྱི་ལས་གཞི་མང་དག་ཅིག་སྤེལ་རྒྱུ་ལུགས་བསྒྲགས་ཤིང་། དམིགས་བསལ་འཛུགས་སྐྲུན་གྱི་ལས་གཞི་དེ་དག་མཐའ་མཚམས་ཕྱི་སྲིད་དང་ནང་སྲིད་བདེ་འཇགས་དང་འབྲེལ་བའི་ཁང་པ་ཁྲི་ ༣།༩༥ གསར་རྒྱག་དང་། སྡེ་ཁུལ་རྙིང་གྲས་ ༣༨ ལ་བཟོ་བཅོས། གྲོང་གསེབ་ཁག་ ༡༥ ཡི་བཟོ་བཀོད་བསྒྱུར་སྤོར་བྱ་རྒྱུ། དེ་བཞིན། མེ་འཁོར་ལྕགས་ལམ་དང་གཞུང་ལམ། གནམ་ཐང་གསར་བསྐྲུན་སོགས་ལ་དམིགས་ཡོད་པ་ཉམས་ཞིབ་པས་བརྗོད་འདུག
གནས་ཚུལ་ནང་འཛུགས་སྐྲུན་གྱི་ལས་གཞི་སྤེལ་ཡུལ་བོད་རང་སྐྱོང་ལྗོངས་ཟེར་བའི་ནང་ཡིན་པ་ལས་ས་གནས་དངོས་གང་ཡིན་གྱི་གནས་ཚུལ་གསལ་མི་འདུག་མོད། བོད་རང་སྐྱོང་ལྗོངས་ཟེར་བའི་ནང་གནམ་ཐང་གསར་པ་བཅུ་གསར་རྒྱག་བྱ་རྒྱུ་ཡིན་པ་དང་ལས་གཞི་ཁག་ཅིག་མགོ་བཙུགས་ཟིན་སྐོར་བོད་རང་ལྗོངས་ཟེར་བའི་མགོ་འཁྲིད་ཡན་ཅིན་ཧའེ་ཡིས་བརྗོད་འདུག
དེ་རིང་བོད་ལྗོངས་ཉིན་རེའི་ཚོགས་པར་ཐོག མི་དམངས་འཐུས་མི་ཚོགས་ཆེན་ཟེར་བ་མཇུག་སྒྲིལ་ཏེ། མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་འཛུགས་སྐྲུན་བྱས་ནས་ཐུན་མོང་གི་ཐོག་བསྐྱར་དར་རླབས་པོ་ཆེའི་ཕུགས་འདུན་མངོན་འགྱུར་བྱེད་དགོས། ཞེས་པའི་ཆེད་བརྗོད་ཅིག་སྤེལ་འདུག་ལ། དེའི་ནང་ཞི་ཅིན་ཕིན་སྲོག་ཤིང་ཡིན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་ལེགས་སྐྱེས་འབུལ་དགོས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཟེར་བར་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཀྲུང་གོ་གསར་པ་དབུ་བརྙེས་ནས་ལོ་ ༧༥ དང་མི་དམངས་འཐུས་མི་ཚོགས་ཆེན་གྱི་ལམ་ལུགས་བཙུགས་ནས་ལོ་ ༧༠ འཁོར་བར་དགའ་བསུ་ཡང་ཞུ་དགོས་ལུགས་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
